靖難之變

靖難之變係大明初年發生嘅一場政變。建文元年（1399年），燕王朱棣不滿明惠帝朱允炆嘅削藩政策，用「清君側，靖內難」做藉口起兵發動政變，想推翻佢，最後響建文四年（1402年）成功攻陷應天府，惠帝失蹤，朱棣登位做咗明成祖。

背景

明太祖朱元璋為咗鞏固自己同子孫嘅統治，就封咗宗室二十幾人做藩王，駐守全國各地。呢啲藩王雖然冇封地嘅管治權，但係有自己嘅護衛軍隊，少嘅有三千人，多嘅有成一萬九千人，而駐守北方邊境嘅晉王、燕王同寧王嘅軍權仲大。

明太祖嘅太子朱標早死，太孫朱允炆係啲藩王嘅後輩，佢一早就覺得啲藩王可能會對佢構成威脅，所以就想削藩。

洪武三十一年（1398年）明太祖去世，朱允炆以皇太孫繼位，就係明惠帝。佢聽咗齊泰同黃子澄嘅建議開始削藩，之後就削咗周王、齊王、湘王、代王同岷王五位藩王。

經過

燕王朱棣覺得朝廷會削埋佢，喺謀士姚廣孝嘅策劃下，喺建文元年七月響北平起兵造反，話惠帝身邊嘅齊泰同黃子澄係奸臣，要鏟除佢哋，叫自己起兵做「靖難」，朱棣好快就控制咗北平附近地區，兵力增至幾萬人。

朝廷派65歲老將耿炳文率兵30萬北上討伐。耿炳文嘅先頭部隊13萬人喺初期戰事度唔夠燕軍打，朝廷搵李景隆取代耿炳文打燕軍，又增兵到50萬人，但係李景隆輸得仲慘。朱棣喺呢段時間突襲寧王所在嘅大寧（喺今日嘅內蒙古寧城），挾持咗寧王朱權，控制埋佢嘅軍隊，軍力變得更強。

建文二年四月，燕軍喺白溝河打敗咗李景隆嘅60萬大軍，之後燕軍去到濟南，畀守城嘅盛庸同鐵鉉擋住，燕軍攻唔陷濟南。朝廷撤換咗李景隆，封盛庸做平燕將軍。十二月盛庸喺東昌大破燕軍，燕軍損失咗幾萬人同大將張玉。建文三年三月，燕軍喺夾河大敗盛庸，之後燕軍又多次打贏中央軍。

由於惠帝曾經講過「毋使朕負殺叔父之名」，因此中央軍同燕軍打仗嗰陣有所顧忌。喺夾河之戰嗰陣，朱棣同十幾個騎兵喺夜晚響敵軍營地附近露宿，天光嗰陣發覺畀中央軍包圍咗，朱棣就咁騎馬穿過敵軍營地走出去，啲中央軍一箭都唔敢射，就咁畀佢走咗去。^[1]

建文三年冬天嗰陣，有不滿朝廷嘅宦官投靠朱棣，話畀佢知京城守備空虛，朱棣於是帶兵南下，繞過咗盛庸軍，直指南京。建文四年四月，中央軍徐輝祖等部隊喺齊眉山擊敗燕軍，朝廷以為燕軍已經撤退，調徐輝祖返京城，搞到前線嘅中央軍弱咗，跟住燕軍喺靈壁大破中央軍，大量中央軍投降。^[2]五月燕軍打敗咗防守淮河南岸嘅盛庸，去到長江北岸。六月有水師向燕軍投降，燕軍渡過長江，谷王朱橞同李景隆開南京城門畀燕軍入城，皇宮起火，惠帝失咗蹤，朱棣坐上皇帝位，就係明成祖。

參考

1. 明史卷五
2. 明史卷四