Vlag van die Republiek China

Die vlag van die Republiek China (ook bekend as die vlag van Taiwan of die Blou lug, wit son en geheel rooi grond) is op 1 Januarie 1928 deur die Republiek China aanvaar en op 25 Oktober 1949 deur die Republiek China op Taiwan. Die vlag vertoon ’n enkele rooi baan met ’n blou skildhoek waarop ’n wit son met twaalf strale gesentreer is. Die skyf en driehoeke simboliseer die son en die sonstrale wat daaruit voortvloei.

Vlag van die Republiek China

Vlag van die Republiek China
Bynaam	青天白日滿地紅, letterlik “Blou lug, wit son en geheel rooi grond”
Gebruik	Burgerlike- en Staatsvlag en Nasionale vaandel
Verhouding	2:3
Goedgekeur	1894 (deur die “Herleef China Geselskap”, oorspronklike weergawe) 1906 (byvoeging van die rooi veld) 1 Januarie 1912 (vlootvaandel) 5 Mei 1921 (deur die Guangzhou-regering) 9 Desember 1928 (in vastelandse China) 25 Oktober 1945 (in Taiwan)
Ontwerp	’n Enkele rooi baan met ’n blou skildhoek waarop ’n wit son met twaalf strale gesentreer is.
Ontwerp deur	Lu Haodong en Sun Yat-sen

Vlag van die Republiek China
Name (taalvariante)
Tradisionele Chinees	中華民國國旗
Vereenvoudigde Chinees	中华民国国旗
Pinyin	Zhōnghuá Mínguó Guóqí
Betekenis	Republiek China-vlag

Blou lug, wit son en geheel rooi grond
Name (taalvariante)
Tradisionele Chinees	青天白日滿地紅
Vereenvoudigde Chinees	青天白日满地红
Pinyin	Qīng Tiān, Bái Rì, Mǎn Dì Hóng
Betekenis	Blou lug, wit son en geheel rooi grond

Die vlag is oorspronklik in 1894 deur die Anti-Qing-groepering, die “Herleef China Geselskap” ontwerp en die rooi baan is in 1906 deur Sun Yat-sen bygevoeg.

Die vlag is vir die eerste keer in 1912 as die Vlootvlag op die Chinese vasteland gebruik,^[1] en is in 1928 deur die Kuomintang (KMT) tot die amptelike nasionale vlag van die Republiek China verklaar. Dit is vasgelê in artikel ses van die Grondwet van die Republiek China toe dit in 1947 gepromulgeer is. Die vlag word nie meer op die Chinese vasteland gebruik nie nadat die Volksrepubliek China in 1949 gestig is.

Aangesien die eilande van Taiwan en Penghu tot 1945 onder Japannese beheer was, is die vlag eers in 1945 aldaar gebruik toe die Republiek China beheer verkry het. Die vlag word nou oorwegend gebruik in Taiwan, Penghu, Kinmen, Matsu en ander afgeleë eilande waarheen die Republiek China verplaas is nadat hulle in 1949 tydens die Chinese Burgeroorlog verslaan is.

Simboliek

’n Wapperende vlag van die Republiek China.

Die “Blou-lug-en-wit-son”-vlag van Lu Hao-tung is in 1895 in Hawaii bekendgestel. Die twaalf strale van die wit son stel die twaalf maande van en die twaalf tradisionele shichen ((zh) 時辰), ’n tradisionele tydeenheid wat gelykstaande aan twee uur is, voor. Sun Yat-sen het die “rooi grond” tot die vlag toegevoeg om die gestorte bloed van die revolusionêre magte wat hul lewens geoffer het om die Qing-dinastie omver te werp en die Republiek China op te rig, voor te stel. Die drie kleure tesame stem ooreen met die Drie Beginsels van die Volk: blou stel nasionalisme en vryheid voor, wit stel demokrasie en gelykheid voor en rooi stel die volk se lewensbestaan en broederskap voor.^[2] President Chiang Kai-shek het op die Nasionale Dag in 1929 verklaar dat “so lank as die nasionale vlag met die blou lug, wit son en rooi grond oor die Chinese grond wapper, dit die onafhanklikheid en vryheid nakomelinge van die Huang-keiser sal simboliseer”.

Die skildhoek word dikwels as partyvlag van die KMT gebruik. Die vlag het bykomende simboliek ontwikkel weens die unieke en opspraakwekkende politieke status van Taiwan. Op een vlak verteenwoordig die vlag ’n duidelike simbool dat Taiwan nie deur dieselfde regering as die Volksrepubliek China geregeer word nie omdat hierdie vlag verskil van dié van die Volksrepubliek China.

Omdat die vlag voorheen regoor China gebruik is, het dit intussen ’n simbool geword van ’n voortsetting van die ideale van die Chinese nasionalisme en bewegings wat hulle vir Chinese hereniging beywer. Dit het ook ’n simbool geword van ’n historiese en huidige verbintenis met China. Daarbenewens is die vlag afgelei van die seël van die KMT, en die kleur van die skildhoek word ook met die partykleure vereenselwig.

Sommige Chinese sien die vlag as ’n uitdrukking van Chinese nasionalisme en trots, gepaardgaande met gelyklopende verwerping van die huidige kommunistiese regering. Die vlag simboliseer moontlik ook ’n identifisering met en bewondering vir die politieke ideë van Sun Yat-sen en sy Drie Beginsels van die Volk.

Dit is egter ironies dat, gegewe die verbintenis van die vlag met Chinese nasionalisme in teenstelling met Taiwannese onafhanklikheid, die vlag ’n onverwagte bondgenoot in die Volksrepubliek China gevind het. Die Volksrepubliek het onafhanklikheidsgroeperinge in Taiwan gekritiseer wat die vlag wil verander of afstand daarvan doen, en het geïmpliseer dat regstappe om so iets uit te voer negatiewe reaksie van die Volksrepubliek China sal ontlok.

Die teenwoordigheid van die vlag in Taiwan onderskei egter ook die feit dat Taiwan en die Republiek China se territoriale eilande elders onder jurisdiksie val van ’n land wat onderskei word van die Volksrepubliek China. Die hys van die Taiwannese vlag word selfs deur die uiterste ondersteuners van Taiwannese onafhanklikheid, soos die Taiwannese Solidariteitsunie, voorgestaan wanneer die lede die onderskeie en onafhanklik regeerde stelsels en gebiede van die Republiek China en die Volksrepubliek China beklemtoon.

Ontwerp

Ontwerp van die vlag in Chinees

Die spesifieke ontwerpe van die vlag word gevind in die “Wet op die nasionale vlag en embleem van die Republiek China” in 1928. Die verhouding van die vlag is 2:3 waarvan drie kwart rooi is en een kwart blou is met ’n wit twaalfpuntige son op. Elke sonstraal lê op 30 grade sodat die somtotaal van die strale op 360 uitkom. Binne die son is die blou sirkel die deursnee van die wit son gedeel deur vyftien.^[3]

In latere jare is meer spesifikasies van die skildhoek (wat ook as die KMT se vlag gebruik is) in die wetboeke geskryf. In die skets wat in “Wet op die Party en Vervaardiging en Metodes van die Nasionale Vlag” (黨旗國旗之製造及使用辦法), is die son in groter detail geskets en wiskundige waardes is aan elke element van die vlag toegeken. In die wet het die skildhoek steeds ’n verhouding van 2:3 gehad maar die wiskundige waardes is gegee as 24x36 meter. Die deursnee van die son en strale is ⁶⁄₈ van die hoogte van die skildhoek (in meter sal dit dus 18 wees). Die deursnee van die son sonder die strale is ¹⁄₄ van die wydte van die skildhoek, dus 9 meter. Die blou sirkel wat bo-oor die ’n gedeelte van die son en strale is, is ’n ¹⁄₁₅ van die son se deursnee, dus 0,6 meter. Die hoek van die strale en die aantal het nie verander nie.^[4]

Die kleure van die nasionale vlag is donkerrooi, wit en donkerblou. Die KMT-party gebruik slers wit en donkerblou en albei vlae word met ’n goue entversiering gekroon.^[5] Die wet lys geen spesifieke kleurgewingsproses, soos Pantone, om die vlag te skep of skets nie. Ander publikasies, soos die Album des pavillons nationaux et des marques distinctive, gee benaderings vir Pantone-kleure. Die donkerblou kleur is Pantone 310c en die donkerrooi is Pantone 186c.^[6] Album des pavillons verskaf ook die benaderde CMYK-kleure vir die vlag; donkerblou is 100-45-0-10 en donkerrooi is 0-90-75-5.^[6]

Konstruksietekening

Kleure

Die volgende kleurbenaderings word hieronder weergegee

Kleurskema	Donkerblou		Donkerrooi		Wit
RGB		0, 0, 149		254, 0, 0		255, 255, 255
Pantone		310c		186c		284c
CMYK		100-45-0-10		0-90-75-5		0-0-0-0
Heksadesimaal		000095		FE0000		FFFFFF

Geskiedenis

Die vlag van die Chinese Taipei Olimpiese Komitee (ook bekend as die ‘Pruimbloeiselbanier’) word in die plek van die vlag van die Republiek China by die Olimpiese Spele en sommige sportbyeenkomste gebruik.

Die “Vyfkleurvlag” tydens die Xinhei-rewolusie in Sjanghai, 1911

Die “18-stervlag” van die Hubei-rebelle in 1911

Die eerste nasionale vlag van Taiwan is vir die eerste maal in 1663 gedurende die Koninkryk van Tungning gebruik. Dit was ’n eenvoudige wit vlag met die karakter “鄭” (zhèng) in ’n rooi sirkel in die middel van die wit vlag gehad. Die vlag van die Qing-dinastie is ook van 1683 tot 1895 gebruik toe die Republiek van Formosa verklaar is. Die vlag van Formosa het ’n tier op ’n eenvoudige blou met asuurwolke daaronder bevat.

Gedurende die Japannese oorheersing van Taiwan (1895 tot 1945) is die vlag van Japan op die eiland gebruik. Terselfdertyd is die “Vyfkleurvlag” deur die voorlopige senaat van die regering van die Republiek China wat op 1 Januarie 1912 gestig is, as nasionale vlag gekies. Die “18-stervlag” is deur die weermag aanvaar^[7] en die moderne vlag is as ’n vlootvaandel aanvaar.^[8] Sun Yat-senhet egter nie die vyfkleurvlag as geskik geag nie en het geredeneer dat die horisontale orde ’n hiërargie of klassestelsel veronderstel het wat gedurende die dinastiese tyd gegeld het.

Na die teruggawe deur Japan van Taiwan aan China in 1945, is die vlag in Artikel Ses van die 1947-grondwet van die Republiek China gespesifiseer. Na die Chinese Burgeroorlog in 1949 het die regering van Chiang Kai-shek die soewereine onafhanklike land van die Republiek China na die eiland van Taiwan verskuif. Op die Chinese vasteland het die kommunistiese magte van Mao Zedong die Volksrepubliek China gestig en hul eie vlag aanvaar. Op 23 Oktober 1954 is die Wet op die Nasionale Embleem en Nasionale Vlag van die Republiek China (中華民國|國徽|國旗法) deur die wetgewende Yuan gepromulgeer om die grootte, mates, verhouding, vervaardiging en bestuur van die vlag te spesifiseer.^[9]

Verbod in Kambodja

Hoewel openbare vertoning van die vlag van die Republiek China in die algemeen raar is en in die Volksrepubliek tot arrestasie kan lei, was Kambodja die eerste land wat die vertoon daarvan amptelik onwettig verklaar het. In Februarie 2017 het die Eerste Minister, Hun Sen, ’n verbod op die vertoon van die vlag in Kambodja aangekondig as deel van sy toewyding aan die Een-Chinabeleid.^[10][11]

Vorige vlae

• 
  Vlag van die Koninkryk Tungning, 1661–1683
• 
  Vlag van die Qing-dinastie, 1683–1895
• 
  Vlag van die Republiek van Formosa, 1895
• 
  Vlag van Taiwan onder Japannese bewind, 1895–1945
• 
  Eerste vlag van die Republiek China (“Vyfkleurvlag”), 1912–1928
• 
  “18-stervlag”, 14 Mei tot 11 Junie 1912
• 
  “19-stervlag”, 11 Junie 1912 tot 1928

Gebruik van die vlag

Vlag van die Kuomintang binne die Sun Yat-sen-mausoleum in Nanjing, Volksrepubliek China

Oorlogsplakkaat vir die Verenigde Nasies, geskep in 1942 deur die Amerikaanse Kantoor van Oorlogsinformasie, wat die 26 lede van die Geallieerdes van die Tweede Wêreldoorlog toon, waaronder die Republiek China links bo.

’n Plakkaat wat die permanente president van die Republiek China, Yuan Shikai en die voorlopige president van die Republiek, Sun Yat-sen, herdenk.

Oorlogsplakkaat vir die Verenigde Nasies, geskep in 1943 deur die Amerikaanse Kantoor van Oorlogsinformasie. In die middel die vlag van die Republiek China as deel van die Geallieerdes.

’n Skaars prent met al die drie vlae van die Republiek China op. In die middel die eerste nasionale vlag, links die weermagvlag en regs die Sun Yat-sen-vlag (nou die vlag van Taiwan).

Onder politieke toesig van die Kuomintang het die vlag in die vroeë jare van die republiek dieselfde belangrikheid as die Kuomintang se partyvlag gehad. ’n Muur het bestaan waarop die Kuomintang-vlag op linkerkant en die nasionale vlag op regterkant vertoon is, elk teen ’n hoek gedraai met ’n portret van Sun Yat-sen, Vader van die Nasie, in die middel. Vir die spitsberade wat tydens die Chinese Burgeroorlog tussen die Kuomintang en die Kommunistiese Party van China plaasgevind het, is die vlag in gelyke stand met dié van die Chinese Sowjetrepubliek (Jiangxi Sowjet) vertoon. Die vlagwet het later die horisontale vertoon van die vlag met die portret van Sun Yat-sen in die middel van die rooi veld gespesifiseer. Hierdie vlag word in talle regeringsgeboue in Taiwan aangetref en dit is ook die vlag wat vertoon word wanneer die president en adjunkpresident van die Republiek China ingesweer word.

Die vlag het ’n alomteenwoordigheid in Taiwan. Die hys en stryk van die vlag geskied seremonieel en word deur die Vlagvolkslied begelei, terwyl die aanwesiges die vlag met die regterhand teen die regter wenkbrou groet. Van skoolkinders word tradisioneel verwag om soggens aan seremonies deel te neem wanneer die vlag begelei deur die Nasionale Volkslied van die Republiek China gehys word. Voordat die Krygswet in 1987 in Taiwan opgehef is, is van alle vaartuigbestuurders verwag om te stop wanneer hulle ’n vlagseremonie teëkom.

Die vlag van die Republiek China word tydens internasionale byeenkomste, waaraan die Volksrepubliek China deelneem, min vertoon, veral as gevolg die Volksrepubliek China se sterk druk oor die politieke status van Taiwan en die gepaardgaande minimale invloed van die Republiek China in hierdie kringe. Pleks daarvan word die Republiek China gewoonlik met ’n pseudoniem (dikwels “Chinese Taipei”) aangekondig en in tydens Olimpiese Spele gebruik dit sy eie vlag, die Chinese Taipei-vlag. Dit omdat die Internasionale Olimpiese Komitee die Volksrepubliek se standpunt erken, waarvolgens die Republiek China ’n ontbinde entiteit en die Republiek China op Taiwan onwettig is. Die verbanning raak ook toeskouers — tydens die tafeltenniseindstryd gedurende die Olimpiese Somerspele 1996 in Atlanta is ’n Taiwanese student in hegtenis geneem nadat hy met die vlag van die Republiek China gewaai het.^[12]

Aan die begin van die 21ste eeu het die simboliek van die vlag egter begin verander, nadat die verhoudings tussen die Kuomintang in Taiwan en die Kommunistiese Party van China verbeter het. Die vlag van die Republiek China begin nou om die voorheen en moontlike toekomstige verenigde China te simboliseer, en vervolgens het die Volksrepubliek China dit duidelik gemaak dat ’n verandering van die vlag ’n groot provokasie ten gunste van Taiwanese onafhanklikheid sal wees. Die dubbelsinnigheid rondom die vlag het tydens die besoek van die Kuomintang se voorsitter, Lien Chan, aan die vastelandse China in April 2005 ontstaan, toe die vlag gedurende seremonies ter eerbetoning van Sun Yat-sen in aanwesigheid van ampsdraers uit beide die Republiek China en die Volksrepubliek China vertoon is. Een plek in die vastelandse China waar die Wit-Son-vlag steeds opvallend vertoon word is die mosaïek binne die Sun Yat-sen-mausoleum in Nanjing.

Die gebruik van die vlag in Taiwan weerspieël sy omstrede simboliek. Alhoewel ondersteuners van ’n Taiwanese onafhanklikheid soos die vroeëre president Chen Shui-bian die vlag tydens amptelike staatsverpligtinge gebruik en gegroet het, word dit tydens politieke veldtogte van die Demokratiese Progressiewe Party nooit vertoon nie. Dit is nie net omdat die vlag met die vastelandse China verbind word nie, maar ook weens die insluiting van Kuomintang se party-embleme op die vlag. Daar teenoor word die vlag tydens politieke veldtogte van die Kuomintang baie opvallend gebruik. Hierdie onderskeidelike gebruik raak selfs die kleure wat tydens politieke optogte gebruik word. Optogte van die Kuomintang gebruik veral die kleure van die vlag, met meer blou as rooi, terwyl tydens optogte van die onafhanklikheidsgesinde partye veral groen gebruik word, maar nóg blou nóg rooi.

Verskeie ondersteuners van ’n Taiwanese onafhanklikheid soos die vroeëre president Lee Teng-hui het al vir ’n verwydering van die huidige vlag gepleit, en daar bestaan verskeie ontwerpe vir ’n spesifiek Taiwanese vlag. Die vooruitsigte oor ’n verandering van die vlag is egter nie hoog nie, aangesien die verandering van die vlag ’n grondwetlike verandering eis; die huidige vlag geniet ’n groot ondersteuning onder Kuomintang-aanhangers en in ’n minder mate gewildheid onder moderate ondersteuners van ’n Taiwanese onafhanklikheid; en omdat ’n verandering aan die vlag tot politieke spanning met die Volksrepubliek sal kan lei. Gedurende die 2004-verkiesings is vir ’n kort rukkie voorgestel dat indien die groen koalisie die verkiesings sal wen, hulle die Kuomintang sal kan dwing om hul politieke kenteken in een van die vlag afwykende te laat verander. Dié voorstel het tot enkele dae se kontroversie gelei, maar het spoedig in vergetelheid geraak.

Voorvalle

Gedurende ’n optrede in Manchester in November 2013 het die sanger Deserts Chang die vlag van die Republiek China vir die gehoor gewys, wat tot protes van die Volksrepubliek en die kansellasie van haar optrede in Beijing gelei het.^[13]

Eweneens in November 2015 het die sanger Chou Tzu-yu saam met die groep Twice in die Suid-Koreaanse televisieprogram My Little Television verskyn. Sy het haarself as ’n Taiwanese aangekondig en die vlag van die Republiek China saam met die vlag van Suid-Korea gewys. Die Japanese vlag is ook gewys om die nasionaliteit van ander groeplede te wys.^[14] Alhoewel dit deur die Volksrepubliek skerp veroordeel is, het die Republiek China se raad vir vastelandse verhoudings gemeen dat hulle Chou se vertoning van die Republiek China se vlag as ’n patriotiese daad ondersteun. Die raad het by die vastelandse Taiwanese Sakekantoor sy protes ingedien en daarop aangedring dat die Chinese regering “sy privaatsektor weerhou”, aangesien dit die gevoelens van die Taiwanese volk “ernstig beseer het” en die wedersydse verhoudinge verder ernstig sal kan beskadig. Hulle het mense van weerskante die seestraat aangespoor “om die swaarverdiende vriendelike bande te koester”.^[15]

’n Plaaslike raad in die Australiese stad Rockhampton het ’n Taiwanese Australiese gesin ontstel nadat hulle oor die kinders se handgeskilderde uitbeeldings van die Taiwannese vlag ’n veselglasbulbeeld geverf het wat, as deel van die driejaarlikse Beef Australia-vieringe op die rivieroewer, geplaas is.^[16] Die Taiwanese broers en susters het twee vlae onder die ander vlae van Barramundi wat deur studente van die North Rockhampton State High School geverf is, geteken.^[17] Die bul, wat voor die Doeanehuis geplaas is, is ontwerp om die multikulturele gemeenskap van die stad te simboliseer, maar die twee vlae is later deur oorverfing gesensor.^[17] Rockhampton se plaaslike raad het erken dat hulle dit in ooreenstemming met die Australiese regering se Een-Chinabeleid gedoen het.^[17] In die Australiese media is egter beweer dat dit gedoen is om te verhoed dat die Chinese afgevaardigdes wat Beef Australia besoek het, ontsteld kan raak, aangesien die Volksrepubliek China ’n belangrike invoerder van Australiese beesvleis is.^[17][18] Taiwan News het dit as Australiese “koutou” (buiging) voor die Volksrepubliek China beskryf.^[18]

Apple beperk volgens bewerings die stuur van die vlag van die Republiek China in iOs-toestelle as ’n emoji wanneer dié toestel se landskode China of die taalinstellings Chinees is.^[19][20] Volgens die veiligheidsnavorser Patrick Wardle kan ’n fout in die vlagsensuurkode van die iOS-stelsel egter veroorsaak dat toestelle ineenstort.^[21] Apple het die emoji wat die vlag van Taiwan verteenwoordig gedurende die proteste van 2019–20 in Hongkong weereens gesensor, nadat hulle dit uit die iOS-sleutelborde in Hongkong en Macau verwyder het.^[22][23]

Gebruik van soortgelyke vlae

Volgens berigte het Taiwanese aanhangers die Chinese Taipei nasionale bofbalspan met die vorige vlag van Mianmar tydens baie internasionale toernooie soos die Olimpiese Somerspele 2008 in Beijing ondersteun; in die Volksrepubliek China is die openbare gebruik van die vlag van die Republiek China verbied.^[24][25][26] Mianmar is ’n bondgenoot van die Volksrepubliek China en het in 2010 sy nasionale vlag verander.

Ander vlae

Onderafdelings

• 
  Vlag van Taiwanprovinsie
• 
  Vlag van Kaohsiung
• 
  Vlag van Nieu-Taipei
• 
  Vlag van Taichung
• 
  Vlag van Tainan
• 
  Vlag van Taipei
• 
  Vlag van Taoyuan

Diensvlae

• 
  Handelsvlag
• 
  Vaandel van die Soutadministrasie
• 
  Vaandel van die Waterpolisie
• 
  Doeanevlag

Ander vlae

• 
  Olimpiese vlag van Chinees Taipei
• 
  Paralimpiese vlag van Chinees Taipei
• 
  Chinees Taipei se vlag vir Dooflimpiese Spele
• 
  Chinees Taipei se vlag vir Universiades
• 
  Sokkervlag van Chinees Taipei
• 
  Vlugbalvlag van Chinees Taipei

Militêre vlae

• 
  Gewapende Magte-vlag van Republiek China
• 
  Weermagvlag van Republiek China
• 
  Vlootvlag van Republiek China
• 
  Lugmagvlag van Republiek China
• 
  Marinierskorps-vlag van Republiek China
• 
  Militêre Polisie-vlag van Republiek China
• 
  Reserwe Gewapende Magte-vlag van Republiek China
• 
  Gekombineerde Logistiekbeheer-vlag van Republiek China

Voorgestelde vlae

• 
  Republic of Taiwan Provisional Government, 1950's–1970's
• 
  New Name, New Flag, New Anthem, 1996
• 
  World Taiwanese Congress
• 
  ’n Banier vir die Republiek Taiwan, ontwerp deur die 908 Taiwan Republiek-veldtog^[27]

Soortgelyke vlae

• 
  Vlag van Samoa
• 
  Vlag van Mianmar, 1974 tot 2010

Galery

• 
  Die Chieh Shou-saal in die Presidensiële kantoorgebou bevat die vlag en portret van Sun Yat-sen, waarop die presidente die eed op die amp aflê.
• 
  Kuomintang-ondersteuners swaai tydens ’n saamtrek gedurende die presidentsverkiesing in 2004 die vlag van die Republiek China.
• 
  Die vlae van die Republiek China, die Volksrepubliek China en die Verenigde State bo-op aangrensende geboue in San Francisco se Chinatown. Die meeste welwillende verenigings in San Francisco, waaronder die Chinese Ses Maatskappye, gaan voort om die vlag van die Republiek China te hys vanweë hul noue betrekkinge met die Kuomintang.
• 
  Vlag van die Republiek China by Taipei se ekonomiese en kulturele kantoor in Seattle.
• 
  Vlae van die Verenigde State en die Republiek China, 2016.
• 
  Vlag van die Republiek China en sy diplomatieke bondgenote.
• 
  Vier vlae van die Republiek China in die poskantoor van Minsheng.
• 
  ’n Reeks aan vlae van die Republiek China.
• 
  WCTC winkelsentrum in Koror, Palau met die vlag van Palau die Republiek China.
• 
  Die vlae van die Republiek China binne die geregtelike Yuan.
• 
  Tsai Ing-wen met die vlag van die Republiek China op die agtergrond.
• 
  Vlag van die Republiek China tydens die Hongkongse proteste in 2019–20.

Sien ook

• Vlag van Hongkong
• Vlag van Macau
• Vlag van Oos-Turkestan
• Vlag van Tibet
• Vlag van die Volksrepubliek China

Verwysings

1. (en) Amptelike gaset van die Vlootdepartement van die Republiek China, Julie 1912, bl. 344, pdf Geargiveer 8 Maart 2021 op Wayback Machine, Nasionale Sentrale Biblioteek – Aanlyngaset
2. (en) Kantoor van die President (2011). "Nasionale Vlag". Republiek China (Taiwan). Geargiveer vanaf die oorspronklike op 18 Mei 2019. Besoek op 4 Augustus 2020.
3. (zh) "中華民國國徽國旗法". 17 Desember 1928. Besoek op 14 April 2024.
4. (zh) Yu-liang, Tai (19 Mei 2006). "黨旗國旗之製造及使用辦法". Besoek op 4 Augustus 2020.
5. (zh) Yu-liang, Tai (19 Mei 2006). "國旗黨旗製用升降辦法". Besoek op 4 Augustus 2020.
6. (fr) du Payrat, Armand (2000). Album des pavillons nationaux et des marques distinctive. Frankryk: Service Hydrographique et Océanographique de la Marine. pp. TA2.1.
7. (zh) Yu-liang, Tai (23 Oktober 1954). "中國歷代陸軍旗幟". Geargiveer vanaf die oorspronklike op 1 Desember 2019. Besoek op 4 Augustus 2020.
8. (zh) Yu-liang, Tai (23 Oktober 1954). "中國歷代海軍旗幟". Geargiveer vanaf die oorspronklike op 29 November 2019. Besoek op 4 Augustus 2020.
9. (zh) Yu-liang, Tai (23 Oktober 1954). "中華民國國徽國旗法". Besoek op 4 Augustus 2020.
10. (en) Chung, Lawrence (7 Februarie 2017). "Deur die vlag te verbied dra Kambodja tot Taiwan se ellende by". South China Morning Post. Geargiveer vanaf die oorspronklike op 27 Julie 2018. Besoek op 4 Augustus 2020.
11. (en) Soumy, Phan (6 Februarie 2017). "Hun Sen verban Taiwan-vlag uit Kambodja". The Cambodia Daily. Geargiveer vanaf die oorspronklike op 16 Januarie 2019. Besoek op 4 Augustus 2020.
12. (en) "Taiwanese spectators arrested". Associated Press. The Washington Post. 1 September 1996.
13. (en) "Taiwan singer upsets China with flag stunt". The Daily Telegraph. 7 November 2013.^{[dooie skakel]}
14. (en) Politi, Daniel (16 Januarie 2016). "Did a 16-Year-Old Pop Star Help Pro-Independence Party Win Taiwan's Election?". Slate. Besoek op 20 Januarie 2016.
15. (en) Zai, C.C.; Wang, Flor (16 Januarie 2016). "MAC asks China to rein in private sector in wake of flag controversy". Focus Taiwan. Besoek op 4 Augustus 2020.
16. (en) "Taiwanese flag on bull artwork painted over in Australia". BBC. 9 Mei 2018. Besoek op 4 Augustus 2020.
17. (en) Robinson, Paul; Terzon, Emilia (9 Mei 2018). "Taiwan flag design painted over by council ahead of beef industry event". ABC News. Besoek op 4 Augustus 2020.{{cite web}}: AS1-onderhoud: meer as een naam (link)
18. (en) Everington, Keoni (9 Mei 2018). "Australian council paints over children's Taiwan flags fearing beef with Beijing". Taiwan News. Besoek op 4 Augustus 2020.
19. (en) Goodin, Dan (10 Julie 2018). "iPhone crashing bug likely caused by code added to appease Chinese gov't". Ars Technica. Besoek op 4 Augustus 2020. He said his fix addressed code Apple added likely to appease the Chinese government; this is the code that caused crashes on certain iDevices when users typed the word Taiwan or received messages containing a Taiwanese flag emoji.
20. (en) Wardle, Patrick (10 Julie 2018). "A Remote iOS Bug". objective-see llc. Geargiveer vanaf die oorspronklike op 10 Julie 2018. Besoek op 4 Augustus 2020.
21. (en) Greenberg, Andy (10 Julie 2018). "APPLE'S CHINA-FRIENDLY CENSORSHIP CAUSED AN IPHONE-CRASHING BUG". The Wired. Besoek op 4 Augustus 2020.
22. (en) Gurman, Mark (8 Oktober 2019). "Apple Pulls Taiwanese Flag Emoji From iPhones in Hong Kong". Bloomberg. Bloomberg. Besoek op 4 Augustus 2020.
23. (en) Cheng, Kris (5 Oktober 2019). "Taiwan flag emoji disappears from latest Apple iPhone keyboard". Hong Kong Free Press. Besoek op 4 Augustus 2020.
24. (zh) "日本爆烏龍！錯把緬甸國旗當我國旗". TVBS News. 23 Mei 2010. Geargiveer vanaf die oorspronklike op 1 Desember 2020. Besoek op 4 Augustus 2020.
25. (zh) "沖繩車站介紹台灣，誤植緬甸國旗". NOW News. 23 Mei 2010. Geargiveer vanaf die oorspronklike op 27 September 2013. Besoek op 4 Augustus 2020.
26. (en) "Myanmar's flag mistaken as Taiwan's in Okinawa". The China Post. 25 Mei 2010. Geargiveer vanaf die oorspronklike op 28 Mei 2010. Besoek op 28 Mei 2010.
27. (en) Wang, Min-wei. "Attendants at a Taiwan Republic flag-raising ceremony organized yesterday by Peter Wang, leader of the 908 Taiwan Republic Campaign, wave flags reading Taiwan Republic. Geargiveer 27 Maart 2019 op Wayback Machine Taipei Times. Besoek op 22 Januarie 2009.

Eksterne skakels

Wikimedia Commons bevat media in verband met Vlae van die Republiek China.

• (en) Republiek China by Flags of the World.
• (en) "Flag of Taiwan". Encyclopædia Britannica. Besoek op 4 Augustus 2020.

Hierdie artikel is in sy geheel of gedeeltelik vanuit die Engelse Wikipedia vertaal.