中國史
From Wikipedia, the free encyclopedia
中國係指亞洲東部一帶嘅地方,又叫中原,大細成日唔同,涉地唔同,並無嚴格劃分。現時指以黃河、長江一帶開啟嘅文明,以及日後擴張及延續,爲考據基本。亦有以當今中華人民共和國及中華民國領土爲基本。無論何種分法,此帶地上,曾出現多國,亦與周邊各國互動,有時一國幅原甚廣。由於年代久遠,與埃及、印度、兩河流域,並稱四大文明古國之一。中國境內古人類遺址,可上追一百七十萬年咁耐。中國史傳統係按斷代史分,簡畧歸納爲朝代,以示時期劃分。朝代只係簡略,同時當中可能多至數十甚至上百國,始絡不一,長短不一,好複雜。
中國史經過二重證據法證明嘅夏朝計起大概有4,200年;從孔子所說嘅、有三皇五帝嘅傳疑時代計起大概有4,600年;從盤古、上帝、女媧等嘅神話時代計起都有五千年(呢啲都係中國歷史傳統意義上嘅長度);從標誌住人類文明萌芽嘅新石器時代磁山文化計起大概有10,000年;從人類開始脫離原始生活嘅舊石器時代嘅藍田猿人文化計起大概都有80萬年歷史。一般嚟講,「歷史」都係指過去發生嘅一切事件,而狹義嘅歷史係從有文字發明時起算,此前嘅歷史就稱為「史前時代」。中國史前時代嘅傳說有伏羲做八卦,黃帝時代倉頡造文字;而近代考古發現3,350多年前(前1350年)商朝嘅甲骨文、約3,000年前至4,000年前嘅陶文、約4,000年前至5,000年前具有文字性質嘅龜骨契刻符號。從政治同埋社會形態去區分中國歷史,據考古資料顯示,大概係早喺距今6,000年前嘅裴李崗文化晚期或者仰韶文化早期時代,中原地區從母系氏族社會過渡去氏族。同時,原始社會平等被打破。而據有文字記載嘅歷史,夏朝已經開始咗君王世襲,周朝建立咗完備嘅禮制,至東周逐漸解構,秦朝統一咗各國政治同好多民間分歧嘅文字同埋丈量制度,並建立咗中央集權嘅專制君權統治。自漢朝起就以文官主治國家直至清朝。