پیغمبر اسلام محمد کی بیویویاں From Wikipedia, the free encyclopedia
حضرت محمد صلی اللہ علیہ و آلہ وسلم کی مختلف روایات میں اکثر گیارہ سے تیرہ ازواج کے نام ملتے ہیں۔ جنہیں امہات المؤمنین کہا جاتا ہے یعنی مؤمنین کی مائیں۔ اس کے علاوہ انھیں ازواج مطہرات بھی کہا جاتا ہے۔ آپ صلی اللہ علیہ و آلہ و سلم کی ازواج میں حضرت عائشہ کے علاوہ تمام بیوہ و مطلقہ (طلاق شدہ) تھیں اور زیادہ شادیوں کا عرب میں عام رواج تھا۔
|
|
مؤرخین کے مطابق اکثر شادیاں مختلف قبائل سے اتحاد کے لیے یا ان خواتین کو عزت دینے کے لیے کی گئیں۔ ان میں سے کچھ سن رسیدہ تھیں اس لیے حضور صلی اللہ علیہ و آلہ و سلم پر کثرت ازدواج کا الزام لگانے والوں کی دلیلیں ناکارہ ہو جاتی ہیں۔ ان میں سے صرف حضرت خدیجہ بنت خویلد اور حضرت ماریہ قبطیہ سے اولاد ہوئی۔
آپ صلی اللہ علیہ و آلہ وسلم نے نبوت سے قبل 25 برس کی عمر میں حضرت خدیجہ سے شادی کی۔ حضرت خدیجہ آپ صلی اللہ علیہ و آلہ وسلم کی پہلی بیوی تھیں اور آپ کی اولاد میں حضرت ابراہیم بن محمد کے سوا تمام صاحبزادے اور صاحبزادیاں ان کے ہی بطن سے ہوئیں۔ ان کے ساتھ آپ کی ازدواجی زندگی 25 سالہ تھی اس دوران آپ نے کوئی اور شادی نہیں کی۔ باقی تمام شادیاں 50 سال کی عمر کے بعد کی ہیں۔
آنحضرت کی وفات کے وقت ان کی نو ازواج حیات تھیں۔
| شمار | نام | سال نکاح | سال وفات | بیاں کردہ احادیث کی تعداد | متفق علیہ احادیث |
|---|---|---|---|---|---|
| 1 | حضرت خدیجہ | 15 قبل نبوت | 10 نبوی | - | - |
| 2 | حضرت سودہ بنت زمعہ | شوال 10 نبوت | 22ہجری | 5 | - |
| 3 | حضرت عائشہ صدیقہ | شوال 1ہجری رخصت | 57ہجری | 2210 | 74 |
| 4 | حضرت حفصہ بنت عمر | شعبان 3 ہجری | 45ہجری | 60 | 4 |
| 5 | حضرت زینب بنت خزیمہ | 4ہجری | 4ہجری | - | - |
| 6 | حضرت ام سلمہ | شوال 4 ہجری | 63 ہجری | 378 | 13 |
| 7 | حضرت زینب بنت جحش | ذی قعدہ 5 ہجری | 20 ہجری | 11 | 2 |
| 8 | حضرت جویریہ بنت حارث | آخر شعبان 6 ہجری | 50 ہجری | 7 | - |
| 9 | حضرت ام حبیبہ | 6 ہجری | 44 ہجری | 65 | 2 |
| 10 | حضرت صفیہ بنت حی بن اخطب | محرم 7 ہجری | 50 ہجری | 10 | 1 |
| 11 | حضرت میمونہ بنت حارث | ذی قعدہ 7 ہجری | 51 ہجری | 72 | 7 |
| - | میزان | - | - | 2822 | 103 |
تفصیلی مضمون کے لیے حضرت خدیجہ ملاحظہ کریں۔آنحضرت صلی اللہ علیہ و آلہ وسلم نے 25 برس کی عمر میں مکہ میں حضرت خدیجہ سے شادی کی۔ اس طرح حضرت خدیجہ پہلی خاتون تھی جو حضور صلی اللہ علیہ و آلہ و سلم کے نکاح میں آئيں۔ ان کا نام خدیجہ اور لقب طاہرہ تھا۔ ان کے والد کا نام خویلد اور والدہ کا نام فاطمہ تھا۔ حضور صلی اللہ علیہ و آلہ و سلم کے نکاح میں آنے سے قبل ان کا نکاح پہلے ابو ہالہ بن بناش تمیمی سے ہوا تھا۔ ان کے بعد عتیق بن عابد مخزومی کے نکاح میں آئیں۔ ان کے انتقال کے بعد 40 برس کی عمر میں حرم نبوت میں داخل ہوئیں اور ام المؤمنین کا شرف حاصل ہوا۔ پاکیزہ اخلاق کی بدولت طاہرہ کے لقب سے مشہور تھیں۔ آنحضرت صلی اللہ علیہ و آلہ وسلم کو نبوت ملی تو نبوت کی تصدیق کے ساتھ ساتھ سب سے پہلے اسلام لانے کی سعادت انھوں نے ہی حاصل کی۔ حضور صلی اللہ علیہ و آلہ و سلم کے نکاح میں آنے کے بعد 25 برس تک زندہ رہیں۔ نبوت کے دسویں سال انتقال کیا۔
تفصیلی مضمون کے لیے سودہ بنت زمعہ ملاحظہ کریں۔حضور صلی اللہ علیہ و آلہ و سلم نے حضرت خدیجہ کے انتقال کے بعد حضرت سودہ بنت زمعہ سے شادی کی۔ جو قریش کے ایک قبیلے عامر بن لوی سے تعلق رکھتی تھیں۔ ان کی پہلی شادی سکران بن عمرو سے ہوئی تھی۔ جن کا انتقال ہو گیا تو 7 رمضان (بعض روایات میں شوال) سن 10 نبوی میں حضور صلی اللہ علیہ و آلہ و سلم کے نکاح میں آئیں اور حضرت عمر فاروق کے زمانۂ خلافت میں انتقال کیا۔ سخاوت و فیاضی ان کے اوصاف کے نمایاں پہلو تھے۔
تفصیلی مضمون کے لیے عائشہ بنت ابی بکر ملاحظہ کریں۔ابوبکر صدیق کی صاحبزادی تھیں۔ والدہ کا نام زینب تھا۔ ان کا نام عائشہ لقب صدیقہ اور کنیت ام عبد اللہ تھی۔ حضور صلی اللہ علیہ و آلہ و سلم نے سن 11 نبوی میں حضرت عائشہ سے نکاح کیا اور 1 ہجری میں ان کی رخصتی ہوئی۔ رخصتی کے وقت ان کی عمر ساڑھے گیارہ برس تھی۔ انھوں نے حضور صلی اللہ علیہ و آلہ و سلم کے ساتھ نو برس گزارے۔ حضور صلی اللہ علیہ و آلہ و سلم کے وصال کے 48 سال بعد 66 برس کی عمر میں بنو امیہ کے حکمران امیر معاویہ کے دور میں انتقال ہوا۔ حضرت عائشہ کو علمی حیثیت سے عورتوں میں سب سے زيادہ فقیہہ اور صاحب علم ہونے کی بنا پر چند صحابہ کرام پر بھی فوقیت حاصل تھی۔ فتوے دیتی تھی اور بے شمار احادیث ان سے مروی ہیں۔ خوش تقریر بھی تھیں۔
تفصیلی مضمون کے لیے حفصہ بنت عمر ملاحظہ کریں۔عمر فاروق کی صاحبزادی تھیں۔ والدہ کا نام زینب بنت مظعون تھا۔ غزوۂ بدر میں حضرت حفصہ کے شوہر شہید ہوئے تو آنحضرت سے نکاح ہوا۔ 45ھ میں مدینہ میں انتقال کیا۔
تفصیلی مضمون کے لیے زینب بنت خزیمہ ملاحظہ کریں۔ام المساکین کے والد کا نام خزیمہ تھا۔ ام المساکین کنیت تھی۔ فقراء اور مساکین کے ساتھ فیاضی کرتی تھیں۔ اس لیے اس کنیت سے مشہور ہوگئیں۔ پہلے شوہر عبد اللہ بن جحش تھے۔ جو غزوۂ احد میں شہید ہوئے تو آنحضرت صلی اللہ علیہ و آلہ و سلم سے نکاح ہوا لیکن صرف دو تین ماہ کے بعد ہی انتقال کیا۔
تفصیلی مضمون کے لیے ام سلمہ رضی اللہ عنہا ملاحظہ کریں۔کا نام ہند اور کنیت ام سلمہ تھی۔ پہلے ابو سلمہ سے نکاح ہوا تھا۔ اسلام کے ابتدائی دور میں دونوں اسلام لائے تھے۔ حبشہ اور مدینہ ہجرت بھی کی تھی۔ ابو سلمہ غزوۂ احد میں زخمی ہوئے اور جانبر نہ ہو سکے تو ام سلمہ آنحضرت صلی اللہ علیہ و آلہ و سلم سے نکاح ہوا۔
علمی اعتبار سے حضرت عائشہ کے بعد آپ کا نمبر آتا تھا۔آپ سے بہت سی احادیث ان سے مروی ہیں۔
تفصیلی مضمون کے لیے زینب بنت جحش ملاحظہ کریں۔نام زینب اور کنیت ام الحکم تھی۔ والد کا نام جحش بن رباب اور والدہ کا نام امیمہ تھا جو حضور صلی اللہ علیہ و آلہ و سلم کی پھوپھی تھیں۔ اس طرح زینب حضور اکرم صلی اللہ علیہ و آلہ و سلم کی پھوپھی زاد تھیں۔
آپ کی دو بیوہ بھابھیاں بھی ازواج مطہرہ تھیں۔ (ام حبیبہ جو عبید اللہ بن جحش کی بیوہ تھیں اور زینب بنت خزیمہ جو عبد اللہ بن جحش کی بیوہ تھیں)
حضرت زینب کا پہلا نکاح زید بن حارثہ سے ہوا جو آپ صلی اللہ علیہ و آلہ و سلم کے آزاد کردہ غلام تھے۔ دونوں کے تعلقات خوشگوار نہ رہ سکے اور حضرت زید بن حارثہ نے طلاق دے دی زید بن حارثہ کا ذکر مبارک قرآن مجید میں نام کے ساتھ آیا ہے اور آپ واحد صحابی رسول ہیں جن کا ذکر قرآن عرفان القرآن میں موجود ہے حضرت زینب سے آپ صلی اللہ علیہ و آلہ و سلم نے نکاح کیا۔ ان کا انتقال حضرت عمر فاروق کے زمانۂ خلافت میں ہوا۔
تفصیلی مضمون کے لیے جویریہ بنت حارث ملاحظہ کریں۔بنی مصطلق کے سردار حارث بن ابی ضرار کی بیٹی تھیں۔ حضرت جویریہ کا نکاح مسافع بن صفون سے ہوا تھا۔ جو ان کے قبیلے سے تھا۔ لیکن غزوہ مرسیع میں قتل ہو گیا تو مسلمانوں کے ہاتھ آنے والے لونڈی و غلاموں میں حضرت جویریہ بھی تھیں اور مال غنیمت کی تقسیم میں ثابت بن قیس کے حصے میں آئیں۔
حضور صلی اللہ علیہ و آلہ و سلم نے رقم دے کر آزاد کرایا اور ان سے نکاح کیا۔ آپ صلی اللہ علیہ و آلہ و سلم کے نکاح کے بعد بنی مصطلق قبیلہ کے دیگر لونڈی غلام بھی آزاد کر دیے۔ حضرت جویریہ کا انتقال 50ھ ہوا۔
تفصیلی مضمون کے لیے رملہ بنت ابوسفیان ملاحظہ کریں۔کا اصل نام رملہ تھا۔ ابو سفیان بن حرب کی بیٹی تھیں۔ والدہ صفیہ بنت العاص تھیں۔ جو حضور صلی اللہ علیہ و آلہ و سلم کی پھوپھی تھیں۔ نکاح عبید اللہ بن جحش سے ہوا اور مسلمان ہوئیں۔ حبشہ ہجرت بھی کی۔ عبید اللہ کا انتقال حبشہ میں ہی ہوا۔ عدت کے بعد حضور صلی اللہ علیہ و آلہ و سلم نے نجاشی کے پاس عمرو بن امیہ کو نکاح کے پیغام کے لیے بھیجا۔ نجاشی نے خود نکاح پڑھایا اور ام حبیبہ مدینہ آگئیں۔ 44ھ میں انتقال ہوا۔
تفصیلی مضمون کے لیے صفیہ بنت حی بن اخطب ملاحظہ کریں۔کا اصل نام زینب تھا۔ جو غزوۂ خیبر کے قیدیوں میں سے حضور صلی اللہ علیہ و آلہ وسلم کے حصے میں آئی تھیں جو قبیلہ بنو نضیر کے سردار حی بن اخطب کی بیٹی تھیں۔ ان کی ماں بھی رئیس قریظہ کی بیٹی تھیں۔
ان کی پہلی شادی مشکم القرظی سے ہوئی۔ اس سے طلاق کے بعد کنانہ بن ابی الحقیق کے نکاح میں آئیں جو جنگ خیبر میں قتل ہوا۔ حضرت صفیہ جنگ میں گرفتار ہو کر آئیں۔ حضور صلی اللہ علیہ و آلہ و سلم نے آزاد کر کے نکاح کیا۔ 50ھ میں انتقال کیا۔
تفصیلی مضمون کے لیے میمونہ بنت حارث ملاحظہ کریں۔کے والد کا نام حارث بن حزن تھا۔ حضور صلی اللہ علیہ و آلہ و سلم سے نکاح سے قبل پہلے مسعود بن عمرو سے نکاح ہوا۔ ان سے علیحدگی کے ابودھم کے نکاح میں آئیں۔ جن کی 7ھ میں وفات ہوئی اور 7ھ میں ہی حضور صلی اللہ علیہ و آلہ و سلم سے نکاح ہوا۔ 51ھ میں انتقال فرمایا۔
تفصیلی مضمون کے لیے ماریہ قبطیہ ملاحظہ کریں۔بعض روایات کے مطابق حضرت ماریہ قبطیہ کنیز تھیں۔ مگر زیادہ روایات کے مطابق آپ سے حضور صلی اللہ علیہ و آلہ و سلم نے شادی کی تھی چنانچہ آپ بھی امہات المؤمنین میں شامل ہیں۔ ابراہیم بن محمد آپ کے بطن سے پیدا ہوئے تھے۔
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
