Ku Klux Klan
From Wikipedia, the free encyclopedia
Lo Ku Klux Klan, nomenat sovent pel sigle KKK o tanben lo Klan, es una organizacion supremacista blanca dels EUA fondada lo 24 de decembre de 1865.
Classificada a la drecha extrèma de l'espèctre politic dels EUA, foguèt pas jamai un partit politic, mas una organizacion de defensa o de lobbying dels interesses e de prejutjats d'elements tradicionalistas, racistas e xenofòbs d'unes Blancs protestants, los White Anglo-Saxon Protestant (WASP - acronim en jòc de mots amb la vèspa) que se revendican coma una comunautat « etnicoreligiosa » e se pièja sus una revendicacion d'una « supremacia blanca » sus una interpretacion plan particulara d'un versèt del Libre de la Genèsi (Modèl:Réf Bible) (plan presenta dins la « Bible belt »)[1] e sus las doctrinas racistas de l'antropologia del sègle XIX[2].
Al sègle XXI, es una nebolosa d'organizacons mai o mens formalas e estructuradas, legalas o clandestinas, sovent rivalas entre elas. Quitament se demora un simbòl fòrt, es pasmens concurenciada uèi per d'organizacions amb un imatge mens arcaïc, coma los grops neonazis, mai obertament revolucionaris, o las milícias privadas d'autodefensa, mai comunautàrias e comunalistas.
Lo Ku Klux Klan presica esquematicament la supremacia de la « raça » blanca sus las autras « raças » — Negras (davalantas dels ancians esclaus), Asiaticas (imigrats chinenes e japoeses), Ispanicas (Mexicans, Cubans, Puertoricans e autres pòbles d'America latina), la comunautat araba e tanben l'antisemitisme, l'anticatolicisme (son visats, a l'origina, los immigrats catolics: Poloneses, Italians e Irlandeses), l'antiortodoxisme (los Levantins et Europèus orientals coma los Grècs, Romans, Iogoslaus, Russes o ucrainians…), l'anticomunisme e l'omofobia. Es d'en primièr conservator e xenofòb. Tanben, es fòrça anticentralista (fòrça ostil a çò que considèra coma de damatges de las autoritats federalas sulss drechs dels Estats) e puslèu isolacionista en politica estrangièra.
Lo Ku Klux Klan es d'en primièr eissit de la desfacha e de l'ocupacion dels onze Estats secessionistas de l'Union en 1860-1861 e membres dels Estats confederats d'America (CSA), territòri chafrat « Dixieland » per las tropas federalas e de la reaccion espontanèa dels elements mai actius de la populacion en fàcia dels excesses comeses per aquesta e subretot per lors collaborators civils.
Torna fòrça mai tard a l'escasença de la Primièra Guèrra mondiala, mas aqueste còp jos la forma d'una associacion legala e culturala, obèrta a totes los WASP, del Nòrd coma del Sud, volent defendre las valors que considèran coma fondamentalas de la « Nacion blanca » americana. Lo segond Ku Klux Klan desaparéis oficialament en 1944.
Lo Ku Klux Klan possedís son quartier general dins lo comtat de Boone, dins l'Arkansas, a 30 km al nòrd de Harrison, lo sèti del comtat, qu'es tanben considerat per fòrça mèdias coma la vila mai racista dels EUA. Son actual líder es Thomas Robb.