拍子記號

拍子記號（粵拼：paak3 zi2 gei3 hou6；英文：time signature），簡稱拍號，係樂譜上嘅一種記號，喺五線譜或者類似樂譜上面用一對數字，上面嗰個表示一個小節入面有幾多個時間單位，而下面嗰個就表示一個時間單位係用幾分音符表示^[1]。一個時間單位通常即係一拍，除非係複拍子^[1]。

例如，下面呢段音樂拍子記號寫 3/4，粵語講 ｢3 拍 4｣ 或者 ｢三四拍子｣，上面嘅 3 指每小節 3 拍，而下面嘅 4 就指四分音符為之 1 拍。

常態拍子

四四拍子比較特別，叫常態拍子^{[註 1]}（英文：common time）或者普通拍子^{[註 2]}，好多時唔寫 4/4，只係用一個大楷 C 表示。

複拍子

複拍子^{[註 2]}（compound time^[2]）係指拍子記號上面嘅數字係 3 嘅倍數，但係大過 3^[1]。喺咁嘅情形下，下面所指嘅幾分音符，就要 3 個先算一拍，例如 6/8 係複拍子，要 3 個八分音符先算一拍^[1]。

複合拍號

複合拍號^{[註 3]}指有加號嘅拍子記號（都係 compound time^[2]），例如 3/8 + 4/8 代表 7/8。

表示不規則拍子^{[註 4]}嘅拍子記號亦叫複合拍號，例如 5/4、7/8 等等^[3]。

指揮只係得指兩拍、3 拍或者 4 拍嘅基本手勢，所以 5 拍或者 7 拍等等係指唔出嘅，所以一定要拆散嚟指，而且可以有多過一種拆法，比較複雜。

註

1. 譯名見："Common time". 《音樂字典》 (香港中文)。M5 Music。喺2024年8月25號搵到。
2. 譯名見：《音樂科學與教常用英漢辭彙》 (PDF) (英文、香港中文)。2023年9月。喺2024年7月22號搵到。
3. 譯名見：〈電結他〉 (香港中文)。香港結化藝術教育中心。喺2023年3月1號搵到。
4. 譯名見：王月 (2018年5月11號)。〈【樂人專欄：音樂 ABC】第四章：拍子記號〉。《樂人谷》 (香港中文)。喺2024年8月25號搵到。

考

1. 王月 (2018年5月11號)。〈【樂人專欄：音樂 ABC】第四章：拍子記號〉。《樂人谷》 (香港中文)。喺2024年8月25號搵到。
2. "compound time". LilyPond — Music Glossary (英文) (第2.24.1版). 喺2023年3月1號搵到.
3. 〈電結他〉 (香港中文)。香港結化藝術教育中心。喺2023年3月1號搵到。