Visigodos

Los visigodos^[1] foron la rama occidental de les tribus nómades de pueblos xermánicos que recibieron colectivamente'l nome de godos^[2]. Estes tribus formáronse y espardiéronse per Europa y el norte d'África a partir de los caberos momentos d'esistencia del Imperiu romanu, na Antigüedá tardía. Considerase que los visigodos surdieron a partir de grupos godos anteriores (posiblemente los tervinxos) qu'invadieran l'Imperiu romanu a partir de 376 y derrotaran a los romanos na batalla d'Adrianópolis en 378^[3]. Les rellaciones ente los romanos y los visigodos foron cambiantes, y lluchaben ente sí o roblaben trataos de collaboración según-yos fora más conveniente^[4]. Los visigodos invadieron Italia mandaos por Alaricu I, y saquearon la ciudá de Roma en 410. Dempués d'esa fecha entamaron a asentase en tierres del imperiu, primero nel sur de la Galia y dempués n'España y Portugal, aú fundaron el reinu visigodu, qu'había esistir hasta los primeros años del sieglu VIII^[5].

Visigodos

Tipu	tribu y grupu étnicu históricu
Relixón	Arrianismo visigodo (es)

Detalle de la corona votiva del rei visigodu Recesvintu († 672). Fecha n'oru y piedres precioses na segunda metada del sieglu VII. La imaxe amuesa talles nel cristal de roca y cadenes con eslabones de los que colinga la conseña: (R)ECCESVINTUVS REX DEFERET y una cruz pectoral bizantina.

Gutthiuda, el territoriu de la confederación tervinxa del Danubiu nel sieglu IV.

Los visigodos instaláronse na Galia meridional, nún primer momentu y a partir del 418, como pueblu federáu ([[foederati]]) de los romanos. Sicasí, por razones entá nun esclariadas, rompieron bien ceo'l so alcuerdu con Roma y establecieron el so propiu reinu, con capital en Tolosa (l'actual Toulouse). Dempués estendieron la so autoridá n'Hispania en perxuiciu de los suevos y los vándalos. El sieglu VI entamó pa ellos cola perda de los sos territorios galos tres de la derrota, en 507, frente a los francos de Clodovéu I na batalla de Vouillé. De magar, nun tendríen más territorios al norte de los Pirineos que la Septimania. Pasaron a Hispania y se ficieron col control de los territorios suevos y de la provincia bizantina de Spania.

Alredor del añu 589 los visigodos, siguiendo l'exemplu de so rei Recaréu, convirtiéronse del arrianismu al catolicismu, entamando de magar un proceso d'absorción de la cultura de los sos súbditos d'orixe hispanorromanu^[6]. El so códigu llegal, el Liber Iudiciorum o Códigu Visigóticu, completáu nel 654, acabó cola práutica, tradicional nel reinu de magar la so fundación, d'aplicar lleis diferentes a los súbditos d'orixe romanu qu'a los visigodos. Una y bones eses diferencies desapaecieron yá nun se faló más de godos y romanos, y pasó a falase d'hispanos. Nel sieglu siguiente la vida del reinu visigodu, del que sabemos perpoco nel sieglu VII pola escasez de fontes documentales, tuvo dominada polos obispos, celebrándose los conceyos de Toledo. En 711 o 712 un exércitu musulmán qu'aportó a la Península Ibérica dende'l norte d'África derrotó a los visigodos na batalla de Guadalete. El so rei Rodrigu, y munchos de los miembros de la élite gobernante, morrieron nella, y el reinu colapsó en perpocu tiempu. La identidá gótica, sicasí, sobrevivió, especialmente na Marca Hispánica y nel reinu d'Asturies, fundáu pol noble visigodu Pelayu tres de la so victoria sobre los moros na batalla de Cuadonga (718).

Los visigodos fundaron les úniques ciudaes de nueva creación n'Europa occidental dende la cayida l'Imperiu romanu hasta l'apaición de la dinastía carolinxa. Entá se conserven, amás, delles de les ilesies que llevantaron, y un bon númberu de materiales, neto d'usu cotidianu que de lluxu (tesoru de Guarrazar) de toa triba, que nun paren de ver la lluz nes estremaes escavaciones feches nos caberos años. Hai, tamién, güelga del so pasu pela Península na toponimia y na antroponimia. El so mayor legáu, sicasí, foi'l Códigu Visigóticu, que foi la base de los procedimientos xudiciales na mayor parte de la Hispania cristiana hasta finales de la Edá Media, sieglos dempués de la desapaición del reinu.

Ver tamién

• Llista de reis visigodos

Referencies

1. Esti términu apaez nel Diccionariu de l'Academia de la Llingua Asturiana. Ver: visigodu, -a, -o
2. Waldman, Carl; Mason, Catherine (2006). Encyclopedia of European Peoples. New York: Facts on File, p. 843. ISBN 978-0816049646
3. Heather, Peter, The Goths, pp=52–57, 300–301. Oxford, Blackwell Publishers, 1998.
4. Waldman, Carl; Mason, Catherine (2006). Encyclopedia of European Peoples. New York: Facts on File, p. 843. ISBN 978-0816049646
5. Waldman, Carl; Mason, Catherine (2006). Encyclopedia of European Peoples. New York: Facts on File, pp. 843-4. ISBN 978-0816049646
6. Claude, Dietrich. "Remarks to the Relationship between Visigoths and Hispano-Romans in the 7th Century", en Pohl, W., Reimitz, H., (ed.), Strategies of Distinction: Construction of Ethnic Communities, 300–800 (The Transformation of the Roman World, vol. 2). Leiden, Brill Academic Publishers, 1998, pp. 119-20. ISBN 978-9-00410-846-2

Enllaces esternos

• Wikimedia Commons acueye conteníu multimedia sobre Visigodos.

• Datos: Q23693
• Multimedia: Visigoths