![cover image](https://wikiwandv2-19431.kxcdn.com/_next/image?url=https://upload.wikimedia.org/wikipedia/commons/thumb/9/91/Uttara_Guruvayurappan_Temple-_Main_Gopuram.jpg/640px-Uttara_Guruvayurappan_Temple-_Main_Gopuram.jpg&w=640&q=50)
ഡൽഹി മയൂർ വിഹാർ ഉത്തര ഗുരുവായൂരപ്പൻ ക്ഷേത്രം
From Wikipedia, the free encyclopedia
ഭാരതത്തിന്റെ തലസ്ഥാനമായ ഡൽഹി നഗരത്തിന്റെ കിഴക്കേ അതിരായ മയൂർ വിഹാറിൽ, യമുനാനദിയുടെ കരയിൽ നിന്ന് അല്പം കിഴക്കുമാറി, പ്രകൃതിരമണീയമായ അന്തരീക്ഷത്തിൽ സ്ഥിതിചെയ്യുന്ന ഒരു ക്ഷേത്രമാണ് ഉത്തര ഗുരുവായൂരപ്പൻ ക്ഷേത്രം. വിശ്വപ്രസിദ്ധമായ ഗുരുവായൂർ ക്ഷേത്രത്തിന്റെ അതേ മാതൃകയിൽ പണികഴിപ്പിച്ചിരിയ്ക്കുന്ന ഈ ക്ഷേത്രത്തിലെ മുഖ്യപ്രതിഷ്ഠ, കേരളീയ ഹൈന്ദവരുടെ പ്രധാന ആരാധനാമൂർത്തികളിലൊരാളായ ശ്രീഗുരുവായൂരപ്പൻ തന്നെയാണ്. കൂടാതെ, ഉപദേവതകളായി ഗണപതി, ചോറ്റാനിക്കര ഭഗവതി, ശിവൻ, അയ്യപ്പൻ, നാഗദൈവങ്ങൾ എന്നിവർക്കും പ്രതിഷ്ഠകളുണ്ട്. ഗുരുവായൂർ ക്ഷേത്രത്തിന്റെ ഉത്തരദിക്കിൽ (വടക്ക്) സ്ഥിതിചെയ്യുന്ന ക്ഷേത്രമായതുകൊണ്ടാണ് ഇതിന് ഉത്തര ഗുരുവായൂരപ്പൻ ക്ഷേത്രം എന്ന പേരുവന്നത്. ഗുരുവായൂർ ക്ഷേത്രത്തിന്റെ അതേ മാതൃകയിൽ പണികഴിപ്പിച്ചതും അതേ പൂജാവിധികൾ പിന്തുടരുന്നതുമായ ഈ ക്ഷേത്രത്തിൽ, പക്ഷേ ഗുരുവായൂരിൽ നിന്ന് വ്യത്യസ്തമായി പടിഞ്ഞാറോട്ട് ദർശനമായാണ് പ്രതിഷ്ഠ നടത്തിയിരിയ്ക്കുന്നത്. ഡൽഹി മലയാളികളുടെ പ്രധാന ആരാധനാകേന്ദ്രങ്ങളിലൊന്നായ ഈ ക്ഷേത്രം, 1989-ലാണ് നിലവിൽ വന്നത്. ഇടവം മൂന്നിന് ആറാട്ട് വരുന്ന വിധത്തിൽ നടക്കുന്ന എട്ടുദിവസത്തെ കൊടിയേറ്റുത്സവമാണ് ക്ഷേത്രത്തിലുള്ളത്. കൂടാതെ, വൃശ്ചികമാസത്തിൽ ഗുരുവായൂർ ഏകാദശി, ചിങ്ങമാസത്തിൽ അഷ്ടമിരോഹിണി, മേടമാസത്തിൽ വിഷു, കുംഭമാസത്തിൽ ശിവരാത്രി, അതേ മാസത്തിൽ ചോറ്റാനിക്കര മകം തൊഴൽ, കന്നിമാസത്തിൽ നവരാത്രി, ചിങ്ങമാസത്തിൽ വിനായക ചതുർത്ഥി, മീനമാസത്തിൽ പങ്കുനി ഉത്രം തുടങ്ങിയ ദിവസങ്ങളും അതിവിശേഷമായി ആചരിച്ചുവരുന്നു. ആർഷ ധർമ്മ പരിഷദ് എന്ന സംഘടനയാണ് ക്ഷേത്രഭരണം നടത്തുന്നത്. നിരവധി ആദ്ധ്യാത്മിക-സാമൂഹിക പ്രവർത്തനങ്ങൾ ഈ സംഘടന നടത്തിവരുന്നുണ്ട്. ക്ഷേത്രത്തോടനുബന്ധിച്ച് ഒരു ഓഡിറ്റോറിയവും ആശുപത്രിയും മറ്റ് സൗകര്യങ്ങളുമെല്ലാമുണ്ട്.
ഉത്തര ഗുരുവായൂരപ്പൻ ക്ഷേത്രം | |
---|---|
![]() പടിഞ്ഞാറേ ഗോപുരം | |
അടിസ്ഥാന വിവരങ്ങൾ | |
സ്ഥലം | മയൂർ വിഹാർ ഫേസ്-1 |
നിർദ്ദേശാങ്കം | 28°36′13″N 77°17′52″E |
മതവിഭാഗം | ഹിന്ദുയിസം |
ആരാധനാമൂർത്തി | ഗുരുവായൂരപ്പൻ (മഹാവിഷ്ണു/ശ്രീകൃഷ്ണൻ) |
ആഘോഷങ്ങൾ | കൊടിയേറ്റുത്സവം, അഷ്ടമിരോഹിണി, ഗുരുവായൂർ ഏകാദശി, വിഷു |
ജില്ല | കിഴക്കൻ ഡൽഹി |
സംസ്ഥാനം | ഡൽഹി |
രാജ്യം | ഇന്ത്യ |
വെബ്സൈറ്റ് | www.uttaraguruvayurappan.org |
വാസ്തുവിദ്യാ വിവരങ്ങൾ | |
വാസ്തുവിദ്യാ തരം | കേരള ക്ഷേത്രനിർമ്മാണശൈലി |
സ്ഥാപകൻ | ആർഷ ധർമ്മ പരിഷദ് |
പൂർത്തിയാക്കിയ വർഷം | 17 മേയ് 1989 |