Papuxa común

A papuxa común (Curruca communis, antes Sylvia communis) é unha especie de ave paseriforme do xénero sylvia dentro da familia Sylviidae.

Papuxa común
Sylvia communis
Estado de conservación
Pouco preocupante
Clasificación científica
Reino: Animalia Filo: Chordata Clase: Aves Orde: Passeriformes Familia: Sylviidae Xénero: Curruca Especie: C. communis
Nome binomial
Curruca communis Latham, 1787
Sinonimia
Sylvia communis Latham, 1787 Sylvia cinerea Bechstein 1803[1]

Cuculus canorus canorus + Sylvia communis

Descrición

......... meu rumoroso val dos pitorreises das calandrias, das pegas, das papuxas, polo serán enriba nun solpor de lonxanos horizontes. —Celso Emilio Ferreiro[2]

A papuxa común presenta unha lonxitude de 14 cm, envergadura de 22 cm, e iris marrón claro de 3'5 mm Ø. A plumaxe pasa desapercibida, o macho posúe a cabeza nun ton gris cincento até debaixo do ollo, coas partes superiores en pardo avermellado, con algunhas plumas das ás en cor marrón claro, a gorxa é branca, as restantes partes inferiores agrisadas e o peito esbrancuxado, lixeiramente irisado dun ton marrón claro. Nesta especie a femia é moi semellante, só que ten a cabeza pardusca e o peito algo máis avermellado.

Hábitat

Desenvólvese en terreos abertos con matos baixos, é dicir, en espazos abertos cubertos de matogueira, xa que se move polas vides, sebes de matogueira, silveiras, buxos, enebros, sabinas e queirugas entre outros, onde pode agocharse mentres segue o curso da súa vida. Localizado en lindeiros con matogueiras, en campos de cultivo, pradarías e bosquetes. Evita vivir preto de espazos habitados, e normalmente recean da actividade urbana, aínda que en ocasións pode observarse nas proximidades de pobos.

Dieta

Son aves principalmente insectívoras, baseando a súa dieta en chinches, eirugas, bolboretas, formigas, abellas, mosquitos e moscas, entre outros, que caza sen descanso. Porén tamén pode inxerir, sobre todo no verán, cereais, e os froitos das matogueiras onde se agochan.

Distribución

• Mundial:

A papuxa común posúe unha área de cría ampla pois atopándose en case toda Europa, agás o norte e as montañas escandinavas. Distribúese tamén por Asia occidental até o río Enisei, con algúns núcleos en Berbería, Israel, montañas de Irán e Turquestán. Invernante en África tropical, onde se localiza ao longo do mes de setembro e primeira quincena de outubro.

• España:

Paxaro estival en toda España. Nidificante presente en todas as Comunidades Autónomas peninsulares, cunha maior e máis continua distribución no terzo norte peninsular.

Notas

1. Mayr, Ernst; Cottrell, G. William, eds. (1986). Check-List of Birds of the World 11. Cambridge, Massachusetts: Museum of Comparative Zoology. pp. 273–274.
2. Penas Patiño, Xosé M.; Pedreira López, Carlos (1980). Guía das aves de Galicia. Ficha do carrizo. Ilustrado por Calros Silvar. Vigo: Editorial Galaxia. p. 47. ISBN 84-7154-379-6.

Véxase tamén

Wikimedia Commons ten máis contidos multimedia na categoría:  Papuxa común

Wikispecies posúe unha páxina sobre:  Papuxa común

Ligazóns externas

• Ficha da especie (PDF), por Javier Blasco-Zumeta (en castelán)