Papuxa anana

A papuxa anana^[2] (Curruca nana) é unha papuxa típica da familia Sylviidae que se reproduce nos desertos de Asia central e occidental e no extremo leste de Europa (do leste do delta do Volga ata o oeste de Mongolia Interior na China), e migra a hábitats similares no suroeste de Asia (Península Arábiga ata o noroeste da India) e o extremo noroeste de África (costas do mar Vermello) en inverno. Ata recentemente era considerada da mesma especie que a papuxa do deserto de África,^[3] pero agora están en especies separadas.^[4][5] Ambas especies son parentes próximos e as súas relacións con outros sílvidos típicos non están claras. Poden estar bastante próximos á papuxa común; e, en concreto, as femias da papuxa común teñen unha aparencia moi similar á dunha papuxa anana máis ricamente coloreada. Parece ser que os tres taxons son membros bastante basais do seu xénero.^[6][7]

Papuxa anana
Estado de conservación
Pouco preocupante[1]
Clasificación científica
Reino: Animalia Filo: Chordata Clase: Aves Orde: Passeriformes Familia: Sylviidae Xénero: Curruca Especie: Curruca nana Hemprich & Ehrenberg, 1833
Sinonimia
Sylvia nana theresae

Papuxa anana en Kutch

É un paxaro pequeno (a segunda papuxa do seu xénero máis pequena despois da papuxa do deserto), de 11,5–12,5 cm de longo. Os sexos son de cores case idénticas, de dorso marrón gris con ás e cola máis marróns, e partes ventrais abrancazadas; o bico e patas son amareladas, e o ollo ten o iris amarelo. Igual que os seus parentes, son insectívoros, pero tamén comen pequenas bagas, e a diferenza da maioría dos sílvidos, adoita alimentarse no chan. A canción cántaa en voo cunha mestura de notas claras e ásperas. Reprodúcese en hábitats esteparios secos semidesérticos que teñan polo menos algúns arbustos para nidificar neles. Fan os niños nun arbusto baixo e poñen de 4 a 6 ovos.^[3][5]

Ten aparecido como vagante raro tan ao oeste como Gran Bretaña.^[8]

O nome específico nana vén do latín e significa 'anano', á súa vez do grego antigo nanos.^[9]