Papuxas

Sylvia é un xénero de aves da orde dos paseriformes, subordo dos páseros, infraorde dos paséridos, e superfamilia dos silvioideos, que é o tipo da familia dos sílvidos ou silvíidos (Sylviidae).

Papuxas Xénero Sylvia
Varias especies do xénero Sylvia.
Clasificación científica
Reino: Animalia Filo: Chordata Clase: Aves Orde: Passeriformes Suborde: Passeri Infraorde: Passerida Superfamilia: Sylvioidea Familia: Sylviidae Xénero: Sylvia Scopoli, 1769
Especies
Véxase o texto
Sinonimia
Parisoma Swainson in Richardson, 1832

O xénero comprende 29 especies de pequenos paxaros coñecidos popularmente como papuxas ou papudas,^[1] propias de Europa, o sur e o sueste de Asia, África e Arabia.

Características

Son aves de pequeno tamaño, plumaxe discreta, pouco rechamante, canto melodioso e prolongado, moi activas, que se moven constantemente en busca de insectos, dos que se alimentan.

Habitan zonas de bosques frondosos e claros, campos agrícolas e áreas urbanas.

A maioría das especies presentan dimorfismo sexual e os machos distínguense, habitualmente, por presentaren manchas, riscos ou coroas na cabeza.

As especies que aniñan en climas temperados son migratorias, desprazánsose a rexiones cálidas en inverno.

Taxonomía

Descrición

O xénero foi descrito en 1769 polo médico, entomólogo e naturalista austríaco, de cultura italiana, Giovanni Antonio Scopoli.

Etimoloxía

O nome Sylvia é un neoloxismo do latín científico usado a miúdo para designar especies de paxaros similares a Sylvia atricapilla,^[2] que é un nome propio feminino que significa literalmente "que vive nos bosques", derivado do latín silva, -ae, "selva", "bosque".^[3]

Clasificación

Segundo o ITIS, o xénero conta coas 29 especies seguintes:^[4]

• Sylvia althaea Hume, 1878
• Sylvia atricapilla (Linnaeus, 1758)
• Sylvia balearica Von Jordans, 1913
• Sylvia boehmi (Reichenow, 1882)
• Sylvia borin (Boddaert, 1783)
• Sylvia buryi (Ogilvie-Grant, 1913)
• Sylvia cantillans (Pallas, 1764)
• Sylvia communis Latham, 1787
• Sylvia conspicillata Temminck, 1820
• Sylvia crassirostris Cretzschmar, 1830
• Sylvia curruca (Linnaeus, 1758)
• Sylvia deserti (Loche, 1858)
• Sylvia deserticola Tristram, 1859
• Sylvia hortensis (Gmelin, 1789)
• Sylvia layardi (Hartlaub, 1862)
• Sylvia leucomelaena (Hemprich & Ehrenberg, 1833)
• Sylvia lugens Rüppell, 1840
• Sylvia melanocephala (Gmelin, 1789)
• Sylvia melanothorax Tristram, 1872
• Sylvia minula Hume, 1873
• Sylvia moltonii Orlando, 1937
• Sylvia mystacea Ménétriés, 1832
• Sylvia nana (Hemprich & Ehrenberg, 1833)
• Sylvia nisoria (Bechstein, 1792)
• Sylvia ruppelli Temminck, 1823
• Sylvia sarda Temminck, 1820
• Sylvia subalpina Temminck, 1820
• Sylvia subcaerulea Vieillot, 1817
• Sylvia undata (Boddaert, 1783)

Nas clasificacións máis modernas, moitas das especies de Sylvia foron pasadas ao xénero Curruca. Ademais, nalgunhas especies as subespecies foron clasificadas como especies separadas.

En Galicia

En Galicia existen 6 especies de papuxas; delas, 3 pódense atopar en Galicia durante todo o ano, e 3 son estivais.^[5]

Sylvia

Especie Autoridade, ano	Nome vulgar	EC	Distribución	Imaxe	Poboación
Sylvia undata (Boddaert, 1783)	Papuxa do mato	LC			aprox. 138.000 pp.[6]
Sylvia cantillans (Pallas, 1764)	Papuxa balcánica	LC
Sylvia melanocephala (Gmelin, 1789)	Papuxa de cabeza negra	VU
Sylvia communis Latham, 1787	Papuxa común	LC			aprox. 236.000 pp.[6]
Sylvia borin (Boddaert, 1783)	Papuxa das figueiras	VU
Sylvia atricapilla (Linnaeus, 1758)	Papuxa das amoras	LC			aprox. 563.800 pp.[6]