From Wikipedia, the free encyclopedia
Vladikavkaz (ven.: Владикавка́з, oset.: Дзæуджыхъæу «Dzaugan eländpunkt») om Venäman lidn da lidnümbrik valdkundan suvipäivlaskmas. Se om Pohjoižosetijan — Alanijan Tazovaldkundan pälidn da kaikiš suremb lidn. Om «sodahoštusen lidn»-arvonke vspäi 2007.
Lidnanznam | |
| Valdkund | Venäma |
| Eläjiden lugu (2024) | 292,717 ristitud |
| Pind | 291,61 km² |
 | |
| Pämez' | Aleksandr Paciorin (viluku 2023—) |
| Telefonkod | +7−8672-xxx-xxx |
| Avtokod | 15 |
| Aigvö | UTC+3 (MSK+0) |
Eländpunktan aluz om pandud vl 1784 kuti Vladikavkaz-lidnuz Venälaižen imperijan Jekaterina II-imperatornaižen käskön mödhe hänel valitud sijha Georgijevskan traktatan vahvištusen jäl'ghe. Soda-gruzine te zavodiše lidnas.
Vladikavkaz om lidnan oficialiženke statusanke vspäi 1860. Vl 1875 raudte ühtenzoiti lidnad Rostovanke. Vozil 1931−1944 i 1954−1990 lidnan nimi oli Ordžonikidze, vll 1944−1954 — Dzaudžikau. Vspäi 1990 oficialine venäkel'ne nimituz om eziauguine.
Vladikavkaz šingotase mujumetallurgijan koumel tegimel, kahtel gidroelektrostancijal, elektroladimiden i elektrokomponentoiden koumel tegimel, sauvondmaterialiden pästandal (savič, pumaterialad, katuzmaterialad), sömtegimištol (oluden, etilspirtan, väghižiden alkogoližiden jomiden tehmine), mugažo stökolpakuitesen, zirkloiden i bioetanolan tegimed, kalližarvoižiden kividen ümbriradmine i nahktegim ratas lidnas.
Lidn sijadase Terek-jogen (oset.: Терк) mougotil randoil, Kavkazan pohjoižil pautkil. Lidnan keskuzpala seižub 692 m keskmäižel korktusel valdmeren pindan päl.
Matkad Moskvhasai om 1504 km pohjoižhe orhal. Lähembaižed järedad lidnad oma Nal'čik lodeheze (117 km avtotedme), Nazran' pohjoižpäivnouzmha (26 km avtotedme) i Groznii päivnouzmha (113 km avtotedme).
Klimat om ven ezimägišton. Voden keskmäine lämuz om +9,2 C°, kezakun-elokun +18,1..+20,7 C°, tal'vkun-uhokun −0,6..−1,9 C°. Voib toda pakaižid −22 Cel'sijan gradushasai kül'mkus-keväz'kus, i räkäd korktemb mi +30 C° keväz'kus-redukus. Ekstremumad oma −27,8 C° (viluku, uhoku) i +39,2 C° (eloku). Kezaaigan minimum om +2,2 C° (kezaku), tal'vaigan maksimum om +27,1 C° (tal'vku). Ei voi panda halad kezakus-elokus, sügüz'kun minimum om 0 C°. Paneb sadegid 883 mm vodes, enamba semendkus-elokus (93..113 mm kus), vähemba tal'vkus-uhokus (31..34 mm kus).
Vladikavkaz jagase nelläks administrativižeks rajonaks. Lidnanvuitte Zavodskoi-žilo da viž muite žilod mülüdas lidnümbrikho Vladikazkazan ližaks, kaik ned alištudas lidnrajonile. Lidnümbrikon pind om 291,61 nellikkilometrad.
Lidnümbrikon tobmuden pämez' om sen Ezitajiden suiman ezimez'. Hän valičese suiman 32 ezitajal videks vodeks. Kaik rahvaz valičeb suiman ühtnijoid videks vodeks. Edeline suiman ezimez' om Ruslanbek Ikaev (sügüz'ku 2019 — heinku 2022). Lidnan Administracijan pämez' panese radnikusele suimal videks vodeks mugažo. Municipalitetan Administracijan pämez' om Väčeslav Mil'dzihov vn 2021 heinkuspäi. Edeline Administracijan pämez' om Tamerlan Farniev (sügüz'ku 2019 — kezaku 2021).
Vl 1939 lidnan ristitišt oli 130 755 eläjad, vl 1959 — 164 420 eläjad. Vn 2010 kaiken Venäman rahvahanlugemižen mödhe lidnan eläjiden lugu oli 311 693 ristitud, lidnümbrikon — 330 148 ristitud. Vn 2021 rahvahanlugemižen mödhe lidnan ristitišt oli 295 830 eläjad, kaiken lidnümbrikon — 312 755 eläjad. Kaik 306 978 eläjad oli lidnas vl 2017. Kaikiš suremb lidnan ristitišt oli 325 tuhad eläjid vl 1992.
Rahvahad (lidnümbrik, enamba 0,4 % vl 2010): osetinalaižed — 63,9 %, venälaižed — 24,5 %, armenijalaižed — 3,5 %, gruzijalaižed — 2,2 %, ingušad — 1,1 %, azerbaidžanlaižed — 0,7 %, ukrainalaižed — 0,6 %, grekalaižed — 0,5 %, toižed rahvahad da rahvahuden ozutandata — 3,0 %.
Üläopendusen aluzkundad:
Niiden ližaks, läz 15 professionaližen keskopendusen aluzkundad ratas lidnas.
_02.jpg)
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
