Gumersindo Pardo Reguera

Gumersindo Pardo Reguera, nado en Valgos (A Ribeira, Cervantes) o 24 de xaneiro de 1847 e finado na Coruña o 28 de abril de 1916, foi un farmacéutico e pintor galego. Retratou á burguesía coruñesa cun estilo realista, minucioso e veraz.

Gumersindo Pardo Reguera

Biografía
Nacemento	24 de xaneiro de 1847 Valgos, España
Morte	28 de abril de 1916 (69 anos) A Coruña, España
Lugar de sepultura	cemiterio de Santo Amaro da Coruña
Educación	Universidade de Santiago de Compostela
Actividade
Ocupación	pintor, farmacéutico
Sinatura
Descrito pola fonte	Gran Enciclopedia Galega Silverio Cañada Dicionario biográfico de Galicia Diccionario bio-bibliográfico de escritores

Traxectoria

A súa primeira actividade laboral foi como delineante de estradas e camiños. Xa casado, fixo a carreira de Farmacia na Universidade de Santiago de Compostela, licenciándose cun dos dous premios extraordinarios do ano 1880 (entre 1.399 alumnos). Despois estableceuse en Lugo, colaborando na vacinación contra a varíola. Foi catedrático de Química na Universidade de Granada. Deixou Granada e retornou á Coruña para ser profesor na Escola de Artes Industriais e na de Belas Artes. Abriu despacho de farmacia no número 96 da rúa Real e actuou como perito en xuízos por envelenamento.^[1]

Foi concelleiro da Coruña representando aos monárquicos e formou parte da comisión de facenda. Pertencente á directiva do Colexio Farmacéutico Provincial, representou ao colectivo en Madrid, na asemblea nacional de 1899.^[2]

Afeccionado á arte, comezou a pintar pasados os corenta anos de idade, retratando a Ramón Pérez Costales e a Manuel Pereiro Caeiro. Participou na Exposición Nacional de Belas Artes en 1895, e na de 1904 logrou mención honorífica. Retratista de corte moi realista, compartiu esta actividade na Coruña con Román Navarro. No paisaxismo ten semellanzas con Dionisio Fierros. Foi membro de número e secretario da Real Academia Galega de Belas Artes, e correspondente da Real Academia de Belas Artes de San Fernando.^[3]

Pompas de xabón, 1892 (Col. Pardo Yáñez).^[4]

Exerceu unha importante influencia sobre, o daquela neno, Pablo Ruiz Picasso, amigo do seu fillo, Antonio Pardo, durante a época no que o malagueño residiu na Coruña.^[5]

Caravana, 1900 (Colección Afundación).^[3]

Finou por unha uremia na Coruña o 28 de abril de 1916^[6] e foi enterrado no Cemiterio de Santo Amaro. A súa obra consérvase na Deputación da Coruña, que garda un retrato do rei Afonso XIII,^[7] no Museo Provincial de Lugo,^[8][9] na Colección Afundación^[3] e noutras coleccións particulares.

Con motivo do centenario do seu pasamento, fixéronse dúas exposicións da súa obra, comisariadas por Rubén Ventureira Novo, a primeira no Museo de Lugo, do 11 de agosto ao 20 de novembro de 2016, e a segunda no PALEXCO da Coruña, do 17 de febreiro ao 26 de marzo de 2017.^[10]

Obra escrita publicada

• Reconocimiento de las falsificaciones y adulteraciones de las sustancias alimenticias de uso más frecuente en Galicia (A Coruña, 1887).^[11]

Vida persoal

Casou con Filomena García Reboredo e foi pai de catro fillos: Elena, Antonio, Mercedes e Gumersindo Pardo García.^[1]

Galería de imaxes

• 
  Mondando patacas.^[5]
• 
  Tomando chocolate.^[4]
• 
  Eusebio da Guarda.^[12]
• 
  Eliseo Ozores y Camino.
• 
  Afonso XIII.^[9]
• 
  Jaime Ozores de Prado.^[9]
• 
  Camila Marquina Illa.^[9]
• 
  Francisco García Reboredo.^[9]
• 
  Autorretrato.^[9]

Notas

1. de Cora, José (4/2/2019). "Pardo Reguera, de delineante a pintor, pasando por farmacéutico" (en castelán).
2. Visitas guiadas a la exposición del farmacéutico Pardo Reguera (21/3/2017) Colexio Oficial de Farmacéuticos da provincia da Coruña (en castelán).
3. Gumersindo Pardo Reguera na Colección Afundación.
4. Gumersindo Pardo Reguera. Inspirador de Picasso. Sala de Exposicións do Museo Provincial de Lugo.
5. García, Rodri (18/2/2017). "El farmacéutico que inspiró a Picasso". La Voz de Galicia (en castelán).
6. Necrolóxica en La Voz de Galicia (29/4/1916) p. 4.
7. Catálogo del patrimonio artístico de la Diputación de A Coruña II. Artes plásticas (1990-2010) (2011). ISBN 978-84-9812-149-0 (en castelán).
8. "Álbum: Gumersindo Pardo Reguera (Obra no MPLugo)"
9. "Sete novas obras de Pardo Reguera no MPLugo" 20/4/2017.
10. "A Deputación cede 4 obras e 32 bonecos para a mostra Gumersindo Pardo Reguera, Inspirador de Picasso na Coruña". Drupal. Consultado o 2023-01-13.
11. Couceiro Freijomil, Antonio (1951-53). Diccionario bio-bibliográfico de escritores (en castelán) III. Bibliófilos Gallegos. p. 33.
12. Exposición «O primeiro Picasso. A Coruña: 2015» Concello da Coruña.

Véxase tamén

Wikimedia Commons ten máis contidos multimedia na categoría:  Gumersindo Pardo Reguera

Bibliografía

• "Pardo Reguera, Gumersindo". Diccionario enciclopédico galego universal 47. La Voz de Galicia. 2003-2004. p. 95. ISBN 84-7680-429-6.
• "Pardo Reguera, Gumersindo". Dicionario biográfico de Galicia 3. Ir Indo Edicións. 2010-2011. p. 65.
• "Pardo Reguera, Gumersindo". Enciclopedia Galega Universal 13. Ir Indo. 1999-2002. p. 246. ISBN 84-7680-288-9.
• M. Vilanova, Fernando (1998). A pintura galega (1850-1950). Escola, contextualización e modernidade. Xerais. ISBN 978-84-8302-271-9.
• Mon, Fernando (2005). "Pardo Reguera, Gumersindo". Gran Enciclopedia Galega Silverio Cañada (DVD). El Progreso. ISBN 84-87804-88-8.

Outros artigos

• Román Navarro
• Pablo Picasso

Ligazóns externas

• Ficha no PARES Ministerio de Cultura y Deporte (en castelán).
• Bibliografía de pintura gallega en pintoresgallegos.com