From Wikipedia, the free encyclopedia
Tambov (ven.: Тамбо́в) om lidn da lidnümbrik Venäman päivlaskmas. Se om Tambovan agjan administrativine keskuz da kaikiš suremb lidn, mugažo Tambovan rajonan tobmuden aluzkundoiden keskuseks.
Lidnanznam![]() | Flag![]() |
Valdkund | Venäma |
Eläjiden lugu (2023) | 258,546 ristitud |
Pind | 107,31 km² |
Pämez' | Jelena Leonova (reduku 2020—) |
Telefonkod | +7−4752-xxx-xxx |
Avtokod | 68 |
Aigvö | UTC+3 (MSK+0) |
Eländpunktan aluz om pandud vl 1636 kuti Tambov-kaičendlidnuz Venäman suviröunal. Se sai lidnan statusad vl 1719. Vspäi 1796 kändihe Tambovan gubernijan keskuzlidnaks, sur' jarmank oleskeli keskuzližel torgul.
Tambov šingotase mašinansauvomižen edheotandoil («Terrion»-traktorad i kombainad, elektroladimed, himižen sarakon täht), himižel tegimištol (ližadused i mujutimed sädamha tekstilid, bumagad, šinoid, benzinad, betonad; räzintehnižed tegesed, gazmaskad, respiratorad, kosmoslaivoiden elonvarmitusen sistemad), sauvondmaterialiden pästandal (raudbetontegesed, plastiktorved, mujud), erazvuiččel sömtegimištol, tekstilin tehmižel (kanghad specialižen soban täht) i omblendedheotandoil.
Lidn sijadase Cnanjogen hural randal, 130 metrad valdmeren pindan päl keskmäižel korktusel. Matkad Moskvhasai om 420 km lodeheze orhal. Lähembaine järed lidn om Lipeck 130 km päivlaskmha avtotedme. Kotovsk om suvipäivnouzmaine kaimdailidn.
Klimat om ven kontinentaline. Kaik kümne puištod om lidnan territorijal. Voden keskmäine lämuz om +6,1 C°, kezakun-elokun +18..+20 C°, tal'vkun-uhokun −6..−8 C°. Ekstremumad oma −38 C° i +41,1 C°. Paneb sadegid 520 mm vodes, enamba kezakus-heinkus (54..66 mm kus), vähemba uhokus-sulakus (29..30 mm kus).
Tambov jagase koumeks administrativižeks ümbrikoks. Kaik 18 territoriališt nevondkundad om lidnas. Se om lidnümbrikon üks'jäižeks eländpunktaks.
Municipaližen ühtnikan pämez' om Tambovan Duman ezimez' vn 2022 uhokuspäi. Jelena Leonova radab sen ezimehen vn 2020 redukuspäi.
Nügüdläine lidnan pämez' om Maksim Kosenkov vn 2020 kül'mkuspäi (oti sidä-žo radnikust vll 2005−2008). Edeližed lidnan pämehed oliba Sergei Čebotaröv (keväz'ku 2017 — keväz'ku 2019), Dmitrii Samorodin (velgusentäutai, keväz'ku 2019 — sügüz'ku 2019), Natalija Makarevič (sügüz'ku 2019 — reduku 2020). Lidnan pämez' valičese Tambovan Dumal i tegeb lidnümbrikon Administracijan pämehen velgusidme.
Vn 2010 Venäman rahvahanlugemižen mödhe lidnan eläjiden lugu oli 280 161 ristitud. Kaik 290 365 eläjad oli lidnas vl 2017. Kaikiš suremb lidnan ristitišt oli 318 tuhad eläjid vl 1997.
Venälaižed i ortodoksižed hristanuskojad oma enambuses lidnas.
Kaik viž tehnikumad i kümne kolledžad oma professionaližen keskopendusen aluzkundoikš. Nell' tedoinstitutad ratas lidnas.
Üläopendusen aluzkundad:
Avtobusad, trolleibusad, maršruttaksid da taksid oma kundaližeks transportaks lidnas. Kaks' avtostancijad om olmas: «Tambov» i «Pohjoine». Tambov I-päraudtestancii om saudud vl 1868. Avtote ümbärdab lidnad.
Tatanmaine civiline Tambov (Donskoje)-lendimport[3] (TBW / ТМБ / UUOT, 31,8 tuh. passažiroid vl 2021) sijadase kümnes kilometras pohjoižpäivnouzmha lidnan keskusespäi Donskoje-žilos. Tehtas reisid Moskvha i Piterihe, om sezonreisid Sočihe. Mugažo Tambov-sodaaviabaz om olmas viž kilometrad päivlaskmha lidnan keskusespäi.