Алег Аркадзевіч Сурскі

У Вікіпедыі ёсць артыкулы пра іншых людзей з прозвішчам Сурскі.

Алег Аркадзевіч Сурскі (16 красавіка 1928, Тбілісі — 28 лістапада 2012, Мінск) — беларускі дызайнер, мастак, арт-крытык і мастацтвазнаўца.

Алег Аркадзевіч Сурскі
Дата нараджэння	16 красавіка 1928(1928-04-16)
Месца нараджэння	Тыфліс, Тыфліскі павет, Сацыялістычная Савецкая Рэспубліка Грузія[d], Закаўказская Савецкая Федэратыўная Сацыялістычная Рэспубліка, СССР
Дата смерці	28 лістапада 2012(2012-11-28) (84 гады)
Месца смерці	Мінск, Беларусь
Грамадзянства	СССР  Беларусь
Дзеці	Дзмітрый Алегавіч Сурскі
Род дзейнасці	журналіст, дызайнер, мастак, мастацкі крытык, мастацтвазнавец
Вучоба	Тбіліскі авіяцыйны тэхнікум[d] БДУ
Член у	Беларускі саюз дызайнераў Саюз мастакоў СССР Саюз журналістаў СССР[d]

Біяграфія

Нарадзіўся 16 красавіка 1928 года ў Тбілісі. Вучыўся ў Тбіліскім авіяцыйным тэхнікуме. У 1952 годзе скончыў Беларускі дзяржаўны ўніверсітэт. Прымаў удзел у мастацкіх выстаўках з 1947 года. Уваходзіў у шэраг грамадскіх аб’яднанняў: Саюз журналістаў СССР, Саюз мастакоў СССР, Міжнародная асацыяцыя крытыкаў мастацтва пры ЮНЕСКА, Асацыяцыя мастацтвазнаўцаў СНГ, Беларускі саюз дызайнераў.

Алег Сурскі стаяў ля вытокаў школы беларускай мастацкай крытыкі. З яго імем у значнай ступені звязаны пад’ём беларускага мастацтвазнаўства і выхад беларускай мастацкай крытыкі на міжнародную арэну. Адным з першых у Беларусі займаўся пытаннямі тэхнічнай эстэтыкі і дызайна, публікаваўся ў буйных савецкіх і замежных выданнях. З’яўляўся аўтарам шматлікіх артыкулаў і публіцыстычных нарысаў ва ўсесаюзным і рэспубліканскім друку. манаграфіі, альбомы і каталогі былі прысвечаны дэкаратыўна-прыкладному мастацтву, а таксама вядомым беларускім мастакам: Барысу Забораву, Васілю Сумараву, Маю Данцыгу, Віктару Грамыку, Віталю Цвірке, Георгію Паплаўскаму, Абраму Кролю і іншым.

У якасці дызайнера выканаў унікальныя аб’ёмна-прасторавыя светлавыя кампазіцыі ў санаторыях «Беларусь» (Сочы, Місхор), пансіянаце «Сосны» (возера Нарач), Доме прыёмаў Савета Міністраў БССР (Мінск), Нацыянальным банку Беларусі, Магілёўскім мастацкім музеі імя. П. Масленікава, Заслаўскім гісторыка-культурным музеі-запаведніку. З’яўляўся аўтарам экспазіцый у Музеі этнаграфіі народаў СССР, Музеі гісторыі Ленінграда (Санкт-Пецярбург), для ВДНГ СССР, Лейпцыгскага міжнароднага кірмашу^[1].

Працаваў разам са скульптарам Анатолем Анікейчыкам, мастакамі Гаўрылай Вашчанкай, Аляксандрам Кішчанкай, Міхаілам Савіцкім, Уладзімірам Стальмашонкам, Барысам Заборавым. Быў у сяброўскіх адносінах з выдатнымі савецкімі крытыкамі Д. Сараб’янавым, А. Кантарам, Л. Жадавай, М. Аўсяннікавым.

Памёр 28 лістапада 2012 года ў Мінску.

Бібліяграфія

• Сурскі А. А. «Май Вольфавіч Данцыг: заслужаны мастак Беларускай ССР г. Мінск; аб мінулым і сучасным», манаграфія // Советский художник, 1975
• Сурскі А. А. «Віктар Аляксандравіч Грамыка: Чырвоныя глебы Полаччыны» // Советский художник, 1978
• Сурскі А. А. «Васіль Сумараў», манаграфія // Советский художник, 1975

Зноскі

1. Naviny.by Пайшоў з жыцця Алег Сурскі, беларускі мастак і мастацтвазнаўца

Літаратура

• Су́рскі Алег Аркадзьевіч // Беларуская энцыклапедыя: У 18 т. Т. 15: Следавікі — Трыо / Рэдкал.: Г. П. Пашкоў і інш. — Мн. : БелЭн, 2002. — Т. 15. — С. 283. — 10 000 экз. — ISBN 985-11-0035-8. — ISBN 985-11-0251-2 (т. 15).

Спасылкі

• В Национальном художественном музее Республики Беларусь проходит выставка «Олег Аркадьевич Сурский. Портрет поколения»(недаступная спасылка)
• «Олег Аркадьевич Сурский. Портрет поколения» (к 80-летию со дня рождения)
• Ушёл из жизни Олег Аркадьевич Сурский