長江

  想搵第二個意思嘅話，請睇長江 (搞清楚)。

  提示：呢篇文講嘅唔係楊子。

長江（粵拼：coeng4 gong1；普通話拼音： Chángjiāng ），又叫江水（gong1 seoi2）、揚子江（joeng4 zi2 gong1）、大江（daai6 gong1），位於中國大陸中部，係中國最長嘅江。長江嘅水源地域係中國西部青海省嘅西藏高原，然後向東流過華中地區，最後注入中國東海。長江全長約6300公里，係亞洲最長嘅大江，兼且係地球第三長河，排喺非洲嘅尼羅河同南美嘅亞馬遜河後面。

31°23′37″N 121°58′59″E

長江
揚子江
河
長江黃昏 長江黃昏
花名：江、大江、江水
國	中華人民共和國
省/州/邦	青海、西藏、雲南、四川、重慶、湖北、湖南、江西、安徽、江蘇、上海
支流
- 左邊支流	雅礱江，岷江，沱江，嘉陵江，漢水
- 右面支流	烏江，沅江，資江（中文：資江），湘江，贛江，黃浦江
城市	宜賓、瀘州、重慶、萬州、宜昌、宜都、荊州、石首、岳陽、洪湖、武漢、鄂州、黃石、武穴、九江、安慶、池州、銅陵、蕪湖、馬鞍山、南京、鎮江、無錫、常州、南通、蘇州、上海
源頭	各拉丹冬峰（中文：各拉丹冬峰）
- 位置	中國青海唐古拉山脈
- 海拔	16,542呎（15,126尺，5,042米）
- 座標	33°25′44″N 91°10′57″E
河口	東海
- 位置	中國江蘇南通同上海
- 海拔	0呎（0尺，0米）
- 座標	31°23′37″N 121°58′59″E
長度	3,915哩（12,601里，6,301千米）[1]
流域面積	698,266 mi²（1,808,501 km²）[2]
流量
- 平均流量	30,166 m³/s（1,065,302 ft³/s）[3]
- 最大流量	3,884,613 ft³/s（110,000 m³/s）[4]
- 最細流量	70,629 ft³/s（2,000 m³/s）
長江幹流同埋流域地圖 長江幹流同埋流域地圖

長江流域包含中國19個省、直轄市、自治區，成都、重慶、武漢呢啲重要工業都市，同埋南京、上海呢啲商業都會都喺長江一帶，成個流域有4億5千萬人口。由於長江地區人口密集，串起中國重要城市，條江又深入內地，通航里程長，所以譽爲「黃金水道」，由古至今長江航運業都好發達，水上貿易繁盛，舊時係華中乃至四川、華東嘅核心交通綫路。古代隻江字原本專指長江，而河指黃河，後來呢兩個專有名詞都泛化成指代啲大河川嘅一般名詞。長江通常睇做係中國華南同華北呢兩大地區嘅分界綫，不過淮河亦可以當做得呢條界線。

同黃河一樣，長江係中國歷史、文化、經濟中最緊要嘅江河。肥沃繁榮嘅長江三角洲平原產出中國20%嘅GDP。長江流過多樣嘅生態系統，而佢本身亦係多種特有物種、瀕危物種嘅生息地，如揚子鱷、中華鱘。幾千年來，人民用呢條大江去引水、灌溉、飲用、運載、工業、劃界、戰爭。長江上嘅三峽大壩係世界最大嘅水電工程^[5][6]。

近年來，長江遭受來自工業、農業嘅污染物質，同時喪失緊幾多溼地同湖，增強咗季節性洪水嘅因素。一啲江段喺家下劃做自然保護區去保存當中嘅天然環境。有一段長江流過雲南西北部嘅險山深谷之中，嗰度劃做三江並流自然保護區，UNESCO認證佢爲世界遺產。

國際上長江嘅通用名係「揚子江」（英文：Yangtze River），而喺漢字文化圈入面習慣嗌「長江」。「揚子江」呢個名其實係長江最下游個別名，係指從南京到長江口嗰段^[7]，呢個名源自江蘇揚州南岸喺隋朝時設嘅渡口揚子津，呢度同對出嘅鎮江互有往來。最初「揚子江」係指揚州同鎮江附近嘅江面，後來指稱嘅範圍擴大^[8]。明清時，西洋人從長江口坐船入內地，首先就經揚子江，於是就用呢個名叫長江^[7][9]。而家喺中文入面，「揚子江」可以係指成條長江，亦可以係傳統意義上嘅江蘇嗰段江。

世界主要河川比較
	亞馬遜河	尼羅河	密西西比河	長江	伏加河	剛果河
長度(km)	7,570	6,650	3,779	6,300	3,700	4,700
流域面積 (100萬km2)	7,05	2,9	3,2	1,8	1,3	3,7
平均流量 (1000m3/s)	297	2-3	18	21	8	39

地理

長江分爲上中下游三段，唔同段有唔同名。從青海源頭到湖北宜昌係上游，其中源頭唐古拉山脈到楚瑪爾河口之間喺青藏高原上，呢段最上游嗌長江源（coeng4 gong1 jyun4），又叫通天河（tung1 tin1 ho4），之後巴塘河口到四川宜賓嘅岷江口呢段嗌做金沙江（gam1 saa1 gong1），佢流喺四川西部；喺岷江滙入之後先正式嗌長江，而之後從宜賓到宜昌呢段嗌川江（cyun1 gong1），佢流經四川盆地、三峽，約喺四川東部；中游係宜昌到江西湖口，其中湖北宜都到湖南岳陽嘅江面嗌做荊江（ging1 gong1）；湖口之後係下游，其中安徽境內嗌皖江（wun5 gong1），南京之後嘅江蘇段嗌揚子江；最後流入東海嘅河口喺上海。長江中下游嘅南岸係緊要稻作地帶，舊時嗌做江南，後來「江南」個名收縮到長江下游嘅太湖地區；同時，長江口一帶嘅中國東岸地方嗌做江東。

長江源出自唐古拉山脈，位於青藏高原腹地，之後向東南流過高原，入到橫斷山脈。呢段江流過嘅峽谷非常之險，又深又窄。其中喺橫斷山脈約650km²長嘅嗰段尤其險，喺咁長嘅距離當中江面下降咗1400米咁多，平均一公里下降2米，所以江水洶湧，流得好快。到咗川江嗰段後，基本就位於川東，就一路向東流到三峽。三峽約208公里長，其中峽谷段長97公里^[10]，江面闊100米〜350米^[10]，江兩邊係大約500米〜1000米高左右嘅山^[10]，呢啲山有好多係垂直絕壁，係有名嘅風景。因爲個峽谷入面斷壁千仞、一水中流，長江咁大水量畀峽谷收束住，所以江窄水深，最窄唔過百米，最深水位超過150米，三峽行船時會覺得啲峰㨃上天、而隻船行喺地窖度噉^[10]。而家三峽呢度起咗世界最大嘅水壩三峽大壩。

到咗中游後，就基本出咗峽谷、到咗有好多湖分佈嘅平原，而江面亦跟住開闊。喺荊江嗰段，因爲條江彎、水流慢，淤積咗好多河沙，抬高咗河床，甚至重高過週圍嘅平原，所以好容易發洪，有講「萬里長江、險在荊江」，所以呢度築咗好多河堤、搞咗好多水利工程來防範。長江中下游人口密集，水田多，所以水利好緊要。不過落雨落大咗時，一旦長江水位超過堤防，就會有大洪災。到咗下游，長江先向東北流，到南京之後在轉返東面流向，入咗三角洲。下游嘅長江水勢和緩，有好多沙洲。到咗長江口，南面就係上海。長江係中國商業價値最高嘅江河，1794公里長嘅京杭大運河同長江交叉，連通北面嘅黃河同北京^[11]。

航運

長江係中國中部嘅東西大動脈，2010年，包括支流在內嘅成個長江水系，佢嘅內河貨運量同貨物週轉量分別佔中國內河運輸總量嘅75.3%同78.0%^[12]。雖然話要等岷江喺四川宜賓滙入咗之後先正式叫長江，而喺以前「長江第一港」係宜賓，從宜賓到上海寶山（長江口）之間係長江航運幹道，大約長2800公里左右^[13]；後來整治航道，結果幹道向上推咗28公里到雲南水富，目前水富取代宜賓成爲咗「長江第一港」^[13][14]，而目前嘅長江航運幹道從水富到長江口達2838公里，橫貫中國東中西七省二市^[15]，同時呢條幹道可能重有得向上推、推到四川攀枝花，噉幹道就有3600公里長^[13]。幹道有咁長，再加埋水系內嘅支流，長江嘅航運就好發達，目前長江係世界上運量最大嘅江河，2013年長江幹綫嘅貨物通過量達19.2億噸，連續七年打破世界內河航運記錄^[16]，同時長江嘅江蘇段（揚子江）係全球最繁忙嘅水域^[17]。

喺延長上游航道同時，亦加深長江下游航道。喺以前能夠全年行鹹水船嘅航段淨係到蕪湖，2.5萬噸級海輪要靠起潮先到南京，而南京到武漢最多行到5000噸級海輪。而家從長江口到江蘇太倉段可以雙向行5萬噸級船，起潮時可以行10萬噸級貨船^[18]；而太倉到南京可以行3萬噸級，等到12.5米深水航道從太倉起到南京時，南京亦可以好似太倉家下噉泊到最大嘅10萬噸級船^[18]。南京到蕪湖喺豐水期可以行3萬噸級，其他時候係1萬噸級海輪^[19]；而蕪湖到安慶可以常年行1萬噸級貨輪^[20]。

不過中游嘅荊江因爲航運條件差得滯，影響咗長江航運發展^[21]。目前武漢可以行到5000噸級海輪同萬噸級船隊^[22][23][21]，而豐水期（5月到10月）先至行到萬噸海輪^[23]；宜昌到武漢可以行1000～5000噸級內河船組成嘅船隊^[22][23]，不過常年亦就3000噸級以下嘅船^[21]；而重慶到宜昌可以行萬噸級船隊^[22]、以及3000噸級以下嘅內河船^[23]，而從上海到重慶（羊角灘）常年可行2000噸級船^[24]；重慶以上可行千噸級嘅船^[22]。

支流

• 雲南
  • 普渡河
  • 牛欄江
• 四川、貴州、重慶
  • 嘉陵江
  • 岷江
  • 烏江
  • 雅礱江
  • 沱江
  • 赤水河
  • 綦江
• 湖北
  • 漢水
  • 清江
• 湖南
  • 湘江
  • 沅江
  • 資水
  • 澧水
  • 汨羅江
• 江西
  • 贛江
  • 撫河
  • 信江
  • 修水
  • 饒河
• 安徽
  • 青弋江
  • 水陽江
• 江蘇、上海
  • 秦淮河
  • 滁河
  • 黃浦江
  • 吳淞江

相集

• 
  長江源。唐古拉山嘅冰川。
• 
  長江正源沱沱河
• 
  長江喺青海嘅青藏高原。青藏鐵路檻過長江上流。
• 
  金沙江虎跳峽
• 
  長江上游嘅金沙江。喺雲南嘅虎跳峽。
• 
  流過雲南嘅峽谷嘅金沙江
• 
  長江響雲南兜返轉行（長江第一彎）
• 
  四川宜賓岷江口。岷江同金沙江合流嘅地方，之後先嗌做長江。
• 
  長江三峽
• 
  長江瞿塘峽
• 
  三峽大壩
• 
  長江中游嘅湖北宜昌
• 
  長江三角洲
• 
  南京長江大橋
• 
  喺南京嘅江面度行船
• 
  長江最後一條支流黃浦江滙入大江嘅地方（上海寶山）

地圖位置

臺 灣 海 峽 白令海 恆河 白令海峽 哥打華里河 戈壁沙漠 南海 挪威海 新畿內亞 多瑙河 東西伯利亞海 東海 日本海 東北 平原 立借夫海 利拿河 馬麻拉海 馬來半島 湄公河 馬爾代夫 巴倫支海 貝加爾湖 峇里 波羅的海 白海 孟加拉灣 婆羅洲 北冰洋 北海 伏加河 雅魯藏布江 庫頁島 北威拿河 蘇門答臘 蘇拉威西 斯間地那維亞 西奈 星加坡島 細亞細亞 亞丁灣 阿剌伯半島 阿剌伯海 鹹海 黑龍江 亞速海 非洲之角 鶯曼羣島 阿爾泰山 愛琴海 耶尼射河 阿曼灣 鄂河 澳洲 鄂荷次克海 烏拉河 烏拉山脈 幼發拉底河 伊朗高原 印度河 印度次大陸 彥地結卡河 北印度洋 中南半島 日本列島 爪哇 珠江 長江 祁連山 卡拉海 喀喇崑崙 裏海 琴察加半島 高加索 加羅蓮 羣島 哥羅馬河 崑崙 聖誕島 塔克拉瑪干 沙漠 泰國灣 北太平洋 天山 北部灣 底格里斯河 帝汶 青藏高原 帕米爾 波斯灣 比初拉河 菲律賓 菲律賓海 朝鮮半島 北海道 紅海 華北 平原 黃河 黃海 黑海 喜馬拉雅山 印度大  平原 興都古舒 臺灣 此格： 去睇 • 討論 • 編輯 • 歷史 亞洲主要地理

睇埋

• 長江文明
• 長江三峽
• 三江並流
• 三峽大壩
• 白鰭豚

攷

1. Encyclopaedia Britannica: Yangtze River
2. Zhang, Zengxin; Tao, Hui; Zhang, Qiang; Zhang, Jinchi; Forher, Nicola; Hörmann, Georg. "Moisture budget variations in the Yangtze River Basin, China, and possible associations with large-scale circulation". 《Stochastic Environmental Research and Risk Assessment》. Springer Berlin/Heidelberg. 24 (5): 579–589. {{cite journal}}: |access-date= requires |url= (help)CS1 maint: multiple names: 作者名單 (link)
3. "Main Rivers". National Conditions. China.org.cn. 喺2010-07-27搵到.
4. "Three Gorges Says Yangtze River Flow Surpasses 1998". Bloomberg Businessweek. 2010-07-20. 喺2010-07-27搵到.
5. 〈Three Gorges Dam, China（中國三峽大壩）〉。Earth Observatory, NASA。2009年4月15號。喺2019年11月30號搵到。
6. 〈Three Gorges Dam profile（三峽大壩資訊）〉。International Rivers。2009年8月3號。原著喺2009年4月20號歸檔。喺2019年11月30號搵到。
7. 孫仲明, 趙葦航. 長江與揚子江名稱初攷. 地名知識. 1980(03)
8. 《大觀圖經》：「揚子江自黃天蕩西牛步沙與建康爲界……徑通州入海。」
9. 混亂 야기하는 中國 關聯 誤記들 바로잡아야，《世界日報》 2007年11月7號（韓文）
10. 〈長江三峽〉。2014年7月17號。原著喺2014年7月17號歸檔。喺2019年11月22號搵到。
11. James F. Luhr (2009年). 《Smithsonian Institution Earth》. Smithsonian Institution. p. 232頁. ISBN 978-0-7566-6115-1.
12. 〈交通運輸部長江航務管理局：黃金水道暢九州〉。原著喺2014年7月18號歸檔。喺2014年7月13號搵到。
13. 21世紀網：川滇黔合力推進長江上游航道延伸800公里 攀枝花有望成長江第一港 或改變上游地區區域格局^{[失咗效嘅鏈]}
14. 昭通日報：港口經濟助推水富起舞長江^{[失咗效嘅鏈]}
15. 新華網湖北頻道：長江航道建設駛上快車道
16. 中國網：長江連續七年刷新世界內河航運記錄^{[失咗效嘅鏈]}
17. 〈中國日報：長江江蘇段成全球最繁忙水域 高峰流量每天3000艘次〉。原著喺2015-06-15歸檔。喺2014-07-13搵到。
18. 中國新聞網：長江口12.5米深水航道延伸至太倉
19. 〈中安在綫：萬噸級海輪可常年直抵蕪湖港〉。原著喺2015年6月15號歸檔。喺2014年7月13號搵到。
20. 〈中安在綫：萬噸級貨輪可直達安慶〉。原著喺2012年12月30號歸檔。喺2014年7月13號搵到。
21. 〈新華湖北：抱團整治航道 湘贛鄂皖擬合力打通長江「中梗阻」〉。原著喺2014年7月1號歸檔。喺2014年7月13號搵到。
22. 〈長江引航中心：六十載，長江航道步入「讀圖時代」〉。原著喺2020年3月28號歸檔。喺2014年7月13號搵到。
23. 長江商報：萬噸級海輪有望常年直達武漢
24. 中華人民共和國中央人民政府：交通運輸部5月27日發佈4條救災物資水陸聯運綫路