Сцяпан Акімавіч Красоўскі

У Вікіпедыі ёсць артыкулы пра іншых асоб з прозвішчам Красоўскі.

Сцяпан Акімавіч Красоўскі (20 жніўня 1897, вёска Глухі, Быхаўскі раён, Магілёўская вобласць — 21 красавіка 1983) — Герой Савецкага Саюза (1945), маршал авіяцыі.

Сцяпан Акімавіч Красоўскі
Дата нараджэння	20 жніўня 1897(1897-08-20)[1]
Месца нараджэння	Глухі, Быхаўскі павет, Магілёўская губерня, Расійская імперыя
Дата смерці	21 красавіка 1983(1983-04-21)[1] (85 гадоў)
Месца смерці	Масква, РСФСР, СССР
Месца пахавання	Маскоўская вобласць
Грамадзянства	БНР
Прыналежнасць	СССР
Род войскаў	Авіяцыя РСЧА (ВПС) УС СССР
Гады службы	1916—1983
Званне	Маршал авіяцыі ВПС СССР
Камандаваў	2-я паветраная армія, Ваенна-паветраная акадэмія імя Ю. А. Гагарына
Бітвы/войны	Першая сусветная вайна, Грамадзянская вайна ў Расіі, Савецка-фінская вайна 1939—1940 гг., Вялікая Айчынная вайна
Узнагароды і званні	Ордэн «За службу Радзіме ва Узброеных Сілах СССР» III ступені
Медыяфайлы на Вікісховішчы

Біяграфія

У 1916 г. прызваны ў царскую армію, ваяваў на Заходнім фронце. З сакавіка 1917 г. у 25-м карпусным авіяатрадзе, выбіраўся членам салдацкага камітэта. За рэвалюцыйную прапаганду сярод салдат быў арыштаваны. З лістапада 1917 г. у Чырвонай гвардыі, потым у Чырвонай Арміі. У Грамадзянскую вайну на Усходнім і Каўказскім франтах: авіяматарыст, начальнік сувязі авіяатрада, ваенкам. У 1927 г. скончыў курсы ўдасканалення начсаставу ВПС, у 1936 г. — Ваенна-паветраную інжынерную акадэмію імя Жукоўскага. Камандаваў авіяцыйнымі брыгадай, корпусам, раёнам ваеннай акругі.

Удзельнік савецка-фінляндскай вайны 1939—1940 гг. У 1940—1941 гг. начальнік авіяцыйнага вучылішча, памочнік камандуючага, камандуючы ВПС Паўночна-Каўказскай акругі. У Вялікую Айчынную вайну на Паўднёвым, Бранскім, Паўднёва-Заходнім, Варонежскім і 1-м Украінскім франтах, камандуючы ВПС 56-й арміі, ВПС Бранскага фронту, 2-й і 17-й паветранымі арміямі. Удзельнічаў у распрацоўцы і правядзенні баявых аперацый савецкіх войск пад Растовам-на-Доне, Сталінградам і Курскам, па фарсіраванню Дняпра, Корсунь-Шаўчэнкаўскай, Львоўска-Сандамірскай, Ніжне-Сілезскай, Берлінскай і Пражскай аперацый. Вызначыўся ўмелым камандаваннем авіяцыяй і арганізацыяй узаемадзеяння з наземнымі войскамі пры авалоданні Берлінам, Дрэздэнам і вызваленні Прагі. З 1945 г. на камандуючых пасадах у ВПС, Далёкаўсходняй, Маскоўскай, Паўночна-Каўказскай і Беларускай ваенных акругах. У 1956—1968 гг. узначальваў Ваенна-паветраную акадэмію імя Гагарына. З 1970 г. ваенны інспектар-саветнік Групы генеральных інспектараў Міністэрства абароны СССР. Член Цэнтральнай рэвізійнай камісіі КПСС у 1961—1966 гг., член ЦК КПБ у 1956—1960 гг.

Аўтар кнігі «Жыццё ў авіяцыі» (3-е выд., 1976). Узнагароджаны шасцю ордэнамі Леніна, ордэнам Кастрычніцкай рэвалюцыі, ордэнамі Суворава I і II ступеней, чатырма ордэнамі Чырвонага Сцяга і інш., а таксама чатырнаццаццю ордэнамі і медалямі Чэхаславакіі, Манголіі, Польшчы, Балгарыі, ГДР, Кітая, Венгрыі. Імем Красоўскага названа плошча ў Быхаве, яго імя прысвоена піянерскай дружыне Быхаўскай СШ № 3, вуліцы ў Варонежы.

Зноскі

1. Stepan Akimovich Krasovsky // TracesOfWar

   <a href='https://wikidata.org/wiki/Track:Q98839586'></a>

Літаратура

• Красоўскі Сцяпан Акімавіч // Беларуская энцыклапедыя: У 18 т. Т. 8: Канто — Кулі / Рэдкал.: Г. П. Пашкоў і інш. — Мн. : БелЭн, 1999. — Т. 8. — С. 464. — 10 000 экз. — ISBN 985-11-0035-8. — ISBN 985-11-0144-3 (т. 8).
• Красоўскі Сцяпан Акімавіч // Беларусь у Вялікай Айчыннай вайне, 1941—1945: Энцыкл. / Рэдкал.: І. П. Шамякін (гал. рэд.) і інш. — Мн.: БелСЭ, 1990. — С. 274. — 680 с. — 20 000 экз. — ISBN 5-85700-012-2.
• Красоўскі Сцяпан Акімавіч // Энцыклапедыя гісторыі Беларусі. У 6 т. Т. 4: Кадэты — Ляшчэня / Рэдкал.: Г. П. Пашкоў (галоўны рэд.) і інш.; Маст. Э. Э. Жакевіч. — Мн. : БелЭн, 1997. — 432 с. — 10 000 экз. — ISBN 985-11-0041-2. — С. 253.

Спасылкі

• Сцяпан Акімавіч Красоўскі на сайце «Героі краіны»