lidn Venämas From Wikipedia, the free encyclopedia
Belgorod (ven.: Бе́лгород) om lidn da lidnümbrik Venäman päivlaskmas. Se om Belgorodan agjan administrativine keskuz da kaikiš suremb lidn. Vspäi 2007 Belgorod om «sodahoštusen lidn»-arvnimenke.
Lidnanznam
| Flag |
| Valdkund | Venäma |
| Eläjiden lugu (2024) | 328,482 ristitud |
| Pind | 153,1 km² |
 | |
| Pämez' | Valentin Demidov (kül'mku 2022—) |
| Telefonkod | +7−4722-xxx-xxx |
| Avtokod | 31 |
| Aigvö | UTC+3 (MSK+0) |
Amuine Severskii-lidnuz oli pandud Vezölk-jogen randal sen lanktendan sijanno Severskii Doncha 10. voz'sadal. Sil-žo voz'sadal kalaidajad heimod paniba sidä mantazole.
Nügüdläižen eländpunktan aluz om pandud Födor I Čudokahan käskön mödhe vn 1596 sügüz'kun 11. päiväspäi kuti lidnuz Venäman valdkundröunanno. Vozil 1727−1779 Belgorod oli Belgorodan gubernijan keskuseks, sid' mülüi Kurskan gubernijha makundan keskuseks. Vl 1954 panihe Belgorodan agjan alust, i Belgorod kätihe sen keskuseks.
Belgorod šingotase mašinansauvomižen tegimil (kaivuzmašiništ), sauvondmaterialiden pästandal (abrazivad, mel, cement, pumaterialad), himižel i farmaceftižel sarakoil, sömtegimištol.
Lidn sijadase agjan päivlaskmas, Severskii Donc-jogen muugotil randoil, 200 m ü.m.t. keskmäižel korktusel (keskuz om 130 m korktusel). Pertišt otab koumen kukhan pautkid, reljef om vanoikaz. Belgorodan vezivaradim augotaze lidnan territorijal.
Matkad Moskvhasai om 700 km pohjoižhe, Ukrainan röunhasai — 40 km suvhe. Lähembaine järed lidn om röunantagaine Har'kov 71 km suvipäivlaskmha.
Klimat om ven. Voden keskmäine lämuz +7,7 C°, kezakun-elokun +19,4..+21,8 C°, tal'vkun-uhokun −5,6..−6,1 C°. Ekstremumad oma −34,5 C° (viluku) i +39,0 C° (heinku, eloku). Kezaaigan minimum om +2,9 C° (kezaku), tal'vaigan maksimum om +12,3 C° (uhoku). Ei voi panda halad kezakus-elokus. Paneb sadegid 605 mm vodes, läz tazomäras kuidme, enamba kezakus-elokus (53..72 mm kus), vähemba uhokus-keväz'kus (36..40 mm kus) i redukus (40 mm). Kun keskmäine relätivine nepsuz vajehtase 58..65 % röunoiš sulakus-sügüz'kus, 84..90 % kül'mkus-uhokus.
Londuseližed varad oma mel, letked, saved, reskvezi, mineralveded, mustma, ištutadud kavag'mecad.
Belgorod jagaze kahteks ümbrikoks: Päivnouzmaine (ven.: Восточный) i Päivlaskmaine (ven. Западный). Lidn om lidnümbrikon üks'jäižeks eländpunktaks.
Lidnümbrikon pämez' om lidnan Administracijan pämez' (mer). Edeližen merad oma Anton Ivanov (tal'vku 2021 — kül'mku 2022), Jurii Galdun (keväz'ku 2019 — reduku 2021), Konstantin Poležajev (kül'mku 2015 — keväz'ku 2019). Lidnan Nevondkundan ezimez' om Vadim Radčenko vn 2022 vilukuspäi.
Vn 2010 Venäman rahvahanlugemižen mödhe lidnan eläjiden lugu oli 356 402 ristitud, vn 2021 — 339 978 ristitud. Vl 2017 lidnan ristitišt oli 391 135 eläjad. Kaikiš suremb lidnan ristitišt oli 394 142 eläjad vl 2020. Läz 600 tuhad ristituid elädas ezilidnoidenke. Eländpertiden sauvondan korged piguz (enamba mi keskmäine valdkundas) vedatab migracijad Venäman pohjoižiš regionoišpäi.
Rahvahad (2010): venälaižed — 94,1 %, ukrainalaižed — 3,4 %, armenijalaižed — 0,5 %, toižed rahvahad — 2,0 %.
Avtobusad, trolleibusad da taksid oma kundaližeks transportaks lidnas. Avtobusad ühtenzoittas lidnad rajonkeskusidenke, Venäman da Ukrainan järedoidenke lidnoidenke. 20. voz'sadan augotišespäi Belgorod om raudtesol'meks, raudted lähttas Kurskha, Sumihe, Har'kovha.
Rahvahidenkeskeine civiline Belgorod-lendimport[1] (EGO / БЕД / UUOB, 468 tuh. passažiroid vl 2017) sijadase nelläs kilometras pohjoižhe lidnan keskusespäi. Sišpäi tehtas čarterreisid Keskmeren da Tailandan lebutahoihe, mugažo reisid Venämadme (Moskv, Piter, Alauz'lidn; Tümenin agj, Noril'sk — vahtradnikoiden täht).
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
