新朝(粵拼:san1 ciu4)係中國史上一朝,喺西漢之後;凈係得王莽一個皇帝(公元9年至23年在位)。
舊石器時代 中石器時代 新石器時代 青銅器時代
歷史
起源
西漢末年國力衰退,國家逐漸畀王氏外戚控制。王氏外戚入面出咗一個叫王莽嘅叻人,佢雖然好細個就冇咗老豆,但係佢靠住扮嘢嚟獲得其他叔伯嘅支持,因此由最初嘅黃門郎一下升咗做大司馬。之後王莽慢慢咁控制咗成個朝廷,並且透過扮好人嚟拉攏平民百姓同埋讀書人嘅支持。哀帝病死之後,王莽立咗得兩歲大嘅孺子嬰做皇帝,並自稱「假皇帝」(假即係代理嘅意思)。之後王莽廢咗孺子嬰,自立為皇帝,國號改做新,首都仲係喺長安,但就改名做常安。
託古改制
新朝建立之後,王莽開始恢復周朝嘅制度,並且奉行《周禮》。政治方面,王莽恢復周代嘅官制同官名,並且將天下分為九州萬國。另外,王莽將「匈奴單于」改為「降奴服于」,高句麗改為下句麗,呢啲舉動激嬲咗好多原本臣服漢朝嘅國家,佢哋好多都同新朝斷絕咗原本藩屬嘅關係,匈奴後尾甚至同新朝爆發戰爭。經濟方面,王莽將煮鹽、治鐵、釀酒、鑄錢、開採山澤資源同埋五均賒貸(即係宜家嘅高利貸)改做國營,叫做「六筦」。佢先後作出四次幣制改革,廢咗漢武帝時期就開始成為全國唯一合法貨幣嘅五銖錢,再先後改造咗28種貨幣。但呢啲貨幣並唔統一,仲換算困難,搞到當時嘅社會經濟亂曬大龍。除此之外,佢仲實行「王田制」,將全國土地收歸國有,然後由國家分田地畀大家,並且禁止買賣奴婢,搞到好多有錢嘅地主豪強破產。呢啲政策並冇解決到當時嘅社會問題,反而成為咗擾民嘅苛政。
滅亡
王莽改制失敗,加深人民苦難,加上全國各地連年發生旱災同蝗災,災民紛紛起來反抗,規模較大嘅有山東瑯琊人樊崇所領導嘅「赤眉軍」同埋荊州北部嘅「綠林軍」。西漢宗室劉縯、劉秀兄弟亦喺舂陵(家下湖北棗陽南)起兵,之後更加入綠林軍,加強咗綠林軍嘅力量。王莽派出四十二萬大軍攻打喺昆陽(今河南葉縣)留守嘅劉秀,但係大敗而歸。公元23年,綠林軍攻佔長安,王莽被叛軍殺害,立國僅十五年嘅新朝喺一片混亂中滅亡。同年,更始帝劉玄正式喺長安即位,建立玄漢。
參攷
睇埋
Wikiwand in your browser!
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.