മലയാളചലച്ചിത്രമേഖലയിലെ തിരക്കഥാകൃത്തും സംവിധായകനും From Wikipedia, the free encyclopedia
മലയാളചലച്ചിത്രമേഖലയിലെ പ്രശസ്തനായ തിരക്കഥാകൃത്തും സംവിധായകനുമായിരുന്നു അമ്പഴത്തിൽ കരുണാകരൻ ലോഹിതദാസ് എന്ന എ.കെ. ലോഹിതദാസ് (മേയ് 10, 1955 - ജൂൺ 28, 2009[1]). ജീവിതഗന്ധിയും തന്മയത്വമുള്ളതുമായ തിരക്കഥകളിലൂടെ ഇദ്ദേഹം രണ്ട് ദശകത്തിലേറെക്കാലം മലയാളചലച്ചിത്രവേദിയെ ധന്യമാക്കി. പത്മരാജനും ഭരതനും എം.ടിയ്ക്കും ശേഷം മലയാളചലച്ചിത്രത്തിൽ ശക്തമായ തിരക്കഥകൾ സംഭാവന ചെയ്ത എഴുത്തുകാരനായാണ് ഇദ്ദേഹത്തെ വിലയിരുത്തുന്നത്.[2] തിരക്കഥാകൃത്ത്, സംവിധായകൻ എന്നിവയ്ക്കുപുറമെ ഗാനരചയിതാവ്, നിർമ്മാതാവ്, നാടകകൃത്ത്, ചെറുകഥാകൃത്ത് എന്നിങ്ങനെ വിവിധ മേഖലകളിൽ ഇദ്ദേഹം പ്രതിഭ തെളിയിച്ചു.
1955 മേയ് 10-ന് തൃശൂർ ജില്ലയിലെ ചാലക്കുടിയ്ക്കടുത്ത് മുരിങ്ങൂരിൽ അമ്പഴത്തുപറമ്പിൽ വീട്ടിൽ കരുണാകരന്റെയും മായിയമ്മയുടെയും മകനായി ജനിച്ചു. എറണാകുളം മഹാരാജാസിൽ നിന്ന് ബിരുദപഠനവും തിരുവനന്തപുരം മെഡിക്കൽ കോളേജിൽ നിന്നു ലാബറട്ടറി ടെക്നീഷ്യൻ കോഴ്സും പൂർത്തിയാക്കി.[3]
ലോഹി എന്ന് അറിയപ്പെട്ടിരുന്ന ലോഹിതദാസ് ചെറുകഥകൾ എഴുതിക്കൊണ്ടാണ് എഴുത്തിന്റെ ലോകത്തേക്ക് പ്രവേശിക്കുന്നത്. എന്നാൽ സാഹിത്യത്തിൽ ശ്രദ്ധേയനാകുവാൻ അദ്ദേഹത്തിനു കഴിഞ്ഞില്ല. തോപ്പിൽ ഭാസിയുടെ നേതൃത്വത്തിലുള്ള കെ.പി.എ.സിക്കു വേണ്ടി 1986-ൽ നാടകരചന നിർവഹിച്ചുകൊണ്ട് അദ്ദേഹം മലയാള നാടകവേദിയിൽ പ്രവേശിച്ചു. തോപ്പിൽ ഭാസിയുടെ ഇടതുപക്ഷ (സി.പി.ഐ) ചായ്വുള്ള ‘കേരള പീപ്പിൾസ് ആർട്സ് ക്ലബ്’ എന്ന നാടകവേദിക്കായി ആയിരുന്നു ആദ്യ നാടകരചന. സിന്ധു ശാന്തമായൊഴുകുന്നു ആയിരുന്നു ആദ്യനാടകം. ഈ നാടകത്തിന് അദ്ദേഹത്തിന് സംസ്ഥാന അവാർഡ് ലഭിച്ചു.[4] പിന്നീട് അവസാനം വന്ന അതിഥി, സ്വപ്നം വിതച്ചവർ തുടങ്ങിയ നാടകങ്ങളും എഴുതി.[5]
നാടകത്തിന്റെ സാമ്പത്തികവിജയവും നിരൂപകശ്രദ്ധയും കൊണ്ട് ശ്രദ്ധേയനായ ലോഹിതദാസിനെ ചലച്ചിത്രലോകത്തേക്ക് നയിച്ചത് തിലകനാണ്[അവലംബം ആവശ്യമാണ്]. 1987 - ൽ സിബി മലയിൽ സംവിധാനം ചെയ്ത ആദ്യ സിനിമയായ തനിയാവർത്തനം എന്ന ചിത്രത്തിന് തിരക്കഥ എഴുതിക്കൊണ്ട് ലോഹിതദാസ് മലയാളസിനിമാരംഗത്ത് പ്രവേശിച്ചു[1]. പാരമ്പര്യമായി ലഭിച്ച ഭ്രാന്തിന്റെ വിഹ്വലതകളിൽ ഉഴലുന്ന ബാലൻമാഷ് എന്ന കഥാപാത്രത്തിന് ജന്മം നല്കിയ ലോഹിയുടെ തിരക്കഥ മലയാളചലച്ചിത്രലോകത്ത് പുതിയൊരനുഭവമായിരുന്നു. ഈ ചിത്രം സാമ്പത്തികവിജയം കൂടി നേടിയതോടെ സിബി മലയിൽ-ലോഹിതദാസ് കൂട്ടുകെട്ടിൽനിന്ന് പിന്നീടും ഒട്ടേറെ പ്രശസ്തമായ മലയാളചലച്ചിത്രങ്ങൾ പിറവികൊണ്ടു.
സിന്ധുവാണ് ഭാര്യ. ഹരികൃഷ്ണൻ, വിജയശങ്കർ എന്നിവർ മക്കളും.
2009 ജൂൺ 28-ന് രാവിലെ 10.50-ന് തികച്ചും അപ്രതീക്ഷിതമായി ഹൃദയാഘാതത്തെത്തുടർന്ന് എറണാകുളത്തെ ലിസി ആശുപത്രിയിൽ വെച്ച് ലോഹിതദാസ് അന്തരിച്ചു[1]. ആലുവയിൽ താമസിയ്ക്കുകയായിരുന്ന അദ്ദേഹം അന്ന് രാവിലെ ഭക്ഷണം കഴിയ്ക്കുന്നതിനിടയിൽ പെട്ടെന്ന് കുഴഞ്ഞുവീഴുകയായിരുന്നു. ഉടനെ ആശുപത്രിയിലെത്തിച്ചെങ്കിലും ജീവൻ രക്ഷിയ്ക്കാനായില്ല. 54 വയസ്സായിരുന്നു അദ്ദേഹത്തിന്. ഏറെക്കാലമായി തിരിച്ചറിയാതിരുന്ന ഹൃദ്രോഗമാണ് ഒടുവിൽ അദ്ദേഹത്തിന്റെ ജീവനെടുത്തത്. മൃതദേഹം അദ്ദേഹത്തിന്റെ അന്ത്യാഭിലാഷമനുസരിച്ച് ലക്കിടിയിലെ 'അമരാവതി' വീട്ടുവളപ്പിൽ സംസ്കരിച്ചു.
ലോഹിതദാസിന്റെ അകാലനിര്യാണം കാരണം അദ്ദേഹത്തിന്റെ രണ്ട് ചലച്ചിത്രങ്ങൾ പൂർത്തിയാകാതെ പോയി. ലോഹിതദാസ് തന്നെ സംവിധാനം ചെയ്യാനുദ്ദേശിച്ചിരുന്ന ചെമ്പട്ട്, വർഷങ്ങൾക്കുശേഷം സിബി മലയിൽ-ലോഹിതദാസ്-മോഹൻലാൽ കൂട്ടുകെട്ടിന് വഴിവെക്കുമായിരുന്ന ഭീഷ്മർ എന്നീ ചലച്ചിത്രങ്ങളാണ് പാതിവഴിയിൽ അവസാനിച്ചത്.[6]
ചലച്ചിത്രരംഗത്ത് വിഭിന്ന ഭാവങ്ങൾ പുലർത്തിയ ലോഹിതദാസ് തിരക്കഥാകൃത്ത്, സംവിധായകൻ എന്നീ നിലകളിലാണ് സ്ഥിരപ്രതിഷ്ഠ നേടിയത്. കൂടാതെ ഗാനരചന, അഭിനയം എന്നീ മേഖലകളിലും അദ്ദേഹം തന്റെ സംഭാവനകൾ നല്കിയിട്ടുണ്ട്.
വർഷം | ചലച്ചിത്രം | അഭിനേതാക്കൾ |
---|---|---|
1997 | ഭൂതക്കണ്ണാടി | മമ്മൂട്ടി, ശ്രീലക്ഷ്മി |
1997 | കാരുണ്യം | ജയറാം, ദിവ്യ ഉണ്ണി, മുരളി |
1998 | ഓർമച്ചെപ്പ് | ലാൽ, ദിലീപ്, ചഞ്ചൽ, ബിജു മേനോൻ |
1998 | കന്മദം | മോഹൻലാൽ, മഞ്ജു വാര്യർ, ലാൽ |
2000 | അരയന്നങ്ങളുടെ വീട് | മമ്മൂട്ടി, ലക്ഷ്മി ഗോപാലസ്വാമി, കവിയൂർ പൊന്നമ്മ |
2000 | ജോക്കർ | ദിലീപ്, മന്യ, നിഷാന്ത് സാഗർ |
2001 | സൂത്രധാരൻ | ദിലീപ്, മീര ജാസ്മിൻ |
2003 | കസ്തൂരിമാൻ | കുഞ്ചാക്കോ ബോബൻ, മീര ജാസ്മിൻ |
2003 | ചക്രം | പൃഥ്വിരാജ്, മീര ജാസ്മിൻ |
2005 | കസ്തൂരിമാൻ (തമിഴ്) | പ്രസന്ന, മീര ജാസ്മിൻ |
2006 | ചക്കരമുത്ത് | ദിലീപ്, കാവ്യാ മാധവൻ |
2007 | നിവേദ്യം | വിനു മോഹൻ, ഭാമ, നെടുമുടി വേണു |
വർഷം | ചലച്ചിത്രം | കഥാപാത്രം |
---|---|---|
2008 | ഷേക്സ്പിയർ എം.എ. മലയാളം | ലോഹിതദാസ് |
2005 | ഉദയനാണ് താരം | ചലച്ചിത്രസംവിധായകൻ പ്രതാപൻ |
2005 | ദി ക്യാമ്പസ് | ലോഹിതദാസ് |
2002 | സ്റ്റോപ്പ് വയലൻസ് | ലോഹിതദാസ് |
1999 | വീണ്ടും ചില വീട്ടുകാര്യങ്ങൾ | ചലച്ചിത്രസംവിധായകൻ |
1992 | ആധാരം | ചീട്ടുകളിക്കാരൻ |
1994 | ചകോരം (ചലച്ചിത്രം) | കൈനോട്ടക്കാരൻ |
1994 | കാറ്റ് വന്നു വിളിച്ചപ്പോൾ (ചലച്ചിത്രം ) | ലോഹിതദാസ് |
1992 | വളയം | സോമൻ |
വർഷം | ചലച്ചിത്രം | സംവിധായകൻ | അഭിനേതാക്കൾ |
---|---|---|---|
2003 | കസ്തൂരിമാൻ | ലോഹിതദാസ് | കുഞ്ചാക്കോ ബോബൻ, മീര ജാസ്മിൻ |
വർഷം | ചലച്ചിത്രം | ഗാനം[8] | സംഗീതം | ഗായകർ |
---|---|---|---|---|
2007 | നിവേദ്യം | കോലക്കുഴൽ വിളി കേട്ടോ... | എം. ജയചന്ദ്രൻ | വിജയ് യേശുദാസ്, ശ്വേത |
2003 | കസ്തൂരിമാൻ | രാക്കുയിൽ പാടി... | ഔസേപ്പച്ചൻ | യേശുദാസ് |
2000 | ജോക്കർ | ചെമ്മാനം പൂത്തേ.. | മോഹൻ സിത്താര | യേശുദാസ് |
2000 | ജോക്കർ | അഴകേ നീ പാടും... | മോഹൻ സിത്താര | യേശുദാസ് |
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.