From Wikipedia, the free encyclopedia
تَنْتْر (ہندی: तन्त्र) سے مراد ہندو مت اور بدھ مت کی وہ باطنی روایتیں ہیں جو پہلے ہزارے کے وسط میں کسی وقت مدون ہوئیں۔ ہندوستانی روایتوں کے پس منظر سے معلوم ہوتا ہے کہ "تنتر" کی اصطلاح بہت وسیع معنوں کی حامل اور مخصوص متون، نظریات، نظام اور طریقہ کار، تکنیک اور آلات سب پر حاوی ہے۔[1][2] ہندو مت اور بدھ مت کی یہ تانترک روایت جین مت، سکھ مت، تبت کے بون مت، تاؤ مت اور جاپان کے شنٹو مت پر بھی اثر انداز ہوئی اور ان سب مذاہب میں باطنی روایتوں کا سلسلہ چل پڑا۔[3]
عموماً ہندومت میں تانترک روایت شکتی مت سے منسوب کی جاتی ہے، شکتی مت کے پیروکاروں میں شیو مت اور ویشنوی مت کے معتقدین شمار کیے جاتے ہیں۔[2] جبکہ بدھ مت میں وجریان روایت اپنے انتہائی باطنی یعنی تانترک تصورات، خیالات، روایتوں اور اعمال کی بنا پر معروف ہے۔[2][4]
نیز ہندومت میں تنتر ایک ادبی صنف کی حیثیت سے بھی مستعمل ہے، چنانچہ ہندو فنون، علامتوں اور مندروں کی تعمیر میں تانترک روایت کے اثرات صاف دیکھے جا سکتے ہیں۔[5][6] بلکہ پوجا، مندر اور ہندومت کی بیشتر علامتیں طبعاً تانترک ہیں۔[7] جن ہندو متون میں تانترک موضوعات کا احاطہ کیا گیا ہے انھیں تنتر، آگم اور سنہتا کہتے ہیں۔[8] ان متون کی فہرست بہت طویل ہے تاہم کہا جاتا ہے کہ انتہائی اہم کتابوں کی تعداد چونسٹھ ہے۔ بدھ مت میں بھی یہ تانترک صنفِ ادب پائی جاتی ہے؛ تبت میں واقع فن پارے، ہندوستان کی مندر نما تاریخی غاریں اور جنوب مشرقی ایشیا میں موجود تصویریں اس کی بہترین مثال ہیں۔[9][10][11]
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.