![cover image](https://wikiwandv2-19431.kxcdn.com/_next/image?url=https://upload.wikimedia.org/wikipedia/commons/thumb/b/bf/Ricky_Ponting_YM.jpg/640px-Ricky_Ponting_YM.jpg&w=640&q=50)
రికీ పాంటింగ్ అంతర్జాతీయ క్రికెట్ సెంచరీల జాబితా
From Wikipedia, the free encyclopedia
రికీ పాంటింగ్ విశ్రాంత ఆస్ట్రేలియా క్రికెటరు, ఆస్ట్రేలియా క్రికెట్ జట్టు మాజీ కెప్టెన్. అతను టెస్టు క్రికెట్లో 41, వన్డే ఇంటర్నేషనల్ (వన్డే) మ్యాచ్లలో 38 సెంచరీలు చేశాడు. ఈ రెండూ ఆస్ట్రేలియా రికార్డులు. [1] [2] టెస్టు మ్యాచ్లలో పాంటింగ్, టెస్టు ఆడే దేశాలన్నిటిపై సెంచరీలు చేశాడు. అతను టెస్టు సెంచరీ మేకర్ల జాబితాలో సచిన్ టెండూల్కర్ (51), జాక్ కాలిస్ (45) తర్వాత మూడవ స్థానంలో (41) ఉన్నాడు. [3] పాంటింగ్ 1997లో హెడ్డింగ్లీలో ఇంగ్లండ్పై 127 పరుగులు చేసి తొలి టెస్టు సెంచరీ సాధించాడు. అతని అత్యధిక స్కోరు 257, 2003 చివరలో మెల్బోర్న్ క్రికెట్ గ్రౌండ్లో భారత్పై చేశాడు. పాంటింగ్ చేసిన 41 సెంచరీలలో 6 డబుల్ సెంచరీలు. అతని టెస్టు సెంచరీలు 21 క్రికెట్ గ్రౌండ్స్లో జరిగాయి, అందులో 15 ఆస్ట్రేలియా వెలుపలి వేదికలపై ఉన్నాయి. తొంభైలలో పాంటింగ్ నాలుగు సార్లు ఔట్ అయ్యాడు. వాటిలో తన తొలి టెస్టు (96 పరుగులు) కూడా ఉంది.[4] [5] పాంటింగ్ ఒక టెస్టులో రెండు ఇన్నింగ్స్ల్లోనూ సెంచరీలు మూడు సార్లు సాధించి, సునీల్ గవాస్కర్ రికార్డును సమం చేశాడు. ఇందులో అతని 100వ టెస్టు మ్యాచ్లో కూడా ఉంది, తద్వారా చరిత్రలో ఆ ఘనత సాధించిన ఏకైక ఆటగాడిగా నిలిచాడు. ఆ మ్యాచ్లో అతను ఆఖరి రోజున దక్షిణాఫ్రికాపై విజయం సాధించడంలో జట్టును నడిపించాడు. [6] 2006లో, పాంటింగ్ ఏడు సెంచరీలు సాధించాడు, ఒక సంవత్సరంలో అత్యధిక సెంచరీలు చేసిన ఆస్ట్రేలియా బ్యాటరతను. [7]
![A man stands in front of a brick wall; he is wearing a cap.](http://upload.wikimedia.org/wikipedia/commons/thumb/b/bf/Ricky_Ponting_YM.jpg/640px-Ricky_Ponting_YM.jpg)
వన్డేలలో, పాంటింగ్ 11 మంది ప్రత్యర్థులపై 30 సెంచరీలు సాధించాడు. అతను శాశ్వత వన్డే అంతర్జాతీయ హోదా కలిగిన అన్ని క్రికెట్ దేశాలపై సెంచరీలు సాధించాడు. వన్డే క్రికెట్ చరిత్రలో ఈ ఘనత సాధించిన ప్రపంచంలోనే మొట్టమొదటి బ్యాట్స్మెన్గా నిలిచాడు. 1996లో మెల్బోర్న్ క్రికెట్ గ్రౌండ్లో జరిగిన బెన్సన్ & హెడ్జెస్ వరల్డ్ సిరీస్ తొమ్మిదో మ్యాచ్లో శ్రీలంకపై చేసినది అతని మొదటి వన్డే సెంచరీ. అతని అత్యధిక వన్డే స్కోరు 164, 2006లో జోహన్నెస్బర్గ్లోని వాండరర్స్ స్టేడియంలో దక్షిణాఫ్రికాపై చేశాడు. దాంతో ఆస్ట్రేలియా వన్డేల్లో ప్రపంచ రికార్డు స్కోరు సాధించింది. అయితే దక్షిణాఫ్రికా, కొన్ని గంటల్లోనే ఈ రికార్డును బద్దలుకొట్టి, మ్యాచ్ గెలుచుకుంది.
సెంచరీ మేకర్ల జాబితాలో టెండూల్కర్ (49), కోహ్లీ (44) తర్వాత పాంటింగ్ మూడో స్థానంలో ఉన్నాడు. [2] పాంటింగ్ స్వదేశంలో 12 సెంచరీలు, విదేశాల్లో 16 సెంచరీలు చేశాడు. మెల్బోర్న్ క్రికెట్ గ్రౌండ్లో ఏడు సెంచరీలు కొట్టాడు. అతను 90లలో నాలుగు సార్లు డిస్మిస్ అయ్యాడు. [8] [9] పాంటింగ్ గతంలో 2003లో భారత్పై 140 నాటౌట్తో వరల్డ్ కప్ ఫైనల్లో అత్యధిక స్కోరు రికర్డు సాధించాడు. 2007లో ఆడమ్ గిల్క్రిస్టు దానిని బద్దలు కొట్టాడు.[10] [11] అతను ఐదు ప్రపంచ కప్ సెంచరీలు సాధించాడు, కుమార సంగక్కరతో పాటు, ఇద్దరూ ఆరు సెంచరీలతో టెండూల్కర్ వెనుక రెండవ స్థానంలో ఉన్నారు. [12] 1998లో జింబాబ్వేపై అతని 145 పరుగులు డీన్ జోన్స్ చేసిమ్న ఆస్ట్రేలియా రికార్డు స్కోరును సమం చేసింది. అయితే దీన్ని 1999 ప్రారంభంలో ఆడమ్ గిల్క్రిస్టు 154 తో అధిగమించాడు. [13] [14]
2009 సెప్టెంబరులో పాంటింగ్ [15], ట్వంటీ20 అంతర్జాతీయ (T20I) క్రికెట్ నుండి రిటైర్ అయ్యాడు. T20I మ్యాచ్లో సెంచరీ చేయలేదు. అయితే, ఆక్లాండ్లో న్యూజిలాండ్తో జరిగిన మొదటి అంతర్జాతీయ మ్యాచ్లో అతను 98 పరుగులతో నాటౌట్గా నిలిచాడు. [16]
రికీ పాంటింగ్ ఆస్ట్రేలియాలోని ఆరు ప్రముఖ క్రికెట్ వేదికలన్నిటిలో, టెస్టులు, ODIలు రెండింటిలోనూ సెంచరీలు సాధించాడు. అలా చేసిన ఏకైక ఆస్ట్రేలియా ఆటగాడతడు.
![A ground with two sportsman playing cricket, with a boundary rope in the background](http://upload.wikimedia.org/wikipedia/commons/thumb/3/32/Ponting_and_Warne2.jpg/320px-Ponting_and_Warne2.jpg)