Гісторыка-культурны музей-запаведнік «Заслаўе»

У паняцця ёсць і іншыя значэнні, гл. Заслаўе (значэнні).

Гісторыка-культурны музей-запаведнік «Заслаўе» — заснаваны ў 1967 годзе як Заслаўскі гісторыка-археалагічны запаведнік, філіял Дзяржаўнага музея БССР (цяпер Нацыянальны гістарычны музей) з экспазіцыяй «Музей рамёстваў і народных промыслаў Беларусі» ў былым кальвінскім зборы. 31 снежня 1986 года ў Заслаўі паводле пастановы Савета Міністраў БССР на базе філіяла Дзяржаўнага музея БССР створаны Гісторыка-культурны запаведнік «Заслаўе». Музеем-запаведнікам кіравалі A. M. Калбаска, Т. С. Скрыпчанка, А. М. Краснова, А. К. Рак, А. Л. Строганаў, А. П. Харак, М. М. Паграноўскі (2005—2016), Ю. В. Шкурскі (2016—2023). З 2023 года дырэктарка Запаведніка — В. А. Зезетка

Гісторыка-культурны музей-запаведнік «Заслаўе»
Профіль	комплексны
Заснаваны	31 снежня 1967
Падпарадкаванасць	Аддзел ідэалагічнай работы, культуры і па справах моладзі Мінскага райвыканкама
Месцазнаходжанне	Мінская вобласць, г. Заслаўе, вул. Рынкавая, 1, 223036
Памеры фонду	11 976
Агульная плошча	1961,7
Выставачная плошча	535,19
Плошча запаснікаў	500
Дырэктар	Вольга Анатолеўна Зезетка
Адкрыты	9.00–17.30, акрамя панядзелка
zaslaue.by

Прадстаўляе складаную сістэму гістарычна, тэматычна і функцыянальна аб’яднаных паміж сабой аб’ектаў і ахоўных тэрыторый. Ахоўная зона плошчаю 113 га ўключае Заслаўскі замак (гарадзішча «Вал») з былым кальвінскім зборам 2-й паловы 16 — пачатку 17 ст. (у 19 — пачатку 20 ст. і з 1990 года — Спаса-Праабражэнская царква), гарадзішча «Замэчак» (летапісны горад Ізяслаўль) 10—11 ст., курганныя могільнікі 10 — 11 ст., касцёл Найсвяцейшай Дзевы Марыі (1774), рэшткі сядзібы Заслаў 17—19 ст. На тэрыторыі запаведніка знаходзяцца музейна-выставачны комплекс, этнаграфічны комплекс «Млын», музей «ДАП» і дзіцячы Музей міфалогіі і лесу.

Асноўны фонд музея (2008) налічвае 11 976 адзінак захоўвання, навукова-дапаможны — 4561 адзінку. Плошча экспазіцыі 503 м², выставачнай залы — 131 м².

Фонды музея складаюць калекцыі археалагічных знаходак з раскопак на тэрыторыі горада і яго наваколля (1967—1986), ткацтва, керамікі і шкла, дэкаратыўна-прыкладнога мастацтва. Сярод найбольш цікавых экспанатаў калекцыя маляваных дываноў, якая налічвае 130 адзінак, з іх 30 зроблены Я. Драздовічам. У калекцыі жывапісу і графікі захоўваецца збор мастацкіх твораў В. Маркаўца, В. Сташчанюка, Г. Вашчанкі і інш.

Музейна-выставачны комплекс адкрыты для наведвання ў 1992 годзе. У зале габеленаў прадстаўлены творы беларускіх мастакоў В. Дзёмкінай і Ю. Піскуна «Рагнеда», «Полацкія званы» (абодва 1991), «Малітва» (1992). Тэма гісторыі Полацкага княства і Заслаўя перадаецца праз вобразы Рагнеды і Ізяслава. Зала «Музыка вячорак» знаёміць з музычнай культурай беларускіх вёсак і мястэчак. Экспануюцца музычныя інструменты, сабраныя з усёй Беларусі і аб’яднаныя ў вясельныя гурты: гармонікі, цымбалы, скрыпкі, жалейкі, бубны. У выставачнай зале праводзяцца часовыя абменныя выстаўкі з фондаў музеяў і прыватных творчых майстэрняў Беларусі.

Музей «ДАП»

З ваенна-інжынернымі збудаваннямі ўздоўж заходняй мяжы СССР у перадваенны перыяд (1932—1934) знаёміць музей «ДАП» у ваколіцы Заслаўя (2004). Трохамбразурны агнявы пункт быў узброены 3 станковымі кулямётамі «Максім» на спецыяльных станках з цэнтральнай сістэмай ахаладжэння і адным ручным кулямётам сістэмы Дзегцярова.

Спасылкі

• zaslaue.by — афіцыйны сайт Гісторыка-культурнага музея-запаведніка «Заслаўе»