浮雕

浮雕（粵拼：fau4 diu1；英文：relief）係雕塑嘅一種，指個雕刻家喺一塊平面（例如係牆）上面將佢想塑造嘅形象雕出嚟，成日畀人攞嚟做建築物牆上面嘅裝飾。古典嘅粵式建築出嗮名多浮雕。

吳哥窟嘅浮雕

概論

内文：雕塑

雕塑係專創作 3D 物體嘅視覺藝術，相對於例如創作 2D 圖像嘅畫畫。創作雕塑嗰陣，雕塑家傳統上要^[1]

• 用鉛筆畫稿，或者用工藝黏土等軟嘅材料整個預想雛型出嚟；
• 搵嚿固體嘅材料返嚟－材料可以係木、石頭、甚至冰都得；
• 然後佢就要郁手用鎚仔同鑿等嘅架生，將嚿材料雕成佢想要嘅形狀；

一般嚟講，雕塑作品可以分做兩大類：雕像同埋浮雕；前者係指能夠自己企到喺度嘅雕塑作品，例子有舉世聞名嘅《大衛像》；而後者就係指喺一塊平面（例如牆）上雕出嚟嘅雕塑。

浮雕可以按「有幾由塊表面嗰度凸出」分做低浮雕（凸出程度低）同埋高浮雕（凸出程度高），一般嚟講，如果雕嗰嚿嘢嘅質量有一半以上係由個表面嗰度凸咗出嚟，件作品就算係高浮雕，極高嘅浮雕同雕像好多時難以清楚分界。

• 
  波斯波利斯牆上嘅拜火教浮雕
  類：低浮雕
• 
  高浮雕嘅例子

粵地文化

内文：粵式建築

傳統上，粵式建築一大特徵係浮雕多：同其他唐人起嘅祠堂比起上嚟，粵式祠堂鍾意擺好多用木同石頭整嘅雕塑嚟做裝飾，達到「光宗耀祖」。啲雕塑喺主題上好多樣，有歷史故事、神話傳說、吉祥圖案、飛禽走獸、奇花異草呀噉，亦都有啲係用本地特色嘅景物，好似係洋桃、番石榴、木棉同榕樹呢啲嶺南嘅生果同植物。

睇埋

• 立體
• 雕像
• 建築設計

引咗

1. 4 Basic Sculpture Techniques.