వెంకీ మామ

వెంకీ మామ 2019, డిసెంబరు 13న విడుదలైన తెలుగు హాస్య చలనచిత్రం. సురేష్ ప్రొడక్షన్స్^[2] పతాకంపై సురేష్ బాబు నిర్మించిన ఈ చిత్రానికి కె.ఎస్. రవీంద్ర దర్శకత్వం వహించాడు.^[3][4] వెంకటేష్, నాగ చైతన్య, రాశీ ఖన్నా, పాయల్ రాజ్‌పుత్ నటించిన ఈ చిత్రానికి ఎస్. తమన్ సంగీతం అందించాడు.^[5] ఈ సినిమా ప్రేక్షకులు, విమర్శకుల నుండి మిశ్రమ స్పందనలను అందుకుంది.^[6]

వెంకీ మామ
వెంకీ మామ సినిమా పోస్టర్
దర్శకత్వం	కె.ఎస్.రవీంద్ర
రచన	జనార్ధన మహర్షి కె.ఎస్.రవీంద్ర కోన వెంకట్
నిర్మాత	సురేష్ బాబు టి.జి. విశ్వ ప్రసాద్ వివేక్ కూచిభొట్ల
తారాగణం	వెంకటేష్ నాగ చైతన్య రాశీ ఖన్నా పాయల్ రాజ్‌పుత్
ఛాయాగ్రహణం	ప్రసాద్ మూరెళ్ళ
కూర్పు	ప్రవీణ్ పూడి
సంగీతం	ఎస్. తమన్
నిర్మాణ సంస్థలు	సురేష్ ప్రొడక్షన్స్ పీపుల్ మీడియా ఫ్యాక్టరీ
విడుదల తేదీ	13 డిసెంబరు 2019 (2019-12-13)
దేశం	భారతదేశం
భాష	తెలుగు
బాక్సాఫీసు	₹45.5 crore (US$5.7 million)(తొలి 3 రోజులు)[1]

కథ

పేరుమోసిన జ్యోతిష్యుడు రామనారాయణ (నాజర్‌) కూతురు జాతకాలతో సంబంధం లేకుండా ప్రేమ వివాహం చేసుకుంటుంది. కానీ, ఆ దంపతులిద్దరు రోడ్డు యాక్సిడెంట్‌లో చనిపోతారు. జాతకం దృష్ట్యా వారి ఏడాది కొడుకును చేరదీయడానికి రామనారాయణ నిరాకరించగా, జాతకాల కన్నా ప్రేమ గొప్పదని భావించే మేనమామ వెంకటరత్నం (వెంకటేశ్‌) ఆ చిన్నారిని చేరదీసి, తాను పెళ్లికూడా చేసుకోకుండా పెంచి పెద్ద చేస్తాడు. మరోవైపు మామ కోసం లండన్‌లో మంచి ఉద్యోగాన్ని, ఆఖరికీ ప్రేమను కూడా తిరస్కరించడానికి కార్తీక్‌ (నాగచైతన్య) సిద్ధపడతాడు. ఈ క్రమంలో మామకు పెళ్లి చేయడానికి కార్తీక్‌, కార్తీక్‌ ప్రేమించిన అమ్మాయిని మళ్లీ కలుపడానికి వెంకటరత్నం ప్రయత్నిస్తారు. కానీ, కార్తీక్‌ జాతక ప్రభావం వెంకటరత్నాన్ని వెంటాడుతుంది. ఈ క్రమంలో మామకు దూరంగా వెళ్లిపోయిన కార్తీక్‌ ఆర్మీలో మేజర్‌గా చేరుతాడు. తనకు దూరంగా ఉన్న కార్తీక్‌ను వెతుక్కుంటూ వెంకటరత్నం వెలుతాడు. అక్కడ ఏం జరిగిందన్నది ఇది మిగతా కథ.

నటవర్గం

• వెంకటేష్ (మేజర్ వెంకట్ సత్యనారాయణ/వెంకీ మామ)
• నాగ చైతన్య (కెప్టెన్ కార్తీక్ శివరాం వీరమాచినేని/కార్తీక్)
• రాశీ ఖన్నా (హారిక)
• పాయల్ రాజ్‌పుత్ (మీనా)
• ప్రకాష్ రాజ్ (మేజర్ జయదేవ్)
• నాజర్
• పరాగ్ త్యాగి
• సంపత్ రాజ్
• రావు రమేష్
• కిషోర్
• పోసాని కృష్ణ మురళి
• బ్రహ్మాజీ
• జాన్ కొక్కెన్
• చమ్మక్ చంద్ర
• శ్రీనివాస రెడ్డి
• గీత
• విద్యుల్లేఖ రామన్
• మాస్టర్ నాగ మహేష్
• దాసరి అరుణ్ కుమార్
• హైపర్ ఆది

సాంకేతికవర్గం

• దర్శకత్వం: కె.ఎస్. రవీంద్ర
• నిర్మాత: దగ్గుబాటి సురేష్‌బాబు, టి.జి. విశ్వ ప్రసాద్, వివేక్ కూచిభొట్ల
• రచన: జనార్ధన మహర్షి, కె.ఎస్. రవీంద్ర, కోన వెంకట్
• సంగీతం: ఎస్. తమన్
• ఛాయాగ్రహణం: ప్రసాద్ మూరెళ్ళ
• కూర్పు: ప్రవీణ్ పూడి
• నిర్మాణ సంస్థ: సురేష్ ప్రొడక్షన్స్, పీపుల్స్ మీడియా ఫ్యాక్టరీ
• కాస్టింగ్ కోఆర్డినేటర్: చందు కాస్టింగ్ క్లబ్

నిర్మాణం

అభివృద్ధి

మహేష్ బాబుతో సీతమ్మ వాకిట్లో సిరిమల్లె చెట్టు, రామ్ తో మసాలా, పవన్ కళ్యాణ్ తో గోపాల గోపాల, వరుణ్ తేజ్ తో F2 – ఫన్ అండ్ ఫ్రస్టేషన్ వంటి మల్టీస్టారర్ సినిమాలు తీసిన వెంకటేష్, ఈసారి తన మేనల్లుడు నాగచైతన్యతో కలిసి ఈ మల్టీస్టారర్ సినిమాలో నటించాడు. ఈ సినిమాకంటే ముందు నాగచైతన్య నటించిన ప్రేమమ్ సినిమాలో వెంకీ అతిథి పాత్ర చేయగా, మొదటిసారిగా ఈసినిమాలో ఇద్దరూ కలిసి పూర్తి నిడివి గల పాత్రలు చేసారు.^[7]

హైదరాబాదులోని రామానాయుడు స్టూడియోలో సినీ దర్శకుడు వి.వి. వినాయక్ అతిథిగా ఈ చిత్రం అధికారికంగా ప్రారంభించబడింది. సురేష్ ప్రొడక్షన్స్, పీపుల్స్ మీడియా ఫ్యాక్టరీ సంయుక్తంగా ఈ చిత్రాన్ని నిర్మించాయి.^[8]

నటీనటుల ఎంపిక

వెంకటేష్‌కు జోడిగా శ్రియా సరన్,^[9] నాగచైతన్యకు జోడిగా రకుల్ ప్రీత్ సింగ్^[10] నటించబోతున్నారని మొదట ప్రకటించారు. కానీ, ఇద్దరూ హీరోయిన్స్ మార్చబడ్డారు. రకుల్ ప్రీత్ సింగ్ స్థానంలో నభా నటేష్ నటించబోతుందని వార్తలు వచ్చాయి.^[11] ఆఖరికి, ఈ చిత్రంలో హీరోయిన్స్ గా రాశీ ఖన్నా,^[12][13] పాయల్ రాజ్‌పుత్^[14] నటిస్తున్నారని చిత్రబృందం ప్రకటించింది.

చిత్రీకరణ

2019, ఫిబ్రవరి 24న గోదావరి నది^[15] తీరంలో చిత్రీకరణ ప్రారంభమై, రాజమండ్రిలో మొదటి షెడ్యూల్ పూర్తయింది.^[16] 2019, ఏప్రిల్ 8న హైదరాబాదులో రెండవ షెడ్యూల్ ప్రారంభమయింది.^[17] హైదరాబాద్‌లో రెండవ షెడ్యూల్‌ను పూర్తిచేసిన తరువాత 2019, జూన్ 13^[18] వరకు దాదాపు ఒక నెలరోజులపాటు కాశ్మీర్‌^[19] షెడ్యూల్‌లో కీలక సన్నివేశాలు చిత్రీకరించబడ్డాయి. కాశ్మీర్ షెడ్యూల్ పూర్తిచేసిన తరువాత బృందం విశాఖపట్నంకు వెళ్ళి అక్కడ కొన్ని రోజులు చిత్రీకరించింది.^[20] అనంతరం రామోజీ ఫిల్మ్ సిటీలో వెంకటేష్, పాయల్ రాజ్‌పుత్‌లతో పాట చిత్రీకరణ జరిగింది.^[21] పోరాట సన్నివేశం చిత్రీకరిస్తున్నప్పుడు వెంకటేష్ గాయపడగా, రెండు వారాలు విశ్రాంతి తీసుకున్నాడు.^[22]

పాటలు

ఎస్. తమన్ సంగీతం అందించిన ఈ చిత్రంలోని పాటలు ఆదిత్యా మ్యూజిక్ ద్వారా విడుదలయ్యాయి.^[23] 2019, నవంబరు 7న ఈ చిత్రంలోని వెంకీ మామ (మొదటి పాట) విడుదల చేయబడింది. శ్రీకృష్ణ, మోహన భోగరాజు పాడిన ఈ పాటను రామజోగయ్య శాస్త్రి రాశాడు. మామ (వెంకటేష్), అతని మేనల్లుడు (చైతన్య)ల మధ్య ఉన్న బంధాన్ని ఈ పాట తెలియజేస్తుంది.^[24] శ్రీమణి రాయగా పృథ్వీ చంద్ర, ఎస్. తమన్ పాడిన ఎన్నేళ్ళకో (రెండవ పాట) సంగీత దర్శకుడు ఎస్. తమన్ పుట్టినరోజు సందర్భంగా 2019, నవంబరు 19న విడుదలైంది.^[25] కాసర్ల శ్యామ్ రాయగా, అదితి భావరాజు, రమ్య బెహరా, సింహా, హనుమాన్ పాడిన కోకా కోలా పెప్సి (మూడవ పాట) 2019, డిసెంబరు 4న విడుదల చేయబడింది.^[26]

పాటల జాబితా

సం.	పాట	పాట రచయిత	గాయకులు	పాట నిడివి
1.	"వెంకీ మామ (రచన: రామజోగయ్య శాస్త్రి)"	రామజోగయ్య శాస్త్రి	శ్రీకృష్ణ, మోహన భోగరాజు	4:15
2.	"ఎన్నేళ్ళకో (రచన: శ్రీమణి)"	శ్రీమణి	పృథ్వీ చంద్ర, ఎస్. తమన్	3:36
3.	"కోకా కోలా పెప్సి (రచన: కాసర్ల శ్యామ్‌)"	కాసర్ల శ్యామ్‌	సింహా, రమ్య బెహరా, అదితి భావరాజు, హనుమాన్	3:41
4.	"నువ్వు నేను (రచన: శ్రీమణి)"	శ్రీమణి	అనురాగ్ కులకర్ణి, నందిత	4:02
మొత్తం నిడివి:				15:34

విడుదల

మొదటగా ఈ చిత్రాన్ని 2019, అక్టోబరు 4న విడుదల చేయడానికి సన్నాహాలు చేశారు.^[27] 2019, డిసెంబరు 7న ఈ చిత్రానికి 'యు/ఎ' సర్టిఫికేట్ వచ్చింది.^[28] వెంకటేష్ పుట్టినరోజు సందర్భంగా 2019, డిసెంబరు 13న విడుదలచేశారు.^[29]

మార్కెటింగ్

2019, ఏప్రిల్ 6న ఉగాది సందర్భంగా వెంకటేష్,నాగచైతన్యల ఫస్ట్‌లుక్ పోస్టర్ విడుదలైంది. ఇందులో ఇద్దరూ గ్రామీణ నేపథ్యంలో ముఖం మీద చిరునవ్వుతో వరి సంచులపై కూర్చున్న ఫోటో ఉంది.^[17] 2019, ఆగస్టు 1న దర్శకుడు కె.ఎస్. రవీంద్ర పుట్టినరోజు సందర్భంగా ప్రీ-టీజర్ విడుదలైంది.^[30] 2019, సెప్టెంబరు 2న వినాయక చవితి సందర్భంగా పండుగ పోస్టర్ విడుదలైంది. ఇందులో వెంకటేష్, నాగచైతన్యలు సాంప్రదాయ దక్షిణ భారత దుస్తులైన పంచకట్టులో ఉన్నారు.^[31] 2019, అక్టోబరు 7న ఫస్ట్‌లుక్ పోస్టర్ విడుదలైంది. ఇందులో వెంకటేష్, నాగచైతన్య, రాశీఖన్నా, పాయల్ రాజ్‌పుత్ ఒక ట్రాక్టర్ పై కూర్చునివున్న ఫోటో ఉంది. ఇందులో చిత్ర విడుదల తేదీని ప్రకటించారు.^[32] 2019, అక్టోబరు 8న విజయదశమి సందర్భంగా మొదటి టీజర్ విడుదలై,^[33] మంచి స్పందన అందుకుంది.^[34] గడ్డంతో వెంకటేష్, పారామిలట్రీ దుస్తుల్లో నాగచైతన్య ఉన్న పోస్టర్ 2019, అక్టోబరు 26న దీపావళి సందర్భంగా విడుదలైంది.^[35]

2019, నవంబరు 23న నాగచైతన్య పుట్టినరోజు సందర్భంగా అల్లుడు పుట్టినరోజు టీజర్ విడుదలైంది, దీనిలో చైతన్య పాత్ర సరదాగా ప్రేమించే బాలుడిగా, ఆర్మీ ఆఫీసర్‌గా ఉంది.^[36] 2019, నవంబరు 30న రాశీఖన్నా పుట్టినరోజు సందర్భంగా రాశీఖన్నా పుట్టినరోజు టీజర్ విడుదల చేయబడింది.^[37] 2019, డిసెంబరు 5న పాయల్ రాజ్‌పుత్ పుట్టినరోజు సందర్భంగా విషింగ్ అవర్ టీచర్ (పాయల్ రాజ్‌పుత్) ఏ వెరీ హ్యాపీ బర్త్డే అంటూ ఒక పోస్టర్ విడుదల చేయబడింది.^[38]

2019, డిసెంబరు 4న పత్రికా సమావేశం జరిగింది. ఇందులో చిత్రబృందం పాల్గొన్నారు.^[39] 2019, డిసెంబరు 7న ఖమ్మంలో చిత్ర ప్రీ-రిలీజ్ ఈవెంట్ జరిగింది.^[40] దీనికి చిత్రబృందం మొత్తం హాజరయ్యారు.^[41] అదే రోజున చిత్రం ట్రైలర్ కూడా విడుదలైంది.^[42] 2019, డిసెంబరు 10న జెఆర్‌సి కన్వెన్షన్స్‌లో వెంకీ మామ మ్యూజికల్ నైట్ ఈవెంట్ జరిగింది, పూర్తి సౌండ్‌ట్రాక్ ఆల్బమ్ విడుదలై ప్రత్యక్ష ప్రసారం చేయబడింది, దీనికి సినీ దర్శకుడు కె. రాఘవేంద్రరావు అతిథిగా వచ్చాడు.^[43]

స్పందన

బాక్సాఫీస్

తొలిరోజు ప్రపంచవ్యాప్తంగా 16.5కోట్లు గ్రాస్ కలెక్షన్ చేసింది.^[44][45] రెండోరోజు ప్రపంచవ్యాప్తంగా 14కోట్లు గ్రాస్ కలెక్షన్ చేసింది.^[46] మూడోరోజు ప్రపంచవ్యాప్తంగా 14.5కోట్లు గ్రాస్ కలెక్షన్ చేసింది.^[1] మొదటి వారంలో ప్రపంచవ్యాప్తంగా 45కోట్ల గ్రాస్ కలెక్షన్ సంపాదించింది.^[47]

రేటింగ్

ప్రేక్షకులు, విమర్శకుల నుండి మిశ్రమ స్పందన వచ్చింది.^[48]

• ది హన్స్ ఇండియా: 3/5^[49]
• సమయం: 3.5/5^[50]
• టైమ్స్ ఆఫ్ ఇండియా: 2.5/5^[51]
• ఇండియా టుడే: 2.5/5^[52]
• ది న్యూస్ మినట్: 2/5^[53]
• ఫస్ట్ పోస్టు: 2.5/5^[54]
• టాలీవుడ్.నెట్: 3/5^[55]
• గ్రేట్ ఆంధ్ర: 2.5/5^[56]