定義

定義（粵音：ding6 ji6），做動詞嗰陣又可以叫界定，係指一段「描述某隻字詞或者某個概念嘅意思」嘅語言或者文字（講定個意義）。以定義為例，定義呢隻詞嘅一個可能定義，就係前面寫咗嘅「描述某隻字詞或者某個概念嘅意思嘅文字」呢一句嘢^[1]。

原則上，字典會講明一隻語言裡便嘅每個字詞嘅定義^{[註 1]}。

定義喺學術討論上好重要，學者做親乜嘢研究，通常開始討論前，第一樣嘢就係要講明晒用緊嗰啲概念係咩定義先。噉係因為事實表明，唔講清楚啲概念嘅定義好易會出現謬誤^[1]。

基本概念

「白馬到底係唔係馬？」答呢條問題之前，討論嘅人應該搞清楚係呢隻字詞係咩意思先。

内文：哲學分析同語義謬誤

「要長智慧，第一步係要識得定義啲字詞。定詞啟智。」
——蘇格拉底^{[註 2][註 3][2]}

喺哲學同科學嘅討論當中，啲人第一樣會做嘅嘢通常係講明晒啲字詞嘅定義先。想像有隻字詞，叫佢做 X，一個人攞住 X 嘅定義，理應要能夠清楚噉分到「邊啲嘢屬於 X 邊啲嘢唔屬於 X」。噉先至唔會因為搞唔清楚字詞定義而引起謬誤^[1]。

舉個例說明，白馬非馬就係漢字文化圈入便一個好出名嘅謬誤，源於冇搞清楚定義。呢個謬誤簡化講如下^[3]：

白馬有「白色」呢一樣馬冇嘅特徵，

如果話白馬係馬，噉兩樣嘢特徵應該完全一樣，所以

白馬唔係馬。

一般認為，呢一個論證查實係一個謬誤，分析如下：無論係上古文言定係現代粵語，A 係 B 噉樣嘅句子有至少兩個可能意思，可以指

1. 「A 同 B 係同一樣嘢。」（兩樣嘢特徵完全一樣）又或者係
2. 「A 係 B 嘅一種。」

白馬同馬的確唔係同一樣嘢，但係白馬係馬嘅一種，即係話白馬係馬呢句嘢喺第一個意思上唔合理，但係喺第二個意思上係合理嘅。喺白馬非馬呢個「論證」當中，提出論證嗰個人撈亂咗白馬係馬嘅兩個可能意思，就出咗個謬誤^[4]。順帶一提，呢種因為一隻字詞有幾個可能意思而引起嘅謬誤，就係所謂嘅語義謬誤。

定義做法

一隻黑馬

睇埋：語義學、原型理論同理型論

要制定一個定義，可以有以下呢啲做法^[5]:2.3：

• 本質特性：根據本質主義嘅諗法，一嚿物件或者一個概念梗會有一組「核心特性」，呢啲特性可以用嚟做佢嘅定義；喺古典嘅本質主義當中，呢啲定義特徵固有，冇得變。有關本質主義思想有咩問題，可以睇睇進化論上講到物種之間要點分界^[6]，又或者係語言學當中講到嘅方言連續體現象。
• 直示定義：講嘢嘅人可以索性去搵一啲實體物體返嚟，用嚟做個定義嘅例子；例如要界定咩係雀鳥講嘢嘅人可以去搵一啲雀鳥返嚟，用嚟做隻字詞嘅定義；不過呢個方法被指好多問題，例如如果隻字詞唔係指緊一啲實質、感知得到嘅事物或者特性（好係係因為同所以等表示邏輯關係嘅字詞），就好難靠直示定義；除咗噉，「例子要點揀」亦係一個幾大嘅問題，如果揀得唔恰當，聽嘢嘅人好易會錯意——想像依家要定義咩係馬，用直示定義嘅人搵一大堆馬返嚟，但係佢淨係搵咗啡色嘅馬同白色嘅馬，聽嘢嘅人就誤以為馬一定係白色或者啡色嘅。
• 同義詞：講嘢嘅人提出隻字詞有邊啲同義詞；用粵語嚟諗嘅話，嬲呢隻字詞嘅同義詞可能包括憤怒噉；呢種方法亦被指有缺憾——字詞間好多時都做唔到真正 100% 同義，例如喺粵語入便花做形容詞嗰陣可以用嚟指某樣嘢花碌碌，但同時花又可以做名詞指開花植物嘅生殖用構造，噉即係話喺某啲情況下，花同花碌碌的確可以互換，但係又有好多情況係兩隻字詞唔可以互換嘅。
• 情境定義：講嘢嘅人提出隻字詞同另外一啲字詞有乜嘢關係；例如家吓要定義咩係𢯎痕，用情境定義嘅話可以將隻字詞界定為覺得痕嗰陣會做嘅嘢——講隻字詞同痕有咩關係，呢種方法問題在於，佢假設咗聽嘢嘅人已經知道另外嗰隻字詞（痕）係乜嘢意思，而呢點喺好多情況下都唔成立。
• 範例定義：講嘢嘅人提出一拃概念，用呢拃概念嚟做隻字詞嘅「典型例子」；例如家陣要定義咩係雀鳥，講嘢嘅人可以提出「烏鴉、燕子同天鵝都係典型嘅雀鳥」噉嘅講法；範例定義方法亦受到批評，話佢成日會排除邊緣個案，例如企鵝都係雀鳥，但係喺特徵上同啲「典型例子」有明顯差異（企鵝唔識飛，但啲典型例子冚唪唥都識）所以係邊緣個案。
• 從屬差異定義（GD 定義）：古希臘哲學家亞里士多德出咗名偏好從屬差異定義^[7]，用 GD 定義嚟界定一隻字詞，只需要講明兩樣資訊——嗰一樣嘢屬於咩類別（genus）同埋係佢同啲同類事物相比有咩分別、有咩獨特之處（differentia），舉幾個例說明，

語句[註 4]	要定義嘅嘢	Genus	Differentia
人係一種動物，具有理性。	人	動物	具有理性
三角形係一種多邊形，有三條邊。	三角形	多邊形	有三條邊
長篇小說係一種文學作品，長而且有複雜嘅情節。	長篇小說	文學作品	長而且有複雜嘅情節

學術使用

睇埋：科學分界問題

「一個概念嘅定義... 一定要完整先得，佢實要冇歧義噉分辨每一件物件算唔算係屬於嗰個概念指嘅嘢... 個概念一定要有一條好清晰嘅邊界。」^[8]

喺廿一世紀初，認真嚴謹嘅學術領域通常一開始都要講明自己個領域嘅定義，又要講明啲基礎概念嘅定義。舉幾個例說明：

• 物理學：係指用科學方法嚟研究宇宙基本定律嘅領域^[9]；
• 化學：係指用科學方法嚟研究物質同物質基本特性嘅領域^[10]；
• 生物學：係指用科學方法嚟研究生命嘅領域，不過「生命一詞要點定義」喺廿一世紀初嘅生物學上仲係一條有些少爭議性嘅課題^[11]；
• 心理學：係指用科學方法嚟研究人類行為嘅領域^[12]；
• 經濟學：係指用科學方法嚟研究貨品同服務嘅生產、消費同埋分配嘅領域^[13]；
• 音樂：喺廿一世紀初嘅樂理上，音樂嘅定義係一條有返咁上下爭議性嘅課題，不過主流都同意音樂係一種有組織嘅聲（但唔係全部有組織嘅聲都係音樂）^[14]；

等等。

相關問題

• 歧義，指一隻字詞有幾個可能嘅意思。
• 含糊，指一隻字詞根本未有清晰意思。
• 循環定義，用字詞界定其他字詞必然會產生呢個問題。

睇埋

• 概念
• 集合
• 詞彙表
• 分析-綜合區別

註釋

1. 但語義學研究表明，字典定義通常捕捉唔到字詞嘅實際定義。
2. 蘇格拉底講嘅唔係粵語。上面句嘢譯自標準英文譯版 The beginning of wisdom is the definition of terms。
3. 字面啲嘅譯法：「智慧嘅起始係對字詞嘅定義。」
4. 姑且唔好諗呢啲定義係咪合乎現實住。

引述

1. Bickenbach, Jerome E., and Jacqueline M. Davies. Good reasons for better arguments: An introduction to the skills and values of critical thinking. Broadview Press, (1996). p. 49.
2. 例子可以睇 Byard, R. W. The beginning of wisdom is the definition of terms 互聯網檔案館嘅歸檔，歸檔日期2022年11月14號，.. Dr Jhodie R Duncan, page 18.
3. 《戰國策》〈趙策〉：「夫刑名之家，皆曰：白馬非馬也。」
4. Damer, T. Edward (21 February 2008). Attacking Faulty Reasoning: A Practical Guide to Fallacy-Free Arguments. Cengage Learning. pp. 121-123.
5. Riemer, N. (2010). Introducing semantics. Cambridge University Press.
6. Hull, D., 1965, "The Effect of Essentialism on Taxonomy: Two Thousand Years of Stasis", British Journal for the Philosophy of Science, 15: 314–326, 16: 1–18.
7. Parry, William Thomas; Hacker, Edward A. (1991). Aristotelian Logic. G - Reference, Information and Interdisciplinary Subjects Series. Albany: State University of New York Press. p. 86.
8. Aarts, B., Denison, D., Keizer, E. and Popova, G., (eds.) 2004. Fuzzy grammar. A reader. Oxford: Oxford University Press，引咗嗰段："A definition of a concept... must be complete; it must unambiguously determine, as regards any object, whether or not it falls under the concept... cept... Thus there must not be any object as regards which the definition tion leaves in doubt whether it falls under the concept; though for us men, with our defective knowledge, the question may not always be decidable. We may express this metaphorically as follows: the concept must have a sharp boundary."
9. Cropper, W. H. (2004). Great Physicists: The Life and Times of Leading Physicists from Galileo to Hawking. Oxford University Press. ISBN 978-0-19-983208-8.
10. Reinhardt, C. (2001). Chemical Sciences in the 20th Century: Bridging Boundaries, Pages 1–2. Wiley-VCH.
11. Trifonov, Edward N. (2012). "Definition of Life: Navigation through Uncertainties". Journal of Biomolecular Structure & Dynamics. Adenine Press. 29 (4): 647–50.
12. Fernald L.D. (2008). Psychology: Six perspectives (pp.12–15). Thousand Oaks, CA: Sage Publications.
13. Krugman, Paul; Wells, Robin (2012). Economics (3rd ed.). Worth Publishers. p. 2.
14. Gracyk, T. & A. Kania (eds.), 2011, The Routledge Companion to Philosophy and Music, New York: Routledge. pp. 1-13. "Definition".

拎

• （英文） 定義，史丹福哲學百科全書講定義呢個概念。