中國國民黨係由孫文創立嘅政黨。佢嘅前身依次序係興中會、中國同盟會、國民黨同埋中華革命黨,孫文喺1919年將中華革命黨改組為中國國民黨。中國國民黨喺傳統上將由興中會至中國國民黨嘅發展歷程視為一脈相承,故此會以興中會成立嘅1894年為中國國民黨嘅創黨年。中國國民黨1928年以國民革命軍北伐,建立全國統一嘅政權,統治大陸至1949年。1949年,中國國民黨領導嘅中華民國政府喺中國大陸撤守,12月11日,中國國民黨中央黨部由大陸搬去台北。
![](http://upload.wikimedia.org/wikipedia/commons/thumb/6/66/Naval_Jack_of_the_Republic_of_China.svg/640px-Naval_Jack_of_the_Republic_of_China.svg.png)
中國國民黨而家嘅主席係朱立倫,暫時冇副主席,秘書長係黃健庭。
清光緒二十年(1894年),正值中日甲午戰爭,孫中山先生赴檀香山號召華僑親友,創立「興中會」革命救國組織。
光緒三十年(1905年),興中會聯合華興會、光復會等幾個重要革命團體,喺日本東京組成中國同盟會。
民國元年(1912年)八月,同盟會又聯合統一共和黨、國民共進會、國民公黨、共和實進會等組織喺北京組成國民黨;國民黨以孫中山為理事長,實際黨務則由宋教仁代理。1913年,國民黨喺國會選舉中贏得多數席位,引起袁世凱嘅猜忌。冇幾耐宋教仁喺上海被暗殺,唔少歷史學家都認為袁世凱係幕後主謀。及後國民黨籍嘅都督李烈鈞、柏文蔚等發動二次革命討袁,但以失敗告終,國民黨亦被袁世凱下令解散。
民國三年(1914年)七月,孫中山喺東京另組中華革命黨;1919年,中華革命黨改組為中國國民黨,至十三年(1924年)一月舉行第一次全國代表大會,正式改組完成,進入中國國民黨階段。至今一共舉行過十八屆全國代表大會,中國國民黨亦由革命黨,革命民主政黨,演進為現代化嘅民主政黨。
1949年,國民黨喺中國內戰中輸畀中國共產黨,隨同國民政府到咗台灣。同年12月11日,國民黨中央黨部由中國大陸搬去台北,部份留喺中國大陸嘅黨員繼續中國國民黨嘅運作,改稱中國國民黨革命委員會,並成為中國大陸嘅民主黨派之一。
中國國民黨自立黨以來,為因應時勢變化,孫中山,蔣介石皆曾經多次實行黨嘅改造。但喺2000年中華民國總統大選失利後成爲在野黨。2000年以前,中國國民黨一直係中華民國唯一嘅執政黨,佢曾經伴隨中華民國歷經革命開國、討袁護法、北伐統一、訓政建設、抗戰建國、汪精衛媚日、西安事變、制憲行憲等等。
中國國民黨追求嘅目標始終一貫,嗰個就係要將台灣省建設成為三民主義嘅模範省,並令到中華民國成為三民主義嘅理想國家。喺兩岸問題上,中國國民黨認爲「九二共識」中「一中各表」係目前兩岸和平嘅最佳方針,亦都係兩岸尋求進一步關係前嘅最高指導原則。
前中國國民黨主席李登輝係「台灣泛綠」嘅精神象徵,並任較為激進嘅「泛綠」黨派台灣團結聯盟嘅「精神領袖」,佢認為兩岸關係屬於「一邊一國」。
2005年中國國民黨青年團喺台北成立,林益世當選青年團首任總團長並兼任國民黨副主席。
國民黨成立以來,發生幾次分裂:
- 孫文死咗之後,各派點樣對待共產黨有嚴重分歧。1925年11月23號,鄒魯、謝持、林森、張繼等12名反對容共嘅國民黨右派中央執行委員同監察委員,喺西山碧雲寺召開「國民黨一屆四中全會」,史稱西山會議。會後,佢哋喺上海另立中央,形成西山會議派。(詳見西山會議派)
- 1938年,汪精衛以國民黨中央副總裁身份,帶住周佛海等一幫國民黨親日派大員,逃到越南河內,第二年佢喺上海秘密召開偽國民黨第六次代表大會。
- 1949年底中國國民黨再次分裂,搬去台灣嘅仍然名為中國國民黨,留喺大陸嘅左派人士建立中國國民黨革命委員會(簡稱「民革」),並成為中國大陸接受中國共產黨領導嘅「民主黨派」之一,同喺台灣嘅中國國民黨無主從關係。
- 1993年,中國國民黨內部嘅次級團體「新國民黨連線」重新組成「新黨」。
- 2000年,部分黨員退出國民黨,另外組成「親民黨」。
- 2001年,多人喺李登輝、黃主文嘅帶領下另外組成「台灣團結聯盟」,李登輝當時重係國民黨員,後來先至畀國民黨踢出黨,打後佢一路都冇加入台聯。
- 2015年,當時嘅立委徐欣瑩退黨,之後成立「民國黨」。
詳情請睇國共合作
2005年4月26日,國共兩黨最高領導人進行自1945年後嘅第一次會晤。
國民黨主席連戰成為1949年後第一位踏上中華人民共和國土地嘅國民黨最高領導人。會見連戰嘅中國共產黨人包括總書記胡錦濤,呢個亦係自1949年來第一位會見國民黨主席嘅中共最高領導人。
中國國民黨歷任黨主席分別為:
- 孫文(總理:1919年10月–1925年3月)
- 張靜江(1926年5月–1926年7月)
- 蔣中正(1926年7月–1927年3月)
- 胡漢民(1935年12月–1936年5月)
- 蔣中正(總裁:1938年4月–1975年4月,副總裁:陳誠)
- 蔣經國(1975年4月–1988年1月)
- 李登輝(1988年1月–2000年3月)
- 連戰(2000年3月–2005年8月,榮譽主席:2005年8月–2015年1月)-首位以黨員直選方式產生嘅黨主席,但係得一人參選(同額競選)
- 馬英九(2005年8月19號–2007年2月)-首位喺非同額競選中,以黨員直選方式產生嘅黨領導人
- 吳伯雄(2007年–2009年)
- 馬英九(2009年–2014年)
- 吳敦義(2014年–2015年)
- 朱立倫(2015年–2016年1月)
- 洪秀柱(2016年–2017年8月)
- 吳敦義(2017年–2020年1月)
- 江啟臣(2020年–2021年9月)
- 朱立倫(2021年–)
喺全國代表大會之下,有中央委員會同埋常務委員會。佢哋管理住6個委員會:
- 考核紀律委員會
- 國家發展研究院
- 政策委員會
- 行政管理委員會
- 文化傳播委員會
- 組織發展委員會
Wikiwand in your browser!
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.