探戈
From Wikipedia, the free encyclopedia
探戈(粵拼:taam3 gwo1;英文:Tango,粵拼:taan1 gou4)係盛行於拉丁美洲以至歐美嘅一套音樂同社交舞。探戈起源自 1880 年代嘅阿根廷同烏拉圭一帶,初時係由啲低下階層嘅人跳嚟自娛嘅,但後嚟大受歡迎而廣傳,仲成功噉進入社會上流階層嘅舞廳同舞會;探戈响 1910 年代嘅歐洲盛極一時,亦都因此出咗多個地區性嘅風格,例如芬蘭嘅人就出嗮名鍾意探戈[1][2]。
探戈嘅樂曲同舞有好多易認嘅特徵:傳統上,探戈音樂會係用鋼琴、低音提琴、小提琴、結他或者笛嚟演奏嘅,多斷音;喺節奏特性上,典型嘅探戈樂曲拍號係 4/4 或者 2/4,而探戈發源地阿根廷嗰種探戈喺速度上一般都中等偏快[3];啲人跟住探戈音樂嚟跳舞嗰陣,通常會兩個人成雙成對一齊跳,用封閉位分帶領同跟隨噉跳,而且跳舞雙方嘅面或者身體仲會掂住對方,俾好多人認為係一種非常親密同浪漫嘅舞[4]。
探戈嘅文化影響力相當龐大:就算到咗廿一世紀初,探戈喺拉丁美洲嘅舞會嗰度依然係實會見到咁滯,仲有對芭蕾舞等嘅第啲音樂舞蹈傳統產生影響[5];事實係喺 2009 年,探戈仲犀利到俾聯合國教科文組織列埋做阿根廷同烏拉圭嘅共同非物質文化遺產-認定咗探戈嘅文化地位[4]。