文法性別（粵拼：man4 faat3 sing3 bit6；英文：grammatical gender）喺語言學上係一種文法範疇，屬於名詞類別嘅一種。喺一隻有文法性別嘅語言當中，名詞可以分做最少兩種—陰性同陽性，一隻名詞之所以會配個性別上去，可能係因為隻字詞指緊啲有性別嘅嘢，例如法文入面嘅 femme 呀噉—隻字係指女人，而隻字自然係陰性；不過有陣時，亦會有啲字詞明明係指緊啲冇明確性別嘅嘢，但文法上依然要當隻字有性別，簡單講即係好似法文嗰種「檯同櫈都要分男女」噉嘅情況[1]。
gat- → 「貓」嘅詞幹
gato → 貓公
gata → 貓乸
gatos → 多隻貓公
gatas → 多隻貓乸
gatos → 多隻貓，有公有乸
印歐語言多數都有性別—法文、意大利文、西班牙話、德文同印地話都有性別，當中德文係分三種性別，而法文、意大利文同西班牙話就分兩種。以印歐語言嚟講，現代英文冇乜文法性別可言—古英文（大約 5 至 11 世紀嗰陣嘅英文）都有一套深入嘅性別系統，但現代嘅英文經已演變到得返自然性別，即係話淨係得男人同女人等「指有明確性別嘅物件」嘅字詞，先會有文法性別特徵[2]。
文法上嘅性別可以出現一啲怪現象，例如個名詞嘅性別同自然性別可以唔夾。
基礎概念
世上有好多語言都會將啲名詞分類，並且喺文法上要求唔同類嘅名詞要用唔同方法處理。唔同語言嘅名詞分類可以好唔同，例如有啲語言會「指植物嘅名詞，冚唪唥自成一類」噉。其中一種最常見嘅名詞分類法就係將啲名詞按「性別」嚟分，分做[3]
首先，有好多字詞都係的確指緊有性別嘅事物嘅，例如
—阿爸同男人定義上就係男性，而阿媽同女人定義上就係女性。一個人如果係用開粵語等冇文法性別嘅語言，有能力理解「隻字詞指有性別嘅嘢」呢個諗頭，但習慣咗唔喺文法上處理呢樣嘢。相比之下，好似德文呢啲有文法性別嘅語言，就會有規則指定陽性同陰性嘅字詞文法上要用唔同方法處理。
文法性別呢樣嘢响印歐語言[英 4]當中好常見—印歐語言係廿一世紀初世上最大語系，由尼泊爾話同印地話至法文同德文，都屬呢個語系（東至印度西至歐洲）[5]。當中印度-雅利安語支大多數語言都有文法性別[6]。
文法特徵
水色 ■ —冇文法性別。
黃色 ■ —分通性中性。
紅色 ■ —分陽性陰性。
綠色 ■ —分有生無生。
深藍 ■ —分陽性陰性中性。
如果話「呢隻語言有文法性別，要求唔同性別嘅字詞要喺文法上用唔同方法處理」，包括咗兩樣嘢：構詞同一致。
構詞
喺好多有文法性別嘅語言入面，一隻字詞屬邊個性別會影響隻字詞用咩詞綴。
例如喺法文裏面，用親 -elle 做尾嘅名詞，全部都係陰性嘅，要用陰性嘅方法嚟處理[2]:1.2，例如
- La sentinelle
係指嗰位守衛，當中 sentinelle 係陰性名詞指守衛[註 6]，配咗 la 呢隻陰性嘅指定冠詞。又或者可以睇吓意大利文嘅情況，啲 -o 做尾嘅單數名詞多數都係陽性，而啲 -a 做尾嘅單數名詞就多數都係陰性[7][8]
- il treno
- 嗰架火車（陽性）
- un gatto
- 一隻貓公（陽性）
- la casa
- 嗰間屋（陰性）
- la macchina
- 嗰架汽車（陰性）
由於性別會影響構詞，對法文或者意大利文有返咁上下熟嘅人，往往可以齋靠「隻字詞嘅尾係咩樣」嚟判斷隻字詞係陽性定陰性，唔使吓吓都死背每隻詞係邊個性別。佢哋淨係需要記住條普遍法則同埋啲例外情況就得[9]。
句法
文法性別嘅另一樣重要特徵，係會影響埋一句句子啲字詞之間嘅一致[英 5]，唔淨只係影響構詞咁簡單[10][11]。有文法性別嘅語言，通常都會有法則影響名詞掕住嘅其他字詞—好似係冠詞同形容詞呀噉，要求呢啲字詞要喺性別上同佢哋黐住嘅名詞一致；甚至有啲語言嘅名詞本身並冇表示性別嘅詞綴，要得知一隻名詞嘅性別只可以靠句子入面嘅其他字詞。
用法文嘅冠詞同形容詞做例子。法文嘅文法要求，冠詞同形容詞喺性別上要配合佢哋掕嘅名詞，例如法文裏面靚嘅形容詞係 beau 同 belle，當中 beau 係陽性而 belle 係陰性，噉想像以下嘅名詞短語：
- Une belle femme (1) → [ 一個 (une)] [靚嘅] [女人 (femme)]
- Un beau garçon (2) → [ 一個 (un)] [靚嘅] [男仔 (garçon)]
喺 1 當中，名詞 femme 係指女人（一件陰性事物），所以要配返陰性嘅 une 同 belle 唔配陽性嘅 un 同 beau，而喺 2 當中，名詞 garçon 係指男仔（一件陽性事物），所以要配返陽性嘅 un 同 beau 唔配陰性嘅 une 同 belle [12]。而且法文仲會將「一隻名詞，要配返相應性別嘅冠詞同形容詞」用落一啲冇明確性別嘅事物度，例如
- Une belle chaise
係指 [一張]-[靚嘅]-[櫈 (chaise)] 噉解—櫈係死物，理應冇性別，但 chaise（指櫈）呢隻字詞文法屬陰性，所以要跟返陰性名詞嘅處理方法[13]。
語言分類
嚟自柏林、學緊粵語嘅朋友：Die Litschi！呢隻字詞文法上係陰性！
（Litschi 係德文字指荔枝，配咗 die 呢隻單數陰性主格嘅指定冠詞。）
語言類型學[英 6]係語言學嘅一個子領域，專門研究點樣按照各種特徵將語言分類。
文法性別都可以攞嚟將語言分類，分做[2]:2.1
- 有文法性別（例：法文、意大利文、西班牙話、俄羅斯話同希伯來話等）定冇文法性別（例：粵語、標準官話同日本話等）？
- 有幾多種文法性別？例如法文嘅文法性別分陽性同陰性兩種，而德文就係分陽性陰性中性三種。
- 邊啲詞性要
嘜 性別（喺性別上配合名詞）[15]？ - 用咩準則分配性別[2]:2.2？
- 有文法性別嘅語言，往往會有啲規律將名詞按語義或者音系特性嚟分類，某啲類嘅名詞硬係屬陽性，而某啲類嘅名詞就硬係屬陰性。用德文做例子[17]：喺德文入面，指岩石同礦物嘅名詞傾向會係陽性，而指生果（尤其係菠蘿同荔枝等熱帶產嘅生果）嘅名詞傾向會係陰性[18]。呢種「某啲類嘅名詞，傾向會屬某種性別」嘅做法，表示隻語言嘅使用者遇到前所未見嘅字詞（新詞或者外來詞呀噉）嗰陣，都可以決定隻字詞屬邊個文法性別。
- 有陣時，唔同語言分配文法性別嘅準則可以啱啱相反，而呢點可以令啲人學語言嗰陣有困難：例如喺主流羅曼語言（法文同意大利文等）裏面，太陽係陽性而月亮係陰性；而喺德文裏面，太陽係陰性而月亮係陽性（下表），如果有個人母語係德文但想學法文，就成日會喺太陽同月亮嘅性別上犯錯[19]。
呀噉。
語言演變
喺語言演變嘅漫長過程當中，語言可以由冇文法性別變到有文法性別，又或者係喪失文法性別系統。
例如英文喺呢方面就幾出名。古英文[英 7]係 13 世紀前嘅英文，現代英文嘅語言祖先。古英文曾經有一套完整嘅文法性別系統，會好似德文噉[註 7]將名詞分陽性陰性中性三種，文法上會要求代名詞同埋某啲分詞喺性別上要配合名詞。不過，後嚟英文喺演變嘅過程當中慢慢喪失咗性別系統[20][21]。廿世紀初嘅英文淨係得返自然性別[英 8]，淨係要求啲實際上有性別嘅嘢要跟性別文法規則：
- 現代英文要求代名詞喺性別上要吻合名詞，用 he 配合男性嘅名詞同埋用 she 配合女性嘅名詞呀噉，但「名詞分男女」呢樣嘢只會用於「實際上真係指緊有性別嘅嘢」嘅名詞；
- 除此之外，現代英文有時會用有性別嘅代名詞指冇生命嘅嘢，例如廿世紀嘅英系人仲係成日會用 she 嚟稱呼船隻（下句）；呢種做法被指係古代文法性別系統嘅殘餘[註 8][22]。
This is RMS Titanic. She is ready to sail. 代名詞 動詞 專有名詞 代名詞 動詞 形容詞 介詞 動詞 呢（架） 係 鐵達尼號。 佢（指架船） 係 準備好 去 起航。
整體嚟講，英文明顯冇主流歐洲語言咁多性別相關嘅文法規則。
|
實際性別
港澳同廣州人：Une？呢個人係男人嚟㗎喎。
法國朋友：係，但 personne 呢隻字文法上係陰性。
亦要留意嘅係，一隻名詞嘅文法性別，未必會夾佢語義上指嗰樣嘢嘅實際性別。
一般認為，如果一隻名詞指緊實際上有性別嘅嘢，噉佢嘅文法性別理應會同佢指嗰樣嘢嘅性別吻合，即係指男性事物—例如男人或者老公—嘅名詞會當文法上陽性，而指女性事物嘅名詞—例如女人或者老婆—會當文法上陰性。但事實表明間中都會有例外。好似係法文噉，有好多職業嘅名傳統上淨係得陽性，例如喺法國法文裏面，
- 先生（professeur）
淨得陽性，並冇女先生爾個字[註 9]，就算話一個女人職業係先生，一樣照用 professeur [23]；又或者喺法文，
- 人（personne）
呢隻字淨得陰性，就算係男人，只要叫佢做「人」而唔叫佢做「男人」就當係陰性名詞噉處理[24]。德文都有類似情況，例如小稱一定係中性，所以例如本來係尊稱嘅
- 小姐（Fräulein）
呢隻字都係中性[註 10]，要用返中性名詞嘅處理方法嚟應付[25]。
另外有啲
| 「 | 喺德文入面，一個後生女（Fräulein）冇性別，但係一樖大頭菜（Die Rübe）就有。諗吓呢個事實，係對大頭菜展示緊幾咁過高嘅崇敬，同時係幾咁無情噉唔尊重個女仔。 |
」 |
睇埋
註釋
英詞
文獻
- Aikhenvald, A. Y. (2000). Classifiers. Cambridge, U.K.: Cambridge University Press，呢本書第 44 頁提到，希伯來話入面某幾隻名詞似乎係某啲情況下當係陽性，某啲情況下當係陰性。
- Bassetti, B. A. (2014). Is grammatical gender considered arbitrary or semantically motivated? Evidence from young adult monolinguals, second language learners, and early bilinguals. British Journal of Psychology, 105(2), 273-294.
- Byun, K.S., Zwitserlood, I., & De Vos, C. (2015). Classifiers and gender in sign language - the case of Korean Sign Language. Paper presented at the workshop Gender and Classifiers: Areal and Genealogical Perspectives, Max Planck Institute for Psycholinguistics, Nijmegen, The Netherlands，有講到手語裏面嘅文法性別。
- Corbett, Greville G. (1994). Gender and gender systems. In Asher, R. (ed.). The Encyclopedia of Language and Linguistics. Oxford: Pergamon Press. pp. 1347-1353.
- Cubelli, R., Paolieri, D., Lotto, L., & Job, R. (2011). The effect of grammatical gender on object categorization (PDF). Journal of Experimental Psychology: Learning, Memory, and Cognition, 37(2), 449，心理語言學研究發現 L1 有文法性別嘅人，的確傾向會將陽性嘅名詞同男人聯想埋一齊。
- Franceschina, Florencia (2005). Fossilized Second Language Grammars: The Acquisition of Grammatical Gender. John Benjamins Publishing Company.
- Ibrahim, Muhammad Hasan (1973). Grammatical gender: Its Origin and Development. Mouton.
- Jurczyk, R. (2017). The loss of grammatical gender and case features between Old and Early Middle English: Its impact on simple demonstratives and topic shift. Studia Anglica Posnaniensia, 52(2), 203-250，有講英文喺演變過程當中點樣喪失文法性別系統。
- Kavari, J. U., & Marten, L. (2009). Multiple noun class prefixes in Otjiherero. In: P. Austin, O. Bond, M. Charette, D. Nathan, & P. Sells (Eds.), Proceedings of the Conference on Language Documentation & Linguistic Theory 2, London: SOAS，有講到有啲語言可以特登將一隻名詞嘅性別改變，用嚟突顯隻字詞指嗰樣嘢「大啲」或者「細啲」。
- Greenberg, J. H. (1963). Some universals of grammar with particular reference to the order of meaningful elements (PDF). In: J. H. Greenberg (Ed.), Universals of language: Report of a conference held at Dobbs Ferry, New York, April 13-15, 1961 (pp. 73-113). Cambridge, MA: MIT Press，呢篇文提出咗一拃普世語言通則，當中原則 37 話「一隻語言如果有文法性別，噉佢啲單數名詞嘅性別類型數量，實係多過非單數名詞嘅」。打後嘅研究表明，呢個諗法未至於普世適用，但似乎的確係多數情況下都成立[27]。
- 陳俊, & 林少惠. (2010). 漢語語法性別編碼傾向對中國法語初學者的影響研究. 現代外語, (4), 403-410 （簡體中文）
- 王曉惠. (2013). 淺析英語語法性別到自然性別的轉變. 長沙鐵道學院學報: 社會科學版, 14(3), 149-150 （簡體中文）
引述
拎
Wikiwand in your browser!
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
