古英文

古英文gu2 jing1 man4*2（Ænglisc；英文：Old English）係現代英文嘅「語言祖先」，古時英倫用嘅語言，喺5世紀到13世紀間存在。古英文同現代英文喺各方面都爭好遠：雖然現代英文大部分嘅字根都係嚟自古英文，但係因為文法同發音變咗好多，所以依家講英文嘅人都唔會聽得明古英文^[1]。

呢幅地圖描繪嘅，係古英文嗰四大方言嘅分佈。英文喺呢個時間嘅發展都係非常之地道，各自各都唔一樣。

歷史背景

内文：英文史

特性

睇埋：分析語

古英文曾經有一套變格^{[e 1]}系統，同拉丁文、希臘文、同埋德文等等類似，簡單講即係一隻字詞要視乎佢喺句子入邊做乜嘢角色而變樣。不過由古英文變中古英文嗰段期間，英文喪失咗大部份嘅變格系統。到咗廿一世紀，英文嘅變格淨係得返屬格仍然用緊，而屬格以外嘅文法格近乎唔見晒咁滯，係得例如男性第三人稱代詞做主語嗰陣係 he（主格）但係做賓語嗰陣要變做 him（賓格）呀噉。

除此之外，古英文有文法性別，呢樣嘢喺現代入便已經消失咗好耐。

起源

内文：日耳曼語言同原始日耳曼語言

睇埋：英文史、盎格魯-撒遜人同印歐語系

英文嘅起源大約係 400 年後嗰兩個世紀，當時日耳曼人開始遷徙去英倫呢笪土地，而喺一路直至 10 世紀，盎格魯-撒遜人^{[e 2]}大舉由歐洲北部移居去英倫，將佢哋嘅日耳曼語言帶埋去嗰度，從此之後佢哋就同其他日耳曼人群體分流，變到喺語言同文化上同其他日耳曼人有異—英文就誕生咗^[2][3]。

蓋爾特融合

内文：蓋爾特語言

到 5 世紀開始，盎格魯-撒遜人開始大批移民去英倫。當時嘅英倫已經有人住，呢啲原居民係講蓋爾特語言^{[e 3]}嘅。喺打後嗰幾個世紀，盎格魯-撒遜人講嘅日耳曼語言同當地人講嘅蓋爾特語言融合，形成古英文^[4]。到咗 10 世紀，英倫已經變成以古英文為主。

古英文依然係一種日耳曼語言，蓋爾特語言嘅影響相對微細^[5]，不過蓋爾特語言喺愛爾蘭、蘇格蘭同威爾士等地依然維持住影響力—及後嘅愛爾蘭蓋爾話、蘇格蘭蓋爾話同威爾士話都係蓋爾特語言，而喺英倫以至蘇格蘭同威爾士嘅個別地方，到咗依家都仲有唔少蓋爾特-日耳曼融合嘅地名。

基督教化

睇埋：基督教化同教會拉丁文

到 7 世紀開始，基督教開始傳入大不列顛島，呢樣嘢又引起咗一啲重要嘅語言變化：當時基督教嘅權力中心喺羅馬，基督教自然係主要以拉丁文嚟傳播；除此之外，古希臘文亦有一定嘅影響力，噉係因為《新約聖經》（基督教嘅基礎經典）係以古希臘文寫嘅，而且羅馬帝國本身就深受古希臘影響，所以拉丁文字詞有好多原本都係嚟自古希臘文嘅。如是者，古英文喺呢段時間吸納咗好多拉丁文嘅字詞。據估計喺呢個時期，有成 400 隻字詞由拉丁文傳咗過去古英文嗰度，尤其係一啲宗教相關嘅字詞^[6]，例子有^[7]

廿一世紀英文	拉丁文
Bishop，主教	Episcopus，指「主教」[8]
Hymn，聖詩	Hymnus，指「讚美歌」[9]
School，學校	Schola，「學生同老師會面嘅地方」[10]

順帶一提，古英文本來係用盧恩字^{[e 4]}嘅變體寫嘅，呢種文字起源自日耳曼文化，但係喺基督教化期間古英文大受羅馬教會影響，後來喺 8 世紀改為用羅馬字^{[e 5]}嚟寫。

古羅斯融合

睇埋：古羅斯文同維京人

到 8 世紀，維京人^{[e 6]}開始攻擊盎格魯-撒遜人。維京人係嚟自斯堪的納維亞（大致相當今日嘅挪威、瑞典同丹麥等地），講嘅係古羅斯文^{[e 7]}—呢種語言都係日耳曼語言，係挪威文、瑞典文同丹麥文嘅「語言祖先」。喺之後嗰幾百年期間，兩班人一齊控制英格蘭，所以當時有唔少人都係識講英文又識講古羅斯文，加快咗呢兩種語言嘅融合^[11]。

到咗最後，古英文估計總共借咗大約 2,000 個嚟自古羅斯文嘅字詞，當中不乏一啲日常生活成日用嘅字詞。

古英文文獻

呢張紙上面寫咗公元 10 世紀嘅《卑奧胡夫》文本。呢段文本主要用咗羅馬字嚟寫。

睇埋：卑奧胡夫

睇埋

• 中古英文
• Anglish