From Wikipedia, the free encyclopedia
鴉片（粵拼：aa1 pin3；英文：Opium），舊時叫做洋藥，俗稱大煙、阿芙蓉（拉丁化阿拉伯文：Afyūm）、大香煙，清朝時普遍會叫做福壽膏，係天然麻醉抑制劑；醫學上可以用嚟做麻醉性嘅鎮痛藥，如果唔係用嚟做科學研究或者唔係醫藥用嘅話，就屬於毒品。
以毒品嚟講，傳統用鴉片嚟吸毒嘅工具有煙簽、煙燈、煙槍等，一般將生鴉片加工變成熟鴉片，然後搓到細細粒丸咁或者細細條，喺火上面燢到佢變軟之後，就塞入煙槍嘅煙鍋入面，跟住將個煙鍋倒轉擺喺火苗上面燒，經過條煙管就可以吸食燃燒產生嘅鴉片煙；吸毒嘅人之中，煙癮唔大嘅每日大概吸食10～20次，大煙癮嘅可以多到一日吸成百次；而家嘅吸毒者通常直接就咁吞食嗰啲含有鴉片嘅丸仔，或者將鴉片溶喺水裏面直接用針進行靜脈注射；有時一大班人一齊以靜脈注射形式服用鴉片，但係又會共用嗰一兩支針筒，咁就成為咗愛滋病（A.I.D.S.）傳播嘅主要途徑之一。喺中國大陸如果發現有人販賣鴉片，而身上搜出嘅鴉片重量超過一千克（kg）即可判處死刑。
鴉片其實係喺罌粟未熟嘅果實皮度提煉出嚟；罌粟係屬於一年生嘅草本植物，啲人會趁佢嘅果實未熟，
果皮上面割開小小切口，等啲帶白色嘅乳汁流出嚟，然後將呢啲液汁乾燥凝固再用嚟提煉；呢啲凝固物裏面含有多種鴉片生物鹼，而所提煉出嚟嘅鴉片會分為生鴉片同埋熟鴉片。
生鴉片係深啡色，有啲品種就會近黑色；形狀多數整成圓餅形，或者一磚磚咁；一般嘅表面會係乾燥同埋脆硬，但係裏面就保持住柔軟同埋粘性，氣味亦好刺激性好難聞—係好似放咗好耐嘅尿咁嘅苦味。生鴉片除咗有15%至30%嘅礦物質、樹脂同埋水份之外，重含有10%至20%嘅特殊生物鹼。
生鴉片經過燒煮同埋發酵嘅加工處理之後，就會成為吸毒者用嘅熟鴉片。整好嘅熟鴉片多數係條形或者一塊咁，然後用薄嘅布或者塑膠紙嚟包裝；熟鴉片嘅表面光滑柔軟，帶少少油膩，色澤會係淺啡或者金黃色，而佢所發出嚟嘅強烈味道，對啲吸毒者嚟講會係一啲香甜嘅味道。
中國清朝嘅時代，大量鴉片嘅流入，嚴重咁荼毒中國嘅人民，朝廷意識到鴉片係一樣禍國殃民嘅嘢，佢令到人民精神不振，體力衰退，所以當時有兩位大臣分別向清政府提出禁鴉片，許乃濟提倡「馳禁」，而林則徐就提出咗「嚴禁」，最後林則徐嘅意見被朝廷採用；之後林則徐喺虎門銷煙，令到當時被認為係最大嘅鴉片入口商－－英國商人損失慘重，兼成為第一次鴉片戰爭嘅導火線。
抗戰後期，中共喺陝甘寧邊區整咗好多鴉片來賣畀國統區嘅賣家或者國軍士兵，支撐財政——特別係要來買醫療物資。毛澤東同呢啲政策有直接關係。渠哋尤其是喺陝北南泥灣（之前叫爛泥窪/濫泥洼）大肆開墾荒山野嶺，靠種罌粟來支援革命，所以啲產品又叫革命鴉片。共產黨靠渠來反制國民黨嘅經濟封鎖，到內戰打完至唔再做呢種生意。因為噉嘅「秘密武器」講起來並唔馨香，所以呢段歷史向來諱莫如深[1]。
舊時响香港最流行嘅鴉片類毒品有三種——膏狀嘅（上面有詳細講）、粒形嘅（紅丸），同埋粉狀嘅（白粉）——喺九龍寨城光明街（俗稱電台街；靠吸毒恢復精神叫「充電」）各有專賣檔口，分別叫煙館、紅丸檔同埋白粉檔[2]。呢三種由罌粟煉出來嘅嘢之中，鴉片藥力最弱，紅丸排中間，白粉嘅最勁。紅丸嘅成分有海洛英、嗎啡、砒霜……係種粉紅色黄豆形毒品[3]。
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
