收集

收集（粵拼：sau1 zaap6；英文名叫 collecting），又有寫做蒐sau1集，係種嗜好，指玩收集嘅人走去搵某一個類型嘅物品（搜集品），搵咗返嚟之後會將呢啲物品分類儲好，仲會對搵咗返嚟嗰啲物品進行維護同保存（收藏），即係唔淨只想自己啲收藏品有咁齊得咁齊，仲想確保自己啲收藏品企企理理，可以攞去展示畀人睇。

2015 年有個人展示佢搜集返嚟嘅昆蟲標本，包括咗好幾種嘅蝴蝶同甲蟲。

好多細細件嘅物品都會畀人攞嚟收集，例子有郵票、銀仔或者某啲畀人覺得好睇嘅昆蟲（好似係蝴蝶同各種甲蟲）... 呀噉，大件啲嘅到古董同傢俬，都可以攞嚟收集。

收集同收藏涉及唔少學問：首先，收藏品可以係啲唔多襟擺嘅嘢，例如想像有人收藏昆蟲標本，昆蟲標本原則上係昆蟲屍體，屍體就噉擺喺度會腐爛，所以收藏家有必要同啲標本做啲工夫以便保存；除此之外，某啲形式嘅收藏仲可以升值，可以攞嚟做投資。

常見搜集品

内文：收藏品

睇埋：藝術品

一個人要玩收集收藏，首先就要知自己想收集啲乜。會畀人攞嚟收集嘅物品多數都係啲有欣賞價值嘅嘢，當中話一類物品有「欣賞價值」可能係因為呢樣嘢畀人覺得好睇，又或者係具有某啲特殊嘅文化意義。最基本上，搜集品可以分做兩大類：

• 自然物品^[1]
  • 生物標本
    • 昆蟲，尤其係蝴蝶同甲蟲等色水鮮艷形態多變嘅昆蟲（昆蟲搜集）^[2]；
  • 岩石同礦物，呢啲嘢喺化學成份同外形上又係可以好多變^[3]；睇埋地質學。
  • 葉，唔同植物物種嘅葉形狀可以好唔同，廿一世紀初有方法保存植物嘅葉，防止佢哋腐爛；
  • 貝殼，又係喺外形上可以多變得好交關；
• 人造物品
  • 好似係畫、雕塑或者花樽等嘅視覺藝術作品；
  • 古董；
  • 銀仔；
  • 好似係公仔同陀螺等嘅玩具；
  • 樂器；
  • 音樂盒；
  • 郵票（集郵）；
  • 黑膠碟；
  • 集換式咭；
  • 懷舊嘅電子遊戲^[4]；
  • 葡萄酒，尤其係陳年嘅葡萄酒好多時都畀人覺得零舍好飲^{[註 1][5]}。
  • 隨住廿一世紀初互聯網相關科技普及化，唔少人開始收集收藏虛擬物品，例如係網上遊戲裏面啲武器呀噉；睇埋虛擬經濟嘅概念。

... 呀噉。

收藏家可以响好多方面有個體差異：有啲收藏家係所謂嘅完成主義者^{[歐 1]}，堅持一定要將佢哋啲目標物品冚唪唥儲齊嗮，仲會肯畀高價買自己想收集嘅嘢，但又有好多收藏家淨係「收集到咁上下數量」就已經心滿意足嗰隻^[6]；除此之外，收藏家又可以喺「有幾擏geng6惜啲收藏品」依點上有差異－有啲收藏家會好小心翼翼噉保養住自己啲收藏品，會（例如）將啲珍藏收埋喺玻璃造嘅箱入面，想確保啲收藏品唔會整污糟，同時又有啲收藏家會攞自己啲收藏品去用，例如係收藏公仔合桃鉗嘅人攞住自己啲收藏品去開合桃。

喺廿一世紀初嘅世界，集郵係一種常見嘅收集嗜好，顧名思義就係指搜集郵票。 喺廿一世紀初嘅世界，集郵係一種常見嘅收集嗜好，顧名思義就係指搜集郵票。  2014 年捷克一個葡萄酒窖儲住咗好多支葡萄酒。依啲葡萄酒有可能值好多錢。 2014 年捷克一個葡萄酒窖儲住咗好多支葡萄酒。依啲葡萄酒有可能值好多錢。  2009 年有個人收集咗拃公仔合桃鉗，依幅相展示佢啲收藏品。 2009 年有個人收集咗拃公仔合桃鉗，依幅相展示佢啲收藏品。

依幅圖入面有 Gotta Catch 'Em All 依句嘢（要捉嗮佢哋噉解）－句嘢係《寵物小精靈》英文版嘅 slogan，叫玩家盡力捉精靈，以求將所有物種嘅精靈全部捉到嗮。 依幅圖入面有 Gotta Catch 'Em All 依句嘢（要捉嗮佢哋噉解）－句嘢係《寵物小精靈》英文版嘅 slogan，叫玩家盡力捉精靈，以求將所有物種嘅精靈全部捉到嗮。

行為理論

睇埋：藏食行為、囤積、囤積病、旁置成本同學者症候群

有唔少學術領域嘅研究者都有興趣剖析「點解人會有興趣收集嘢」依條問題－動物行為學同心理學响定義上就係鑽研行為嘅，而且事實表明，收集會影響物品嘅市場價值，令到冇乜實用價值嘅物品都可以以高價賣出，所以經濟學同市場學等領域嘅工作者都有興趣想理解收集依種行為。

人類以外嘅動物物種都有類似收集噉嘅行為。對動物行為做嘅研究表明，有多種嘅雀鳥同哺乳類都會將搵到嘅嘢食儲喺同類搵唔到嘅地方（藏食行為），仲有足夠嘅認知能力，記得自己收埋咗嘅嘢食收埋咗喺邊，有需要嗰時會搵返啲嘢食出嚟。依點仲同動物嘅智能息息相關^[7]－隻動物要能夠搵返儲起咗嘅嘢食，表示佢實要有返咁上下嘅記憶能力，而且仲有證據指，動物要有能力想像未來，能夠（例如）預估啲未熟嘅果實要過幾耐時間先熟，做到「喺收埋咗嗰粒果實啱啱熟嗰陣掘返佢出嚟」^[8]，所以藏食行為被指可能係間接促進咗智能嘅進化。

2009 年有隻鴉科雀鳥喺度囤積嘢食。 2009 年有隻鴉科雀鳥喺度囤積嘢食。  依隻松鼠喺度儲起啲嘢食，準備過冬。 依隻松鼠喺度儲起啲嘢食，準備過冬。  唔同甲蟲物種喺形狀同色水上可以爭好遠。 唔同甲蟲物種喺形狀同色水上可以爭好遠。

對於人類嘅收集行為，有經濟學家提出可以由新穎度^{[歐 2]}嘅角度思考。佢哋指出，會有人想攞嚟收集嘅嘢，實係有一定嘅內部差異嘅^{[9]:p. 340}－例如甲蟲噉，甲蟲嘅標本吸引到好多愛好昆蟲嘅人收集，而事實係甲蟲同時亦出晒名係最多樣化嘅目之一，淨係一個目已經有成超過 400,000 種物種（相比之下，人類所屬嘅靈長目物種數量得嗰幾百種），唔同甲蟲物種喺顏色同形狀上可以好唔同。噉想像以下嘅過程^{[9]:Part 3}：

1. 一個人喺度收集緊 X 依類物品；
2. 有日，佢見到一件物品 A，A 屬於 X；
3. A 同嗰位收藏家打前見過嘅 X 相當唔同，設新穎度 ${\displaystyle n}$ 做「A 同收藏家打前見過嘅 X 之間嘅差異」；
4. 如果 ${\displaystyle n}$ 嘅數值有咁上下大（${\displaystyle n}$ 太細嘅話收藏家會覺得悶）但又唔係大得滯，位收藏家攞到 A 就會好過癮；
5. 上述過程一路重複，收藏家手上擁有嘅 X 越嚟越多；

－而提出依套諗法嘅經濟學家指出，推出可收集商品嘅企業應該要好好噉控制產品嘅新穎度嘅「劑量」，以求達致「夠新穎，但又唔會新穎得滯」嘅理想狀態（睇埋最佳差異嘅概念）^[10]。

亦可以睇吓收集嘅心理學。

睇埋

• 囤積：一種喺通脹情況下成日會出現嘅行為，都係涉及有人係噉儲起某啲物品。
• 投資：收藏藝術品同集換式咭等嘅嘢可以用嚟保值，作為投資嘅一種^[11]。
• RPG、TCG、搜集拉松
• 遊戲道具同遊戲成就
• 博物館、圖書館
• 古蹟保留、文獻保養
• 鐵路迷、巴士迷

一個人收藏《Magic: The Gathering》咭，而且仲用膠套好好噉保養住啲咭。等到第時依啲咭難搵嗰陣，物以罕為貴^{[註 2]}，位收藏家就有可能可以用高價賣出佢啲收藏品－事實係，某啲舊嘅 MTG 咭可以值成幾萬銀美金^[12][13]。

註釋

1. 不過葡萄酒儲起上嚟要有技巧，如果唔係會變味。
2. 加上 MTG 對遊戲設計頗有影響，所以算係有文化價值。

歐詞

1. completist / completionists
2. 原文隻字：novelty

文獻

• Andersson, M., & Krebs, J. (1978). On the evolution of hoarding behaviour. Animal Behaviour, 26, 707-711.
• Carey, C. (2008). Modeling collecting behavior: The role of set completion. Journal of Economic Psychology, 29(3), 336-347.
• Ijams Spaid, B. (2018). Exploring consumer collecting behavior: a conceptual model and research agenda. Journal of Consumer Marketing, 35(6), 653-662.

引咗

1. Lekies, K. S., & Beery, T. H. (2013). Everyone needs a rock: Collecting items from nature in childhood. Children Youth and Environments, 23(3), 66-88.
2. Gibb, T. J., & Oseto, C. (2019). Insect collection and identification: techniques for the field and laboratory. Academic Press.
3. Juchartz, L., & Rishoi, C. (1997). Rock collection: history and ideology at the Rock & Roll Hall of Fame. The Review of Education/Pedagogy/Cultural Studies, 19(2-3), 311-332.
4. The Collectors Who Save Video-Game History from Oblivion. The New Yorker.
5. Jackson, R. S. (2008). Wine science: principles and applications. Academic press.
6. What motivates ultra-completist collectors? Futility. Medium.
7. Andersson, M., & Krebs, J. (1978). On the evolution of hoarding behaviour. Animal Behaviour, 26, 707-711，依篇文用數學模型分析動物嘅藏食行為嘅進化適應性。
8. Soley, F. G.; Alvarado-Díaz, I. (2011). "Prospective thinking in a mustelid? Eira barbara (Carnivora) cache unripe fruits to consume them once ripened". Naturwissenschaften. 98 (8): 693-698.
9. Carey, C. (2008). Modeling collecting behavior: The role of set completion. Journal of Economic Psychology, 29(3), 336-347.
10. Bianchi, M. (1998). Consuming novelty: strategies for producing novelty in consumption. Journal of Medieval and Early Modern Studies, 28(1), 3.
11. Olmstead, A. D. (1991). Collecting: leisure, investment or obsession?. Journal of Social Behavior and Personality, 6(6), 287.
12. 15 most rare and expensive Magic: The Gathering cards. Dicebreaker.
13. The 20 Rarest Magic: The Gathering Cards (And How Much They're Worth). Game Rant.

拎

• （香港繁體） 香港人用超過 200 萬收藏《龍珠》周邊 一對閃卡值超過 10 萬蚊！，粵語影片講香港人收集《龍珠》相關產品，段片亦提到呢啲產品升值升得幾勁—原本值一餐飯咁多嘅錢，到咗今日（段片嘅今日）值一層樓咁多嘅錢。
• （英文） 我哋嘅腦啲線係駁到會令我哋想收集物品嘅 | Daniel Krawczyk. TEDxSMU，由心理學同腦神經學嘅角度，剖析收集依種行為。
• （英文） 點樣投資葡萄酒，福布斯，依篇文講到收藏葡萄酒嚟做投資。
• （英文） 雅藝術可以係一種高雅嘅投資，Investopedia，依篇文講收藏藝術品嚟做投資。
• （英文） 投資落罕有寵物小精靈咭度嘅 10 個理由，Entrepreneur，依篇文講收藏寵物小精靈咭做一種投資。