അജപാലകർക്കുള്ള ലേഖനങ്ങൾ
From Wikipedia, the free encyclopedia
ക്രിസ്തീയബൈബിളിന്റെ ഭാഗമായ പുതിയനിയമത്തിലെ സന്ദേശഗ്രന്ഥങ്ങളിൽ മൂന്നെണ്ണത്തിനു പൊതുവായുള്ള പേരാണ് അജപാലകർക്കുള്ള ലേഖനങ്ങൾ(Pastoral Epistles). ആദ്യകാലസഭയുടെ പ്രമുഖ നേതാവും പ്രേഷിതനുമായിരുന്ന പൗലോസ് അപ്പസ്തോലൻ തന്റെ യുവശിഷ്യന്മാരും പ്രാദേശികസഭകളുടെ നേതാക്കളുമായിരുന്ന തിമോത്തെയോസിനും തീത്തോസിനും എഴുതിയ കത്തുകളുടെ രൂപമാണ് ഈ രചനകൾക്ക്. തിമോത്തെയോസിനെഴുതിയ ഒന്നാമത്തേയും രണ്ടാമത്തേയും ലേഖനങ്ങളും തീത്തോസിനെഴുതിയ ഏക ലേഖനവും ആണിവ. ഇവയ്ക്ക് യഥാക്രമം, "1 തിമോത്തെയോസ്", "2 തിമോത്തെയോസ്", "തീത്തോസ്" എന്നീ ചുരുക്കപ്പേരുകളും ഉണ്ട്. ഈ മൂന്നു ലേഖനങ്ങൾ സാധാരണ ഒന്നിച്ചാണ് ചർച്ച ചെയ്യപ്പെടാറ്. അജപാലനസംബന്ധമായ വിഷയങ്ങൾ പരിഗണിക്കപ്പെടുന്നതു കൊണ്ടെന്നതിലപ്പുറും അജപാലകരെ(Pastors) ലക്ഷ്യമാക്കി എഴുതപ്പെട്ടവ എന്ന നിലയ്ക്കാണ് ഇവയ്ക്ക് "അജപാലകർക്കുള്ള ലേഖനങ്ങൾ" എന്ന പൊതുനാമം നൽകപ്പെട്ടിരിക്കുന്നത്. ക്രിസ്തീയജീവിതത്തേയും, വിശ്വാസസംഹിതയേയും, സഭാനേതൃത്വത്തേയും സംബന്ധിച്ച പ്രശ്നങ്ങൾ ഇവയിൽ പരിഗണിക്കപ്പെടുന്നു. ക്രിസ്തീയപാരമ്പര്യത്തിൽ പൗലോസ് അപ്പസ്തോലന്റെ രചനകളായി കരുതപ്പെട്ടിരുന്ന ഈ ലേഖനങ്ങളെ ഭൂരിപക്ഷം ആധുനിക ബൈബിൾ നിരൂപകന്മാരും അദ്ദേഹത്തിന്റെ കാലശേഷം എഴുതപ്പെട്ടവയായി വിലയിരുത്തുന്നു.[1][2]