മോനിഷ

മോനിഷ ഉണ്ണി ആദ്യസിനിമയിൽ തന്നെ തന്റെ പ്രതിഭ തെളിയിച്ച പ്രശസ്ത മലയാളചലച്ചിത്ര താരമായിരുന്നു. മലയാളത്തിനു പുറമേ തമിഴിലും കന്നടയിലും അഭിനയിച്ചിട്ടുണ്ട്. 1986-ൽ തന്റെ ആദ്യ ചലച്ചിത്രമായ നഖക്ഷതങ്ങളിലെ അഭിനയത്തിനു മികച്ച നടിക്കുള്ള ദേശീയ അവാർഡ് നേടുമ്പോൾ 15 വയസ്സ് മാത്രമേ ഉണ്ടായിരുന്നുള്ളൂ^[2]. ഏറ്റവും കുറഞ്ഞ പ്രായത്തിൽ ഈ ബഹുമതി നേടിയത് മോനിഷയാണ്. 21 വയസ്സുള്ള സമയത്ത്, അഭിനയരംഗത്ത് സജീവമായി നിൽക്കുമ്പോൾ ഒരു കാറപകടത്തിൽ മരണപ്പെട്ടു.

മോനിഷ ഉണ്ണി
ജനനം	(1971-01-24)24 ജനുവരി 1971[1] പന്നിയങ്കര, കോഴിക്കോട് ജില്ലt, Kerala,  ഇന്ത്യ
മരണം	5 ഡിസംബർ 1992(1992-12-05) (പ്രായം 21) എക്സ് റേ ജങ്ഷൺ, ദേശിയപാത 66 ചേർത്തല, ആലപ്പുഴ
മരണകാരണം	കാറപകടം
ദേശീയത	ഭാരതീയൻ
തൊഴിൽ(s)	സിനിമാനടി, നർത്തകി
സജീവ കാലം	1986–1992
അറിയപ്പെടുന്നത്	നഖക്ഷതങ്ങൾ പെരുന്തച്ചൻ കമലദളം അധിപൻ ഉന്ന നിനച്ചേൻ പാട്ടുപഠിച്ചേൻ

ജീവിതരേഖ

1971-ൽ കേരളത്തിലെ കോഴിക്കോട്ട് പി. നാരായണനുണ്ണിയുടെയും,ശ്രീദേവിയുടെയും മകളായി ജനിച്ചു. സഹോദരൻ സജിത്. അച്ഛൻ ഉണ്ണിക്ക് ബാംഗ്ലൂരിൽ തുകൽ വ്യവസായം ആയിരുന്നതിനാൽ അവിടെയായിരുന്നു മോനിഷയുടെ ബാല്യം. നർത്തകി കൂടിയായിരുന്ന അമ്മ ശ്രീദേവിയിൽ നിന്നായിരുന്നു നൃത്തത്തിന്റെ ആദ്യപാഠങ്ങൾ പഠിച്ചത്. 9 വയസ്സുള്ളപ്പോൾ നൃത്തത്തിൽ അരങ്ങേറ്റം കുറിച്ചു.1985-ൽ കർണ്ണാടക ഗവൺമെന്റ് ഭരതനാട്യ നർത്തകർക്കായി നൽകുന്ന കൗശിക അവാർഡ് ലഭിച്ചു. ബാംഗ്ലൂരിലെ സെന്റ് ചാൾസ് ഹൈസ്കൂളിൽ നിന്നും,ബിഷപ്പ് കോട്ടൺ ഗേൾസ് ഹൈസ്കൂളിൽ നിന്നുമായി പ്രാഥമിക വിദ്യാഭ്യാസവും മൗണ്ട്‌ കാർമൽ കോളേജിൽ നിന്നു സൈക്കോളജിയിൽ ബിരുദവും ലഭിച്ചു..^[3]

അഭിനേത്രി

പ്രശസ്ത സാഹിത്യകാരനും,തിരക്കഥാകൃത്തും,ചലച്ചിത്രസംവിധായകനുമായ എം.ടി. വാസുദേവൻ നായർ മോനിഷയുടെ കുടുംബസുഹൃത്തായിരുന്നു.അദ്ദേഹമാണ് മോനിഷയുടെ സിനിമാരംഗത്തേക്കുള്ള പ്രവേശനത്തിന്‌ കാരണമായത്. എം.ടി. കഥയും, ഹരിഹരൻ സംവിധാനവും നിർവഹിച്ച 'നഖക്ഷതങ്ങൾ' (1986) ആണ് ആദ്യചിത്രം. കൗമാരപ്രായത്തിലുള്ള ഒരു ത്രികോണ പ്രണയകഥയാണ് ഈ ചിത്രത്തിലേത്‌. മറ്റൊരു പുതുമുഖമായിരുന്ന വിനീത്‌ ആയിരുന്നു ഈ ചിത്രത്തിൽ മോനിഷയുടെ നായകൻ. ഈ ചിത്രത്തിൽ മോനിഷ അഭിനയിച്ച 'ഗൗരി' എന്ന ഗ്രാമീണ പെൺകുട്ടിക്കു 1987-ലെ മികച്ച നടിക്കുള്ള ദേശീയ അവാർഡ്‌ ലഭിച്ചു.^[4] മലയാളത്തിനു പുറമേ പൂക്കൾ വിടും ഇതൾ (നഖക്ഷതങ്ങളുടെ റീമേക്ക്‌), ദ്രാവിഡൻ തുടങ്ങിയ തമിഴ്‌ ചലച്ചിത്രങ്ങളിലും, രാഘവേന്ദ്ര രാജ്കുമാർ നായകനായി അഭിനയിച്ച ചിരംജീവി സുധാകർ (1988) എന്ന കന്നട ചിത്രത്തിലും അഭിനയിച്ചിട്ടുണ്ട്.

ഇതിനു പുറമേ, 'സാമഗാനം' എന്ന സീരിയലിലും (ദൂരദർശൻ - മലയാളം) അഭിനയിച്ചിട്ടുണ്ട്.

മരണം

1992 ഡിസംബർ 5-ന് 'ചെപ്പടിവിദ്യ' എന്ന ചിത്രത്തിന്റെ ചിത്രീകരണം നടക്കുന്നതിനിടയിൽ മോനിഷയും, അമ്മയും സഞ്ചരിക്കുകയായിരുന്ന കാർ ആലപ്പുഴക്കടുത്തുള്ള ചേർത്തലയിൽ വെച്ച് ചേർത്തലയിൽ നിന്നും മുഹമ്മക്ക്കൂ പോകുകയായിരുന്ന KSRTC ബസും ആയി കൂട്ടിയിടിക്കുകയും, തലച്ചോറിനുണ്ടായ പരിക്കു മൂലം മോനിഷ സംഭവസ്ഥലത്തുവച്ചുതന്നെ മരണപ്പെടുകയും ചെയ്തു. അമ്മ നിസ്സാര പരുക്കുകളോടെ രക്ഷപ്പെട്ടു. മൃതദേഹം ബാംഗ്ലൂരിലേക്ക് കൊണ്ടുപോയി അവിടെവച്ച് സംസ്കരിച്ചു.

അഭിനയിച്ച സിനിമകൾ

വർഷം	സിനിമ	കഥാപാത്രം	ഭാഷ	വിവരണം
1984	പാവയ്യ		തമിഴ്	കെ ഐ രാജനാരായണന്റെ ' വിളൈവ് ' എന്ന ചെറുകഥയെ ആസ്പദമാക്കി യു എസ് വാസൻ സംവിധാനം ചെയ്ത 16 mm B / W ഷോർട്ട് ഫിലിം
1986	നഖക്ഷതങ്ങൾ	ഗൗരി	മലയാളം	ആദ്യചിത്രം. രചന:എം ടി  സംവിധാനം:ഹരിഹരൻ. മികച്ച നടിയ്ക്കുള്ള ദേശീയ അവാർഡ്. ദേശീയ അവാർഡ് (ഉർവശി അവാർഡ്) നേടുന്ന ഏറ്റവും പ്രായം കുറഞ്ഞ നടി - ഇന്നുമത് തകർക്കപ്പെട്ടിട്ടില്ല.
1986	ഋതുഭേദം	തങ്കമണി	മലയാളം	രചന:എം ടി സംവിധാനം:പ്രതാപ് പോത്തൻ
1986	സായംസന്ധ്യ	വിനുമോൾ	മലയാളം	രചന:ഡെന്നിസ് ജോസഫ് സംവിധാനം:ജോഷി
1987	പൂക്കൾ വിടും തൂത്	ഗൗരി	തമിഴ്	ആദ്യ തമിഴ്ചിത്രം. നഖക്ഷതങ്ങൾ - ന്റെ തമിഴ് റീമേക്ക്. സംവിധാനം: ശ്രീധർ രാജൻ.
1987	ലോയർ ഭാരതി ദേവി	ലീല	തെലുങ്ക്	ആദ്യ തെലുങ്ക് ചിത്രം. സംവിധാനം: ജി റാം മോഹൻ റാവു.
1988	ആര്യൻ	സൈനബ	മലയാളം	രചന:ടി ദാമോദരൻ സംവിധാനം:പ്രിയദർശൻ
1988	ചിരംജീവി സുധാകർ	സന്ധ്യ, സരള (ഇരട്ട വേഷം)	കന്നഡ	ആദ്യ കന്നഡ ചിത്രം. സംവിധാനം:സിൻഗീതം ശ്രീനിവാസ റാവു
1988	കനകാംബരങ്ങൾ	ശ്രീദേവി	മലയാളം	രചന:പുഷപരാജൻ സംവിധാനം:എൻ ശങ്കരൻ നായർ
1989	ദ്രാവിഡൻ	സൽ‍മ	തമിഴ്	ആര്യൻ - ന്റെ തമിഴ് റീമേക്ക്. സംവിധാനം:ആർ കൃഷ്ണമൂർത്തി
1989	അധിപൻ	ഗീത	മലയാളം	രചന:ജഗദീഷ് സംവിധാനം:കെ മധു
1990	കുറുപ്പിന്റെ കണക്കുപുസ്തകം	സതി	മലയാളം	രചന, സംവിധാനം:ബാലചന്ദ്രമേനോൻ
1990	വീണ മീട്ടിയ വിലങ്ങുകൾ	ശ്രീദേവി	മലയാളം	രചന, സംവിധാനം: കൊച്ചിൻ ഹനീഫ
1990	പെരുന്തച്ചൻ	കുഞ്ഞിക്കാവ് തമ്പുരാട്ടി	മലയാളം	രചന:എം ടി സംവിധാനം:അജയൻ(മികച്ച നവാഗത സംവിധായകനുള്ള ദേശീയ അവാർഡ്)
1990	കാഴ്ചയ്ക്കപ്പുറം	അമ്മു	മലയാളം	രചന:ജി ഹിരൺ സംവിധാനം:വി ആർ ഗോപാലകൃഷ്ണൻ
1991	വേനൽക്കിനാവുകൾ	നളിനി	മലയാളം	രചന:എം ടി സംവിധാനം:കെ എസ് സേതുമാധവൻ
1991	കടവ്	ദേവി	മലയാളം	രചന, സംവിധാനം:എം ടി
1992	ഉന്ന നെനച്ചേൻ പാട്ടു പഠിച്ചേൻ	ധനം	തമിഴ്	രചന,സംവിധാനം:ഗുരു ധനപാൽ
1992	തലസ്ഥാനം	രാധ	മലയാളം	രചന:രൺജി പണിക്കർ സംവിധാനം:ഷാജി കൈലാസ്
1992	ഒരു കൊച്ചു ഭൂമികുലുക്കം	വിജി	മലയാളം	സംവിധാനം: ചന്ദ്രശേഖരൻ
1992	കുടുംബസമേതം	തുളസി	മലയാളം	സംവിധാനം: ജയരാജ്
1992	കമലദളം	മാളവിക നങ്ങ്യാർ	മലയാളം	രചന:എ കെ ലോഹിതദാസ് സംവിധാനം:സിബി മലയിൽ
1992	ചമ്പക്കുളം തച്ചൻ	അമ്മു	മലയാളം	രചന:ശ്രീനിവാസൻ സംവിധാനം:കമൽ
1992	ചെപ്പടിവിദ്യ	എൽസ	മലയാളം	അവസാനം അഭിനയിച്ച സിനിമ. സംവിധാനം: ജി എസ് വിജയൻ
1993	മൂൺട്രാവതു കൺ	പ്രിയ	തമിഴ്	അവസാനം പുറത്തിറങ്ങിയ സിനിമ. രചന, സംവിധാനം: മണിവണ്ണൻ

0

അവലംബം

1. "Monisha Biography". entertainment.oneindia.in. Archived from the original on 5 December 2013. Retrieved 24 Jan 2013.
2. നഖക്ഷതങ്ങളിലെ അഭിനയത്തിന് ദേശീയ അവാർഡ്- ഐ.എം.ഡി.ബി പേജ്
3. "മോനിഷയുടെ വെബ് ലോകം പേജ്". Archived from the original on 2007-04-02. Retrieved 2007-09-18.
4. "ആർക്കൈവ് പകർപ്പ്". Archived from the original on 2007-04-02. Retrieved 2007-09-18.

പുറത്തു നിന്നുള്ള കണ്ണികൾ

• ഐ.എം.ഡി.ബി പ്രൊഫൈൽ