From Wikipedia, the free encyclopedia
Ursula de Leyen[1] (vulgo von der Leyen; nata Elselae in regione Bruxellana 8 Octobris 1958) est femina in rebus publicis versata Germaniae et sodalis Unionis democraticae Christianae Germaniae.
Familia
Filia Ernesti Albrechti est, qui postea praeses ministrorum Saxoniae Inferioris erat, tunc autem minister publicus Unionis Europaeae Bruxellis laborabat. Ibi ergo Ursula Scholam Europaeam frequentavit. Anno 1977 maturitatem adepta de Leyen primo Gottingae et Monasterii oeconomiae, ab anno 1980 Hannoverae medicinae studebat et anno 1987 probationem accepit. In valetudinario Academiae Hannoverae laboravit et anno 1991 doctrix medicinae promota est. Annis 1992 - 1996 cum marito Heiko de Leyen, qui et medicus et professor medicinae est, et filiis in CFA vixit. Tum iterum in academia medicinae Hannoverae laboravit.
Ab anno 1990 de Leyen sodalis CDU est et anno 2003 legata parlamenti Landtag terrae Saxoniae Inferioris et administra rerum socialium feminarum familiarum salutis publicaeque facta est. Post electionem Dietae Foederalis Germaniae anni 2005 Angela Merkel (CDU) cancellaria nova eam 22 Novembris Administram Foederalem Feminarum et Iuventutis nominavit. Quem honorem et post electionem anni 2009 tenuit. Qua electione legata Dietae foederalis creata est. Die 27 Novembris 2009 ab Angela Merkel administra Foederalis Laboris nominata est, Francisco-Iosepho Jung succedens, qui brevi post tempore a magistratu recedere coactus erat. 15 Novembris 2010 etiam praeses vicaria CDU totius Germaniae electa est. Anno 2013 iterum in parlamentum missa et die 17 Decembris 2013 nova Administra Foederalis Defensionis Publicae nominata est[2]. Die 2 Iulii 2019 Consilium Europaeum proposuit Ursulam de Leyen a Parlamento Europaeo praesidem Commissionis Europaeae nominari.[3] Parlamentum eam die 16 Iulii 2019 elegit.[4] Die 17 Iulii 2019 munus Administrae Defensionis Publicae desiit.
De Leyen praesertim studet, ut ludi pueritiae omnibus infantibus suppetant. Praeterea contra diffusionem pornographiae liberorum per interrete certat et iuvenes contra alcohol, medicamenta stupefactiva, et ludos computatorios efferantes defendere studet. Saepe ei obicitur - praesertim a sodalibus Factionis Piraticae, ut et libertatem hominum deminuere velit[5]. Postquam Administra Laboris facta est, de Leyen adiumenta publica civium pauperum augere studuit[6].