故仔
From Wikipedia, the free encyclopedia
故仔(粵拼:gu3*2 zai2),粵語本字係「古仔」[1],係指用某啲媒介、向一個或者一班對象表達、一連串有先後之分、彼此之間有關嘅事件,而一個以某啲形式-例如一段文字或者一段影片-將故仔表達出嚟嘅物體就係敘事體(narrative)。故仔係真嘅又得、虛構嘅都得,真實故仔包括旅遊文學同回憶錄等嘅作品,而虛構故仔又有科幻、奇幻以及恐怖故仔等嘅類型[2]。
多個人文學領域都會研究故仔:敘事學同文學理論等嘅領域有興趣理解故仔,會對故仔做出各種分析;喺現代敘事學上,一般會將要分析嘅故仔揼散做唔同嘅敘事元素-敘事元素包括咗角色、背景設定同情節呀噉,呢啲領域嘅研究者會分析故仔作者點樣運用呢啲敘事元素,並且將敘事元素分門別類[3][4];而創意寫作領域嘅工作者就會運用呢啲知識,諗吓點樣作好睇嘅故仔同埋教人作好睇嘅故仔[5]。
故仔係普世文化通則[歐 1]。噉講意思即係話,無論語言文化,世上已知嘅人類族群幾乎冚唪唥都有作故仔嘅行為。人類會為咗娛樂或者傳達知識等嘅目的而作故仔,透過作唔同形式嘅故仔展示想像力以及傳承先人嘅智慧,所以故仔不嬲都係文化嘅一個重要組成部份[6];人類學同社會學等社科領域嘅學者嘗試了解一個族群嗰陣,好多時都會花心機研究嗰個族群嘅人之間流傳嘅故仔[7][8]。