futbollist anglez From Wikipedia, the free encyclopedia
Harry Edward Kane (lindur më 28 korrik 1993) është një futbollist profesionist anglez i cili luan si sulmues për klubin gjerman Bayern München dhe me kombëtaren angleze. Kane është një golashënues i shquar dhe konsiderohet si një nga sulmuesit më të mirë në botë.[2][3] Ai është golashënuesi më i mirë në historinë e Tottenhamit dhe Anglisë, si dhe golashënuesi i dytë më i mirë në historinë e Premier Ligës.[4] Ai ka shënuar mbi 350 gola për klubet dhe ekipin kombëtar.
 Kane me Anglinë në Kupën e Botës 2018 | |||
| Të dhënat vetjake | |||
|---|---|---|---|
| Emri i plotë | Harry Edward Kane | ||
| Datëlindja | 28 korrik 1993 | ||
| Vendlindja | Walthamstow, Angli | ||
| Gjatësia | 1.88 m (6 ft 2 in)[1] | ||
| Pozicioni | Sulmues | ||
| Të dhënat e klubit | |||
Klubi aktual | Bayern München | ||
| Numri | 9 | ||
| Karriera me të rinjtë | |||
| 1999–2001 | Ridgeway Rovers | ||
| 2001–2002 | Arsenal | ||
| 2002–2004 | Ridgeway Rovers | ||
| 2004 | Watford | ||
| 2004–2009 | Tottenham Hotspur | ||
| Karriera me klube* | |||
| Vitet | Klubi | Ndeshje | (Golat) |
| 2009–2023 | Tottenham Hotspur | 317 | (213) |
| 2011 | → Leyton Orient (huazim) | 18 | (5) |
| 2012 | → Millwall (huazim) | 22 | (7) |
| 2012–2013 | → Norwich City (huazim) | 3 | (0) |
| 2013 | → Leicester City (huazim) | 13 | (2) |
| 2023– | Bayern München | 32 | (36) |
| Karriera ndërkombëtare‡ | |||
| 2010 | Anglia U17 | 6 | (3) |
| 2010–2012 | Anglia U19 | 14 | (6) |
| 2013 | Anglia U20 | 3 | (1) |
| 2013–2015 | Anglia U21 | 14 | (8) |
| 2015– | Anglia | 98 | (66) |
| *Ndeshjet dhe golat me klubet llogariten vetëm për ligën vendase – redaktuar më 4 maj 2024 ‡ Ndeshjet dhe golat me ekipin kombëtar të redaktuar më 14 korrik 2024 | |||
Kane e nisi karrierën e tij si profesionist te Tottenhami në vitin 2009. Në vitet në vazhdim, ai u huazua në ekipe të ndryshme si Leyton Orient, Millwall, Leicester City dhe Norwich City. Ai u bë një lojtar i rëndësishëm i Tottenhamit në vitin 2014 nën drejtimin e trajnerit Mauricio Pochettino, dhe në sezonin e tij të parë të plotë në klub fitoi çmimin PFA Lojtari i Ri i Vitit. Në sezonet 2015–16 dhe 2016–17 ai ishte golashënuesi më i mirë i kampionatit, duke fituar edhe çmimin PFA Lojtari i Vitit i Tifozëve. Kane zhvilloi sezonin e tij më të mirë në aspektin e statistikave në sezonin 2017–18, duke shënuar 41 gola në 48 ndeshje në të gjitha kompeticionet. Në sezonin e ardhshëm, ai luajti në finalen e UEFA Ligës së Kampioneve kurse në sezonin 2020–21 u shpall golashënuesi dhe asistuesi më i mirë në kampionat. Në vitin 2023, Kane u transferua te Bayern München për 110 million €, duke u bërë transferimi më i shtrenjtë në historinë e Bundesligës.
Kane ka shënuar 58 gola në 84 ndeshje me Anglinë. Ai ka luajtur mbi 30 ndeshje me ekipet e moshave. Ai debutoi me ekipin e parë në mars 2015 në moshën 21 vjeç, duke shënuar brënda 80 sekondash. Ai ishte protagonist në fushatën e suksesshme kualifikuese të ekipit në Euro 2016, si dhe mori pjesë edhe në turnament. Kane u emërua kapiten para nisjes së Kupës së Botës 2018, të cilën ai e përfundoi si golashënuesi më i mirë me gjashtë gola, duke fituar Këpucën e Artë; Anglia u rendit në vendin e katërt, duke regjistruar pozicionin më të mirë që nga viti 1990. Dy vite më pas në Euro 2020, Kane udhëhoqi Anglinë në finale, e cila ishte e para në këtë turnament dhe e para në një turnament madhor që nga viti 1966.
Harry Edward Kane lindi më 28 korrik 1993[5] në Walthamstow të Londrës nga prindërit Kim (née Hogg) dhe Patrick Kane dhe ka një vlla më të madh, Charlie.[6][7][8] Ai është me origjinë irlandeze nga babai i tij, i cili është nga Galway.[9][10] Familja e tij lëvizi në Chingford aty ku Kane ishte pjesë e Larkswood Primary Academy deri në vitin 2004,[11] kurse më vonë shkoi te Chingford Foundation School (aty ku më parë ka qënë pjesë David Beckham).[12] Ai e nisi karrierën e futbollit që në moshë të re, duke u bërë pjesë e klubit lokal, Ridgeway Rovers, në vitin 1999 kur ai ishte gjashtë vjeç.[13] Kane foli për rolin e futbollit në familjen e tij:
Unë mendoj se genet sportive vijnë nga ana e familjes së nënës sime, megjithëse kjo temë është një debat i nxehtë në familjen Kane. Babait ndoshta nuk do t'i pëlqejë që unë e thash këtë, por mendoj se gjyshi im Eric nga ana e mamasë sime ishte një futbollist mjaft i mirë dhe luajti në një nivel të mirë.[14]
Kane gjithashtu shtoi: "Shumica e familjes sime ishin tifozë të Spurs dhe unë u rrita 15 minuta larg fushës, kështu që gjithmonë do të isha një tifoz i Spurs".[14] Ai deklaroi se Teddy Sheringham ishte idhulli i tij i fëmijërisë, duke e parë atë si "finalizues të madh" dhe si një model.[15] Jermain Defoe dhe David Beckham kanë qënë lojtarë të tjerë që kanë influencuar Kane në fëmijëri.[16] Kane gjithashtu ka folur për admirimin e tij për sulmuesin brazilian Ronaldo, duke shtuar se ai i shijonte videot e tij në YouTube: "Ai ishte një nga të parët që pash dhe mendova: 'Uau. Ai është golashënues, unë dua të jem golashënues."[17]
Kane e nisi karrierën e tij futbollistike me klubin lokal Ridgeway Rovers, kurse më pas kaloi te akademia e Arsenalit kur ai ishte tetë vjeç. Ai u hoq nga akademia pas vetëm një sezoni për shkak se ishte "pak mbipeshë" dhe "jo atletik" sipas Liam Brady, i cili në atë kohë ishte në krye të akademisë.[18] Trajneri Arsène Wenger deklaroi në vitin 2015 se ai ishte i zhgënjyer që klubi vendosi të largonte Kane.[19] Ai më pas zhvilloi një provë te Tottenham Hotspur, e cila fillimisht nuk ishte e suksesshme,[20] duke bërë që ai të kthehej te klubi i tij i parë, Ridgeway Rovers. Në vitin 2004, në moshën njëmbëdhjetë vjeç, Kane j'u bashkua akademisë së Watfordit për një provë disa javore, duke lënë mbresë në ndeshjen kundër Tottenhamit, gjë që bëri që Tottenhami t'i jepte një tjetër mundësi.[21][22] Ai luajti si mesfushor në sezonin e tij të parë me Tottenhamin, fillimisht në një pozicion të tërhequr, kurse më pas u aktivizua si mesfushor-sulmues.[20]
Në fillimet e tij te Tottenhami, Kane nuk u dallua si lojtar pasi ai nuk ishte as i madh fizikish edhe as i shpejtë, por trajnerët që punuan me të vunë re se ai kishte dëshirë për të përmirësuar çdo aspekt të lojës së tij.[7] Disa vite pasi ishte bërë pjesë e akademisë, Kane pati një rritje të madhe fizike që e bëri atë të gjatë dhe fizikisht të fortë.[23] Në sezonin 2008–09, ai luajti me ekipin nën-16 në turnamentin Copa Chivas në Meksikë dhe turnamentin Bellinzona në Zvicër, duke shënuar tre gola.[24] Në korrik 2009, në ditën e ditëlindjes së tij të 16të, Kane firmosi një kontratë shkolle me Tottenhamin.[25]
Në sezonin 2009–10, Kane luajti 22 ndeshje me ekipin nën-18, duke shënuar 18 gola.[26] Ai gjithashtu ishte në stol në dy ndeshje të ekipit të parë në këtë sezon.[27] Dy dyja ndeshjet ishin pjesë e Kupës së Ligës: e para më 27 tetor 2009 kundër Evertonit dhe e dyta kundër Bolton Wanderers më 24 shkurt 2010.[28][29]
Kane firmosi kontratën e parë si profesionist me klubin në korrik 2010.[30] Më 7 janar 2011, ai u huazua te Leyton Orient deri në fund të sezonit 2010–11.[31] Trajneri Russell Slade ishte "i lumtur" me mbërritjen e tij, duke deklaruar: "Besoj se ai do ketë ndikim me ne në muajt në vazhdim."[32] Ai bëri debutimin e tij me Orient më 15 janar në barazimin 1–1 kundër Rochdale, duke u aktivizuar si zëvëndësues në minutën e 73të në vend të Scott McGleish.[33] Një javë më vonë, Kane shënoi golin e tij të parë si profesionist kundër Sheffield Wednesday në ndeshjen e tij të parë si titullar; ai shënoi në minutën e 57të pas një krosimi të Dean Cox, duke ndihmuar Orient të fitonte 4–0.[34][35] Më 12 shkurt, ai shënoi një dopietë në fitoren 4–1 kundër Bristol Rovers, pasi ishte aktivizuar si zëvëndësues në minutën e 70të.[36] Ai e mbylli sezonin me pesë gola të shënuar në 18 ndeshje.[37]
Më 25 gusht 2011, Kane luajti ndeshjen e tij të parë zyrtare me Tottenhamin, duke u aktivizuar si titullar në ndeshjen kualifikuese të UEFA Ligës së Evropës kundër Hearts; gjatë ndeshjes, e cila u mbyll në barazim pa gola, ai fitoi një penallti të cilën nuk mundi t'a shënojë.[38] Ai luajti gjashtë ndeshje në Ligën e Evropës në atë sezon, duke shënuar edhe golin e parë me klubin që erdhi në fitoren 4–0 kundër Shamrock Rovers më 15 dhjetor 2011.[39]
Më 29 dhjetor, Kane dhe shoku i skuadrës Ryan Mason u dërguan në huazim te klubi i Championship, Millwall deri në përfundim të sezonit 2011–12.[40] Pasi bëri debutimin e tij kundër Bristol City, trajneri Kenny Jackett tha se ai bëri një "debutim shumë të mirë" dhe se ishte "i pafat që nuk shënoi". Ai gjithashtu shtoi se Kane është një "përforcim i rëndësishëm" për klubin për pjesën e dytë të sezonit. Kane shënoi shtatë gola në 14 ndeshjet e fundit të sezonit.[32] Ai e mbylli sezonin me nëntë gola në 27 ndeshje dhe u emërua "Lojtari i Sezonit" nga klubi.[41] Media vuri në dukje ecurinë pozitive të Kane në fundin e sezonit si një nga faktorët kryesor që ndihmoi Millwall të siguronte qëndrimin në Championship.[42]
Kane ishte pjesë e Tottenhamit në fazën përgatitore të sezonit 2012–13, duke shënuar një tregolësh në fitoren 6–0 kundër Southend United më 10 gusht 2012.[43] Ai bëri debutimin e tij në Premier Ligë më 18 gusht kundër Newcastle United; ai hyri në minutat e fundit të ndeshjes, me Tottenhamin që u mposht 2–1.[44][32]
Më 31 gusht, Kane u huazua te klubi tjetër i Premier Ligës, Norwich City, për një sezon.[45] Ai debutoi më 15 shtator në një ndeshje kundër West Ham United e cila u mbyll në barazim pa gola.[46] Kane theu kockën metarale në një ndeshje të Kupës së Ligës kundër Doncaster Rovers në ndeshjen e tij të dytë me klubin.[47] Kane u rikthye te Tottenhami për t'u rikuperuar nga ky dëmtim, dhe u rikthye në aksion për Norwichin më 29 dhjetor në humbjen 4–3 kundër Manchester Cityt.[48] Për shkak se Tottenhami nuk kishte mjaftueshëm lojtarë në sulm, Kane u rikthye nga huazimi në shkurt 2013, katër muaj më herët.[49]
Njëzetë ditë pasi ishte rikthyer te Tottenhami, Kane u bë pjesë e Leicester Cityt deri në fund të sezonit si përforcim për të ndihmuar klubin të ngjitej në elitë.[50] Ai debutoi më 26 shkurt duke shënuar një nga tre golat e fitores kundër Blackburn Rovers.[51] Kane u aktivizua në 13 ndeshje me Leicester, përfshirë tetë si zëvëndësues; ekipi arriti deri në gjysëm-finalen e play-off, por u eliminua nga Watfordi.[52]
Kane shënoi golin e tij të parë për Tottenhamin në White Hart Lane në një ndeshje të Kupës së Ligës kundër Hull City; goli i tij e dërgoi ndeshjen në kohën shtesë dhe më pas te penalltitë, ku Tottenhami fitoi 8–7, me Kane që shënoi një nga penalltitë.[53] Më 7 prill 2014, Kane u aktivizua për herë të parë si titullar në Premier Ligë ngs trajneri Tim Sherwood në fitoren 5–1 kundër Sunderlandit, duke shënuar edhe golin e tij të parë në Premier Ligë.[54] Në ndeshjen e rradhës, ai shënoi kundër West Bromwich Albion, duke ndihmuar ekipin të merrte një barazim pasi ishte në disavantazh të tre golave.[55] Ai shënoi në ndeshjen e tretë rresht më 19 prill, këtë herë në fitoren 3–1 në derbin e Londrës kundër Fulhamit.[56]
.jpg)
Kane luajti ndeshjen e tij të parë të sezonit 2014–15 si zëvëndësues kundër West Ham United në ndeshjen hapëse të kampionatit, duke asistuar golin e fitores së shënuar nga Eric Dier.[57] Ai shënoi në të dyja ndeshjet kundër ekipit qipriot AEL Limassol në fazën play-off të Ligës së Evropës: në ndeshjen e parë ai shënoi golin e fitors në minutën e 80të kurse në ndeshjen e dytë shënoi një nga golat e fitores 3–0, duke humbur edhe një penallti.[58] Kane shënoi një gol në minutat e fundit të fitores 3–1 kundër Nottingham Forestit në Kupën e Ligës në 24 shtator.[59] Më 23 tetor, Kane shënoi tregolëshin e parë në karrierë në fitoren 5–1 kundër Asteras Tripolit në fazën e grupeve të Ligës së Evropës.[60] Në minutat e fundit të ndeshjes, ai u detyrua të luante si portier pas përjashtimit me karton të kuq të Hugo Lloris dhe mbarimit të zëvëndësimeve; ai pësoi një gol me goditje dënimi nga Jerónimo Barrales.[60]
Më 2 nëntor, Kane hyri si zëvëndësues në pjesën e dytë në ndeshjen kundër Aston Villës dhe regjistroi golin e parë në Premier Ligë në minutën e 90të, duke i dhënë fitoren 2–1 ekipit.[61] Trajneri Mauricio Pochettino, i cili zëvëndësoi Sherwoodin pas një nisje negative të sezonit, deklaroi se goli i Kane e shpëtoi nga shkarkimi.[62] Kane më pas u bë titullar i rregullt në formacionin e Pochettinos; një javë më vonë, ai luajti ndeshjen e parë si titullar në Premier Ligë në humbjen 2–1 kundër Stoke Cityt,[63] kur më 23 nëntor, në ndeshjen e rradhës të tij si titullar, ai shënoi në fitoren 2–1 në transfertë ndaj Hull Cityt.[64] Nga 14 dhjetori e deri më 26, Kane shënoi në tre fitore me rezultatin 2–1 rresht, respektivisht kundër Swansea Cityt,[65] Burnley[66] dhe Leicester Cityt.[67] Më 1 janar 2015, Kane shënoi dy gola si dhe fitoi një penallti në fitoren 5–3 nga rivalëve dhe ekipit kryesues Çelsit,[68] e cila u pasua nga një dygolësh tjetër në suksesin 3–0 kundër West Bromwich Albion më 31 janar.[69] Tre ditë para ndeshjes me West Bromwich, Kane asistoi golin e Christian Eriksen në barazimin 2–2 kundër Sheffield United, duke ndihmuar Tottenhamin të kualifikohej në finalen e Kupës së Ligës.[70] Në fund të muajit, ai u emërua Lojtari i Muajit i Premier Ligës, duke e fituar këtë çmim për herë të parë në karrierë.[1]
Më 2 shkurt 2015, Kane rinovoi kontratën e tij me klubin deri në qershor 2020.[71] Pesë ditë më vonë, ai shënoi të dy golat e fitores 2–1 me përmbysje kundër Arsenalit në derbin e veriut të Londrës, duke regjistruar golin e 21të dhe të 22të në të gjitha kompeticionet.[72] Ai gjithashtu shënoi në ndeshjet kundër West Hamit dhe Liverpoolit, duke u shpallur sërisht Lojtari i Muajit në Premier Ligë;[1] ai u bë lojtari i katërt në historinë e Premier Ligës që e fiton këtë çmim në dy muaj rresht.[73] Tottenhami e humbi finalen e Kupës së Ligës kundër Çelsit më 3 mars,[74] të cilën Kane e përshkroi si "ndjesia më e keqe në botë".[75] Njëzet ditë më vonë, Kane regjistroi tregolëshin e parë në Premier Ligë në fitoren 4–3 kundër ish ekipit të tij Leicester City;[76] ai u ngjit në kuotën e 19 golave, duke u bërë kryegolashënuesi i kampionatit.[77]
Më 5 prill, Kane luajti ndeshjen e tij të parë si kapiten në barazimin pa gola kundër Burnley në Turf Moor.[78] Dy javë më vonë, ai shënoi golin e 30të të sezonit në suksesin 3–1 ndaj Newcastle United në St James' Park, duke u bërë lojtari i parë i Tottenhamit që e arrin këtë shifër që nga Gary Lineker në sezonin 1991–92.[79] Pas kësaj, Kane ishte një nga dy sulmuesit, sëbashku me Diego Costën e Çelsit, që u emërua në PFA Ekipin e Vitit të Premier Ligës.[80] Ai gjithashtu fitoi çmimin PFA Lojtari i Ri i Vitit.[81] Më 24 maj, Kane shënoi golin e vetëm të fitores në transfertë kundër Evertonit që konfirmoi vendin e pestë në renditje për Tottenhamin dhe kualifikimin në fazën e grupeve të Ligës së Evropës. Ky ishte goli i tij i 21të në kampionat, duke barazuar rekordin e Teddy Sheringham, Jürgen Klinsmann dhe Gareth Bale për golat e shënuar në një sezon të Premier Ligës për Tottenhamin.[82]
.jpg)
Në fazën përgatitore të ekipit në Australi, Kane tërhoqi një numër të madh tifozësh gjatë vizitës së tij në qëndrën tregtare të Westfield Sydney, duke bërë që klubi të dërgonte një makinë për t'a larguar.[83] Më 29 korrik, Tottenhami u ftua për ndeshjen All-Star të MLS, duke u mposhtur me rezultatin 2–1; Kane shënoi golin e vetëm të ekipit të tij në minutën e 37të.[84]
Kane ndryshoi numrin e fanellës nga 18 në 10, numër që ishte mbajtur për herë të fundit nga sulmuesi Emmanuel Adebayor. Në një intervistë me The Daily Telegraph, ai tha se e ndryshoi numrin "për t'u bërë një legjendë e klubit".[85] Kane ishte sulmuesi i vetëm i ekipit para nisjes së sezonit, me Adebayor dhe Roberto Soldado që ishin në shitje. Ai gjithashtu ishte edhe kapiteni i tretë pas Hugo Lloris dhe Jan Vertonghen.[83] Kane shënoi golin e parë zyrtar të sezonit më 26 shtator në fitoren 4–1 me përmbysje kundër Manchester Cityt, duke i dhënë fund ecurisë negative me 748 minuta pa shënuar.[86] Tetë ditë më vonë, ai shënoi një autogol pas një goditje këndi të Jonjo Shelvey, me Tottenhamin që mori një barazim 2–2 pasi fillimisht ishin në disavantazh.[87]
Më 25 tetor, Kane shënoi tre gola, përfshirë një penallti të cilën e fitoi vetë, në fitoren 5–1 kundër Bournemouth në Dean Court.[88] Ai shënoi edhe në fitoren 3–1 kundër Aston Villës tetë ditë më vonë, duke arritur në shifrën e pesë golave.[89] Më 8 nëntor, ai i dha avantazhin ekipit në ndeshjen me Arsenalin, edhe pse ndeshja në fund u mbyll në barazim;[90] ai mposhti Petr Čech me një gjuajtje direkte pas një vertikalizimi nga Danny Rose.[91]
Tetëmbëdhjetë ditë më pas, ai shënoi golin e nëntë në gjashtë ndeshjet e fundit, të vetmin e fitores kundër Qarabağ FK, duke kualifikuar Tottenhamin në fazën me eliminim direkt të Ligës së Evropës.[92] Ndeshja e tij e 100të me klubin erdhi më 19 dhjetor në suksesin në transfertë ndaj Southampton, duke shënuar një nga dy golat e ndeshjes.[93] Një javë më vonë, ai shënoi dy gola në fitoren 3–0 kundër ish klubit të tij Norwich City; ai arriti në shifrën 27 gola në Premier Ligë për vitin 2015, duke thyer rekordin e klubit të vendosur nga Sheringham.[94] Më 10 janar 2016, ai shënoi golin e 50të për klubin në barazimin 2–2 kundër Leicester në raundin e tretë të Kupës FA.[95]
Kane u shpall Lojtari i Muajit i Premier Ligës në mars 2016, pasi shënoi pesë gola në katër ndeshje, përfshirë një "gol me hark nga jashtë zone" kundër Arsenalit, të cilin ai e përshkroi si një nga "golat më të bukur teknik" që kishte shënuar.[1][96] Kane mē pas shënoi në barazimin 1–1 kundër Liverpoolit në Anfield, duke regjistruar golin e 22të në kampionat, çka e bëri atë lojtarin me më shumë gola në një sezon në Premier Ligë për Tottenhamin.[97]
Kane u shpall fitues i Këpucës së Artë të Premier Ligës, duke shënuar 25 gola, një më shumë se rivalët e tij Sergio Agüero dhe Jamie Vardy.[98] Ai gjithashtu u emërua në PFA Ekipin e Vitit për të dytin sezon rresht,[99] si dhe e ndihmoi Tottenhamin t'a mbyllte kampionatin në vendin e tretë, vend që solli kualifikimin në UEFA Ligën e Kampioneve.[100]
.JPG)
Kane e nisi ndeshjen e parë të sezonit si kapiten në mungesë të Hugo Lloris; Tottenhami mposhti minimalisht Crystal Palace me një gol të Victor Wanyama të asistuar nga Kane.[101] Ai shënoi golin e parë të sezonit në javën e katërt të Premier Ligës, të katërtin e fitores 4–0 kundër Stoke Cityt në transfertë.[102]
Më 14 shtator, Kane bëri debutimin e tij në Ligën e Kampioneve në disfatën 2–1 kundër Monacos në Wembley Stadium.[103] Katër ditë më vonë, ai shënoi golin e fitores kundër Sunderlandit; ai u zëvendësua në pjesën e dytë pasi ndrydhi kyçin pasi tentoi një ndërhyrje ndaj Papy Djilobodjit.[104] U raportua se ai kishte dëmtuar ligamentet e kyçit dhe se koha e rikuperimit do të ishte gjashtë deri në tetë javë.[105] Pasi humbi pesë ndeshje në kampionat dhe tre në fazën e grupeve të Ligës së Kampioneve, Kane u rikthye në barazimin 1–1 kundër Arsenalit, duke shënuar me penallti.[106] Më 22 nëntor, Kane shënoi golin e parë në Ligën e Kampioneve në ndeshjen e kthimit kundër Monacos në Stade Louis II, që nuk mjaftoi për të shmangur humbjen 2–1 dhe eliminimin nga kompeticioni.[107]
Më 1 dhjetor, Kane firmosi një kontratë të re me Tottenhamin deri në vitin 2022.[108] Një muaj më vonë, ai luajti ndeshjen e tij të 100të në Premier Ligë,[109] duke shënuar edhe golin e parë të vitit 2017 kundër Watfordit në minutën e 27të, e cila u ndoq nga një gol i dytë në minutën e 33të.[110] Më 14 janar, ai shënoi një tregolësh në fitoren 4–0 kundër West Bromwich.[111] Tregolëshi i tij i rradhës erdhi në fitoren 4–0 kundër Stoke Cityt më 26 shkurt;[112] ishte tregolëshi i tij i tretë në nëntë ndeshjet e fundit në Premier Ligë, dhe i dyti në dy ndeshjet e fundit, duke arritur edhe 100 gola në karrierën e tij me klube.[113] Në fund të muajit ai mori sërisht çmimin "Lojtari i Muajit i Premier Ligës" për herë të katërt në karrierë.[1]
Në mars, ai pësoi një dëmtim në kyç gjatë ndeshjes së Kupës FA kundër Millwall.[114] Ai u rikthye si titullar për herë të parë pas dëmtimit më 15 prill në takimin ndaj Bournemouth, duke shënuar golin e 20të të sezonit në Premier Ligë, që e bëri atë lojtarin e katërt në historinë e kompeticionit që shënon 20 gola në tre sezone rresht pas Alan Shearer, Thierry Henry dhe Ruud van Nistelrooy.[115]
Më 20 prill, Kane u emërua në PFA Ekipin e Vitit për të tretin sezon rresht.[116] Ai gjithashtu u nominua për çmimet PFA Lojtari i Vitit i Lojtarëve dhe PFA Lojtari i Ri i Vitit.[117][118] Dy ditë më pas, ai shënoi në humbjen 4–2 kundër Çelsit në gjysëm-finalen e Kupës FA në Wembley Stadium, që do të thoshte se Tottenhami do të mbyllte një tjetër sezon pa trofe.[119] Në ndeshjen e fundit në White Hart Lane më 14 maj, Kane shënoi të dytin e fitores 2–1 kundër Manchester United.[120] Me dy ndeshje nga fundi, Kane ishte në kuotën e 22 golave, dy më pak se Romelu Lukaku. Megjithatë, pasi shënoi shtatë gola në dy ndeshjet e fundit, respektivisht katër në fitoren 6–1 kundër Leicester Cityt[121] dhe tre në fitoren 7–1 kundër Hull Cityt,[122] Kane e mbylli sezonin me 29 gola në Premier Ligë, duke u bërë lojtari i pestë në histori që fiton Këpucën e Artë për të dytin sezon rresht.[123]
.jpg)
Kane e nisi sezonin e ri pa shënuar në tre ndeshjet e para, por më pas regjistroi dopieta në tre nga katër ndeshjet e rradhës në të gjitha kompeticionet.[124][125][126] Goli i tij i parë sezonal që erdhi kundër Evertonit më 9 shtator ishte goli i 100të me Tottenhamin në ndeshjen e 169të.[127] Më 26 shtator, Kane shënoi tregolëshin e parë në Ligën e Kampioneve në fitoren 3–0 kundër ekipit qipriot APOEL në fazën e grupeve.[128] Kane u shpall Lojtari i Muajit i Premier Ligës për herë të pestë në shtator 2017, dhe e quajti këtë muaj – gjatë së cilës shënoi 13 gola në 10 ndeshje – si më të mirin e karrierës së tij.[129]
Më 23 dhjetor, Kane shënoi një tregolësh në fitoren 3–0 në transfertë ndaj Burnley, duke barazuar rekordin e Alan Shearer për numrin e golave të shënuar në Premier Ligë në një vit (36).[130] Ai e theu rekordin në ndeshjen e rradhës kundër Southamptonit, duke shënuar një tjetër tregolësh me Tottenhamin që fitoi 5–2 në shtëpi; ai e mbylli vitin me 39 gola në Premier Ligë.[131] Tregolëshi ndaj Southamptonit ishte i gjashti për të në vitin 2017 (i teti në të gjitha kompeticionet), duke u bërë lojtari i parë në historinë e Premier Ligës që e arrin këtë numër.[132] Ai e mbylli vitin kalendarik ai golashënuesi më I mirë me 56 gola, duke thyer dominimin shtatë vjeçar të Lionel Messit dhe Cristiano Ronaldos.[133]
Në janar 2018, Kane shënoi dy gola në fitoren 4–0 në shtëpi kundër Evertonit, duke u bërë golashënuesi më i mirë i Tottenhamir në epokën e Premier Ligës; rekordi më parë mbahej nga Sheringham me 97 gola.[134] Më 4 shkurt, ai shënoi me penallti në minutat shtesë për t'i dhënë Tottenhamit një barazim 2–2 kundër Liverpoolit në transfertë, duke arritur në kuotën e 100 golave në Premier Ligë. Ai e arriti këtë shifër në vetëm 141 ndeshje, duke u bërë lojtari i dytë më i shpejtë pas Alan Shearer (126).[135] Në përfundim të sezonit, ai u emërua në PFA Ekipin e Vitit për të katërtën herë rresht, duke ndarë sulmin me Mohamed Salah dhe Sergio Agüeron.[136] Më 8 qershor, Kane firmosi një kontratë të re me klubin deri në qershor 2024.[137]
Kane e nisi sezonin duke luajtur në ndeshjen hapëse të Premier Ligës kundër Newcastle United dhe shënoi golin e parë një javë më pas kundër Fulhamit; me këtë gol, ai i dha fund tabusë së mos shënimit të një goli në Premier Ligë në muajin gusht.[138] Në ndeshjen e rradhës, Kane shënoi në një fitore 3–0 kundër Manchester United; ky ishte goli i tij i parë në Old Trafford si dhe fitorja e tretë në histori e Tottenhamit në këtë stadium, dhe më e madhja në 46 vite.[139][140] Më 1 janar 2019, Kane shënoi në një ndeshje kundër Cardiff City duke u bërë lojtari i parë në Premier Ligë që shënon kundër të gjitha ekipeve me të cilat është ndeshur.[141] Dymbëdhjetë ditë më vonë, ai dëmtoi ligamentin e kyçin të këmbës gjatë një ndeshje kundër Manchester United, duke humbur disa ndeshje të rëndësishme si pasojë, përfshirë edhe ndeshjen në shtëpi të raundit të 16-tave të Ligës së Kampioneve.[142]
Ai u rikthye në aksion më 23 shkurt në ndeshjen ndaj Burnley, duke e nisur si titullar; në minutën e 65të ai shënoi golin e barazimit të përkohëshëm edhe pse në fund Tottenhami u mposht 2–1.[143] Pas kësaj, Kane shënoi golin e vetëm në fitoren minimale kundër Borussia Dortmundit në transfertë në ndeshjen e dytë të raundit të 16-tave të Ligës së Kampioneve, me Tottenhamin që u kualifikua në çerek-finale me rezultatin e përgjithshëm 4–0. Kjo ishte çerek-finalja e dytë e klubit në histori dhe ky gol e bëri Kane golashënuesin më të mirë të klubit në kompeticionet evropiane me 24 gola.[144] Më 9 prill, në ndeshjen e parë të çerek-finales së kompeticionit kundër Manchester Cityt, Kane pësoi një tjetër dëmtim në kyç, duke mbyllur para kohe sezonin e tij në Premier Ligë.[145] Ai u rikthye në kohë për finalen e Ligës së Kampioneve kundër Liverpoolit më 1 qershor, duke luajtur si titullar për 90 minuta, një vendim që shkaktoi debate në media,[146][147] me Tottenhamin që u mposht 2–0.
Kane shënoi dy gola në fitoren 3–1 kundër Aston Villës në ndeshjen hapëse të sezonit të ri; goli i tij ishte i pari në stadiumin e ri të Tottenhamit.[148] Më 1 janar 2020, Kane pësoi një dëmtim të rëndë në tendinën e pjesës së jashtme të gjurit në humbjen minimale në transfertë kundër Southamptonit;[149] ai u operua dhe qëndroi jashtë fushës për disa muaj.[150] Për shkak të Pandemisë së COVID-19 e cila i shtyu të gjitha ndeshjet e kampionatit, Kane nuk luajti asnjë ndeshje deri më 19 qershor.[151] Katër ditë më vonë, ai luajti ndeshjen e 200të me Tottenhamin në të gjitha kompeticionet, duke shënuar në një fitore 2–0 kundër West Hamit; ky ishte goli i tij i parë për vitin 2020.[152][153]
Kane shënoi golin e parë të sezonit në ndeshjen e Ligës së Evropës kundër Lokomotiv Plovdiv, duke ndihmuar ekipin të fitonte 2–1 pasi Plovdiv kishte dy lojtarë të përjashtuar me karton të kuq.[154] Goli i tij i parë në kampionat erdhi në fitoren 5–2 kundër Southamptonit; ai gjithashtu asistoi të katër golat e tjerë të shënuar nga Son Heung-min. Kjo ishte hera e parë që një lojtar kishte asistuar të njëjtin shok ekipi katër herë. Ai u bë gjithashtu lojtari i gjashtë (dhe anglezi i parë) që asiston katër gola në një ndeshje të Premier Ligës.[155]
Kane shënoi një tregolësh kundër Maccabi Haifa në raundin play-off të Ligës së Evropës më 1 tetor, duke kualifikuar ekipin në fazën e grupeve.[156] Tre ditë më vonë, ai shënoi dy gola në fitoren 6–1 kundër Manchester United në transfertë, e cila ishte fitorja më e madhe e Tottenhamit në Old Trafford dhe rezultati më i mirë që nga viti 1932.[157][158] Ai shënoi golin e 200të me klubin në ndeshjen e tij të 300të në një fitore 3–1 kundër ekipit bullgar Ludogorets në fazën e grupeve të Ligës së Evropës.[159] Më 6 dhjetor, Kane shënoi në fitoren 2–0 në derbin e Londrës Veriore kundër Arsenalit, duke u bërë golashënuesi më i mirë i derbit me 11 gola.[160] Ky ishte gjithashtu goli i tij i 100të në ndeshjet në shtëpi për Tottenhamin dhe i 250ti në karrierë.[161]
Më 2 janar 2021, Kane fillimisht shënoi me penallti dhe më pas asistoi në një fitore 3–0 kundër Leeds United në shtëpi. Ky ishte goli dhe asisti i tij i 10të sezonal, numra të cilat e bënë atë lojtarin e parë në pesë ligat e mëdha që arrin shifra dyshifrore në gola dhe asist për këtë sezon.[162] Më 7 mars, Kane shënoi një dopietë në fitoren 4–1 kundër Crystal Palace; goli i tij i dytë u asistua nga Son Heung-min, i cili ishte goli i 14të i shënuar nga kombinimet midis tyre, që vendosi një tjetër rekord në Premier Ligë.[163] Më 23 maj, Kane shënoi në fitoren 4–2 kundër Leicester Cityt për t'a mbyllur sezonin me 23 gola në Premier Ligë, duke fituar Këpucën e Artë të tretë në karrierë.[164] Ai gjithashtu fitoi çmimin Organizatori i Sezonit si lojtari me më shumë asiste. Kane u bë lojtari i parë që fiton çmimet e Këpucës së Artë dhe Organizatorit të Sezonit që nga krijimi i këtij të fundit në vitin 2018.[165]
Sezoni 2021–22 parapriu me një çështje rreth dëshirës së Kane për t'u larguar nga klubi, duke thënë se ai kishte një "marrëveshje zotërinjsh" me presidentin Daniel Levy që do t'a lejonte atë të largohej në verë.[166] Kjo marrëveshje nuk u zbatua dhe Levy injoroi interesimin e Manchester Cityt për lojtarin,[167][168] përfshirë edhe një ofertë 127 milion £ për të.[169] Kane nuk mori pjesë në fazën përgatitore si dhe nuk luajti në dy ndeshjet e para të sezonit.[170][171] Ai debutoi më në fund më 22 gusht duke u aktivizuar si zëvëndësues kundër Wolverhampton Wanderers.[172] Kane njoftoi dëshirën e tij për të qëndruar te Tottenhami më 25 gusht pasi tratativa për t'u transferuar te Manchester City nuk u konkretizua; ai deklaroi: "Do të qëndrojë te Tottenhami këtë verë dhe do të përqëndrohem 100% për të ndihmuar ekipin të arrij sukses."[173] Një ditë më pas, Kane debutoi në UEFA Ligën e Konferencave kundër Paços de Ferreira, duke shënuar dy gola dhe kualifikuar ekipin në fazën e grupeve.[174] Më 30 shtator, në ndeshjen e dytë të fazës së grupeve të këtij kompeticioni, Kane shënoi tre gola në 20 minuta në fitoren 5–1 kundër ekipit slloven Mura.[175] Ky ishte tregolëshi i parë i shënuar në historinë e Ligës së Konferencave, duke e bërë atë si lojtarin e parë që ka shënuar tre gola në një ndeshje të të tre kompeticioneve madhore të UEFA-s.[176]
Më 17 tetor, Kane shënoi golin e tij të parë në Premier Ligë për sezonin 2021–22 në një fitore 3–2 në transferë kundër Newcastle United.[177] Goli i tij i dytë erdhi më 19 dhjetor në barazimin 2–2 në shtëpi kundër Liverpoolit.[178] Më 19 shkurt 2022, Kane shënoi një dopietë, përfshirë edhe golin e fitores në minutën e 95të, në ndeshjen emocionuese kundër Manchester Cityt e cila u mbyll me fitoren 3–2 të Tottenhamit.[179] Kjo ishte humbja e parë e Cityt në kampionat pas 15 ndeshjesh. Një javë më pas, Kane shënoi dhe asistoi golin e Son në ndeshjen ndaj Leeds United; kjo ishte hera e 37të që ata kishin kombinuar sëbashku për të shënuar, duke vendosur një rekord të ri në Premier Ligë.[180] Më 16 mars, Kane shënoi një nga dy golat e fitores 2–0 kundër Brighton në transfertë; ky ishte goli i tij i 95të në ndeshjet si vizitor në Premier Ligë, duke thyer rekordin e Wayne Rooney.[181]
Kane e nisi sezonin duke shënuar në minutën e 96të të derbit të Londrës kundër Çelsit në Stamford Bridge, duke i dhuruar një barazim 2–2 Tottenhamit.[182] Ky ishte goli i tij i 184të në Premier Ligë me Tottenhamin, duke barazuar rekordin e Sergio Agüeros për numrin e golave të shënuar me një klub të vetëm.[183] Ai e theu rekordin në ndeshjen e rradhës, duke shënuar golin e vetëm në fitoren minimale kundër Wolverhampton Wanderers.[184] Më 5 shkurt 2023, Tottenhami njoftoi se Kane ishte bërë golashënuesi më i mirë në historinë e klubit, duke parakaluar Jimmy Greaves me golin e tij të 267të (i 200ti në Premier Ligë) të shënuar kundër Manchester Cityt në shtëpi.[185] Megjithatë, ky fakt u kundërshtua pasi Tottenhami nuk kishte llogaritur dy golat e shënuar nga Greaves në FA Charity Shield 1962, që do t'a kishin vendosur në shifrën e 268 golave.[186][187][188] Më 11 mars, Kane shënoi golin e tij të 269të dhe 270të në fitoren 3–1 kundër Nottingham Forest duke u bërë de facto golashënuesi më i mirë i historisë së klubit.[189] Ai e mbylli sezonin me 30 gola të shënuar në Premier Ligë, duke u renditur i dyti mbrapa Erling Haaland; ai u bë lojtari i parë që shënon 30 gola në dy sezone të ndryshme në Premier Ligë me formatin me 38 ndeshje.[190]
Pas largimit të Karim Benzemas nga Real Madridi më 6 qershor, trajneri Carlo Ancelotti i kërkoi klubit të fillonte negociatat për transferimin e Kane.[191][192] Në fund të muajit, Bayern München bëri një ofertë 70 milion £ për lojtarin, i cili ishte në vitin e fundit të kontratës; kjo ofertë u refuzua.[193] Në korrik, Kane ishte pjesë e ekipit për fazën përgatitore,[194] kurse presidenti i nderit i Bayernit Uli Hoeneß deklaroi se kishte pasur bisedime midis klubit dhe këshilltarëve të lojtarit, duke shtuar se Kane dëshiron të transferohet te Bayern München.[195][196][197] Më 6 gusht, Kane shënoi katër gola në fitoren 5–1 kundër Shakhtar Donetsk në ndeshjen e parafundit miqësore para nisjes së Premier Ligës.[198] Një ditë më pas, Tottenhami refuzoi një tjetër ofertë nga Bayerni,[199] i cila ishte 86 milion £ sipas raportimeve.[200] Më 10 gusht, u raportua se Bayern München dhe Tottenhami kishin arritur një marrëveshje paraprake për transferimin e Kane për më shumë se 100 million € (86.4 milion £).[201] Largimi i tij u konfirmua edhe nga trajneri i ri Ange Postecoglou në një konferencë për shtyp.[202] Më 12 gusht, Kane postoi një video lamtumire në Instagram duke falenderuar stafin dhe tifozët për kohën e tij te Tottenhami.[203] Tottenhami gjithashtu lëshoi një deklaratë për shtyp duke falenderuar Kane për shërbimin e tij.[204] Presidenti i klubit Daniel Levy deklaroi se Kane dëshironte një sfidë të re dhe vendosi të mos e rinovonte kontratën aktuale me klubin.[205]
Pasi Bayern München dhe Tottenhami arritën marrëveshjen për transferimin e lojtarit më 10 gusht, Kane ra dakort për kushtet personale dhe fluturoi në Mynih në ditë më pas.[206] Më 12 gusht, Bayerni zyrtarizoi transferimin kurse Kane firmosi një kontratë katër-vjeçare.[207][208] Kane u bë transferimi më i shtrenjtë në historinë e Bundesligës, duke kushtuar 100 milion € plus 10 milion € bonuse, duke thyer transferimin e Lucas Hernandez te Bayerni për 80 milion € në vitin 2019.[209][210] Ai u në anglezi i tretë në historinë e klubit, pas Owen Hargreaves dhe Omar Richards.[211]
Kane debutoi në të njëtën ditë kur u zyrtarizua si lojtar, duke u aktivizuar si zëvëndësues në minutën e 64të kundër RB Leipzig në Superkupën e Gjermanisë, me Bayernin që u mposht 3–0.[212] Ai shënoi golin e parë në ndeshjen hapëse të Bundesligës si dhe asistoi golin e Leroy Sanés duke ndihmuar ekipin të fitonte 4–0 kundër Werder Bremenit në transfertë.[213] Më 27 gusht, Kane shënoi dopietën e parë si futbollist i Bayernit në fitoren 3–1 kundër Augsburgut në Allianz Arena,[214] duke u bërë lojtari i tretë i klubit, pas Gustav Jung dhe Adolfo Valencia, që shënon tre gola në dy ndeshjet e para në kampionat.[215]
Në janar 2010, Kane u thirr nga ekipi nën-17 i Anglisë për të luajtur në Turnamentin Algarve në Portugali.[216] Ai humbi UEFA Kampionatin Evropian nën-17 për shkak të një sëmundje, me Anglinë që u shpall fitues në mungesë të tij.[217] Ai shënoi gjithsej tre gola në gjashtë ndeshje me ekipin nën-17.[218] Kane më pas u bë pjesë e ekipit nën-19 dhe shënoi dy gola në fitoren 6–1 kundër Shqipërisë më 8 tetor 2010.[219] Kane luajti një rol të rëndësishëm me ekipin nën-19 që arriti në gjysëm-finalen e Kampionatit Evropian nën-19 në Estoni në verën e vitit 2012. Ai shënoi golin e fitores kundër Francës në ndeshjen e tretë të fazës së grupeve duke kualifikuar ekipin në gjysëm-finale.[220] Ai luajti 14 ndeshje dhe shënoi 6 gola me ekipin nën-19.[221][218]
Më 28 maj 2013, Kane ishte pjesës e listës me 23 lojtarë të thirrur nga trajneri Peter Taylor për të luajtur në Kupën e Botës nën-20.[222] Ai debutoi më 16 qershor në fitoren 3–0 kundër Uruguajit në ndeshjen e fundit miqësore para fillimit të turnamentit.[223] Kane asistoi golin e Luke Williams në ndeshjen hapëse të grupit kundër Irakut më 23 qershor.[224] Ai më pas shënoi në ndeshjen e dytë kundër Kilit pas një asisti të Ross Barkley, duke ndihmuar ekipin të barazonte.[225] Anglia e mbylli grupin E në vendin e fundit, duke u eliminuar nga turnamenti. Më 13 gusht, Kane bëri debutimin e tij me ekipin nën-21 në një ndeshje kundër Skocisë.[221] Ai u aktivizua si zëvëndësues në minutën e 58të duke ndihmuar Anglinë të fitonte 6–0.[226] Më 10 tetor, ai shënoi një tregolësh kundër San Marinos në kualifikueset e UEFA Kampionatit Evropian nën-21 2015.[227]
Kane u emërua në ekipin që do të merrte pjesë në Kampionatin Evropian nën-21 2015 në Republikën Çeke, pavarësisht kundërshtimeve nga trajneri i klubit të tij Mauricio Pochettino.[228] Ai u aktivizua në të gjitha ndeshjet e ekipit, duke luajtur në çdo minutë, me Anglinë që u eliminua në fazën e grupeve duke u renditur në vendin e fundit.[229][230][231]
Kane kishte mundësi për të luajtur me Republikën e Irlandës për shkak se babai i tij ka lindur në Galway,[10] por në gusht 2014, ai deklaroi se donte të bëhej pjesë e kombëtares angleze.[232]
.jpg)
Pas një ecurie të mirë me Tottenhamin në sezonin 2014–15, Kane mori ftesën e parë në mars 2015 nga trajneri Roy Hodgson për ndeshjet kualifikuese të Euro 2016 kundër Lituanisë dhe ndeshjen miqësore kundër Italisë.[233] Ai debutoi në Wembley Stadium kundër Lituanisë, duke shënuar me kokë pas një krosimi të Raheem Sterling 80 sekonda pasi kishte hyrë në fushë si zëvëndësues.[234] Një ditë para ndeshjes me Italinë, Hodgson konfirmoi se Kane do t'a niste takimin si titullar në sulm përkrah Wayne Rooneyt;[235] ai luajti 90 minuta të plota në barazimin 1–1 në Torino.[236]
Në ndeshjen e tij të rradhës më 5 shtator, Kane shënoi një nga golat e fitores 6–0 kundër San Marinos, fitore e cila kualifikoi Anglinë në UEFA Euro 2016.[237] Ai shënoi golin e tretë me ekipin kombëtar në ndeshjen e rradhës kualifikuese kundër Zvicrës tre ditë më pas, të cilën Anglia e fitoi 2–0.[238] Në ndeshjen e fundit kualifikuese kundër Lituanisë, Kane kontriboi në një nga golat e fitores 3–0 të Tre Luanëve; gjuajtja e tij përfundoi në shtyll dhe më pas goditi portierin lituanez Giedrius Arlauskis, i cili shkaktoi autogol. Anglia e mbylli grupin kualifikues duke i fituar të dhjeta ndeshjet.[239]
Më 22 maj 2016, Kane shënoi golin e parë të fitores 2–1 kundër Turqisë por më pas humbi edhe një penallti, duke u bërë lojtari i parë që humbet një penallti për Anglinë që nga Frank Lampard në vitin 2010, dhe i pari që godet jashtë porte që nga Peter Crouch në vitin 2006.[240] Në Kampionatin Evropian që u mbajt në Francë, Kane u caktua si lojtari që do të ekzekutonte goditjet nga këndi për ekipin, një vendim që u kritikua nga analistët,[241] por qê u mbrojt nga trajneri Hodgson, i cili tha se Kane ishte më i miri për atë rol.[242]
Më 10 qershor 2017, Kane luajti ndeshjen e tij të parë si kapiten në ndeshjen kualifikuese të Kupës së Botës 2018 kundër Skocisë në Hampden Park, duke shënuar një gol në minutat shtesë që i dha ekipit një barazim 2–2.[243] Më 5 tetor, ai shënoi golin e fitores kundër Sllovenisë që vulosi kualifikimin e Anglisë në Kupën e Botës 2018.[244]
Kane u emërua në ekipin me 23 lojtar që do të luanin në Kupën e Botës 2018 dhe u vendos si kapiten.[245][246] Ai shënoi dy gola në fitoren 2–1 kundër Tunizisë në ndeshje e parë të fazës së grupeve.[247] Në ndeshjen e dytë më 24 qershor, Kane shënoi një tregolësh në fitoren 6–1 kundër Panamasë, e cila ishte një fitore rekord për Anglinë në një Kupë Bote.[248][249] Ai u bë lojtari i tretë i Anglisë që shënon tre gola në një ndeshje të Kupës së Botës pas Geoff Hurst në finalen e edicionit 1966 dhe Gary Lineker në edicionin 1986.[250]
Kane shënoi golin e gjashtë të turnamentit në ndeshjen kundër Kolumbisë në raundin e 16-tave. Ndeshja u mbyll në barazim 1–1 dhe Anglia u kualifikua pas fitoi 4–3 me penallti; kjo ishte hera e parë që Anglia fitonte një ndeshje në Kupën e Botës nga gjuajtjet e penalltive.[251] Anglia e mbylli turnamentin në vendin e katërt pasi humbi finalen e vogël 2–0 kundër Belgjikës.[252] Kane fitoi Këpucën e Artë si golashënuesi më i mirë i turnamentit me gjashtë gola, duke u bërë lojtari i parë anglez që arrin këtë gjë që nga Gary Lineker në vitin 1986.[253][254]
Shtatori 2018 solli krijimin e një turnamentit të ri të quajtur UEFA Liga e Kombeve. Anglia luajti ndeshjen e parë në këtë turnament më 8 shtator kundër Spanjës; Kane luajti 90 minuta si kapiten, pa mundur të shmangë humbjen 2–1.[255] Në ndeshjen e kthimit më 15 tetor, Kane asistoi dy nga tre golat e fitores 3–2 në Estadio Benito Villamarín.[256] Më 14 nëntor, para fillimit të ndeshjes miqësore kundër Shteteve të Bashkuara, Kane i dhuroi Wayne Rooneyt Këpucën e Artë të Anglisë si nderim për 53 golat e shënuar nga ai që e bënë golashënuesin më të mirë të të gjitha kohërave të Anglisë. Në intervistën pas ndeshje, Rooney deklaroi se ai dëshironte që Kane t'ja çmimin pasi besonte se ai do t'a thyente rekordin e tij.[257] Tre ditë më pas, Anglia mposhti Kroacinë 2–1 dhe u kualifikua në fazën finale; Kane fillimisht asistoi golin e Jesse Lingard dhe më pas shënoi vetë të dytin.[258]
Në Kualifikueset e UEFA Euro 2020, Kane ishte kapiteni i Anglisë në ndeshjen e 1000të të Tre Luanëve kundër Malit të Zi, duke udhëhequr ekipin drejt fitores me një tregolësh. Ai arriti në kuotën e 31 golave me ekipin kombëtar, duke u bërë golashënuesi i gjashtë më i mirë në histori.[259] Kjo fitore gjithashtu vulosi kualifikimin e Anglisë në UEFA Euro 2020.[260] Kane u dallua gjatë kësaj faze kualifikuese, duke shënuar në çdo ndeshje; ai e mbylli fushatën me 12 gola, duke barazuar rekordin e ekipit kombëtar për numrin e golave të shënuar në një vit.[261]
Në turnament, Kane shënoi në fitoren 2–0 kundër Gjermanisë në raundin e 16-tave më 29 qershor 2021. Ky ishte goli i tij i parë në një Kampionat Evropian.[262] Ai shënoi edhe dy të tjerë në fitoren 3–0 kundër Ukrainës në çerek-finale më 3 korrik.[263] Në gjysëm-finale kundër Danimarkës, Kane shënoi golin e fitores, duke e kualifikuar Anglinë në finale, e cila ishte e para në një turnament madhor që nga finalja e FIFA Kupës së Botës 1966.[264] Në finale, Anglia u mposht me penallti nga Italia pasi koha e rregullt dhe shtesa u mbyll në barazim 1–1; Kane shënoi penalltinë e tij, por pa mundur të shmangte humbjen 3–2.[265]
.jpg)
Në dy ndeshjet e fundit kualifikuese të Kupës së Botës 2022, Kane shënoi dy tregolësha rresht (një tregolësh perfekt ndaj së parës dhe katër gola ndaj së dytës), respektivisht në fitoren 5–0 në shtëpi kundër Shqipërisë[266] dhe fitoren 10–0 në transfertë kundër San Marinos.[267] Anglia u kualifikua në turnament si fitues i grupit. Në qershor 2022, në fazën fillestare të Ligës së Kombeve, Kane shënoi në ndeshjen e grupit kundër Gjermanisë, duke u bërë lojtari i dytë në historinë e Anglisë, pas Wayne Rooneyt, që shënon 50 gola.[268] Në Kupën e Botës 2022, Kane shënoi dy gola, duke barazuar rekordin e Rooneyt; Anglia u eliminua nga Franca në çerek-finale, ndeshje në të cilën Kane shënoi golin e vetëm të ekipit të tij por humbi edhe një penallti.[269]
Më 23 mars 2023, Kane shënoi në fitoren 2–1 të Anglisë kundër Italisë në kualifikueset e Euro 2024; kjo ishte fitorja e parë e Tre Luanëve në tokën e Italisë që nga viti 1961.[270] Ky ishte goli i tij i 54të me Anglinë, i cili e bëri atë golashënuesin më të të gjitha kohërave të ekipit kombëtar.[271] Kane e arriti këtë rekord duke luajtur 39 ndeshje më pak se Rooney dhe duke pasur një mesatare 0.7 gola për ndeshje.[272]
I pyetur për Kane, ish trajneri i tij në fëmijëri Alex Inglethorpe ka deklaruar:
Kur ai erdhi për herë të parë në në ekipin nën-18 vjeç kur ishte 15 vjeç, ai u dallua në kuptimin që dukej paksa i çuditshëm. Ai lëvizte paksa çuditshëm, ishte pak i rëndë. Por duke parë më afër, ai kishte shumë aftësi, një teknikë të shkëlqyer. Unë mendoj se ai i habiti njerëzit se sa i mirë ishte. Taktikisht ai ishte shumë fleksibël. Ai shpesh luante në mesfushë. Mbaj mend që e pashë një herë duke luajtur si një mesfushor mbrojtës.[7]
Kane hasi vështirësi në akademinë e Tottenhamit në vitet e tij të para të adoleshencës. Disa faktor për këtë gjë ishin mungesa e zhvillimit fizik dhe shpejtësia. Megjithatë, ai fitoi respektin e trajnerëve me teknikën e tij dhe dëshirën për t'u përmirësuar.[7]
Në shkurt 2013, Talksport shkruajti se Kane luante më mirë si sulmues i dytë, pavarësisht se mund të luante në qëndër ose edhe në krah.[273] Ata gjithashtu shtuan se ai preferonte të gjuante brënda zone edhe pse mund të gjuante saktësisht edhe nga distanca.[273] Raporti vuri në dukje se pavarësisht shpejtësisë së tij, Kane nuk ishte efikas në duelet ajërore, duke qënë një nga faktorët e mungesës së golave gjatë kohës së tij te Norwich.[273] Kane e nisi karrierën e tij si profesionist te Tottenhami fillimisht duke u huazuar në klube te ndryshme në Angli dhe si rezerva e sulmuesit spanjoll Roberto Soldado. Ai filloi të dallohej gjatë sezonit 2014–15 nën drejtimin e trajnerit Mauricio Pochettino.[7] Me Pochettinon, Kane deklaroi se loja e tij u përmirësua falë stërvitjes së fortë teknik të kërkuar nga trajneri.[274] Ai gjithashtu u përpoq të arrijë përfitime margjinale në mënyrë që të maksimizonte potencialin e tij duke ndryshuar aspekte të ndryshme të stërvitjes dhe përgatitjeve të tij, si dhe të ushqyerit.[275]
Ish trajneri i Tottenhamit David Pleat e përshkroi Kane "si një qëndër-sulmues tradicional".[276] Clive Allen, një tjetër trajner i tij te Tottenhami, komentoi: "një gjë që do t'a them për të, që fatkeqsisht nuk e thua për shumë futbollistë të rinjë, është se ai kishte pasion për lojën. Ai e do futbollin, do të luajë, do të shënoj gola."[276] Ish trajneri i tij te ekipi nën-21 Les Ferdinand krahasoi lëvizjet e tij me ato të Teddy Sheringham dhe forcën dhe saktësinë e gjuajtjeve me atë të Alan Shearer.[7]
Kane është një sulmues i gjatë dhe fizik[277][278] dhe stili i tij i lojës është krahasuar me atë të legjendes gjermane Jürgen Klinsmann, të cilën Kane e quajti si kompliment në një intervistë në shkurt 2015.[279] Në mars 2015, presidenti i Federatës Angleze Greg Dyke e quajti Kane një pikë referimi për klubet që prodhojnë lojtarë të rinjë anglez.[83] Po në atë muaj Shearer deklaroi se tre sulmuesit më të mirë të ligës ishin Kane, Diego Costa dhe Sergio Agüero.[280] Në fillimet e karrierës, Kane u kritikua për përfshirjen e pakët në lojën ajërore dhe mungesën e shpejtësisë,[281] të cilat i përmirësoi me kalimin e kohës, duke shënuar shumë gola me kokë në vitet në vazhdim.[282]
Pas fitores së Tottenhamit kundër Çelsit në janar 2015, blogeri Chris Miller shkruajti: "Askush nuk e mendoi se ai do të ishte lojtari që do të bënte atë lloj performance kundër Çelsit."[7] Një muaj më pas, BBC Sport shkruajti se Kane ishte në nivelin e tij më të mirë në rolin e sulmuesit të vetëm, duke shtuar se "kontrolli i topit" që ai zotëron e bën të përshtatëm për të luajtur edhe në pozicione të tjera.[276] Analisti i Match of the Day Danny Murphy deklaroi se ekipi i Anglisë duhet ndërtuar rreth Kane: "Po has vështirësi të gjej një dobësi në lojën e djalit."[283] Gazetari i ESPN, Michael Cox deklaroi: "Kane në fillim ishte një golashënues i pastër, kurse tani është një lojtar i gjithanshëm, duke luajtur ndonjëherë si mesfushor-sulmues". Ai vuri gishtin te kontributi i lojtarit në lojën e ekipit në Kupën e Botës 2018, duke shtuar se Kane "kontriboi jashtëzakonisht në prapavijë dhe se loja e tij me kurriz nga porta ishte më mbreslënëse se kurr."[284]
Pavarësisht se njihet më së miri për finalizimin dhe golat e shumtë, Kane gjithashtu shquhet për vizionin, teknikën, kombinimet dhe pasimet, aftësi këto që e lejonë të zbresi më thellë në fushë, të sjelli shokët e ekipit përpara dhe të krijojë raste shënimi për ta;[285] me këto aftësi ai është i aftë të luaj si "numër 9 fallco" ose në rolin e mesfushorit sulmues, i quajtur ndryshe numri 10.[286][287][288] Në vitin 2022, Sam McGuire i Opta Sports e etiketoi sulmuesin si "numri 9 më krijues në botë".[289] Kane është lavdëruar për kontributin e tij në mbrojtje[290] si dhe është një specialist në gjuajtjet e penalltive.[291][292]
Në vitin 2020, Kane filloi të kritikohej rreth një "taktike" ku ai qëllimisht shkonte mbrapa mbrojtësve kundërshtar që kërcenin për t'a goditur topin me kokë, duke bërë që ata të rrëzoheshin mbrapsht në fushë, gjë që mund të shkaktonte dëmtime serioze.[293] Pasi bëri të njëjtën gjë ndaj lojtarit të Brighton & Hove Albion, Adam Lallana, duke fituar edhe një penallti, Kane u kritikua nga ish lojtari i Arsenalit, Martin Keown, i cili deklaroi: "Ai e shikon kundërshtarin e tij, e di se çfarë do të bëjë dhe i qëndron nga mbrapa. Mendoj së është lojë e rrezikshme nga Harry Kane dhe ai e di se çfarë bënë dhe unë mendoj se ajo nuk ishte penallti."[294] Megjithatë, kjo taktikë u mbrojt nga lojtari i Crystal Palace, Gary Cahill, i cili tha: "Mendoj se është pjesë e futbollit. Mendoj se një element i asaj është të jesh i zgjuar dhe me përvoj dhe t'a dish se në çfar momenti mund të fitosh një faull.[295]
Në një intervistë të dhënë në shkurt 2015, Kane deklaroi se ishte në një marrëdhënje me Katie Goodland, të cilën e kishte njohur që në shkollë të mesme.[296] Ai i tregoi Esquire: "Ne kemi shkuar në shkollë bashkë dhe ajo e ka parë të gjithë karrierën time. I duket pak çmenduri. Ajo ka dal edhe në gazeta, duke nxjerrë qentë shëtitje."[297] Më 1 korrik 2017, Kane njoftoi përmes faqes së tij në Twitter se ata ishin fejuar,[298] kurse në qershor 2019 njoftoi se ishin martuar.[299]
Çifti njoftoi ardhjen në jetë të fëmijës së tyre të parë, një vajzë, në janar 2017.[300] Vajza e tyre e dytë lindi në gusht 2018.[301] Në dhjetor 2020, erdhi në jetë djali i tyre i parë,[302] kurse i dyti erdhi në gusht 2023.[303]
Kane dhe Goodland kanë dy qenë të rracës labrador, të quajtur Brady dhe Wilson, në nder të dy lojtarëve të futbollit amerikan, Tom Brady dhe Russell Wilson.[304] Kane ka cituar Brady 6, një dokumentar rreth Tom Bradyt, si një frymëzim për zhvillimin e tij si futbollist.[305] Në vitin 2019, Kane shfaqi një interes për të nisur një karrierë në NFL në "10 ose 12 vite".[306]
Kane nuk konsumon alkool gjatë sezonit të futbollit dhe që nga viti 2017 ka punësuar një shef për dietën e tij ushqimore.[307] Ai luan golf në kohën e tij të lirë.[297]
Ai u emërua Anëtar i Urdhrit më të Shkëlqyer të Perandorisë Britanike (MBE) në nderimet për vitin e ri 2019 për kontributin e tij në futboll.[308]
Më 10 tetor 2022, Kane hapi "Fondacionin Harry Kane", e cila 'kërkon të ndryshojë perceptimet për shëndetin mendor duke normalizuar bisedat dhe duke promovuar zakone pozitive për t'i dhënë fund stigmës rreth temës'. Për të shënuar këtë rast, Kane u shfaq në CBeebies' Bedtimes Stories.[309]
Në gusht 2023, Kane nisi një marrëveshje sponsorizimi me kompaninë e këpucëve sportive Skechers,[310] pasi marrëveshja e tij me kompaninë e veshjeve dhe pajisjeve sportive Nike përfundoi.[311] Pasi Kane shënoi golin e tij të 100të në Premier Ligë, Nike lançoi edicionin special të këpucëve Hypervenom 3 HK.[311] Në vitin 2018, ai ishte pjesë e reklamës së Nike, 'Nothing Beats A Londoner', sëbashku me sportistë të tjerë të qytetit, përfshirë kampionin olimpik Mo Farah dhe lojtarin e Çelsit Eden Hazard, duke shfaqur diversitetin e Londrës.[312] Para fillimit të UEFA Euro 2016, Kane u shfaq në reklamën e Mars Bars dhe Beats by Dr. Dre, në këtë të fundit sëbashku me Antoine Griezmann, Mario Götze dhe Cesc Fàbregas.[313]
Kane është pjesë video lojës FIFA nga EA Sports; ai ishte pjesë e Ekipit të Vitit në FIFA 18, duke j'u bashkuar Lionel Messit dhe Cristiano Ronaldos në sulm.[314] Kane dhe Camila Cabello njoftuan fituesin e çmimit "Artisti solo më i mirë ndërkombëtar mashkull" në Çmimet Brit 2018 në the O2 Arena më 21 shkurt.[315]
Më 14 maj 2020, Kane njoftoi se do të sponsorizonte fanellat e Leyton Orient, klubit të tij të parë si profesionist, për sezonin e ardhshëm me qëllim për të ndihmuar klubin të kalonte Pandeminë e COVID-19.[316] Kjo marrëveshje e pazakontë, e para e këtij lloji në futbollin anglez, mori miratimin e Premier Ligës, Ligës Angleze të Futbollit dhe Asociacionit të Futbollit, dhe sponsorizimi është dhuruar për bamirësi, e cila do të marri 10% të të ardhurave nga shitja e bluzave përkatëse – fanella e parë tregon një mesazh falënderimi për punonjësit e vijës së parë të NHS që trajtojnë pandeminë, kurse fanella e dytë mban një logo të Haven House Children's Hospice ndërsa fanella e tretë përmban organizatën bamirëse të shëndetit mendor Mind.[317][318]
| Klubi | Sezoni | Liga | Kupa | Kupa e Ligës | Evropa | Tjetër | Gjithsej | |||||||
|---|---|---|---|---|---|---|---|---|---|---|---|---|---|---|
| Divizioni | Ndsh | Gola | Ndsh | Gola | Ndsh | Gola | Ndsh | Gola | Ndsh | Gola | Ndsh | Gola | ||
| Tottenham Hotspur | 2010–11 | Premier League | 0 | 0 | — | 0 | 0 | 0 | 0 | — | 0 | 0 | ||
| 2011–12 | Premier League | 0 | 0 | — | 0 | 0 | 6[a] | 1 | — | 6 | 1 | |||
| 2012–13 | Premier League | 1 | 0 | — | — | 0 | 0 | — | 1 | 0 | ||||
| 2013–14 | Premier League | 10 | 3 | 0 | 0 | 2 | 1 | 7[a] | 0 | — | 19 | 4 | ||
| 2014–15 | Premier League | 34 | 21 | 2 | 0 | 6 | 3 | 9[a] | 7 | — | 51 | 31 | ||
| 2015–16 | Premier League | 38 | 25 | 4 | 1 | 1 | 0 | 7[a] | 2 | — | 50 | 28 | ||
| 2016–17 | Premier League | 30 | 29 | 3 | 4 | 0 | 0 | 5[b] | 2 | — | 38 | 35 | ||
| 2017–18 | Premier League | 37 | 30 | 4 | 4 | 0 | 0 | 7[c] | 7 | — | 48 | 41 | ||
| 2018–19 | Premier League | 28 | 17 | 1 | 1 | 2 | 1 | 9[c] | 5 | — | 40 | 24 | ||
| 2019–20 | Premier League | 29 | 18 | 0 | 0 | 0 | 0 | 5[c] | 6 | — | 34 | 24 | ||
| 2020–21 | Premier League | 35 | 23 | 2 | 1 | 4 | 1 | 8[a] | 8 | — | 49 | 33 | ||
| 2021–22 | Premier League | 37 | 17 | 3 | 3 | 5 | 1 | 5[d] | 6 | — | 50 | 27 | ||
| 2022–23 | Premier League | 38 | 30 | 2 | 1 | 1 | 0 | 8[c] | 1 | — | 49 | 32 | ||
| Gjithsej | 317 | 213 | 21 | 15 | 21 | 7 | 76 | 45 | — | 435 | 280 | |||
| Leyton Orient (huazim) | 2010–11 | League One | 18 | 5 | 0 | 0 | — | — | — | 18 | 5 | |||
| Millwall (huazim) | 2011–12 | Championship | 22 | 7 | 5 | 2 | — | — | — | 27 | 9 | |||
| Norwich City (huazim) | 2012–13 | Premier League | 3 | 0 | 1 | 0 | 1 | 0 | — | — | 5 | 0 | ||
| Leicester City (huazim) | 2012–13 | Championship | 13 | 2 | — | — | — | 2[e] | 0 | 15 | 2 | |||
| Bayern München | 2023–24 | Bundesliga | 3 | 3 | 0 | 0 | — | 0 | 0 | 1[f] | 0 | 4 | 3 | |
| Gjithsej karriera | 376 | 230 | 27 | 17 | 22 | 7 | 76 | 45 | 3 | 0 | 504 | 299 | ||
| Ekipi kombëtar | Viti | Ndsh | Gola |
|---|---|---|---|
| Anglia | 2015 | 8 | 3 |
| 2016 | 9 | 2 | |
| 2017 | 6 | 7 | |
| 2018 | 12 | 8 | |
| 2019 | 10 | 12 | |
| 2020 | 6 | 0 | |
| 2021 | 16 | 16 | |
| 2022 | 13 | 5 | |
| 2023 | 4 | 5 | |
| Gjithsej | 84 | 58 | |
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
