estrella From Wikipedia, the free encyclopedia
AG Carinae (AG Car / HD 949101)[10] ye una estrella variable na constelación austral de Carina. Anque ye una de les estrelles más lluminoses de la Vía Lláctea, la gran distancia que nos dixebra d'ella —aproximao unos 6 kilopársecs o 19.600 años lluz— y el polvu interestelar que la lluz atopa nel so percorríu fai que nun seya visible a simple vista.
AG Carinae ye una variable lluminosa azul de tipu espectral B2.[10] Esta clase d'estrelles son bien pocu frecuentes en nuesa galaxa y AG Carinae ye una de les más conocíes. Aparentemente la estrella ta nuna fase de rápida transición ente una superxigante azul de tipu espectral O y una estrella de Wolf-Rayet.[11] Con una lluminosidá un millón de vegaes superior a la del Sol, tien una masa de 50 mases solares. La so temperatura superficial ye variable; ente 1985 y 1990 yera de 22.800 K, ente qu'en 2000-2001 baxó hasta 17.000 K. En dambes dómines tamién se repararon variaciones tantu na velocidá del vientu estelar como nel ritmu de perda de masa estelar; ésti pasó de 1,5 × 10-5 mases solares per añu en 1985-1990 a 3,7 × 10-5 mases solares per añu en 2000-2001.[12]
Tocantes a la composición química, la superficie estelar d'AG Carinae amuesa, per una parte, «sobreabundancia» d'heliu, nitróxenu y sodiu, y, por otra, baxos conteníos relativos d'hidróxenu, carbonu y oxíxenu, indicando la presencia de material proveniente del ciclu CNO. Los modelos d'evolución estelar indiquen qu'una estrella con una masa inicial de 85 mases solares algama'l conteníu d'heliu qu'anguaño tien AG Carinae a una edá de 3 millones d'años.[12]
AG Carinae amuesa variabilidá fotométrica, espectroscópica y polarimétrica n'escales de tiempu que van de díes a décades. D'alcuerdu al General Catalogue of Variable Stars (GCVS), el so rellumu varia de forma irregular ente magnitú aparente +7,1 y +9,0.[13] En banda V reparáronse fluctuaciones de 2,5 magnitúes en periodos de 5-10 años, atribuyíes a variabilidá de tipu S Doradus. Sobrepuestes a estes variaciones esisten fluctuaciones ente 0,1 y 0,5 magnitúes nuna escala de tiempu de 371 díes, según «microvariaciones» fotométriques.[12]
Tocantes a la so variabilidá espectroscópica, mientres los mínimos na curva de lluz, AG Carinae ye relativamente caliente y tien tipu espectral WN11. Nos máximos de la curva de lluz, la estrella ye más fría y el so espectru recuerda al d'una hiperxigante de tipu A.[12]
AG Carinae ta arrodiada por una nebulosa bipolar formada por material procedente de les capes esteriores de la estrella, espulsáu mientres un periodu d'inestabilidá acaecíu hai menos de 10.000 años. Nun se sabe con certeza si la nebulosa foi creada nun única erupción xigante nesa dómina o si parte d'ella formóse n'episodios anteriores. La nebulosa tien una enorme cantidá de polvu —que la so masa ye de 2,5 mases solares— con una temperatura envalorada ente 76 y 99 K; l'escesu nel infrarroxu llonxanu suxer la presencia de grandes granos de 1 μm. La masa total de la nebulosa puede algamar les 30 mases solares.[14] La estrella apaez como una radiofuente compacta nel centru de la mesma.[15]
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
.png)
