Міхал Сапель

Міхал Сапель (17 лістапада 1967, Браслаў — 10 снежня 2021) — беларускі каталіцкі святар, першы пробашч адроджанай парафіі Касцёла Найсвяцейшай Тройцы (святога Роха) на Залатой Горцы ў Мінску.

Міхал Сапель
Дзейнасць	каталіцкі святар
Нараджэнне	17 лістапада 1967 Браслаў
Смерць	10 снежня 2021

Біяграфія

Міхал Сапель нарадзіўся ў Браславе. Ягоны бацька быў праваслаўным і працаваў электрыкам, а маці каталічкай, якая працавала на мясцовым рыбзаводзе^[1][2]. У 1984 годзе ён паступіў у медыцынскую вучэльню ў латвійскім Даўгаўпілсе, але праз год перавёўся ў духоўную семінарыю ў Рызе, якую паспяхова скончыў у 1990 годзе^[2][3].

У 1990 годзе прызначаны вікарыем Касцёла Узвіжання Святога Крыжа на Кальварыйскіх могілках у Мінску. Пазней ён атрымаў ад арцыбіскупа і будучага кардынала Казіміра Свёнтка заданне душпастырскай апекі над тымі, хто ў Мінску жадаў маліцца па-беларуску: «Ты мусіш заняцца беларусамі»^[3].

Дзякуючы грамадска-палітычным пераменам на пачатку 1990-х гадоў, аднавіліся набажэнствы ў адной з забраных савецкімі ўладамі мінскіх святынь — Касцёле Найсвяцейшай Тройцы (Святога Роха) на Залатой Горцы^[2][3]. У 1990-я парафія «стала сапраўды залатым месцам, дзе збіралася шмат [беларускай] выбітнай інтэлігенцыі»^[1].

Сапель развіваў метадычную працу па перакладзе літургічных тэкстаў на беларускую мову, галоўным плёнам якой стаў выдадзены ў 2004 годзе «Рымскі Імшал для дыяцэзій на Беларусі». Таксама ён наладжваў дабрачынную дзейнасць — у 1991 годзе ў Мінску з’явілася свая арганізацыя «Caritas», якая праз некалькі гадоў стварыла дзіцячы цэнтр у Лескаўцы^[4][2][3]. У 1992 годзе было наладжана выданне часопіса «Хрысціянская думка»^[1].

Акрамя парафіі на Залатой Горцы Сапель да 1996 года быў пробашчам парафіі ў Ракаве і пэўны час з душпастырскай неабходнасці служыў вернікам у Заслаўі^[2][3].

Міхал Сапель памёр 10 снежня 2021 года на 55-м годзе жыцця.

Крыніцы

1. Аксана Ючкавіч.. Кс. Міхал Сапель: «У святарскім жыцці трэба прытрымлівацца здаровых традыцый і прынцыпаў»  (бел.). Сайт «Catholic.by» (12 чэрвеня 2015). Праверана 20 снежня 2021.
2. Адышоў у вечнасць ксёндз Міхал Сапель (+праграма развітання і пахавання)  (бел.). Сайт «Catholic.by» (10 снежня 2021). Праверана 20 снежня 2021.
3. Памёр ксёндз Міхаіл Сапель — першы пробашч адроджанай парафіі святога Роха на Залатой Горцы  (бел.). Сайт газеты «Наша Ніва» (10 снежня 2021). Праверана 20 снежня 2021.
4. Карытас Мінска-Магілёўскай архідыяцэзіі  (бел.). Сайт «Caritas.by» (14 верасня 2013). Праверана 20 снежня 2021.

Спасылкі

 Голас паклікання - Размова з кс. Міхалам Сапелем