貓
From Wikipedia, the free encyclopedia
家貓(粵拼:gaa1 maau1),日常講嘢通常就噉簡稱貓,係一種小型嘅貓科動物。家貓係野貓(Felis silvestris,又叫斑貓)嘅亞種,之所以會畀人嗌做「家」貓,係因為佢哋喺人類嘅屋企嗰度好常見。人類自古以嚟就有養貓嘅紀錄,並且喺成 5,000 年前就已經完全將貓馴養嗮。而到咗而家,家貓經已識得主動噉親近啲養佢哋或者餵佢哋嘅人,而且又曉捉老鼠同一啲害蟲,所以佢哋係響人類之間最有人氣嘅寵物之一,飼養率僅次於狗。
貓 | ||||||||||||||||||||||
---|---|---|---|---|---|---|---|---|---|---|---|---|---|---|---|---|---|---|---|---|---|---|
各種嘅貓 | ||||||||||||||||||||||
馴養 | ||||||||||||||||||||||
物種分類 | ||||||||||||||||||||||
| ||||||||||||||||||||||
Felis silvestris catus (Linnaeus,1758年)[1] | ||||||||||||||||||||||
Felis lybica 無效次異名 |
家貓喺身體構造上同其他貓科動物相似-有住強而有彈性嘅身體、快速嘅反射、𨦟利而又曉得伸縮嘅爪、同埋可以用嚟殺啲細隻獵物嘅尖牙。貓嘅感官好敏銳,聽到一啲頻率高到人類聽唔到嘅聲(例如係老鼠呢啲細隻動物發出嘅聲),而且仲可以係近乎全黑嘅環境嗰度睇到嘢,同大部份嘅哺乳類一樣嗅覺勁過人、但係彩色視覺渣過人。貓擅長喺日出之前或者日落之後冇幾耐、太陽光比較微弱嘅嗰段時間獵食。貓喺獵食嗰陣通常係單獨行動嘅,但係佢哋係一種群居動物-曉用唔同嘅叫聲、身體語言、或者外激素嚟同同類溝通[2]。
家貓好識繁殖[3],佢哋平均有 12 年命左右(呢個數可以因品種而異)。喺一個受控制嘅環境嗰度,攞佢哋嚟配種或者鑒賞好容易。而另一方面,佢哋嘅繁殖生存能力亦都會做成一啲問題:有好多人唔負責任噉樣唔幫自己養嘅貓做絕育,跟手仲要揼咗佢哋,搞到全世界好多地方都有流浪貓,呢啲流浪貓成日會對佢哋周圍嘅環境做成破壞,例如係佢哋獵食鳥類嘅行為搞到唔少鳥類絕種-估計目前有至少 30 個品種嘅鳥類係因為流浪貓而絕種嘅[4],而且流浪貓嘅存在會令到一個地方本嚟啱再引入返啲鳥類品種嘅都變到唔啱[5]。就係因為噉,有好多人(好似係美國嘅動物管制官)都專職噉負責處理流浪貓嘅相關問題[6]。