動物認知（粵拼：dung6 mat6 jing6 zi1 | 英文：animal cognition）係指非人類動物嘅認知能力。齋靠相對簡單嘅研究經已可知，非人類動物具有記憶、解難同埋決策等嘅多種認知功能，而有部份嘅動物物種甚至仲具有一啲能力，原本學界以為係人類先至有嘅，例如係自我意識以及語言呀噉。呢方面嘅研究，亦都引起咗有關動物權益嘅一啲討論。
定義問題
唔同物種
根據對動物認知嘅研究，智能上表現出眾嘅非人類物種有以下呢啲：
- 黑猩猩屬同其他人科動物：黑猩猩同多種嘅人科動物都識得運用工具（一般認為，曉用工具係智能高嘅表現），例如係用石頭打爛一啲硬嘅嘢食嘅外殼，或者用樹枝將匿喺窿入面嘅蟲撩出嚟等等[1]；除此之外，黑猩猩係極少數具有自我意識（知道自己係同環境分開嘅一件物體，識得喺鏡入面認得自己）嘅非人類動物[2]。
- 狼等多種嘅犬科動物：有實驗試過要狼同狗喺實驗室入面搵嘢食，嘢食收埋咗喺兩個盒當中其中一個裏面，而研究員會用各種嘅手勢話俾佢哋知嘢食喺邊個盒嗰度，結果發現，狼同狗都曉慢慢學識解讀研究員嘅手勢，學識一嘢就搵到邊個盒有嘢食（學識解讀環境入面嘅訊號係智能嘅表現）；狗出咗名識得學做各種嘅手勢同動作（例如係扮死），而狼只要有適當嘅誘因，都曉學多種嘅動作[3][4]。
- 海豚：海豚能夠解決複雜嘅問題以及用複雜嘅方法同同類溝通；而且有研究試過搵到有海豚曉採集海綿，再用啲海綿包住自己嘅吻突（頭前方突出嗰忽），似乎用嚟幫助佢哋用吻突喺海床嗰度掘窿－表示海豚識得整同用工具解難[5]。
- 大笨象：大笨象曉做好多有智能嘅行為；例如有研究發現大笨象識喺地下掘窿，用個窿裝住飲嘅水，跟住仲會由樹嗰度採集樹皮，用樹皮遮住個窿等啲水唔會蒸發走，打後遲啲仲會返去個窿嗰度飲水－即係話大笨象會用工具，而且識做長遠嘅計劃[6]。
- 烏鴉：烏鴉識得運用工具，例如有研究搵到，有烏鴉會將堅果擺喺馬路上，等經過嘅車車爛堅果嘅殼，然後自己攞個堅果食[7]；烏鴉仲曉同同類傳達複雜嘅資訊，例如有研究試過發現，烏鴉能夠認得傷害同攻擊過自己嘅人類，及後仲令到區內其他（冇見過嗰個人嘅）烏鴉同樣學識避開嗰個人－表示烏鴉嘅溝通系統能夠傳達「某個某個人係乜樣」等嘅複雜資訊[8]。
- 蜜蜂：蜜蜂曉起大過自己身體好多嘅竇（一般認為，曉起大過自己身體好多嘅結構係智能嘅象徵，例如人類就識做呢樣嘢）；而且蜜蜂能夠記住採過嘅花－就算朵花離佢個竇成幾公里遠－嘅位置記起碼幾日嘅時間，有相當強嘅記憶力[9][10]。睇埋真社會性。
- 多種嘅頭足綱（包括咗八爪魚同墨魚等嘅動物）：頭足綱嘅神經系統同脊椎動物嘅大相逕庭，但就有極高度嘅智能，例如八爪魚就識得做觀察學習（透過觀察第啲動物嘅行動同結果嚟學識乜嘢應該做乜嘢唔應該）以及運用多種嘅工具[11]。
自我意識
鏡測試（mirror test）係廿一世紀初動物行為學上成日用嘅一種實驗，指睇吓一隻動物識唔識得喺鏡入面認得自己，用嚟測試隻動物有冇自我意識：自我意識係一種心理狀態，指一個個體意識到自己係同第啲個體以及環境分離嘅一件物體；响廿一世紀初嘅認知科學上一般認為，如果一隻動物有「自己」嘅概念，噉佢理應會能夠（例如）喺塊鏡入面睇到自己頭頂上面有笪污漕嘢，並且郁手清理笪嘢。
根據鏡測試嘅結果，絕大多數嘅動物物種都冇自我意識，而人、黑猩猩同鬼蝠魔鬼魚等嘅物種係少數嘅例外[12]。
睇埋
引咗
拎
Wikiwand in your browser!
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
