მურჯახეთისწყალი

მურჯახეთისწყალი, კირხბულახი, დლივისწყალი^[1], ახალქალაქისწყალი — მდინარე ახალქალაქის მუნიციპალიტეტში, ფარავნის მარცხენა შენაკადი (ერთვის ახალქალაქთან). სიგრძე 32 კმ, აუზის ფართობი 106 კმ². სათავე აქვს ნიალისყურის ქედის ჩრდილოეთ კალთაზე, ზღვის დონიდან 2760 მ. საერთო ვარდნა — 1143 მ, საშუალო დახრილობა — 35,7‰, წყალშემკრები აუზის ფართობი — 196 კმ², ხოლო საშუალო სიმაღლე 1980 მეტრია.^[2] საზრდოობს თოვლის წვიმისა და მიწისქვეშა წყლით. წყალდიდობა იცის გაზაფხულზე, წყალმცირობა — წლის დანარჩენ დროს, საშუალო წლიური ხარჯი შესართავთან 0,91 მ³/წმ. იყენებენ სარწყავად. მდინარის ნაპირზე გაშენებულია სოფელი მურჯახეთი.

მურჯახეთისწყალი
მურჯახეთისწყალი ახალქალაქთან
სხვა სახელი	კირხბულახი, დლივისწყალი, ახალქალაქისწყალი
ქვეყანა	საქართველო
ტერიტორიული ერთეულები	ახალქალაქის მუნიციპალიტეტი (სამცხე-ჯავახეთის მხარე)
ქალაქები	ახალქალაქი
სათავე	ნიალისყურის ქედი 41°11′25″ ჩ. გ. 43°26′16″ ა. გ.
სათავის სიმაღლე	2760 მ
შესართავი	ფარავანი 41°25′23″ ჩ. გ. 43°28′31″ ა. გ.
სიგრძე	32 კმ
აუზის ფართობი	106 კმ²
დახრილობა	35,7‰
წყლის ხარჯი (საშ.)	0,91 მ³/წმ
— სათავე, — შესართავი

ეტიმოლოგია

კირხბულახი გვიანი თურქული სახელწოდებიდან ყირხ-ბულახისაგან წარმოსდგა, რაც „ორმოც წყაროს“ ნიშნავს (kırk — ორმოცი, bulak — წყარო).^[3]

ვახუშტი ბატონიშვილს თავის გეოგრაფიულ აღწერაში მოხსენიებული აქვს როგორც „ახალქალაქის წყალი“:

	„ჯავახეთის მტკვარს, სამჴრიდამ მოერთვის ახალქალაქის წყალი, რომელი გამოსდის აბოცის დაბის მცირეს ტბასა და მოერთვის მცირედ მუნვე ხავეტისტბასა, და კვალად მის ტბის გამომდინარე მოდის აღმოსავლეთ-სამჴრეთს შუადამ ჩრდილოთ-დასავლეთს შორის. ხოლო ახალქალაქი არს ამ ორ მდინარეთა შესართავს შორის.“
	(ვახუშტი ბატონიშვილი)

ლიტერატურა

• აფხაზავა ი., ქართული საბჭოთა ენციკლოპედია, ტ. 7, თბ., 1984. — გვ. 203.

სქოლიო

1. Dzeglebi.ge. ახალქალაქი ჯავახეთისაი. დაარქივებულია ორიგინალიდან — 2016-03-22. ციტირების თარიღი: 28 ივლისი 2016.
2. ზურაბ გიორგაია. (2014) სამცხე–ჯავახეთის მხარის ტყის რესურსების ეკოლოგიურ–ეკონომიკური შეფასება. ციტირების თარიღი: 28 ივლისი 2016.
3. Nedir Ne Demek. bulak nedir, bulak ne demek?. ციტირების თარიღი: 28 ივლისი 2016.