視覺藝術

視覺藝術si6 gok3 ngai6 seot6（英文：visual arts），粵文簡稱視藝（粵拼：si6 ngai6），係一種藝術形式，指啲作品本質上靠視覺嚟欣賞，以視覺為重點嘅藝術，例如畫畫、雕塑、建築設計、影相同拍戲等都屬於視藝。視覺藝術仲可以按維度嚟分類，分做畫畫同影相同嘅二維視藝同埋牽涉三維立體作品嘅雕塑同埋建築設計等，當中三維嘅視藝又有叫造型藝術（plastic arts）。好多第啲藝術形式亦都會有視覺藝術忌成份，所以定義上並毋係好嚴格。

《蒙娜麗莎》係西洋畫當中嘅一幅出名作品。

而家「視覺藝術」嘅定義通常都屬美術作品（fine arts），有時亦都包埋工藝品（crafts）。喺 19 世紀下半葉工藝美術運動（Arts and Crafts movement）响英國呢啲嘢興起之前，「視覺藝術家」淨係指從事美術創作嘅藝術家（例如繪畫、雕塑或者版畫）而唔包括從事手工藝（handicraft）、工藝美術嘅藝術家。

畫畫

内文：畫畫

畫畫（粵拼：waak6 waa2）狹義上指有意噉用架生將有顏色嘅物料鋪上去一個固體嘅表面上，用意好多時係想製作出一幅有藝術價值嘅圖像。畫畫架生可以包括毛筆、畫刷甚至係畫畫人嘅手，有色物料就可以包括油彩同水彩等多種嘅人造或者自然材料^[1][2]。再廣義上啲噉講嘅話，畫畫可以定義成「畫畫人有意噉創造一幅二維（2D）嘅圖像」^[3]－後者呢個定義可以包括埋用電腦畫畫嘅做法。

畫畫係一門舉足輕重嘅視覺藝術：一方面，畫畫對好多人嚟講都係一樣本質上有趣嘅活動－好多人都會以畫畫同賞畫為喜好^[4]，而且佢哋當中有好多都會就畫畫相關嘅技巧以及理論，作出思考同書寫文獻（可以睇吓視藝設計原則）^[5]；另一方面，畫又對好多其他類型嘅創作品有用，例如漫畫呢種創作品就要求作者又識作故仔又識畫畫，而插圖（illustration）就係泛指為咗輔助另外一啲出版物或者創作品（故仔書等）而畫嘅畫^[6]。

畫畫呢家嘢歷史悠久：人類學家喺法國南部嘅肖維岩洞（Chauvet-Pont-d'Arc Cave）搵到歷史超過 30,000 年嘅壁畫^[7]；古埃及、古希臘同夏商^[8]等嘅古代文明冚唪唥都有畫畫嘅傳統^[9]；而人類喺打後嘅歷史上一路都有畫畫，喺畫畫嘅技術同風格上都有不斷係噉作出創新，好似係粵畫派噉，就係喺 19 世紀尾結合唐人國畫同西人印象派（impressionism）而生嘅流派^[10]。呢啲創新令廿一世紀世界各地唔同族群有唔同嘅畫畫風格，亦令畫畫成為咗一門多樣化嘅藝術^[11]。

高劍父 1935 年嘅《漁港雨》係粵畫派一幅出名嘅早期作品

雕塑

樂山大佛

内文：雕塑

雕塑（粵拼：diu1 sou3），粵文又有叫雕刻，係指專門創作純藝術性嘅造型藝術。最傳統上，喺創作雕塑嗰陣，一個雕塑家（sculptor）要做嘅步驟主要有以下呢啲^[12]：

• 佢要用鉛筆畫個稿，或者用工藝黏土等軟嘅材料整個預想嘅雛型出嚟；
• 跟住佢要去搵嚿固體嘅材料返嚟－雕塑材料可以係木、石頭、甚至係冰都得；
• 然後佢就要郁手用鎚仔同鑿（chisel）等嘅架生，將嚿材料嘅某啲部份削走^[13]，令嚿材料慢慢噉變成佢想要嘅形狀；
• 喺雕好咗一嚿嘢之後，雕塑家仲有可能會用銲接等嘅方法將幾嚿嘢連接埋一齊做一件大嘅作品，或者對件作品嘅表面作出加工^[14]。

一般嚟講，雕塑作品可以分做兩大類：雕像（statue）同埋浮雕（relief）；前者係指能夠自己獨立噉企到喺度嘅雕塑作品，例子有舉世聞名嘅《大衛像》；而後者就係指喺一塊平面（例如係牆）上雕出嚟嘅作品，件作品雕好咗之後會依附喺塊表面上，成日俾人攞嚟做建築物上嘅裝飾^[15]。順帶一提，粵式建築其中一樣出名之處就係多浮雕^[16]。

雕塑呢種藝術歷史悠久：包括兩河流域文明、古埃及、古希臘、古華夏同古印度在內嘅遠古文明都有留低雕塑作品^{[註 1][17]}；喺呢啲遠古社會，雕塑好多時扮演住宗教性嘅角色－啲人會用（喺當時造價一般都好貴嘅）雕塑展示佢哋心目中神靈嘅形象，仲會對雕像做禮拜^[18][19]，而打後歐洲喺基督教化咗之後，就改用雕像展示佢哋心目中耶穌等人物嘅形象^[20]。到咗廿一世紀，隨住啲人變得有錢，雕塑成為咗社會大眾都玩得起嘅藝術，而「多咗人搞」呢樣嘢仲帶嚟用料同風格等方面嘅創新^[21]。

建築設計

内文：建築設計

建築學（粵拼：gin3 zuk1 hok6；希臘文：ἀρχιτέκτων，arkhitekton），廣東話日常用語有陣時會嗌做「aak¹ ki²」，係一門研究建築物要點設計嘅學問^[22][23]，內容包含咗起建築物嘅過程當中嘅規劃同埋施工等嘅工作，再廣義少少仲可以包埋宏觀啲嘅城市規劃（諗一個城市入面啲建築物要點樣互相配合等等）以至微觀啲嘅室內設計（諗吓啲柱要點安排先至方便間屋嘅主人擺傢俬等等）^[24][25]。

作為專用詞嘅「建築學」所研究嘅對象唔淨只係建築物本身，而仲會著重探討人對建築物嘅要求同埋一棟建築物要點先至滿足到人嘅需求－建築學嘅專家會運用柱同牆等嘅基本元素砌想要起嘅建築物出嚟，途中會考慮棟建築物企唔企到喺度、能唔能夠做到人想佢做嘅功能、仲會諗埋棟嘢有冇美感等多方面嘅問題。因為呢啲多方面嘅考量，建築學上嘅重大作品好多時唔淨只有實用價值，仲會俾起佢哋嘅族群覺得係佢哋文化嘅象徵^[26][27]。例如係廣州西關嘅陳氏書院噉，啲人喺討論粵文化同粵式建築嗰陣成日都會提起佢^[28][29]。

巴薩隆拿嘅聖家大教堂（Sagrada Família）由高第設計，俾好多人覺得係人類建築史上嘅一大傑作。

建築學某程度上係一門跨學科領域：要做建築師（粵文又有叫「則師」）要識數學、物理、工程、藝術以至社會科學等各方面嘅嘢。公元前 1 世紀嘅古羅馬工程師維特魯威（Vitruvius）就講，話建築學係由好多領域嗰度融合誕生出嚟嘅。佢仲主張話建築師應該要識音樂、哲學、同天文學方面嘅知識^[30]，而事實係，歷史上好多建築師喺起佢哋嘅大作嗰陣都會參考當代嘅哲學同天文知識^[31][32]。

第啲視藝

• 陶藝
• 書法
• 插花
• 影相
• 拍戲

睇埋

• 藝術
• 設計
• 視覺
• 表演藝術
• 3D 投影
• 卷積神經網絡

註釋

1. 呢啲作品多數以石雕為主，因為石雕襟擺過（例如）木雕好多；而且呢啲遠古作品好多都嚴重甩色。