西班牙文
羅曼語種 / From Wikipedia, the free encyclopedia
西班牙文(粵拼:sai1 baan1 ngaa4 man4*2;西班牙文:español 或者 castellano)係羅曼語族響伊比利亞半島上面嘅一隻語言。發源自西班牙中部卡斯提亞。16世紀開始,隨住美洲殖民運動,西班牙人將西班牙文帶到西半球同其他地方。西班牙文係聯合國六種工作語言之一,亦都係20個國家同好多國際組織嘅官方語言。因為佢分佈廣泛,所以西班牙文相關嘅文化,響現代都一直擴張。西班牙文嘅母語人口係四億八千萬;而非母語人口就大概係九千萬人,喺羅曼語族入面最多人用嘅。總使用人口大概排世界第三。
「西班牙文」可以話係擴大咗卡斯提亞文(含義)代表咗成個西班牙嘅政治稱謂。唔少西班牙人同美洲人重係會以卡斯提亞文(Castellano)來稱呼呢隻語言。1978制定嘅西班牙憲法明確表明除卡斯提亞文外,重有其他嘅西班牙語言(lenguas españolas),而冇「單一絕對嘅西班牙語言」。
西班牙文好似例如芬蘭文或者聖經希伯來文咁,講嘢嗰陣唔需要加「我」、「你」、「我哋」、「你哋」同埋「佢哋」等等嘅主詞嘅。俾如話西班牙文嘅「我食蘋果」係「Como una manzana 」(如果加埋「我」嘅話,呢個句子就會變成「Yo como una manzana 」喇)。如果將呢個句子直譯做廣東話就係「食一個蘋果」。因爲喺西班牙文,你係可以根據詞形嚟到斷定嗰個句子講嘅係「我做咩」定係「你做咩」,所以你喺講嘢嗰陣你揀加定唔加主句喺句子裏面。