邪惡問題

邪惡問題（粵拼：ce4 ok3 man6 tai4 / 英文：problem of evil），又有叫罪惡問題，係宗教哲學上一條好出名嘅問題。條問題係噉嘅：「如果真係有個全知、全能同全善嘅上帝存在，點解呢個世界會有邪惡同痛苦？」呢條問題喺「上帝係咪存在」嘅討論當中引起咗巨大嘅爭議，到咗廿一世紀初世人對呢條問題仲未有一致嘅共識。

伊比鳩魯（希臘文：Ἐπίκουρος；341-270 BCE）嘅雕像；佢係個古希臘哲學家，而且據講係最早提出邪惡問題嘅人^[1]。

背景概念

内文：宗教哲學

邪惡問題本質上係屬於宗教哲學嘅範疇，喺「上帝係咪存在」相關嘅討論上成日會有人提起^[2]。

邪惡存在

内文：邪惡同痛苦

睇埋：痛

首先，諗吓邪惡同痛苦嘅概念：事實表明，自然界無時無刻都有大量嘅動物正喺度畀第啲動物監生食落肚，而且又有好多動物喺度餓死渇死病死（野生動物嘅痛苦）；主流哲學家認為，呢啲噉嘅事好顯然會引起大量嘅痛苦^{[註 1]}；而智能冠絕動物界嘅人類，時不時都會為咗私利而有意引起痛苦，甚至做呢啲嘢嗰陣會經過深思熟慮先郁手，例子可以睇吓謀殺、強姦同埋打仗等嘅現象；雖然邪惡呢個概念難定義，但「有能力決策嘅個體，為咗私利等嘅原因引起巨大痛苦」一般都會畀人覺得係邪惡^[3]。噉即係話

「

邪惡同痛苦好明顯係存在嘅，而且人類承受好多邪惡同痛苦。

」

2016 年影到兩隻狼喺度開餐食鹿；有人指出，喺野外嘅動物成日都會因為畀其他動物捕食，而遭受極大嘅痛苦。

基本論證

内文：全知、全能同全善

睇埋：上帝同全能悖論

根據廿世紀初主流嘅基督教同猶太教思想，上帝有以下呢三樣特徵^{[註 2][4][5]}：

• 全知：上帝乜都知，所以佢理應知道「佢創造嘅呢個宇宙，充滿咗各式各樣嘅邪惡同痛苦」。
• 全能：上帝咩都做得到，所以如果佢想，佢理應會有能力令所有嘅邪惡同痛苦消失。
• 全善：上帝係善良嘅，佢深愛世人，甚至係善嘅化身；而正路認為，如果 A 深愛 B，噉 A 應該會想減少 B 受到嘅痛苦，會郁手減少 B 受到嘅痛苦。

噉問題就嚟喇。邪惡問題最基本嗰款論證係好似以下噉嘅^[1]：

1. 如果上帝存在，而且佢係全知全能全善嘅，噉佢理應會知道邪惡同痛苦存在（全知），會有能力令呢啲嘢消失（全能），亦會郁手令呢啲嘢消失（全善）。噉嘅話，世界理應唔會再有邪惡同痛苦。
2. 不過，邪惡同痛苦好明顯存在（上面提咗）。
3. 所以「假設上帝存在」同現實觀察得到嘅嘢，出現咗場矛盾。

假設冇其他理由，討論者就得出結論：

「

全知全能全善嘅上帝唔存在。

」

解答

内文：自由意志

有唔少思想家都嘗試對邪惡問題作出解答。最簡單嗰隻回應係，上帝缺少咗全知全能全善當中其中一樣，即係可能

• 上帝唔係全知嘅，佢有能力同意圖想令邪惡同痛苦消失，但佢唔知呢啲嘢存在；
• 上帝唔係全能嘅，佢知邪惡同痛苦存在亦想郁手消滅呢啲嘢，但佢冇能力噉做；
• 上帝唔係全善嘅，佢知邪惡同痛苦存在亦有能力消滅呢啲嘢，但佢唔在意人類同第啲動物承受緊嘅痛苦；有啲人甚至覺得上帝係邪惡嘅，特登整咗個充滿邪惡同痛苦嘅世界。

除此之外，亦都有啲人由自由意志嘅角度嚟思考^[6]：例如佢哋有諗過全能悖論等嘅問題，主張上帝嘅全能係「合邏輯嘅全能」，即係指「上帝淨係做到任何合邏輯嘅嘢，所以唔會整到嚿佢舉唔起嘅石頭出嚟」；呢啲思想者又指出，如果一個人要算係做出咗善行，佢必定要靠自己嘅自由意志，喺「有權揀做惡行」嘅情況下揀做出善行，先至可以算係展現咗善呢種價值；而如果上帝完全唔畀人有「揀做惡行」嘅選擇權，人冇可能達致善；噉亦即係話，「一個淨係得善、冇惡嘅世界」係一樣自相矛盾嘅嘢，所以「合邏輯全能」嘅上帝冇可能造到啲噉嘅嘢出嚟。

到咗廿一世紀初，邪惡問題依然廣泛噉畀人視為一條未解得開嘅問題。

睇埋

• 作孽：喺相信「作孽」呢個概念嘅宗教—例如佛教同印度教—當中，啲人有陣時會用孽嚟解釋邪惡同痛苦點解存在—即係好似「佢前世做衰嘢做得多，所以今世先要受埋晒啲噉嘅苦」噉嘅諗法。
• 捕食：捕食呢種自然現象，被指係痛苦嘅一大來源。
• 巨匠造物主：另一個解釋「點解世界充滿邪惡」嘅諗頭。
• 無神論
• 理神論
• 虛無主義

註釋

1. 有啲思考者會攻擊呢一點，主張（例如）人以外嘅動物並冇能力真係感受痛苦。可以睇吓動物認知同痛等嘅課題。
2. 不過正如跟住落嚟會講到，呢三個特徵「要點界定」都係一條問題。

引述

1. Hickson, Michael W. (2014). "A Brief History of Problems of Evil". In McBrayer, Justin P.; Howard-Snyder, Daniel (eds.). The Blackwell Companion to The Problem of Evil. Hoboken, New Jersey: Wiley-Blackwell. pp. 6-7.
2. Gregory A. Boyd (2003), Is God to Blame? (InterVarsity Press). pp. 55-58.
3. Garrard, Eve (April 2002). "Evil as an Explanatory Concept". The Monist. Oxford University Press. 85 (2): 320-336.
4. Wierenga, Edward R. (1989). The Nature of God: An Inquiry Into Divine Attributes. Cornell University Press.
5. Haji, Ishtiyaque (2009). "A Conundrum Concerning Creation". Sophia. 48 (1): 1-14.
6. Lacewing, Michael (2014). Philosophy for AS: Epistemology and Philosophy of Religion. Routledge. pp. 239-242.

拎

• （英文） Zalta, Edward N. (ed.). 邪惡問題，史丹福哲學百科全書