軟科幻

軟科幻（粵音：jyun5 fo1 waan6）係科幻下嘅一個文類，指唔重視「科學上要準確」嘅科幻作品。

定位

睇埋：科幻

喺一個軟科幻故仔當中，故仔入面嗰啲先進科技完全係老作嘅，根本冇現實基礎可言，而且好多時故仔內容科學上唔準確，例如連好基礎嘅物理法則都搞唔清。呢啲作品普遍有以下呢啲噉嘅特徵^[1]：

• 架太空船冇人工重力機制，但啲船員依然可以好似有重力噉喺地板上面行；
• 喺太空當中發生爆炸會有聲（太空近乎真空，而聲呢種波動係要有空氣或者水等嘅物質做介質粒子先可以傳遞到嘅）；
• 太空船一熄咗引擎就停低（太空冇空氣阻力，根據牛頓第二定律，一嚿太空當中嘅物體就算冇再受向前嘅力都會繼續以恆定速度向前飛）；

... 等等。呢啲作品喺科學上準確度明顯比較低，所以屬於軟科幻^[2]。

《星空奇遇記》同《星球大戰》等廿世紀嘅太空歌劇名作都傾向屬於軟科幻作品：太空歌劇泛指故仔大多數時間都設於太空當中嘅故仔，呢類故仔通常主要係講一班角色坐住架太空船喺太空周圍冒險（好多時仲會對地球隻字不提）；呢類作品通常重視戲劇性，所以對科學準確性嘅重視度往往會低啲^[3]。

橋段

• 「軟」機甲：呢種機甲比較架空，接近奇幻；呢啲噉嘅機甲成日都完全唔真實—例如係好似摩天大廈咁高，仲識合體呀噉，好多時違反晒物理定律，而且就算唔違反物理定律，呢啲機甲通常不切實際，由工程學角度睇完全唔夠效率。呢啲機甲好多時都會扮演「英雄」，單獨或者少數上陣打怪獸^[4]，例子可以睇吓《新世紀福音戰士》。

睇埋

• 硬科幻
• 奇幻

引述

1. "Soft SF," Encyclopedia of Science Fiction, ed. John Clute and Peter Nicholls, 1995,
2. Matthew, R. (2003). Japanese science fiction: A view of a changing society. Routledge.
3. Hartwell, David G. & Cramer, Kathryn (2006). The Space Opera Renaissance (1st ed.). New York: Tor.
4. MECHA SIZE COMPARISON REVEALS GIANT ROBOTS LARGER THAN KNOWN UNIVERSE, Nerdist.