From Wikipedia, the free encyclopedia
在港澳洲人係身處喺香港嘅澳洲籍人,總共有大約10萬位[1]。佢哋主要都係香港裔澳洲人,不過都有唔少係其他亞洲人或者澳洲白人[2][3] 。大部分在港澳洲人都擁有香港同澳洲嘅雙重國籍。
澳洲政府對喺香港嘅貿易關係非常重視[5]。澳洲-香港自由貿易協議 (A-HKFTA) 容許澳洲喺冇關稅嘅情況下出口去香港,亦都容許澳洲嘅服務業能夠簡易咁進入香港擴展生意。澳洲同香港嘅貿易關係令香港成為咗澳洲第10大嘅出口市場,總共有價值72億美元嘅貨品,而有唔少都係高價嘅飲食貨品,例如紅酒、海產、豬牛肉、生果、同奶類等。[6] 同時,澳洲嘅服務性出口價值達19億澳元。香港因此係澳洲喺東南部最大嘅生意地,亦係澳洲商會最大嘅離岸地點。[7]
好多澳洲籍嘅人,大部分都係香港華人,都會嚟到香港喺大學讀書或者做短期工,因為有超過600間澳洲公司都喺香港運作[5]。香港一向都係被認為係亞洲主要嘅金融中心之一,亦係通往大陸市場同其他亞洲市場嘅重地,所以唔少公司都會選擇喺香港嚟做試驗新市場或者產品嘅地方。除此之外,香港嘅人口一般都會識用英文溝通,所以請人都易啲。為咗繼續呢啲嘅經濟投資,香港政府都會為公司提供低稅額嚟鼓勵佢哋到香港投資。除咗澳洲商會之外,澳洲亦都有網絡組織,例如 Support Australia,專係代表香港嘅澳洲公司[5]。
因為澳洲同香港嘅東西文化差異,有唔少公司喺關於内部管理嘅方法都會有所誤會[8]。所以,有唔少香港嘅傳統公司都變為西方化,令西方公司更加明白内部運作。亦有啲西方商人嘗試了解香港人嘅文化,所以雙方都從中調整佢哋嘅跨文化生意模式。
澳洲駐香港及澳門總領事館係澳洲喺香港嘅主要外交地點,代表喺香港嘅10萬位澳洲公民並提供唔同嘅服務,包括簽證、護照、公民申請、國際留學同工作、聯絡澳洲貿易委員會同埋澳洲警察等。[9]
不過,因為内地官員唔承認雙重國籍,所以所有澳洲香港嘅雙重國籍者,都一律視為中華人民共和國公民。[10][11]名義上,佢哋唔能夠使用領事館嘅任何領事協助。
自從2020年中華人民共和國推出香港國安法以嚟,澳洲政府認為係違反咗香港基本法,話呢條法律只會摧毀香港人所擁護嘅民主價值觀同埋一國兩制嘅基礎[12]。所以澳洲之後發佈咗旅行警告,呼籲在港嘅澳洲公民:“如果你對新嘅法律(即係國安法)有擔心,就重新考慮留喺香港嘅需要”[13]。兩日之後,澳洲亦都中斷咗同香港嘅逃犯條例[14]。
香港澳洲國際學校係澳洲喺香港嘅主要教育機構,為學生提供澳洲式嘅教育制度。[15]
2014年,澳洲推出咗“新哥林堡”計劃,為澳洲嘅大學生提供去亞太區留學同做實習嘅機會,而香港就被選為四個主要留學地點之一。截止2021年底,呢個計劃服務咗超過2000位澳洲學生,而合作嘅範圍包括工程、衛生、傳媒、商業、教育、城市規劃等等嘅學界。
近日,澳洲政府對香港學生能夠接受澳洲式教育非常關注,所以喺2018年同香港簽咗130條關於教育嘅協議,包括增加兩地嘅師生交流同埋學術上嘅合作等等[16]。
香港澳洲協會 (Australian Association of Hong Kong, AAHK) 係喺1954年,香港嘅澳洲公民為咗互相交流而開嘅一個組織[17]。呢個組織為澳洲人提供文化貼士,例如點樣可以同香港人交流而又唔會令到人覺得出奇或者冇禮貌。因為對唔少澳洲人嚟講,跨文化交流似乎係最難喺香港適應嘅因素之一。除此之外,呢個協會亦都會有唔同嘅文化節慶,包括中式嘅龍舟活動同埋西式嘅澳洲燒烤。由此可見,協會希望利用唔同嘅文化活動嚟引入香港嘅當地文化,亦同時保留自己嘅節慶活動。好多依家或者以前協會嘅會員,都同意個協會對佢哋融入香港社會有好大嘅幫助,特別係龍舟活動會俾新嚟香港嘅澳洲人適應文化差異,而有一個組織亦都為佢哋提供其他澳洲人,嚟喺有需要嘅時候幫手。[18]
香港有一啲澳洲人開嘅餐廳同咖啡店,唔少都專係提供澳洲式嘅飲食文化,但係亦都會提供有當地口味嘅選擇[19]。例如,咖啡店會喺朝早提供澳洲嘅傳統咖啡,亦會同時有中西合璧嘅咖啡選擇。香港亦有啲澳洲人開嘅高級餐廳,例如名厨 Anthony Hammel 開嘅 "Hue" 餐廳。
喺運動方面,在港澳洲人對跑馬相對有興趣,而澳洲跑馬協會亦都支持唔少喺香港嘅比賽[20]。喺2008年奧運,香港嘅跑馬項目包括咗一隊澳洲隊,最終攞到銀牌[21]。
在港澳洲人去咗香港之後,佢哋對欖球同澳式足球嘅喜好亦都帶埋去,而兩種運動都依家喺香港都幾受歡迎。香港有一隊澳式足球隊叫做香港龍 (Hong Kong Dragons),係澳洲喺亞太區其中第一個創辦嘅球隊,有50-60人[22]。香港龍每年有唔少嘅活動,引嚟唔少澳洲人嚟香港觀賽[23]。
每年3-4月,香港都會舉行香港國際七人欖球賽,自從1975年開始,好快就變成咗“亞洲最大嘅運動異節目”[24]。澳洲嘅七人欖球隊表現都唔錯,女子對喺2016年奧運贏到金牌。同樣,香港嘅七人欖球有非常大嘅觀衆同粉絲,有多不勝數嘅聚會都係專去睇比賽,甚至連香港旅遊發展局都有份推行呢個活動。所以,欖球絕對係深受在港澳洲人歡迎嘅活動之一[23]。
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.