దేవదాస్ కనకాల

దేవదాస్ కనకాల (జూలై 30, 1945 - ఆగస్టు 2, 2019) నటుడు, దర్శకుడు, నట శిక్షకుడు. నాటక దర్శకత్వం నుండి సినిమా దర్శకునిగా ఎదిగాడు. పూణే ఫిల్మ్ ఇనిస్టిట్యూట్ లో విద్య అభ్యసించిన తొలితరం తెలుగువారిలో దేవదాస్ ఒకరు.

దేవదాస్ కనకాల
దేవదాస్ కనకాల
జననం	దేవదాస్ కనకాల (1945-07-30)1945 జూలై 30 యానాం
మరణం	2019 ఆగస్టు 2(2019-08-02) (వయసు: 74) హైదరాబాదు, తెలంగాణ
వృత్తి	టీవీ నటుడు.
వీటికి ప్రసిద్ధి	తెలుగు సినిమా నటులు
జీవిత భాగస్వామి	లక్ష్మీదేవి కనకాల
పిల్లలు	రాజీవ్ కనకాల (కుమారుడు) శ్రీలక్ష్మి కనకాల (కుమార్తె)
తల్లిదండ్రులు	కనకాల తాతయ్య నాయుడు (తండ్రి) మహలక్షమమ్మ (తల్లి)
బంధువులు	సుమ కనకాల (కోడలు) పెద్ది రామారావు (అల్లుడు)

జననం

1945లో జూలై 30 న యానంలో జన్మించాడు. దేవదాసు స్వగ్రామం యానాం శివారులోని కనకాల పేట. ఈయన తండ్రి కనకాల తాతయ్య నాయుడు యానాం ఫ్రెంచి పరిపాలనలో ఉన్నప్పుడు యానాం యం.యల్.ఎ.గా చేసాడు. తల్లి మహలక్షమమ్మ. తోబుట్టువులు తనతో కలిపి ఎనమండుగురులో తనే పెద్దవాడు.

చదువు - ఉద్యోగం

విశాఖపట్టణం లోని ఎ.వి.యన్ కాలేజీలో డిగ్రీ, ఆంధ్ర విశ్వవిద్యాలయం లో థియేటర్ ఆర్ట్స్ చదివాడు. సాంగ్ అండ్ డ్రామా కేంద్ర ప్రభుత్వ పబ్లిసిటీ డివిజన్ లో నటుడిగా ఉద్యోగ జీవితాన్ని ఆరంభించాడు.

వివాహం - పిల్లలు

1971 నవంబరు 21న లక్ష్మీదేవి కనకాల తో దేవదాస్ కనకాల ప్రేమ వివాహం జరిగింది. ఆవిడ కూడా నటి, నట శిక్షకురాలు. వీరికి ఒక కుమారుడు (రాజీవ్ కనకాల), ఒక కుమార్తె (శ్రీలక్ష్మి కనకాల) ఉన్నారు. రాజీవ్ వివాహం ప్రముఖ టివీ యాంకర్ సుమ తో, శ్రీలక్ష్మీ వివాహం నాటకరంగ అధ్యాపకుడు డా. పెద్ది రామారావు తో జరిగింది. వీరివి కూడా ప్రేమ వివాహాలే.^[1]

ఇతరములు

కొన్నిరోజులకే ఉద్యోగానికి రాజీనామా చేసి ఓ సీత కథ లాంటి పలు తెలుగు చలన చిత్రాల్లో ముఖ్యపాత్రను పోషించాడు. అంతేకాకుండా చలిచీమలు వంటి సినిమాలకు దర్శకత్వం వహించాడు. అడయార్ ఫిల్మ్ ఇనిస్టిట్యూట్ (మద్రాస్) లో ఎ.ఆర్.కృష్ణ సారథ్యంలో నడిచిన ఆంధ్రప్రదేశ్ రిపర్టరీలోను, మధు ఫిల్మ్ ఇనిస్టిట్యూట్ లోను అధ్యాపకునిగా, తెలుగు విశ్వవిద్యాలయం రంగస్థల కళలశాఖలో అధ్యాపకునిగా, శాఖాధిపతిగా పనిచేశాడు. నట శిక్షణ ఇవ్వడంలో తనకంటూ ఒక ప్రత్యేక స్థానాన్ని సంపాదించుకున్న దేవదాస్ వద్ద రజనీకాంత్‌, చిరంజీవి, రాజేంద్ర ప్రసాద్‌, శుభలేఖ సుధాకర్, నాజర్‌, ప్రదీప్ శక్తి, భానుచందర్‌, అరుణ్‌పాండ్యన్‌, రాంకీ, రఘువరన్ వంటి సినీ నటులతోపాటు, టీవీలో ఉన్న నటులంతా నట శిక్షణ పొందారు.

దూరదర్శన్ కోసం ఈయన దర్శకత్వం వహించిన రాజశేఖర చరిత్ర, డామిట్ కథ అడ్డం తిరిగింది మొదలగు సీరియల్స్ విశేష ప్రజాదరణ పొంది, అనేక బహుమతులను అందుకున్నాయి. ప్రస్తుతం ఫిల్మ్ అండ్ టెలివిజన్ ఇనిస్టిట్యూట్ ఆఫ్ ఆంధ్రప్రదేశ్ అనే నట శిక్షణాలయాన్ని స్థాపించి అనేక వర్థమాన నటులను తీర్చిదిద్దారు.

నటించిన సినిమాలు

• భరత్ అనే నేను (2018) - చివరి సినిమా
• కింగ్ (2008)
• ఇదీ సంగతి (2008)
• ఒక్క మగాడు (2008)
• ఒకటో నంబర్ కుర్రాడు (2002)
• మీ ఆయన జాగ్రత్త (2000)
• అల్లుడు దిద్దిన కాపురం (1991)
• చెట్టు కింద ప్లీడర్ (1989)
• సిరిసిరిమువ్వ (1978)
• అదృష్టవంతురాలు (1977)
• జరుగుతున్న కథ (1977)
• ఈ కాలపు పిల్లలు (1976)
• మాంగల్యానికి మరో ముడి (1976)
• ఓ సీత కథ (1974)^[2]
• కాలం మారింది (1972)
• బుద్ధిమంతుడు (1969)

దర్శకత్వం వహించిన చిత్రాలు

1. చలిచీమలు^[3]
2. ఓ ఇంటి భాగోతం

మరణం

ఈయన 2019, ఆగస్టు 2న హైదరాబాదులోని కిమ్స్ హాస్పిటల్లో మరణించాడు.^[4]