芭蕾舞詞彙表

以下係芭蕾舞（法文：ballet；法文讀音：[ba.lɛ]）上比較常用嘅詞彙嘅一覽表，包括咗跳芭蕾舞嗰陣時用嘅技巧同用具，以至係芭蕾舞相關人員用嘅稱謂呀噉。呢個詞彙表以英國嘅皇家舞蹈學院（RAD）嗰套做中心，噉係因為大中華地區——包括粵港澳地區在內——喺芭蕾舞制度上不溜都係跟開英國嗰套標準嘅^[1][2]。

德加（Degas；早期印象派畫家之一）喺 1847 年畫嘅一幅油畫；幅畫描述當時嘅一堂芭蕾舞堂。

芭蕾舞詞彙當中，有好多都係嚟自英文以外嘅歐洲語言嘅，尤其係法文：今日嘅芭蕾舞技巧有好多都源自 16 至 17 世紀嘅法國，當時芭蕾舞啱啱成咗形冇幾耐，技術仲未成熟，但就引起咗當代法國藝術家嘅興趣，於是當時嘅法國藝術家就著力幫手研究芭蕾舞技巧，用法文字詞幫啲技巧改名，最後令芭蕾舞成為一種廣受人認同嘅藝術；因為呢段歷史，芭蕾舞詞彙有好多都係由法文直接借過去英文嗰度嘅字，而芭蕾舞老師等嘅人員讀呢啲字嗰陣，多數都會跟返法文嗰啲讀音。除咗法文之外，英文嘅芭蕾舞詞彙當中都有一部份係源自意大利文（意大利係芭蕾舞發源地）或者俄羅斯文（俄羅斯係芭蕾舞大勢力，出咗多齣舉世知名嘅舞劇）嘅^[3]。

用具詞彙

架生

以下係跳芭蕾舞會用到嘅架生：

一個芭蕾舞學生一隻手掹住扶手練習。佢身後有塊全身鏡——全身鏡用意在於俾學生練舞嗰陣睇到自己全身各部份嘅狀態。

Barre（法文讀音：[baʁ]）

練功扶手，或者作粵拼：baa1：芭蕾舞堂常用嘅一種架生。練功扶手係一碌打橫、通常用木或者金屬造嘅長條，一碌練功扶手可以係鑲喺埲牆上面嘅，又或者係有兩條腳喺左右兩邊撐住嘅（可攜式）都得。使用練功扶手嗰陣，個學生會一隻手掹住條扶手，一路慢慢做出佢想練習嘅舞步。噉做係有用意嘅：芭蕾舞有好多舞步都要求極強平衡力，好多時學生一開始嗰陣都唔夠平衡力獨力做出舞步，所以老師就會搵條扶手，俾佢哋練吓喺有嘢扶住嘅情況下做出舞步先，等佢哋做熟至試吓叫佢哋唔靠扶手做出舞步^[4]。

無論初階定高階，一堂芭蕾舞堂通常都係以練功扶手運動開始嘅。老師會首先要學生喺掹住條扶手嘅情況下，練習嗰堂要學同練嘅舞步，等到佢哋曉正確噉做出舞步，老師好多時就會攞走條扶手，要啲學生唔扶住任何嘢做出啱啱學咗嘅舞步。除此之外，專業芭蕾舞蹈員好多時都會用練功扶手做熱身或者微調自己啲技巧^[4]。

Studio

舞蹈室：指一間用嚟俾人跳舞（包括芭蕾舞以外嘅舞蹈）嘅房。一間練芭蕾舞用嘅舞蹈室通常會有練功扶把、大型鏡同用嚟播音樂嘅架生^{[註 1]}，而且塊地板一定會好似舞台表面噉有返咁上下平滑，等學生可以輕易噉做一啲涉及腳板跣出去嘅舞步（例子可以睇吓 tendu）^[5]。

衣著

以下係跳芭蕾舞會用到嘅衣著：

2023 年喺香港演藝學院影到嘅一幅相；有人喺度曬芭蕾舞軟鞋。

Tights

緊身褲 / 襪褲：啲人跳古典芭蕾舞嗰陣通常會著緊身褲（如果條褲唔包腳板）或者襪褲（如果條褲包埋腳板）。一般認為，著住襪褲跳芭蕾舞有以下嘅好處^[6]：

• 襪褲會輕輕壓縮雙髀嘅肌肉，改善血液循環。
• 凍嗰陣襪褲可以保暖，熱嗰陣襪褲就可以吸汗。
• 襪褲表面一般都比較平滑，所以舞蹈員做一啲會涉及雙髀互相掂到嘅舞步嗰陣，襪褲可以減低摩擦力。
• 練習嗰陣，學生著住襪褲令老師可以睇清楚佢雙髀每嚿肌肉嘅狀態啱唔啱。事實係喺 18 世紀，啲人提議男芭蕾舞蹈員要著襪褲，其中一個重要理由就係佢哋發覺當時男芭蕾舞蹈員「著一般長褲跳舞」嘅做法搞到老師上堂嗰時成日睇唔到男學生嘅失誤。
• 表演嗰陣，襪褲幫到舞蹈員展示身體嘅線條。

...等等。順帶一提，芭蕾舞用嘅襪褲有分男女裝：女裝襪褲喺色水上偏向粉色，而且好多時半透明；而男裝襪褲就會比較厚，遮得住啲腳毛，兼且色水上偏暗淡，會以黑、白、灰或者深藍等為主^[7]。

Tutu

傘裙：女舞蹈員表演嗰陣通常會著嘅一種裙，多數著喺腰咁高嘅位，比較短，頂櫳去到大髀咁長，而且硬過一般嘅裙，女舞蹈員做一啲旋轉舞步嗰陣傘裙會跟住旋轉，形成一種特殊嘅美感。順帶一提，浪漫芭蕾舞嘅芭蕾舞裙會比較長，可以長到遮埋對小腿^[8]。

Leotard

連身衫：女舞蹈員練習嗰陣有時會著嘅一種緊身衫，覆蓋舞蹈員嘅膊頭同軀幹，袖可長可短，又有好多係冇袖嘅^[9]。

Dance belt

舞蹈腰帶：男舞蹈員會著喺佢哋緊身褲裏面嘅一種底褲。舞蹈腰帶前面會包晒下體，後面就係一條帶噉，最大特徵係硬過一般嘅底褲，幫到手固定男舞蹈員嘅下體——等佢著住緊身褲跳舞嗰時，唔會因為俾人睇到佢下體嘅形狀而引起尷尬^[10]。

Ballet shoes / slippers / soft shoes

軟鞋：專設計嚟俾人跳芭蕾舞嗰陣著嘅輕質軟鞋，材質由軟嘅皮革以至帆布都有。喺色水方面，女舞蹈員通常會著粉色軟鞋，而男舞蹈員通常會著白色或者黑色嘅。順帶一提，芭蕾舞蹈員揀襪褲嗰時好興揀同自己對鞋一樣色嘅，等自己可以望落好似冇著鞋跳舞噉^[7]。

Pointe shoes

足尖鞋：一種為女舞蹈員設計嘅芭蕾舞鞋。呢種鞋喺腳尖個位特別加強咗，令到著住佢嘅舞蹈員能夠做完全腳尖企（指淨係腳趾掂地；下面詳細講）做一段長嘅時間。一個專業舞蹈員著住呢啲鞋嗰時，通常會係噉勁做腳尖企，將自己全身重量施落去對鞋嘅腳尖位度，所以一對足尖鞋好多時著得嗰十零廿個鐘已經開始爛——相比之下，一對普通嘅芭蕾舞鞋喺正常情況下，閒閒哋可以著成兩三個月^[11]。

一男一女嘅兩位舞蹈員著住典型嘅芭蕾舞服裝表演雙人舞（下面詳細講）：個男舞蹈員著住唔透明嘅白色襪褲同軟鞋，個女舞蹈員就著住傘裙、半透明嘅襪褲同足尖鞋；兩人嘅上身服裝都係表達佢哋飾演嘅角色得嚟，又方便郁動。 一男一女嘅兩位舞蹈員著住典型嘅芭蕾舞服裝表演雙人舞（下面詳細講）：個男舞蹈員著住唔透明嘅白色襪褲同軟鞋，個女舞蹈員就著住傘裙、半透明嘅襪褲同足尖鞋；兩人嘅上身服裝都係表達佢哋飾演嘅角色得嚟，又方便郁動。

技巧根基

睇埋：芭蕾舞技巧

芭蕾舞技巧泛指跳芭蕾舞用到嘅技巧，涉及舞蹈員嘗試用特定嘅方法郁自己身體各部份，並且喺舞台上有美感噉移動，達到令觀眾覺得賞心悅目。芭蕾技巧可以視門派而有異，例子可以睇吓芭蕾舞手位（彈去）^[12]。

Placement

擺位：形容一位舞蹈員身體各部位做舞步嗰陣擺得好唔好（夠唔夠準、平衡得好唔好呀噉），例如一位芭蕾舞老師觀察一個學生練舞，可能會睇睇吓同學生講，指出佢個頭擺位唔正確（有啲舞步要求舞蹈員望向特定方向），又或者話佢手腳擺位唔好（唔夠平衡）等等，就會用到 placement 呢個字^[13]。

Pulling up / pull up

拉高：古典芭蕾舞當中舞蹈員應有嘅一種感覺；跳芭蕾舞嗰陣，一位舞蹈員應該要有一種同時掂地又「好似俾一股力拉高咗噉」嘅感覺——佢要將佢嘅胸腔同心口骨提高，收腹，同時要將膊頭放鬆同以髖關節做中心（要用到腹肌），背脊要保持垂直，但要小心個人唔好因為個胸腔提高而墜向後。一般認為，拉高令個舞蹈員望落更加有氣質^[2]。

腳板技巧

以下係芭蕾舞嘅腳板基本技巧：

Feet positions

芭蕾舞腳位：係最基本嘅芭蕾舞技巧，指幾種用嚟起始同終結每個舞步嘅腳板位－芭蕾舞步近乎全部都會以呢啲腳位當中其中一個嚟起始同作結嘅；因為腳位咁重要，無論邊個門派，芭蕾舞學生首先要學識嘅實係五大腳位。五大腳位係喺 1725 年由皮雅·布淳（Pierre Beauchamp）制定嘅，大致如下^[1]：

五大腳位嘅圖解；最左手邊係第一腳位，佢右邊嘅係第二腳位，如此類推。 五大腳位嘅圖解；最左手邊係第一腳位，佢右邊嘅係第二腳位，如此類推。

• 第一腳位（first）：兩腳腳踭掂住，位於身體正下方，而腳尖就指住相反方向，雙髀要直一直。
• 第二腳位（second）：似第一腳位，但係兩腳腳踭要分開，彼此之間維持大約髖關節咁闊嘅距離。
• 第三腳位（third）：同第一腳位類似，但係雙腳嘅腳踭要互相平行，大致上去到另一隻腳板嘅中間位置；呢個腳位比較少用，成日俾人以為係做得衰嘅第一或者第五腳位。
• 第四腳位（fourth）：兩隻腳板平行但腳尖指住相反方向，腳尖要去到另一隻腳踭咁遠，兩隻腳板相距大約一隻腳板嘅距離。呢個腳位都係比較少用。
• 第五腳位（fifth）：係五大腳位當中最難做嗰個；同第四腳位類似，唯一嘅分別係兩隻腳板要掂住。

除咗呢五大腳位，仲有由烏克蘭裔芭蕾舞蹈員謝治·里法（Serge Lifar）發明嘅第六同第七腳位等等^[14]。

第一腳位	第二腳位	第三腳位	第四腳位	第五腳位

呢位男舞蹈員隻右腳喺度做 demi-pointe。

Demi-pointe （法文讀音：[dəmi pwɛ̃t]，近似粵拼：dem1 mi1 pon1）

半腳尖企：舞蹈員腳踭離地，提起自己成個身體，腳板淨係前半橛掂地。好多舞步都會用到半腳尖企，能夠令舞蹈員做某啲舞步嗰時望落更加輕盈^[15]。睇埋腳尖企（彈去）。

Relevé / élevé （法文讀音：[ʁəlve]，近似粵拼：re1 le4 wei4）

上升：一種初階舞步，舞蹈員兩腳一齊由企定定嘅腳位進入半腳尖企（彈去）嘅狀態，然後再落返嚟；慢慢上升（relevé lent）就係指做得慢嘅上升。上升—尤其係慢慢上升—係初階芭蕾舞堂成日做嘅一種運動，因為呢個動作簡單得嚟又能夠有效訓練學生嘅小腿肌肉^[16]。

响多數時候，上升都淨係會做到半腳尖企，除非舞蹈員著住某啲特製嘅鞋，上升一般都唔會做到完全腳尖企（彈去）。

Sous-sous / sus-sous（法文讀音：[su su]，近似粵拼：su1 su1）

落落：上升嘅一個變種，舞蹈員以第五腳位做起始做上升，喺成個過程當中雙腳腳板都要互相掂住，而且腳踭交叉，由前面睇會造成好似一隻腳板有兩隻腳踭噉嘅視覺效果^[17]。

Détourné （法文讀音：[detuʁne]，近似粵拼：di6 toe4 nei1）

轉向旋轉：一種基本舞步，舞蹈員由第三或者第五腳位起始，用 relevé 進入兩隻腳都半腳尖企或者腳尖企嘅狀態，跟住再（慢定快都得）旋轉一個圈，途中靜靜雞兩隻腳前後互換（例如如果開始嗰陣右腳喺前、左腳喺後，做完轉向旋轉之後要變成左腳喺前、右腳喺後），最後再落返地成企定定嘅腳位。轉向旋轉係一種芭蕾舞堂常做嘅運動，因為呢個動作相當講求平衡力，而且就連喺舞台上實際表演嗰時都會用到^[18]。

Demi-détourné（法文讀音：[dəmi detuʁne]）

半轉向旋轉：指做轉向旋轉嗰時淨係轉半個圈，即係話做完之後，個舞蹈員要變成面向相反方向。半轉向旋轉喺舞台上比較少見，比較常見係喺課堂當中使用——芭蕾舞堂當中有最少一半時間都係啲學生喺把側邊練習嘅，如果一個學生右手掂住條把，佢通常會用左髀嚟練習，喺呢個情況下，佢要用右髀練舞步就難，所以一種常見做法係，老師要班學生練到咁上下做一個半轉向旋轉，變成用另一隻手掂條把，等佢哋開始用本嚟冇乜點郁嗰條髀嚟練習^[19]。

手臂技巧

睇埋：芭蕾舞手位

以下係芭蕾舞嘅手臂基本技巧：

Arms positions

芭蕾舞手位：指跳芭蕾舞嗰陣，跳舞嗰個人對手臂會擺嘅幾個特定位。喺最基本嗰套芭蕾舞手位當中，雙手會維持若干（相同嘅）高度，而且兩隻手掌嘅手指尖要爭啲掂住，雙手手掌嘅高度可以係喺髖關節咁高、又或者係喺肚臍咁高、又或者高到喺個舞蹈員頭頂上面都得；喺進階啲嘅手位當中，雙手手臂可能會延伸並且彼此遠離，令到兩隻手掌分別去到身體左右兩邊嘅遠處。有陣時，一位舞蹈員又有可能兩隻手分別做唔同手位^[1][20]。

唔同芭蕾舞門派對手位嘅定義有些少唔同，可能會用同一個名指唔同嘅手位，又或者係有第啲門派冇嘅手位，例如俄羅斯派嘅芭蕾舞會用三個手位，而其他門派就興用五個。大中華地區嘅芭蕾舞老師多數都係用英國皇家舞蹈學院（RAD）嗰套手位嘅。RAD 式嘅五大手位如下^[20]：

• 準備位（bras bas / bras au repos）：舞蹈員雙手手臂垂低，雙手手掌要爭啲掂到對方，手掌要大約喺髖關節咁高。顧名思義，呢個手位往往係對手臂要開始做大動作之前會做嘅準備動作。
• 第一手位（first）：同準備位差唔多，都係雙手手掌要爭啲掂住（好似攬住某啲嘢噉），主要分別係手掌嘅高度要高少少——第一手位係要手掌喺肚臍同胸骨之間嘅高度。喺意大利嘅切劇蒂派當中，第一手位會稍為低少少，去到芭蕾舞裙嗰個高度。
• 第二手位（second）：雙手要向左右兩邊伸出去，手掌要彼此遠離，但唔完全伸直（好似攬住某啲好大嚿嘅嘢噉），手踭位置要高過手腕；手瓜嘅內部要同地板平衡而前臂同手掌唔好完全面向觀眾，要稍微面向下。唔同門派嘅第二手位大致上都係噉，不過佢哋做第二手位嗰陣膊頭嘅圓度同手臂嘅高度有所不同。好多門派亦會要求男舞蹈員手掌去到同膊頭差唔多嘅高度，而女舞蹈員手掌位置就低少少。
• 第三手位（third）就唔同門派都唔同：
  • 法國派同 RAD 嗰套嘅第三手位（又有叫 bras croisé；法文讀音：[bʁa kʁwaze]）涉及舞蹈員左右手當中是但一隻做第一手位，另外嗰隻就做做第二手位。喺 RAD 派入面，啲人會將第三手位分 regular（意譯常規）同 in opposition（意譯互相相反）——如果話第三手位「互相相反」，意思係話喺身體側面做第二手位嗰隻手同伸出髀屬同一邊（例：右髀伸咗出去嘅話，「第三手位，互相相反」就係右手向側移成第二位置嘅第三手位）。
  • 喺切劇蒂派當中，第三手位係指舞蹈員是但一隻手做佢哋嗰套第一手位，而另一隻就做半第二手位（睇下面）。
  • 喺俄羅斯派當中，第三手位等同其他主要門派當中嘅第五手位（睇下面）。

準備位	第一手位	第二手位	第三手位（RAD 式）

• 第四手位（fourth）分兩種：
  • 第四手位打開（fourth, ouvert）：其中一隻手高舉，而另外嗰隻就做第二手位——兩隻手處於好開放嘅位置。
  • 第四手位相交（fourth, croisé），切劇蒂派又有叫佢做西班牙式第四（Spanish fourth），指其中一隻手高舉，而另外嗰隻做第一手位。
  • 喺 RAD 派當中，第四手位又係有得分 regular 同 in opposition，原理同第三手位一樣。
• 第五手位（fifth）：法國派同 RAD 派嗰套第五手位如下；舞蹈員將雙手高舉，兩隻手掌要指住對方但唔一定要掂到；兩隻手掌位置要稍為向前，芭蕾舞蹈員能夠眼尾睄到自己手掌，而且手掌要稍為向內，用其他手指遮住手指公；舞蹈員對手臂關節拗彎嘅角度要大啲，令到雙手手臂好似形成一個圓形或者橢圓形噉。俄羅斯派嗌呢個手位做第三手位。
• 除咗噉，
  • 半手（demi-bras）指一隻手處於第一同第二手位之間，向外延伸。
  • 半第二手位（demi-seconde）似第二手位，不過雙臂要低啲，手掌通常向下。
• 一般認為做芭蕾舞手位嗰陣，手板同手腕應該要放鬆，手指之間要有空間，頭要望向適當嘅方向（例如做 RAD 第五手位嘅話，頭可以望住觀眾嘅方向或者稍微向右上或者向左上），而一般嚟講，男舞蹈員做手位嗰陣雙手手板之間嘅距離會同塊面嘅闊度相約，而女舞蹈員做手位嗰陣雙手手板嘅距離會比較近，大約兩個手指尖嘅距離。

第四手位打開	第五手位

Arms in...

手臂進入...：一個指令，叫個學生手臂做某一個手位，即係例如 arms in first 係叫學生做第一手位，而 arms in second 係叫學生做第二手位... 如此類推^[20]。

Rond de bras （法文讀音：[ʁɔ̃ d(ə) bʁa]，近似粵拼：ron1 du6 braa1）

手臂圈：係指「對手臂形成嘅圓圈」，講緊一個舞蹈員做各種手位嗰陣，雙手手臂所形成嘅圓圈，做第五手位嗰時零舍容易見到^[21]。

Port de bras（法文讀音：[pɔʁ d(ə) bʁa]，近似粵拼：po1 du6 braa1）

手臂運行：指一位芭蕾舞蹈員手臂嘅郁動；手臂運行係芭蕾舞堂上成日會做嘅一種運動，用嚟教初階學生熟習啲手位。喺芭蕾舞堂做手臂運行嗰陣，個學生會將手臂接連噉移去幾個唔同嘅手位，一個基本嘅手臂運行運動涉及學生雙腳唔郁，並且將手臂由第五位移去第一位，再移去第二位，再返去第五位。手臂運行做法可以按門派而有所不同^[22]。

手臂運行就噉望落好似好簡單濕碎噉，但查實並唔容易：好多舞蹈員都要用成幾年咁耐嘅時間先至做到完美嘅手臂運行，有啲舞蹈員甚至去到專業階段都仲喺度練，而喺初階芭蕾舞課堂當中，老師好多時會叫學生維持第五手位維持住一段時間——呢種動作會要求學生嘅手臂肌肉力量有返咁上下勁^[22]。

髀同軀幹

以下係芭蕾舞嘅髀同軀幹基本技巧：

Turnout

外開：指舞蹈員用髖關節嘅力——而唔係膝頭嘅力——將雙髀向外轉，令到對膝頭同腳尖彼此遠離。Turnout 喺五大腳位當中都會用到。用髖關節將雙髀向外轉一般俾人認為好睇過用膝頭嘅力令雙髀向外轉，而且亦冇咁易搞到舞蹈員受傷^{[23]:p. 55}。

髀屈曲嘅示範；個舞蹈員雙髀係噉咦屈曲（demi-plié），再返去企定定嘅第一腳位。

Plié （法文讀音：[plije]，近似粵拼：pli6 je1）

髀屈曲（個法文名係法文彎咗噉解）：雙髀喺膝頭嗰度向外彎曲、同時上半身維持垂直、而且身體冇任何橫向郁動。可以分做兩大種^[1][24]——

Demi-plié

半髀屈曲：舞蹈員係噉咦屈曲膝頭。開始做半髀屈曲嗰陣，腳板可以係處於是但一個腳位都得，手臂嘅位置唔定，舞蹈員嘅膝頭會慢慢噉屈曲，大髀同小腿之間嘅角度開始變細，但個角度唔會太細，個角度要足以容許對腳踭全程掂實地板，下降嘅速度要大致上均一，做到平衡嘅美感，而且上半身喺落嘅過程當中要一路維持垂直^{[註 2]}，落到最底之後再慢慢上返去雙髀大髀掂住、企定定嘅腳位。

Grand plié

宏髀屈曲：舞蹈員做髀屈曲，而且膝頭屈曲程度好大，大到喺最低點嗰陣，同一條髀嘅大髀同小腿差唔多係掂住嘅。開始做宏髀屈曲嗰陣，腳板又係可以處於是但一個腳位都得，手臂嘅位置唔定，而舞蹈員嘅膝頭跟住會慢慢噉屈曲，大髀同小腿之間嘅角度開始變細，除非係用第二腳位做，去到最低點嗰陣膝頭個位屈曲嘅程度要勁到對腳踭焗住要離地，兩隻大髀差唔多變成打橫咁滯，下降嘅速度要大致上均一做到平衡嘅美感，同半髀屈曲一樣，上半身喺落嘅過程當中要一路 kip1 住垂直，落到最底之後再慢慢上返去雙髀大髀互相掂住、企定定嘅腳位。宏髀屈曲可以對膝頭造成相當大嘅壓力。

髀屈曲係一種又基本又重要嘅舞步：通常啲人學芭蕾舞初班嗰陣，老師經已勁叫佢哋做髀屈曲，而且好多時仲要係一開始上堂熱完身就做；噉係因為髀屈曲係好多中階同進階舞步嘅必要部份——想像依家舞蹈員做一個大嘅跳躍跳到好高，跟住就要落地，佢落地嗰刻必需要做一吓半髀屈曲，令到雙髀可以好似彈弓噉吸收落地嗰吓嘅衝擊力；相比之下，如果佢係雙髀伸到直一直噉嚟落地嘅話，好容易會整親膝頭——半髀屈曲起到保護舞蹈員嘅作用，等佢做大幅度嘅跳躍嗰陣冇咁易整親^[24]。

Cambré （法文讀音：[kɑ̃bʁe]）

腰屈曲（個法文名係法文拱咗噉解）：舞蹈員條腰屈曲，令上半身向側（à la seconde）、向前（devant）或者向後（derrière）傾斜。做腰屈曲嗰陣，通常上半身都要維持垂直，雙眼要同胸腹指向同一個方向。向側做腰屈曲嗰陣，舞蹈員通常會上身稍為向前傾^[25]。

一班芭蕾舞學生喺度做向側面嘅腰屈曲。 一班芭蕾舞學生喺度做向側面嘅腰屈曲。

Supporting leg and working leg

支撐髀（supporting leg / standing leg）同抬起髀（working leg）：兩個緊密相連嘅概念，喺多數嘅芭蕾舞步當中，跳舞嗰個人會其中一條腿郁去唔同嘅位（例如 tendu 噉）甚至其中一條腿離地，而喺呢個時候另外嗰條腿就要企定定（好多時要完全伸到直一直）負責支撐住身體重量，前者係抬起髀，後者就係支撐髀；而如果個舞步涉及舞蹈員成個人離地，抬起髀通常係指「離地先嗰一條腿」——後啲離地嗰條腿要喺「抬起髀離地」至「兩隻腳都離地」嗰段短時間內獨力支撐晒身體嘅重量，所以係支撐髀^[26]。

抬起髀有陣時又會俾人稱之為帶頭髀（leading leg）。

Tendu （法文讀音：[tɑ̃dy]，近似粵拼：ton1 dyu1）

髀伸展：芭蕾舞堂上成日做嘅一種簡單舞步，用嚟教初階學生熟習啲腳位同學做腳尖企。做 tendu 嗰陣，舞蹈員會首先以其中一個腳位企定定，一隻手掹住條扶把，上身 kip1 住垂直，然後其中一條腿（抬起髀）要伸展向側（à la seconde）、向前（devant）或者向後（derrière）跣出去，遠離支撐髀，伸展嗰條腿去到最遠嗰點嘅時候要淨係腳尖掂地，所以支撐髀就要負責支撐住成個身體嘅重量。喺芭蕾舞堂上，當一個學生做咗 tendu 之後，佢老師跟手就會快速噉俾指令，叫佢做出唔同嘅腳位或者第啲涉及腿同腳嘅舞步；除此之外，雙腿快速噉交替做 tendu 仲會幫到學生熟習點樣快速轉移身體嘅重量中心^[27]。

一個學生掹住條扶把右腿喺度做向側嘅 tendu（tendu à la seconde）。 一個學生掹住條扶把右腿喺度做向側嘅 tendu（tendu à la seconde）。

Cuisse（法文讀音：[kɥis]）

用大髀（個法文名係法文大髀噉解）：係老師可能會喺芭蕾舞堂上俾嘅一個指令，意思係提醒個學生「要用大髀嘅肌肉」。例如係喺做 tendu 嗰陣，學生可能會太依賴髖關節同小腿嘅力，對大髀肌肉嘅運用唔夠，搞到條腿伸得唔夠直；喺呢個時候，老師就可能會講句 cuisse，用一隻字詞嚟提醒學生「大髀肌肉要用力」^[28]。

Sickling / sickled foot

鐮刀腳：芭蕾舞學生常犯嘅一種錯誤，指個學生其中一隻腳嘅角度唔靚，搞到由前面睇隻腳望落好似向內「拗」咗噉樣。例如係做 tendu 嗰陣，伸出髀伸到最盡嗰一刻應該係成條腿同隻腳板形成一條直線、而且淨係腳尖掂地嘅（好似上面嗰幅圖當中最右手邊嘅姿勢噉），但學生好多時可能因為「條髀未夠力」等嘅原因，所以唔覺意係噉咦屈曲咗腳板，無意中想用腳板嘅力支撐身體——形成隻腳板好似把鐮刀噉向內「拗」咗^[29]。

喺古典芭蕾舞上，鐮刀腳一般俾人視為一種失誤：多數欣賞芭蕾舞嘅人都覺得鐮刀腳會破壞「腿同腳板成一直線」嘅美感，而且如果一位舞蹈員跳起落地嗰陣鐮刀腳，佢有好大機會會扭親；不過都有啲排舞師會特登要舞蹈員做鐮刀腳嚟達到佢哋想要嘅藝術效果^[30]。

Dégagé （法文讀音：[deɡaʒe]）

解離：一個簡單嘅動作，舞蹈員由某一個腳位將其中一隻腳移去（向前、向後或者向側）tendu 嘅狀態，跟住再喺雙腿都直一直嘅情況下，將伸出髀抬起離地——即係同地面「解離」—— 30 至 45 度咁大嘅角，並且維持喺嗰個狀態唔郁，若干時間後再落返地。喺芭蕾舞堂上，老師好多時會叫學生維持抬起狀態維持幾秒咁耐，目的係要鍛鍊學生嘅髀肌肉同平衡力^[31]。

Frappé （法文讀音：[fʁape]）

彈腳：通常係扶住條扶把噉嚟做嘅，舞蹈員開始時其中一隻腳要繃緊外開，並且係噉咦離地，腳踭去到支撐髀腳板嘅腳踭上面，跟住抬起髀要一嘢向外伸，條髀要一嘢伸直，令到抬起髀嘅腳板擦過地板^{[註 3]}。Frappé 嘅用途在於提升髀同腳嘅速度同準確度，好多時用嚟終結喺扶把側面做嘅熱身運動^[32]。

向右邊做嘅 frappé 向右邊做嘅 frappé

Retiré （法文讀音：[ʁətiʁe]，近似粵拼：ri6 ti1 rei4） / raccourci

抽起：髀嘅一種位置。做 retiré 嗰陣，個舞蹈員其中一條髀（支撐髀）要企定定而且伸到直一直做支撐，而另外嗰隻髀（抬起髀）就要外開兼且喺腳板一路掂住支撐髀小腿嘅情況下，慢慢向上移，抬起髀嘅大髀同小腿之間成嘅角度要慢慢變細，直至條抬起髀嘅腳板掂到支撐髀嘅膝頭為止。抽起可以細分做向前（retiré devant；抬起髀腳板喺支撐髀前）同向後（retiré derrière；抬起髀腳板喺支撐髀後）兩種^[33]。

抽起係一個好緊要嘅基本舞步，因為佢係多個進階舞步——例如係腳尖旋轉（詳情）——嘅重要組成部份。

向前（左圖）同向後（右圖）做嘅 retiré 向前（左圖）同向後（右圖）做嘅 retiré

Cou-de-pied （法文讀音：[ku də pje]，近似粵拼：ku1 du6 pi1 je1）

跗：腳位置嘅一種，舞蹈員其中一條髀做好似 retiré 噉嘅動作，用冇抬起嗰條髀支撐身體，但抬起髀淨係抽起少少，形成抬起髀嘅腳尖處於支撐髀嘅小腿同腳踭之間嘅位嗰度。喺多數芭蕾舞流派當中，跗仲可以分做向前（cou-de-pied devant；抽起髀腳尖喺前）同向後（cou-de-pied derriére；抽起髀腳尖喺後）兩種。

Wrapped cou-de-pied / sur le cou-de-pied

包裹跗：俄羅斯嘅華加諾娃派有所謂嘅一種跗，舞蹈員將抬起髀嘅腳踭放喺支撐髀嘅前方，但抬起髀嘅腳板就要「包裹」住支撐髀嘅小腿下橛，令到抬起髀嘅腳尖掂到支撐髀嘅腳踭後方^[34]。

Pas de cheval（法文讀音：[pɑ də ʃ(ə)val]）

馬步（cheval 係法文入便馬噉解）：舞蹈員以第五腳位做起始，跟住將其中一隻腳抬起，變成 cou-de-pied 狀態，然後嗰隻腳要用 tendu 噉嘅方式伸向前、向側或者向後伸出去，可以以 dégagé 嘅方式作結。呢個舞步主要係喺練習嗰陣先會做嘅，用嚟訓練學生雙腳嘅速度^[35]。

Pas de cheval 之所以會有個噉嘅名，據講係因為啲人覺得個舞步望落有少少似馬「將條髀收埋再一嘢踢出去」嘅樣^[35]。

Temps lié （法文讀音：[tɑ̃ lje]）

重心轉移：一個簡單舞步，舞蹈員首先以其中一個腳位企定定，然後做一個 demi-plié，雙腿屈曲後用一個 tendu 嘅方式將是但一條腿伸出（向前、向側或者向右），跟住伸咗出向嗰條腿（帶頭髀）要落地企定，再喺雙腿都做 demi-plié 嘅狀態下將重心移去帶頭髀嗰度，變成以帶頭髀做支撐髀嘅 tendu 狀態，最後將成為咗伸出髀嗰條腿收返埋，個人成一個企定定嘅腳位。重心轉移可以幫舞蹈員喺舞台上面做短距離嘅移動^[2]。

技巧綴詞

以下呢啲詞彙屬於「技巧綴詞」——噉講意思係話，呢拃詞彙通常唔會單獨存在。啲人用親呢啲詞彙，多數係將佢哋掕落某個舞步或者技巧嘅名嗰度，用嚟指嗰個舞步或者技巧嘅「某一個版本」。芭蕾舞上嘅主要技巧綴詞有以下呢啲^[2][36]。

À la seconde、Devant、Derrière

講緊個舞步嘅方向，通常係講緊條抬起髀做個舞步嗰陣要去邊個方向：

• 側伸式（à la seconde；法文讀音：[a la səɡɔ̃d]，意思係去到第二噉解）：指將個目標舞步「打側」噉嚟做，係芭蕾舞堂當中老師時不時會俾學生嘅一個指令。例如 tendu à la seconde 噉，就係指抬起髀移去身體側邊嘅 tendu ^[37]。
• 前移式（devant；法文讀音：[ɑ̃n avɑ̃]）：指「向前郁動」噉解，可以話係 derrière 嘅相對。例如「某某舞步 devant」係指做嗰個舞步嗰陣向前做或者向前抬腿。例如 tendu devant 噉，就係指條腿移去身體前邊嘅 tendu。
• 後移式（derrière；法文讀音：[ɑ̃n aʁjɛːʁ]）：指「向後郁動」噉解，可以話係 devant 嘅相對。例如「某某舞步 derrière」係指做嗰個舞步嗰陣向後做或者向後抬腿。例如 tendu derrière 噉，就係指條腿移去身體後邊嘅 tendu。

À terre、En l'air

指身體某個部份（通常係抬起髀）掂地定係喺空中：

• 喺地下（à terre；法文讀音：[a tɛʁ]）：「掂住地板」噉解，「某某舞步 à terre」係指喺兩隻腳掌都完全掂住地板嘅情況下做嗰個舞步。例如 rond de jambe à terre 就係雙腳全程都唔離地嘅 rond de jambe。
• 喺空中（en l'air；法文讀音：[ɑ̃ l ɛːʁ]）：「喺空中」噉解，「某某舞步 à terre」係指喺抬起髀腳掌離咗地或者成個人離咗地嘅情況下做嗰個舞步。例如 rond de jambe en l'air 就係抬起髀離地嚟郁動嘅 rond de jambe。

Petit、Demi、Grand

指一個舞步「幅度有幾大」：

• 細（petit / petite；法文讀音：[pə.ti]）：法文「細」噉解。喺芭蕾舞用詞上，呢個字通常係畀人攞嚟加喺某個舞步嘅名前面，用嚟指嗰個舞步幅度細啲嘅版本。
• 半（demi；法文讀音：[dəmi]，法文一半噉解，近似粵拼 dem1 mi2）：喺芭蕾舞用詞上，呢隻字詞通常係畀人攞嚟加喺某個舞步嘅名前邊，用嚟指嗰個舞步「中幅度」嘅版本。好似係 plié 噉，plié 呢個舞步涉及舞蹈員屈曲自己雙腿，一個半 plié（demi-plié）涉及舞蹈員「係噉咦」屈曲雙腿。
• 宏（grand / grande；法文讀音：[ɡʁɑ̃]，法文大噉解）：喺芭蕾舞用詞上，呢隻字詞通常係畀人攞嚟加喺某個舞步嘅名前邊，用嚟指嗰個舞步「幅度大啲」嘅版本。好似係 plié 噉，大嘅 plié（grand plié）涉及舞蹈員屈曲雙腿，而且屈曲嘅幅度犀利到對腳踭焗住要離開地板。

Bas, en、Haut, en

講緊手臂或者腳嘅高度：

• 低位（en bas；法文讀音：[ɑ̃ ˈbɑ]）：指「做得低啲」噉解，例如 arms in fifth en bas 係指一個對手唔好去到咁高嘅 RAD 第五手位。
• 高位（en haut；法文讀音：[ɑ̃ ˈo]）：指「做得高啲」噉解，例如 arms in fifth en haut 係指一個對手擺得高啲嘅 RAD 第五手位。

Allongé、Arrondi

講緊手臂或者腿嘅伸直程度：

• 延伸（allongé；法文讀音：[alɔ̃ʒe]）：指「伸長啲噉做」噉解，「某某舞步 allongé」指做嗰個舞步嗰陣手臂或者腿要伸展得出啲直啲，成日會同 grand plié 一齊用，指做 grand plié 嗰時雙手要「直一直」。
• 彎曲（arrondi；法文讀音：[aʁɔ̃di]）：延伸嘅相對，指「圓啲噉做」噉解，「某某舞步 arrondi」係指做嗰個舞步嗰陣手或者腳唔好伸展到最直。

Dedans, en、Dehors, en

指抬起髀喺個舞步中途郁嘅方向：

• 向內（en dedans；法文讀音：[ɑ̃ dədɑ̃]）：指做一個舞步嗰陣要「向內」，例如 rond de jambe en dedans 係指隻抬起髀先去身後，再去前嘅 rond de jambe。
• 向外（en dehors；法文讀音：[ɑ̃ dəɔʁ]）：指做一個舞步嗰陣要「向外」，例如 rond de jambe en dehors 係指隻抬起髀先去身前，再去後嘅 rond de jambe。

呢兩隻字詞喺腳尖旋轉上都會用到。

Changé

換腳（changé；法文讀音：[ˈtʃeɪndʒ]）：指緊做一個舞步嗰陣，要途中雙腳腳板嘅位置要互換，例如如果做「某某舞步 changé」開始嗰陣係右腳喺前左腳喺後，做完之後要變成左腳喺前右腳喺後。

Dessous、Dessus

指會唔會其中一隻手臂或者腿喺另外嗰隻前或者後經過：

• 之下（dessous；法文讀音：[dəsu]）：喺芭蕾舞用詞上，有陣時俾人攞嚟加喺某個舞步嘅名後面，用嚟指做嗰個舞步嗰時其中一隻手或者髀要喺另外一隻後面經過。例如係 assemblé 之下（assemblé dessous），就係指喺做嗰個 assemblé 嗰陣，條抬起髀要喺空中變成喺支撐髀後面，再聚合。
• 之上（dessus；法文讀音：[dəsy]）：喺芭蕾舞用詞上，有陣時俾人攞嚟加喺某個舞步嘅名後面，用嚟指做嗰個舞步嗰時其中一隻手或者髀要喺另外一隻前面經過。例如係 assemblé 之上（assemblé dessus），就係指喺做嗰個 assemblé 嗰陣，條抬起髀要喺空中變成喺支撐髀前面，再聚合。

Piqué（法文讀音：[pike]，近似粵拼 pi1 kei1）

刺步：指做一個舞步起始嗰陣，身體重心要一吓移去一隻伸咗出去而且成半腳尖企（demi-pointe）或者腳尖企（pointe）嘅腳板嗰度，例子有 piqué turn 同埋刺步阿拉伯斯卡（piqué arabesque）等等^[38]。

Fermé （法文讀音：[fɛʁm]）

封閉著地：通常畀人加喺一個跳躍舞蹈嘅名前面，指做嗰個舞步著地嗰陣雙腳要成第五腳位，雙腳腳板好似「封閉」咗噉^[39]。

Face, en （法文讀音：[ɑ̃ fas]）

面向：指做一個舞步嗰陣塊面要向住觀眾嘅方向；喺課室入面，通常會係老師指定間房嘅某一邊當係觀眾。

Tournant, en （法文讀音：[ɑ̃ tuʁnɑ̃]）

旋轉式（法文旋轉噉解）：喺芭蕾舞用詞上，呢隻字詞通常畀人加喺某個舞步嘅名後面，用嚟指個舞步嘅旋轉版本，例子有 coupé-jeté en tournant ^[40]。

Manèges （法文讀音：[ma.nɛʒ]）

連串打圈做：指緊靠某個舞步喺舞台上打圈噉移動，當中「某個舞步」多數係一個涉及旋轉嘅舞步，例如係一連串嘅 coupé-jeté en tournant 噉，就成日俾男舞蹈員用嚟喺舞台上面打圈移動^[41]。

禮儀

一位女舞蹈員喺度做 curtsy。

跳芭蕾舞亦都有一定嘅禮儀：

Reverence

行禮：講緊舞蹈員喺芭蕾舞堂或者表演結束嗰陣時會做嘅一個舉動，涉及舞蹈做一吓手臂運行再加上一個特定動作，嚟向老師或者觀眾表示敬意。傳統上，男舞蹈員嘅特定動作係鞠躬，而女舞蹈員嘅特定動作係屈膝禮^[42]。

行禮係芭蕾舞傳統嘅一部份，反映尊重同高貴嘅意涵。喺一場表演結束後，通常全體舞蹈員會一齊喺舞台上一路接受觀眾嘅掌聲、一路做個大行禮（grande reverence）——主角同有名嘅配角會企喺其他舞蹈員前面，並且先後做行禮^[42]。

Bow

鞠躬：傳統上，男舞蹈員嘅行禮動作係鞠躬。要鞠躬嗰陣，舞蹈員要將一隻手擺喺肚臍上面，而另一隻手向外開（類似 RAD 式第三手位，分別係喺鞠躬嗰陣，收埋嗰隻手會掂到自己個肚），跟住佢要彎腰，令到上半身向前傾。

Curtsy （近似粵拼：koe1 si4）

屈膝禮：傳統上，女舞蹈員嘅行禮動作係屈膝禮。要做屈膝禮嗰時，舞蹈員要雙手外開，將其中一隻腳半腳尖企（彈去），另外嗰隻腳完全掂地，跟住腳尖企嗰條髀要喺腳板掂住地板嘅情況下跣去身體後面，然後個舞蹈員兩隻髀要一齊係噉咦屈曲。

初階技巧

以下列出芭蕾舞當中一啲比較初階嘅技巧。呢啲技巧好多時都係進階舞步嘅必要準備動作。

初階運動

呢位舞蹈員正處於腳尖企大擊打嘅最高點。

Battement （法文讀音：[batmɑ̃]）

擊打（個法文名有擊打、打破等嘅意思）：舞蹈員其中一條腿向側（à la seconde）、向前（devant）或者向後（derrière）抬起若干角度，當中抬起嘅角度由 30 度嘅細角至 90 度咁高都得；抬起髀要一吓過遠離仲掂住地嘅支撐髀，去到最高點之後再落返地掂返住支撐髀。成個過程嘅速度可快可慢，亦可以重複若干次。喺全個過程當中，舞蹈員嘅上半身都要 kip1 住垂直，手臂位置唔定。據講呢個動作之所以叫做「擊打」，係因為快速做呢個動作嘅時候，抬起髀落地嗰下會「擊打」條支撐髀^[43]。

擊打係初階芭蕾舞堂上成日做嘅一種運動，噉係因為呢個動作能夠提升學生嘅柔軟度，而且擊打亦係好多進階舞步嘅起始動作，所以練習擊打會有助學生準備做嗰啲進階舞步^[43]。擊打嘅常見類型有：

Petit battements

細擊打：抬起角度細嘅擊打。

Grand battements

大擊打：抬起角度大嘅擊打。

Battements tendu

伸展擊打：做擊打嗰陣做到去 tendu 嘅狀態然後停低，跟住返去企定定嘅腳位。

Battements glissé

滑行擊打：做擊打嗰陣去到 tendu 嘅位之後，隻腳板要係噉咦離地（大約離地 2 至 3 cm），跟住先落地同返去企定定嘅腳位。

Battements fondu

單髀屈曲擊打：舞蹈員一路用支撐髀做一個 demi-plié，同時另一條髀一路屈曲抬起（向前、向後或者向側都得），而支撐髀屈曲到極點嘅同時抬起髀要伸到最直兼去到最高點。可以睇埋 fondu 嘅概念。

Battements développé

延伸發展擊打：舞蹈員以第五腳位做起始，將要抬嗰條腿做 retiré 嘅動作，然後向前、向後或者向側面打開成擊打最高點噉嘅姿勢，最後抬起咗嗰條髀要慢慢落返嚟，最後成企定定嘅第五腳位。可以睇埋 développé。

Battements frappé

切擊打：指做擊打嗰陣，條抬起髀起始嘅時候要處於外開咗、而且繃緊嘅狀態，嗰條腿嘅腳踭要係噉咦離地，腳踭掂到支撐髀嘅腳踭對上嘅地方（成 frappé 噉嘅樣），跟住抬起髀先至一路遠離支撐髀一路慢慢噉伸直。

Rond de jambe（法文讀音：[ʁɔ̃ d(ə) ʒɑ̃b]）

用腿畫圈：一種喺芭蕾舞堂同埋表演嗰陣都成日用嘅基礎舞步；舞蹈員企定定，通常係第一或者第三腳位，跟住佢要用其中一條腿企喺度，另一條腿向前或者向後 tendu 去到淨係腳板尖掂地或者係稍微離地，伸咗出去嗰條腿跟住要以一條弧線嘅軌道移向身體側面，再移向身體後面（前面），最後返到去企定定嘅腳位。成個過程就好似係用啲腳趾尖喺身體其中一邊嘅地板畫咗半個圖圈噉樣。用腿畫圈可以再細分做幾種^[44]：

Rond de jambe à terre / rond de jambe par terre

喺地下用腿畫圈：指全程抬起髀腳尖都掂住地板嘅用腿畫圈。

Rond de jambe en l'air

半空用腿畫圈：指全程抬起髀都喺身體側邊（à la seconde），郁嘅淨係膝頭以下嘅腿部。如果條大髀同身體成嘅角度細過 90 度嘅話，抬起髀啲腳趾應該會喺支撐髀嘅小腿對開嘅空中畫一個圖圈，而如果條大髀同身體成 90 度角，噉抬起髀啲腳趾應該會喺支撐髀嘅膝頭高度嘅半空畫圈。

Grand rond de jambe en l'air

大半空用腿畫圈：指緊半空用腿畫圈嗰時，全程條抬起咗嘅腿都要喺 grand battements 噉嘅高度。

Rond de jambe attitude

用腿畫圈鶴立：指緊用腿畫圈嗰陣時，抬起咗嗰條腿一開始嗰陣要喺身體前面，再向側移，再向後移，跟手支撐住身體嗰條髀要腳尖企或者半腳尖企，成個人形成 attitude 噉嘅狀態。

Rond de jambe à terre 嘅示範圖（左為先右為後） Rond de jambe à terre 嘅示範圖（左為先右為後）

Fondu（法文讀音：[fɔ̃dy]，大致似粵拼 fon1 dyu1）

單髀屈曲（fondu 嚟自法文溶化噉解）：喺芭蕾舞用詞上，呢隻字詞通常俾人加喺某個舞步嘅名後面，指做嗰個舞步嗰陣支撐髀要稍為屈曲，好似淨係用一條腿做嘅 demi-plié 噉。例如係 battements fondu 噉，就用咗 fondu。值得一提嘅係，由於 fondu 擊打係 fondu 最常見嘅應用，所以有陣時啲人會用 fondu 作為 battements fondu 嘅同義詞^[45]。

Fondu 個法文名嘅典故，據講係源自法國菜嘅：法國菜入便有好多味餸菜都會用到溶化嘅芝士（例子可以睇吓芝士火鍋噉）；法國人食嘢，將一塊麵包浸落煮得靚嘅溶芝士再拎返出嚟嗰陣，啲溶芝士會慢慢噉由塊麵包嗰度「跣」落嚟，而唔係「一嘢躂返落嚟」——而古典芭蕾舞傳統上認為，呢種慢慢下降而唔係「一嘢躂落嚟」嘅感覺，就係做 fondu 嗰陣應有嘅美感^[45]。

一連串 fondu 練習（條支撐髀係噉屈曲又伸返直）嘅示範圖；抬起髀同支撐髀嘅位置唔同，但永遠都係喺同一時間點完全伸直，又會喺同一時間點去到屈曲得最犀利嗰點。 一連串 fondu 練習（條支撐髀係噉屈曲又伸返直）嘅示範圖；抬起髀同支撐髀嘅位置唔同，但永遠都係喺同一時間點完全伸直，又會喺同一時間點去到屈曲得最犀利嗰點。

Développé（法文讀音：[devlɔpe]）同埋 enveloppé（法文讀音：[envlɔpe]）

延伸發展（développé）：舞蹈員做 retiré，當佢條抬起髀去到最高點（腳板掂到支撐髀嘅膝頭）之後，抬起髀要向前、向側或者向後伸展。全程條支撐髀都要直一直，而且條抬起髀嘅移動速度要均一，伸展到極點之後條抬起髀就要落返地成 tendu 噉嘅狀態，通常最後條抬起髀會返埋去條支撐髀度，成一個企定定嘅腳位。延伸發展喺古典芭蕾舞以至多種芭蕾舞以外嘅舞蹈當中都好常見，而且算係初階舞步。不過呢種舞步易學難精，就連好多進階嘅學生同專業嘅芭蕾舞蹈員，都會俾老師話佢嘅延伸發展做得唔夠靚^[46]。

內合舞步（enveloppé）：可以話係延伸發展嘅相反；舞蹈員要首先用抬起髀做 tendu，等到條抬起髀伸到最盡，抬起髀就要抬起離地，抬起髀去到最大高度之後，就要收返埋變成 retiré 或者 cou-de-pied 噉嘅狀態——內合舞步基本上就係將延伸發展前後掉返轉嚟做^[47]。

向前（devant）做嘅 développé 向前（devant）做嘅 développé  passé passé

Passé （法文讀音：[pɑse]，大致似粵拼 paa6 sei1）

經過舞步：一種簡單但好有用嘅初階舞步；舞蹈員抬起一隻本嚟喺另一隻腳板後面嘅腳板^{[註 4]}，令抬起髀腳板變成喺前面（或者後面），通常做法係抬起髀做 retiré，等到抬起髀嗰隻腳板嘅腳尖掂到支撐髀嘅膝頭嗰陣，舞蹈員要乘勢將嗰隻腳板移向支撐髀個膝頭嘅後面（或者前面），最後再落返地板。Passé 可以喺做完腳尖旋轉（詳情）等嘅大舞步之後用嚟改變重心腳，等舞蹈員可以乘勢做下一個舞步^[48]。

Classical walk

古典式步行：指古典芭蕾舞當中舞蹈員行起路上嚟嘅一種姿態。用古典式步行行路步驟如下：首先，舞蹈員要企定定，跟住要踏出去嗰隻腳要進入好似腳尖企噉嘅狀態，再跣出去移動若干距離，嗰隻腳去到最遠處嗰陣，成條髀會好似成 tendu 噉嘅樣、而且淨係腳趾尖掂地；然後踏咗出去嗰隻腳要落地，腳掌前半橛掂地先，最後至腳踭掂地；腳踭掂咗地之後，舞蹈員會乘機將自己身體向前移，令重心移去去咗前方嗰隻腳板度，而跟住後面隻腳要以一個小型 développé 噉嘅方式向前踏，踏完之後嗰隻腳又係要成好似向前 tendu 噉嘅狀態，再落地，呢個過程可以重複若干次^[49]。

喺古典芭蕾舞當中，舞台上嘅芭蕾舞蹈員近乎冚唪唥都會使用古典式行走，用意在於展示佢哋嘅高貴氣質^[49]。

身體位置第二式

Positions of the body

身體位置：芭蕾舞上常用嘅一啲全身姿勢，好多時用嚟做大舞步嘅準備動作。芭蕾舞身體位置主要嘅有六大款：

• 交叉位（croisé；法文讀音：[kʁwɑze]，法文打咗交叉噉解）：舞蹈員面向舞台其中一個角落頭，由心口向前指出去嗰條直線要同觀眾嘅眼光成約莫 45 度角，等觀眾同時睇到舞蹈員嘅兩個膊頭同髖關節，手位通常會係 RAD 第三或者第四，而佢其中一條腿要用 tendu 嘅方式向前或者向後伸，令到由觀眾嘅角度睇，佢兩條腿好似打咗交叉噉——即係近觀眾嗰條腿向前 tendu 或者離觀眾遠嗰條髀向後 tendu）。喺 RAD 派同切劇蒂派當中，交叉位仲可以細分做向前（croisé devant）同向後（croisé derrière）兩種，向前交叉位涉及近觀眾嗰條腿做向前 tendu，而向後交叉位涉及離觀眾遠嗰條腿做向後 tendu ^[50]。
• 陰影（effacé；法文讀音：[ɪˈfeɪs]）：可以話係交叉位嘅相反，步驟上同交叉位唯一分別係雙腿由觀眾嘅角度睇要處於「開放」狀態——即係近觀眾嗰條髀向後 tendu（effacé derrière）或者遠離觀眾嗰條腿要向前 tendu（effacé devant）^[51]。順帶一提，法國派係嗌呢個位置做打開向前（ouvert；法文讀音：[uvɛʁ(t)]）嘅^[52]。
• 身體位置嘅第二式（à la seconde；法文讀音：[a la səɡɔ̃d]）：同黐喺第啲舞步嘅名嗰度嘅側伸式（睇 à la seconde）唔同。身體位置第二式，有陣時會稱之為 à la seconde en face，涉及舞蹈員面向觀眾（en face）、雙手成第二手位，而兩條腿其中一條要做個向外嘅 tendu（tendu à la seconde），令到嗰位舞蹈員可以準備用彈跳等嘅方法向側移動同埋做下一個舞步^[53]。
• 第四式（à la quatrième；法文讀音：[a la katʁijɛm]，法文去到第四噉解）：舞蹈員身體面向觀眾（en face）、雙手成第二手位、其中一條腿要喺另一條髀前面（quatrième devant）或者後（quatrième derrière）形成成第四腳位^[54]。
• 分離式（écarté；法文讀音：[ekaʁte]）：舞蹈員身體打斜，由心口向前指出去嗰條直線要同觀眾嘅眼光成 45 度角左右，近觀眾嗰條髀要向外伸成第二腳位，同一邊隻手臂要好似 RAD 第五手位噉高舉；支撐髀就要企定定，同支撐髀同一邊嗰隻手臂要成低嘅第二手位；個頭要係噉咦向上傾而且轉咗向高舉嗰隻手臂嗰邊，對眼要望到高舉咗嗰隻手掌。某啲門派，例如係法國派，會將分離式身體位置分做向前分離式（écarté devant）同向後分離式（écarté derrière）兩種，向前分離式如前述，而向後分離式同向前分離式分別在於，向後分離式嘅近觀眾嗰條腿 tendu 嗰陣要向前伸（伸向身體面向嗰個方向）^[55]。
• 膊頭式（épaulé；法文讀音：[epole]）：舞蹈員面向舞台嘅角落頭，遠離觀眾嗰條腿向後 tendu 再令兩腳成完全掂地嘅第四腳位，近觀眾嗰隻手臂就要向前伸直，而遠離觀眾嗰隻手臂就向後伸直，通常個頭會面向觀眾。喺呢個動作入面，個舞蹈員總體成個人最樣眼嗰部份係近觀眾嗰隻手臂嘅膊頭——所以就叫「膊頭式」^[53]。

Épaulment（法文讀音：[epolmɑ̃]）

擰膊頭：舞蹈員係噉咦擰轉條腰，令到一邊膊頭移去腰嘅前面，而另一邊膊頭就移去腰嘅後面，通常個頭會稍為擰向前面嗰邊膊頭指向嘅地方。做擰膊頭嗰陣，舞蹈員要做到好似成個上半身慢慢噉旋轉嘅美感，而唔係淨係膊頭擰轉咗方向。擰膊頭喺某啲身體位置當中會用到^[56]。

初階跳躍

芭蕾舞有好多舞步都涉及舞蹈員跳起，呢啲舞步仲有得細分做好多種。

Small jumps

喺廿一世紀初，有啲人會堅持 jump 呢隻英文字或者 sauté 呢隻法文字喺芭蕾舞上淨係指冇咩橫向移動（或者直頭純直上直落）、由兩隻腳起跳兩隻腳同時落地嘅跳躍^[1][57]。

• 細跳躍（petit saut；法文讀音：[p(ə)ti so]）：細嘅跳躍，舞蹈員由是但一個腳位起跳，跳嘅途中冇橫向移動，期間唔會改變腳位。呢種舞步喺俄羅斯派當中俾人嗌做 temps levé sauté。
• 突然躍起（soubresaut；法文讀音：[subʁəso]）：一種基礎嘅跳躍，舞蹈員由是但一個腳位向前起跳一段短嘅距離，喺空中對髀完全伸直並且好快噉改變雙腳腳板嘅位置，令到落地嗰陣變成第五腳位，手臂位置唔定。突然躍起通常俾人用嚟做一啲高階舞步嘅準備動作，喺男舞蹈員做變奏舞嗰時零舍常用。除此之外，因為「快速改變雙腳腳板嘅位置」呢家嘢好講求雙腿嘅肌肉力量，突然躍起又成日會俾芭蕾舞老師用嚟做一種運動，鍛鍊學生雙腿肌肉^[1]。
• 交換（changement；法文讀音：[ʃɑ̃ʒmɑ̃]）：舞蹈員由一個 demi-plié 嘅第五腳位跳起，喺空中一路伸直雙髀同腳板，一路快速改變腳位，最後落地嗰陣變成前後相反咗嘅第五腳位，即係例如起跳之前係左腳前右腳後嘅，做咗交換落地嗰時就要變成左腳後右腳前，反之亦然。交換舞步通常都係一連串噉做嘅，可以係一連跳幾吓而每吓都交換一次，又可以係跳一吓但途中雙腳前後互換幾次都得^[1]。順帶一提，喺華加諾娃派當中仲有所謂嘅 petit changement de pieds，指做交換嗰時雙腳腳尖要近乎掂到地板咁滯^[1]。

Temps levé （法文讀音：[tɑ̃ l(ə)ve]）

短暫上升：大致係指一位舞蹈員喺其中一條腿以某啲方式抬起咗嘅狀態下，用冇抬起嗰條髀輕力彈跳，常見嘅做法如下——舞蹈員首先企好，然後以 tendu 嘅方式將其中一條腿（帶頭髀）向前伸，跟住帶頭髀要落地，而喺後面嗰條腿要乘勢向前郁，變成以帶頭髀做支撐嘅 retiré 狀態，跟住帶頭髀（仲掂地）要一撐，令到佢成個人係噉咦離地，最後落地，並且成一個企定定嘅腳位^[2]。

向側做嘅 assemblé 示範；如果用慢鏡睇，會見到位舞蹈員落地前一刻兩腳聚合。

Assemblé （法文讀音：[asɑ̃ble]，大致似粵拼 aa6 saam1 ble4）

聚合，全名聚合舞步（pas assemblé）：男舞蹈員成日做嘅一種跳躍，女舞蹈員間中都會做；舞蹈員用一隻腳跳起，用兩隻腳落地，途中兩腳喺空中「聚合」；最普通嗰種聚合舞步做法如下——起始嗰陣，舞蹈員兩腳掂地，跟住佢其中一條腿做抬起髀，以某啲方式（可以睇 battement）抬起離開支撐髀，抬起髀嘅腳掌喺離地前要「掃過」地板，跟住舞蹈員會用仲掂住地板嘅支撐髀一撐跳起，而第二隻腳掌要喺佢成個人落地之前掂到第一隻腳掌，成是但其中一個腳位，最後落到地嗰一刻，雙腿通常會做一個快嘅 demi-plié 嚟吸收落地嗰吓嘅衝擊力^[1][58]。

聚合舞步仲有得分好多款：唔同款嘅聚合舞步喺跳嘅方向同抬起嗰條腿離地嘅方式... 等各方面都有異，但重點都係要「兩隻腳掌喺半空嗰度聚合，先至落地」^[58]；聚合嘅高度亦都唔定，舞蹈員可能喺離地 50 厘米嗰陣兩隻腳掌聚合，又可以係喺臨掂到地板前一刻先聚合^[58]。

Pas de chat 嘅示範

Pas de chat（法文讀音：[pɑ d(ə) ʃa]；睇埋 grand pas de chat）

貓舞步（chat 係法文貓噉解）：一種跳躍，以一隻腳帶頭起跳，帶頭嗰隻腳落地先（唔似得 assemblé 噉兩隻腳一齊落地）；舞蹈員要以第三或者第五腳位做起始，跟住做 demi-plié 再一吓伸直後面條腿嚟起跳，而同一時間前面條腿要做一個好快速嘅 passé 令到雙腿前後互換，然後原本喺後面嗰條腿要做一個 retiré 噉嘅動作，再用原先喺前面嗰條髀嘅腳板落地。喺成個過程當中，舞蹈員向前、向側、或者向後跳都得^[59]。

貓舞步之所以有個噉嘅名，據講係因為呢個舞步誕生嗰陣有傳說話貓跳起上嚟係前雙腳離地先，再後雙腳離地，然後前雙腳落地先再後雙腳落地——而貓舞步好相似，涉及一隻腳離地先，跟住離地先嗰隻腳會落地先。不過及後嘅考究證實，冇人證實過貓真係噉樣跳嘅——成件事只不過係一個都市傳說，但芭蕾舞界到咗廿一世紀初都仲係會稱呢個舞步為貓舞步^[59]。

連續 sissonne 嘅示範

Sissonne （法文讀音：[sisɔn]，大致似粵拼 si6 son1）

分髀跳：另一種跳躍，兩腳一齊起跳而帶頭髀落地先或者兩腳一齊落地；最基本嘅分髀跳過程如下——舞蹈員首先要兩腳掂地企喺度，腳位同手位就是但一個都得；跟住佢要用兩隻腳一齊𨅝一嘢跳起，喺空中嗰陣兩條髀要分開若干角度，個角可以去到成 180 度（即係兩條髀成一字馬）咁大都得，角度到咗最大之後，帶頭嗰隻腳要首先著地或者兩腳同時著地；當中 sissone fermee 係由第五腳位起始，兩腳同時著地嘅分髀跳，最後落地嗰刻兩腳要成五大腳位當中其中一個，通常雙腿會做一吓 demi-plié 吸收落地嗰吓嘅衝力。分髀跳係一種中階舞步，係好多 allegro 嘅組成部份，啲學生學芭蕾舞嘅時候老師多數會叫學生做好分髀跳先，然後至教一啲高階嘅快板^[60]。

Sissonne 同時亦係最廣為人知嘅芭蕾舞舞步之一，啲芭蕾舞劇或者芭蕾舞班嘅宣傳海報好興展示處於分髀跳最高點嘅舞蹈員^[60]。

Failli （法文讀音：[faji]，近似粵拼 fei1 ji1）

飛伊：一種用嚟做連接嘅舞步，通常攞嚟連接兩個跳躍；舞蹈員做第一個跳躍舞步落地，跟住下一刻將其中一隻腳向前 dégagé，然後乘勢做下一個跳躍舞步，例如係用 dégagé 離咗地嗰條髀作為抬起髀，做一個 assemblé 噉^[61]。

另一方面，failli 有陣時會俾人攞嚟做分髀跳飛伊（sissonne failli）嘅簡稱，分髀跳飛伊指嘅係舞蹈員做咗一個兩腳唔同時著地嘅 sissonne 之後，後著地嗰隻腳用要落地嗰吓嘅下墜力一嘢掃向前，然後做下一個舞步，而好多時「下一個舞步」係一個 chassé ^[61]。

Brisé （法文讀音：[bʁize]）

分散舞步（法文入面破碎或者分散噉解）：係 assemblé 嘅一個變種，涉及舞蹈員由是但一個腳位——通常係第四或者第五——做起始，一路做個 demi-plié 一路轉移成第一腳位，跟住就用由 demi-plié 伸直嗰陣雙腿施嗰吓力起跳，喺空中雙腿互相拍打（合埋再分開）並且前後轉換若干次，成個過程當中上半身要同下半身唔成垂直－腰要喺上下半身嘅左邊或者右邊，即係上下半身同條腰「分散」咗，最後再以一隻或者兩隻腳著地。破碎舞步跳嗰陣可以向前或者向後移動都得^[62]。

Entrechat （法文讀音：[ɑ̃tʁəʃa]）

交織舞步：舞蹈員由某一個腳位（多數係第五）一嘢跳起，喺空中嗰度雙腿互相拍打（雙腿前後互換）若干次，再落返地成企定定嘅腳位。喺現實嘅應用當中，啲人用 entrechat 呢隻字詞嗰時通常都會將佢掕住另外一個字，當中隻字詞表示空中雙髀拍打嘅次數，例如 entrechat quatre 係指個舞蹈員喺空中雙髀拍打兩吓－quatre 係法文四噉解，兩條腿都拍打咗兩吓，所以總共算四吓，而 entrechat six（six 係法文六）同 entrechat huit（huit 係法文八）等嘅詞彙，可以用同一道理想像^[63]。

如果 entrechat 掕住嗰個數字係單數，就表示要用一隻腳落地：例如 entrechat trois（trois 係三）就係指舞蹈員用雙腳離開地面，喺空中雙髀都拍打一吓（3 減 1 再除 2 等如 1），跟住再用其中一隻腳著地（可以當一隻腳著地做拍打咗一吓）^[63]。

Retombe

退卻：法國派同切劇蒂派會用嘅一個詞彙，指舞蹈員跳返去佢起始嗰個位^[64]。

初階旋轉

睇埋：旋轉舞步

Chaînés （法文讀音：[ʃɛne]） / chaînés turns

連鎖旋轉：係指雙腳腳尖企或者半腳尖企嘅情況下一路旋轉一路移位，最簡單嘅做法如下——首先舞蹈員要用第一腳位企喺度，手臂多數喺第一或者第五手位，跟手佢兩隻腳要進入腳尖企或者半腳尖企嘅狀態，喺兩隻腳板之間距離不變嘅狀態之下，佢要用髖關節嘅力量旋轉，令到其中一隻腳郁，另外嗰隻腳就做旋轉嘅軸心，成個人 180 度旋轉，而喺下一個旋轉當中，用髖關節嘅力令到另外嗰隻腳郁，啱啱郁咗嗰隻腳要改為做旋轉軸心，旋轉方向不變，而個芭蕾舞舞蹈員要重複呢個過程若干次（所以就叫連鎖），形成好似成個人輕盈噉一路旋轉一路「飄」過舞台噉嘅視覺效果^[65]。

呢個舞步有陣時會俾人稱之為猛衝（déboulé；法文讀音：[debule]），噉因為連鎖旋轉嘅法文全名係 les tours chaînés déboulés（連鎖猛衝旋轉）。

Posé turn （法文讀音：[poze]，大致似粵拼 pou6 sei1）

平靜旋轉：舞蹈員用第五腳位企定定，跟住做一個 demi-plié，再用 tendu 將其中一條腿移向身體前面，再做一個 90 度嘅 rond de jambe，令到帶頭髀移去身體側面，跟手支撐髀要一撐，身體以帶頭髀做軸心旋轉，並且向側邊移動，然後舞蹈員仲可以重複噉做「髀伸展伸出」至「成個身體向側邊移動」嘅過程若干次，令到自己旋轉式噉移動若干距離，所以呢個動作喺舞台上好常用嚟幫啲舞蹈員優雅噉移動去特定嘅位置。

Piqué tour （法文讀音：[pike tuʁz]，piqué 讀音大致似粵拼 pi1 kei1）

刺步旋轉：女舞蹈員常用嘅舞步；做刺步旋轉嗰陣，舞蹈員用 piqué 嘅方式將身體重心一下移去一隻腳尖企或者半腳尖企嘅腳掌嗰度，跟住再用嗰條腿做軸心旋轉，令到另外嗰條腿劃過空中，最後仲可以乘勢停低變成阿拉伯斯卡（詳情）嘅姿勢。刺步旋轉可以用向前或者向後嘅 passé 做起始，即係話伸出去做軸心嗰條腿用 passé 嘅方式伸去目的地^[66]。

Spotting

定點法：多種舞蹈都會用到嘅一種旋轉技巧；包括芭蕾舞在內嘅好多種舞都會要求舞蹈員做旋轉動作（例如腳尖旋轉），旋轉動作有可能搞到舞蹈員頭暈；定點法就係一種旋轉用嘅技巧，舞蹈員特登將佢頭頸嘅轉速同身體其他部份嘅唔一致——旋轉啱啱起始嗰時，舞蹈員頸以下嘅身體要加速，但頭同頸就繼續望實前方，等個頸以下身體轉到咁上下（大約轉咗 80 度角之後），頭頸先至一嘢轉晒成個圈返去原初嘅方向。練習定點法嗰時，芭蕾舞學生通常會要自己一路練一路望實埲牆上面嘅某一點，所以就叫「定點法」^[67]。

拉雜初階

Balancé 嘅示範

Balancé（法文讀音：[balɑ̃se]，大致似粵拼 baa6 lan1 sei4）

搖擺舞步：舞蹈員一路移位一路變換雙腳嘅平衡，通常會好似華爾茲（1 2 3 1 2 3 噉嘅節奏）噉分三步；一般嚟講，舞蹈員會以第五腳位做起始，跟住佢要做 demi-plié 成 cou-de-pied，跟住抬起咗嗰隻腳掃去前、側、或後（成 fondu 噉嘅狀態），跟手要彈一吓變成以帶頭嗰條腿支撐身體（成前後或者左右相反咗嘅 fondu），並且跟尾嗰隻腳要郁，並且移去支撐腳嘅腳踭後面，成一個 cou-de-pied，再落地，雙腳半腳尖企，成 sous-sous 狀態，再落返地成一個企定定嘅腳位，跟住佢可以重複呢個過程若干次。喺成個過程當中，舞蹈員一路移動其中一隻腳一路轉換重心腳，造成好輕快嘅外觀^[68]。

Chassé 嘅示範

Chassé （法文讀音：[ʃase]，大致似粵拼 shaa6 sei1）

追趕踢：首先，舞蹈員其中一條腿要向前伸（可以睇 tendu），嗰條髀嘅腳尖要爭啲掂地或者稍為離地，並且將身體嘅重量放晒喺冇伸前嗰條腿度；跟住冇伸前嗰條腿要好快噉向前跳或者跣，同向前伸咗嗰條髀會合；下一刻，舞蹈員要將身體重量移返落去後面嗰條腿度，帶頭嗰條腿要再向前郁；如是者，舞蹈員可以一路係噉重複以上嘅過程若干次，造成好似一路「半跣半跳」過舞台、一路用後髀「追趕」前髀噉樣嘅效果。追趕踢雙髀同雙手嘅位置可變，重點係「後面嗰條髀追趕前面嗰條髀」^[69]。

• 旋轉式追趕踢（chassé en tournant；法文讀音：[ʃase ɑ̃ tuʁnɑ̃]）：做法同追趕踢相似，分別係舞蹈員喺空中嗰陣，要一路旋轉、兩條腿同兩隻腳板要一路合埋一齊，跟住前髀要伸前並且用後髀落地。同追趕踢一樣，一位舞蹈員做旋轉式追趕踢嗰時可以重複成個過程若干次，喺舞台上移動一段距離^[70]。

Pas de Basque （法文讀音：[pɑ d(ə) bask]）

巴斯克舞步（法文「巴斯克人嘅舞步」噉解）：一種中階舞步，源自聚居喺法國南部嘅巴斯克族人嘅民族舞；首先，舞蹈員要以第五腳位企定定，右腳喺左腳前面，跟住左腿要做一個 demi-plié，而左腿一路維持 plié 狀態、一路將右腿以 rond de jambe 噉嘅方式向前或者向側伸（即係好似 fondu 噉），然後個舞蹈員要一瞬間將身體重心由左腳移去右腳嗰度，右腳一踏，變成用右腳做支撐髀企喺度、左腳去 cou-de-pied 嘅位，跟住左腳可以再以用向前、側或者後踏，又或者收返埋去右腳嗰度成第五腳位；如果係再踏嘅話，「改變重心腳一踏」嘅過程可以重複若干次，重點係喺終止嗰吓兩隻腳要變成第五腳位^[71]。

Coupé （法文讀音：[kupe]，大致似粵拼 ku1 pei1）

切入：一種用嚟連接唔同嘅舞步嘅動作，好多時係用嚟準備做某啲大舞步；好多芭蕾舞舞步都涉及舞蹈員一隻腳喺前另外嗰隻喺後，而做 coupé 嗰陣，佢要用某啲方法（例如係噉咦向上跳起）令兩隻腳位置互換。舉例說明：想像家吓有一位舞蹈員處於 cou-de-pied 左腳抬起咗喺前、右腳喺後支撐嘅狀態，佢想用 coupé 令兩隻腳位置互換；首先，佢喺後面嘅右腳要進入半腳尖企，同時左腳落返地成半腳尖企，跟住左腳要變成完全掂地，同時右腳離地成喺左腳後嘅跗狀態——最後變成一個同之前兩腳位置相反嘅 cou-de-pied 狀態^[72]。

Échappé （法文讀音：[eʃape]，大致似粵拼 e1 shaa1 pei1）

脫逃：舞蹈員由一個一個封閉嘅腳位（第一或者第五）變成一個開放腳位（第二或者第四），通常係「第一變第二」或者「第五變第四」，可以分兩種^[73]：

• 脫逃半腳尖企（échappé demi-pointes / échappé sur le pointes）：舞蹈員以封閉腳位企好，跟住佢要雙腳都向外彈，成一個兩腳都半腳尖企嘅開放腳位，再落返地，由頭到尾隻腳腳板都唔會完全離地——兩隻腳板由一個封閉腳位「脫逃」。呢個舞步喺女舞蹈員嘅變奏舞當中好常見。
• 脫逃跳躍（échappé sauté）：舞蹈員起始嗰時，要做一個 cou-de-pied 先，再一跳，落地嗰時做一個 demi-plié 嘅開放腳位。

Glissade （法文讀音：[ɡlisad]）

滑行：小型嘅「跳躍」舞步；舞蹈員首先要用第五腳位企定定，再做一個 demi-plié，其中一隻腳跟住要用 dégagé 嘅方式移向側、向前或者向後成抬起髀，條抬起髀抬起大約 20 度，跟住條支撐髀一嘢伸直，令到成個人起跳，喺半空中嗰一剎那，個舞蹈員要雙腿伸直，腳尖指住地下；最後抬起髀嘅腳板要著地並且係噉咦屈曲，而支撐髀跟住再落地，最後兩腳關埋，成第五腳位。如果個滑行係向側做嘅話，通常最後嗰個第五腳位係支撐髀腳板喺前嘅。

• 準備型滑行（glissade précipitée；法文讀音：[ɡlisad pʁesipite]）：用嚟為下一個舞步做準備而做嘅滑行^[74]。

Balloné （法文讀音：[ba.lɔ.ne]，大致似粵拼 baa6 lou1 ne1）

波形舞步：舞蹈員用第四腳位企喺度先，再將抬起髀向外伸、離地、再返落嚟成 cou-de-pied 狀態，然後可以將「向外伸」至「返落嚟成跗狀態」嘅過程一路做一路用支撐髀向前彈跳，重複若干次，嚟到喺舞台上移動若干距離^[75]。

Polonaise step （法文讀音：[pɔlɔnɛz]）

波蘭舞步：個名嚟自同名嘅波蘭民族舞蹈，喺古典芭蕾舞步當中通常指一個簡單嘅舞步；芭蕾舞嘅波蘭舞步係指舞蹈員由一個企定定嘅腳位開始，然後用 tendu 嘅方式將一隻腳向前移動，跟住嗰隻腳著地成半腳尖企（詳情）狀態，同時另外嗰隻腳進入半腳尖企狀態同向前踏，然後再以呢個方法行多一步（全程兩隻腳都要係喺半腳尖企狀態），然後再變返做兩腳完全掂地做一個腳位，下一刻起始嗰條髀要 plié 而另一條髀要掃向前^[76]。

可以睇埋 polonaise。

Pas de valse（法文讀音：[pɑ d(ə) vals]）

華爾茲舞步（valse 係指華爾茲）：一個中階舞步，成日畀女舞蹈員用嚟喺舞台上優雅噉移動；要做一個華爾茲舞步，舞蹈員會用 fondu 將其中一隻腳伸出，然後伸出去嗰隻腳會落地成半腳尖企或者腳尖企，同時另外嗰條髀會掃向前，而呢條髀嘅腳尖去到目的地嘅同時，另外嗰隻腳會完全掂地並且成 fondu 狀態，如是者重複若干次，令個舞蹈員可以向任何方向移動一段距離^[77]。

Compound step

複合舞步：一個由簡單啲嘅舞步組成嘅舞步，例如 assemblé 呢個舞步涉及個舞蹈員喺起跳之前做一吓 plié，所以 plié 係 assemblé 嘅其中一個組成部份，而 assemblé 就屬於一種複合舞步。中階同進階嘅芭蕾舞舞步多數都係複合舞步，每個都係由若干個初階舞步組成嘅^[78]。

Préparation （法文讀音：[pʁe.pa.ʁa.sjɔ̃]）

準備步：指一個畀舞蹈員用嚟為一個（通常高難度嘅）舞步做準備嘅舞步或者位置^[79]。

進階技巧

以下嘅資料只供參考。唔熟芭蕾舞嘅人獨力嘗試做高難度嘅舞步好易整親。

一男一女兩位舞蹈員喺度拍擋跳舞；「兩位舞蹈員同步噉做出相同嘅舞步」係拍擋跳舞嘅常見做法。

Pointe / en pointe（法文讀音：[ɑ̃ pwɛ̃t]）

腳尖企（法文名係用腳尖噉解）：一種好出名嘅進階芭蕾舞技巧，指舞蹈員跳舞嗰陣淨係腳尖掂地－即係齋靠腳趾嚟支撐晒全身嘅重量，噉做目的係要令位舞蹈員望落好似「無重量」噉，達到一種輕盈嘅美感，喺女舞蹈員當中零舍常見。芭蕾舞當中有啲鞋係有特別設計嘅（足尖鞋），經過強化所以能夠撐住舞蹈員全身嘅重量。教芭蕾舞嗰陣，老師通常都會叫學生做半腳尖企（詳情）先，即係要啲學生試吓淨係腳板前半橛掂地而腳踭離地，等到佢哋腳板同腳趾有返咁上下強壯，老師先會叫佢哋做更加講求體力嘅腳尖企^[15]。

亦可以睇埋浪漫芭蕾舞嘅概念。

Couru （法文讀音：[kuʁy]，近似粵拼 ku1 ryu1）

腳尖跑：指舞蹈員由進入第五腳位雙腳腳尖企或者半腳尖企（relevé），並且喺一路維持 relevé 、雙腿大髀掂住而且一前一後嘅情況下進行向前、向後或者向側嘅移動。「女舞蹈員喺完全腳尖企之下嚟做 couru」嘅影象，畀好多人認為係古典芭蕾舞最令人印象深刻嘅嘢之一^[15]。

Pas de bourrée （法文讀音：[pɑ d(ə) buʁe]）

布尼舞步：個名取自同名嘅法國舞曲；舞蹈員企定定，然後支撐髀（S）做一嘢 demi-plié，同時另外嗰條髀（抬起髀；W）用 tendu 噉嘅方法伸出並且移去想去嘅地方，喺抬起髀隻腳板去到目的地掂地嗰一刻要做 relevé 令雙腳腳板都半離地，然後原先嘅支撐髀（A）喺兩腳腳板都成腳尖企或者半腳尖企嘅 relevé 狀態下又移動雙腿成開放狀態，跟住原先嘅抬起髀（W）又移去 S 前或者後（令雙腿變返封閉狀態），最後雙腳完全落地成第五腳位。布尼舞步可以連串噉做，最常見嘅用途係攞嚟喺舞台上面做短至中距離嘅移動^[15]。

Partnering

拍檔跳舞：指兩位舞蹈員（通常一男一女）一齊合作跳舞。拍檔跳舞嗰陣時，兩位舞蹈員會務求配合對方嚟跳，達到和諧同互相協調嘅動作；對於男舞蹈員嚟講，拍檔跳舞係相當要求體力嘅，因為佢哋好多時都要喺拍檔跳舞嘅過程當中捧起自己舞伴、接住跳起嘅舞伴、甚至乎捧住自己舞伴行一段距離，而且佢哋仲要喺舞伴跳起同做腳尖旋轉（詳情）嗰時負責做支撐^[80]。

可以睇埋雙人舞（pas de deux）同埋拍檔舞等嘅概念。

Lift

高舉：指 拍檔跳舞當中其中一方（通常係男主角）捧起另一方（通常係女主角）嘅技巧。喺最簡單嗰種情況下，女主角會做一啲姿勢（例如係阿拉伯斯卡），然後女主角一路做一路俾男主角舉起佢，令女主角成為全舞台嘅注意力焦點^[81]。高舉通常係比較進階嘅芭蕾舞先會做嘅，因為呢個動作要求相當強嘅體力，而且對男主角嚟講，做得唔正確有機會搞到佢腰背受傷^[82]。

Split

一字馬：指一個人雙腿向相反方向伸展，可以係一條向左一條向右，又或者一條向前一條向後都得，雙腿成 180 度角；一字馬喺多個進階舞步當中都會用到，好似係 grand jeté 噉，就要求舞蹈員跳到最大高度嗰陣雙腿成一字馬^[83]。

Batterie （法文讀音：[batʁi]）

擊打型舞步：泛指所有涉及舞蹈員喺空中雙腿互相擊打嘅舞步，例子有 jeté battu 同 cabriolé ^[84]。

腳尖企	傾斜阿拉伯斯卡	向後 attitude	Fish dive	一位男舞蹈員舉起自己舞伴。

Arabesque （法文讀音：[æɹ.əˈbɛsk]）

阿拉伯斯卡（法文名係「阿拉伯式」噉解）：芭蕾舞其中一種最廣為人知嘅舞步，指舞蹈員其中一條腿（支撐髀）支撐住成個身體，而另一條腿（抬起髀）就抬高去身體後面，上身稍微傾前，抬高咗嗰條腿要伸到直一直，抬高嘅角度由 20 度左右嘅低角至大過 90 度角嘅都有，例如所謂嘅傾斜阿拉伯斯卡（arabesque penché）就係指抬腿角度高到抬起髀嘅腳板位置高過個頭；阿拉伯斯卡目的係要令成個身體形成一條由膊頭一路延伸落去抬起髀嘅腳趾尾嘅線條，達到一種美感。要留意嘅係，芭蕾舞蹈員抬起條腿嗰時，抬起髀嘅腳板被指要係噉咦擰轉少少，令到隻腳板腳甲嗰邊對住觀眾，噉做嘅話個腳踭就唔會阻礙到腿部形成嘅線條^[1][85]。

專業嘅芭蕾舞蹈員會記得自己嘅最大阿拉伯斯卡（maximum arabesque）——指佢喺唔犧牲流暢度同精確度嘅情況下，做阿拉伯斯卡隻腳可以去到幾高^[85]。

Attitude （法文讀音：[atityd]）

鶴立式舞姿：舞蹈員用其中一條腿（支撐髀）企喺度，而另外嗰條腿（抬起髀）抬起，同時抬起髀膝頭要屈曲令大髀同小腿兩條直線成大約 90 度角，手臂嘅位置同「抬起嗰條髀要抬幾高角度」就唔定。抬起髀可以喺身體後面（derrière）、前面（devant）或者側面（à la seconde）都得。支撐髀可以屈曲或者伸直，而嗰條腿隻腳掌可以係平放嘅（a terre），又可以係腳尖企或者半腳尖企嘅。向後抬腿嘅鶴立式舞姿同阿拉伯斯卡嘅另一個重要分別係，一位芭蕾舞蹈員做鶴立式舞姿嗰陣個上身要盡可能垂直，唔似得阿拉伯斯卡舞姿噉向前傾^[86]。

Fish dive

魚衝式：係雙人舞（詳情）成日用嘅一種舞步，涉及一位女舞蹈員 retiré 佢其中一條腿，再由做佢舞伴嗰個男舞蹈員捧住佢，令佢好接近地板噉「飄」過若干距離（但係女舞蹈員由始至終都掂唔到地板）——望落有啲似一條游過河床嘅魚噉。魚衝式好多時係由女舞蹈員做嘅阿拉伯斯卡做起始嘅，當位女舞蹈員做緊阿拉伯斯卡要轉換做魚衝嗰陣，男舞蹈員通常會用佢兩隻手分別托住佢舞伴條腰同抬起髀嘅大髀，再將自己身後嗰隻腳移位變成魚衝式嘅位，跟住嗰位女舞蹈員就可以乘勢改變姿勢變成魚衝式^[87]。

進階跳躍

睇埋：華爾茲

芭蕾舞嘅大型跳躍零舍常見於快板型嘅舞段。

Tours en l'air （法文讀音：[tuʁz ɑ̃ l ɛːʁ]）

空中轉圈（法文名係喺空中轉圈噉解）：男舞蹈員成日會做嘅一種快舞步，位舞蹈員用 soubresaut 嘅技巧跳起，並且喺空中全身旋轉至少一個圈先至落地——而技術精湛嘅舞蹈員甚至仲可以喺空中轉超過一個圈。空中轉圈落地有多種做法：落地嗰陣，舞蹈員要用兩隻腳掌著地成一個企定定嘅腳位，又或者一隻腳掌著地另一隻劃出去成（例如）阿拉伯斯卡嘅狀態；除此之外，另一種高階嘅空中轉圈做法涉及位舞蹈員用一隻腳掌同埋另一條腿嘅膝頭嚟著地——呢種技巧相當難，因為做嗰個人落地之前要能夠減速，否則就好易撞親膝頭，後者呢種做法喺男主角做變奏舞嘅收尾嗰陣時相當常用^[88]。

一位跳得好高嘅男舞蹈員； 男舞蹈員成日會做大跳躍。	空中轉圈； 個舞蹈員用腳掌同膝頭著地。	細 cabriolé	Grand jeté 最高點

Cabriolé （法文讀音：[kabʁijɔl]）

雀躍（法文名大致係愩gung1噉解）：男舞蹈員成日會喺舞台上做嘅一種快舞步，跳起嘅舞蹈員喺半空兩條腿互相打擊。雀躍分大（grande）同細（petite）兩種，細雀躍涉及舞蹈員雙腿喺同上身成大約 45 度角嗰時打擊，而大雀躍就涉及個舞蹈員雙髀同上身成差唔多 90 度嘅高角嗰時打擊。喺雙腿互相打擊嗰時，喺下嗰條腿會向喺上面嗰條施力，令到上面條腿移得更加高。最後舞蹈員會用喺下嗰條腿落地。雀躍可以向前（en avant）、向後（en arrière）或者向側面（à la seconde）做都得，上半身嘅位置唔定^[89]。

• 雙重雀躍（double cabriole）指喺半空雙髀互相打擊兩次嘅雀躍，幾乎淨係男舞蹈員先會做嘅。
• 封閉雀躍（cabriole fermée）指落地嗰陣雙腳成第五腳位嘅雀躍。

大越步嘅動畫

Jeté （法文讀音：[ʒəte]，大致似粵拼 zet6 tei1）

越步（法文名係掟出去噉解）：跳躍嘅一種，舞蹈員其中一條腿好似「向住佢郁嘅方向飛出去」噉。做越步嗰陣，舞蹈員會將佢嘅其中一隻腿抬向前（jeté devant）、向後（jeté derrière）或者向側面（jeté à la seconde），然後用仲掂住地嗰隻腿起跳，可以分做好多種^[90][91][92]：

• 普通越步（jeté ordinaire / pas jeté），某啲門派興叫細越步（petit jeté）：由 plié 起始，跟住而要抬起嗰條腿隻腳板會掃過地板，同時個舞蹈員會乘機將身體重量集中落去仲掂住地嗰條髀（支撐髀）嗰度，跟住要抬起嗰條髀會完全離地，再用掂住地嗰隻腳一撐起跳，令個舞蹈員飛越一段短嘅距離，途中雙髀之間嘅角度可能得嗰 30 度咁細，最後要用帶頭嗰條腿落地（有異於例如兩隻腳齊齊落地嘅 assemblé）。呢種越步喺做啲細規模嘅快板嗰陣成日都會用到。
• 打吓越步（jeté battu）：涉及舞蹈員喺半空嗰陣雙腿互相拍打嘅普通越步。
• 轉向越步（jeté entrelacé / tour jeté）：越步嘅一個變種，涉及舞蹈員用越步嘅方式起跳，抬起髀去到空中之後，支撐髀都起跳，跟住用抬起髀著地（抬起髀著地先，所以算係越步）同時身體轉向，最後變成條支撐髀喺身體後面，用原先嗰條帶頭髀支撐住身體，成一個阿拉伯斯卡嘅姿態。
• 大越步（grand jeté）：大型嘅跳躍舞步，通常涉及舞蹈員用一隻腳向前跳。舞蹈員其中一隻腳會向跳嘅方向一掃，以 grand battement 嘅形式抬起，而喺後嗰隻腳要一撐起跳，令到佢成個人離地；喺空中嗰陣，舞蹈員雙腿要擘開成一字馬，而且擘開嘅幅度喺跳躍最高嗰點要去到最大，雙腿要完全伸直晒，身體重心稍微向移動嘅方向傾，整體形成位舞蹈員望落好似成個人喺空中「飄」過咗若干距離噉嘅視覺效果，畀好多評論家認為係最好睇嘅芭蕾舞舞步之一。大越步可以係向前（devant）、向後（derrière）或者向側面（à la seconde）做嘅都得^[90]。
• 旋轉式切入越步（Jeté en tournant）：大越步嘅一個變種。旋轉式切入越步係涉及旋轉嘅大越步。做旋轉式切入越步嗰陣，舞蹈員要以好似大越步噉嘅方法起跳；同一般大越步嘅分別係，一般大越步涉及舞蹈員喺空中直線噉移動，而喺旋轉式切入越步當中，舞蹈員就要喺空中令身體旋轉，因而稍為改變移動方向。一個舞蹈員可以做一連串嘅旋轉式切入越步（en manège），用呢個方法嚟喺舞台上打圈，呢種做法喺變奏舞裏面相當常用^[93]。

Rivoltade / revoltade

大轉步：一種強力嘅高階舞步，通常係由男舞蹈員做嘅。做大轉步嗰陣，舞蹈員會一路成個身旋轉，一路將其中一條腿用 grand battement 嘅方式一嘢掃向半空，然後掂住地嗰條腿（跟尾髀）一撐起跳，再將跟尾髀用大越步嘅方式掃去一個高過另外嗰條腿嘅空中，跟尾髀喺空中劃過一條弧線，再先過帶頭髀著地。大轉步喺男主角嘅變奏舞當中不時會用到^[94]。

Grand pas de chat（法文讀音：[ɡʁɑ̃ pɑ d(ə) ʃa]）

宏貓舞步：係 pas de chat 嘅一個變種，涉及舞蹈員喺空中嗰陣一路維持住帶頭髀 battement 式伸直抬起並且同上身成 90 度角，而跟尾嗰髀成 retiré 噉抽起咗嘅狀態，而且雙髀一路維持呢種狀態直到要落地為止。同 pas de chat 唔同嘅係，通常做宏貓舞步嗰個舞蹈員離地同落地都係用跟尾嗰條髀嘅－離地同落地都係用同一條髀。有啲舞蹈員做宏貓舞步會做得再激啲，做到抬起咗嗰條髀抬起嘅角度超過 90 度^[59]。

進階旋轉

睇埋：旋轉舞步

旋轉舞步廣泛噉被視為芭蕾舞表演當中不可或缺嘅一環。

Pirouette（法文讀音：[piʁwɛt]）

腳尖旋轉（法文名係旋轉噉解）：一種旋轉舞步，廣泛噉畀人認為係最有美感嘅芭蕾舞步之一。最簡單嗰種腳尖旋轉涉及以下步驟：舞蹈員首先要雙手成第二手位，一隻腳企定定，而另一隻腳處於第二腳位噉嘅位置兼且淨係腳尖掂地；跟住處於第二腳位位置嗰隻腳要向後移，令雙腳成第四腳位，同時雙手要變成第三手位，跟住再用一個快速嘅 retiré 將向後移咗嗰條髀抽起，並且用企定定嗰隻腳做支撐髀同旋轉嘅軸心（呢隻腳要同時變腳尖企或者半腳尖企），用快速抽起嗰股力加埋核心肌乘勢令成個人開始旋轉至少 360 度，可以再轉若干個圈。腳尖旋轉可以按照旋轉嗰陣條腿抬幾高、雙手嘅位置、或者係轉幾多個圈... 等嘅因素再細分做幾種，重點係舞蹈員喺其中一條腿抬起咗嘅情況下，用支撐髀做軸心旋轉^[95][96]。

喺芭蕾舞課程當中，腳尖旋轉屬於相當之高難度嘅一種舞步（尤其係轉多過一個圈嗰種），要求個學生有好勁嘅核心肌同平衡力，畀人形容為「每位芭蕾舞蹈員都想做到最好嘅大師級舞步」。亦因為噉，腳尖旋轉係比較高階啲嘅芭蕾舞考試當中實會考嘅一種舞步^[97]。

• 宏腳尖旋轉（grand piroutte / pirouette à la seconde）：指抬起髀抬起 90 度角嘅腳尖旋轉^[98]。

Fouetté （法文讀音：[fwɛte]）

揮鞭轉^{[99]:pp. 164-165}：舞蹈員運用支撐髀嘅肌肉，令到自己成個身體同埋條抬起髀以支撐髀做軸心轉向若干角度（由 45 度以至 180 度嘅都得）。想像舞蹈員條抬起髀向前伸前抬起 90 度，支撐髀進入半腳尖企狀態，而條支撐髀跟住快速噉旋轉 180 度同時抬起髀繼續指向開頭嘅方向，最後令到身體變成面向咗相反嘅方向，但條抬起髀變成喺身體後方同依然指住原先嗰個方向，即係變咗好似阿拉伯斯卡噉嘅狀態。揮鞭轉可以用嚟將身體由向前轉成向後、由向側轉成向後、或者由向後轉成向側等等都得，重點係「運用支撐髀嘅旋轉嚟改變身體同抬起髀面向嘅方向」。

• 揮鞭轉轉向（fouetté turn）^{[99]:pp. 164-165}：腳尖旋轉成日用嘅一種技巧，可以用嚟幫舞蹈員轉多幾個圈；首先，舞蹈員條支撐髀要做一個 plié，然後條抬起髀要向前伸，再一嘢「揈fing6」去身體側面或者後面嘅位置，跟住條抬起髀收返埋、變成 retiré 噉嘅狀態掂住支撐髀嘅膝頭，同時支撐髀要伸返直同變成半腳尖企或者腳尖企。呢個過程會產生一股力，令成個人繼續旋轉，而完成咗一個轉之後，個舞蹈員可以重複以上嘅步驟，令自己身體再繼續旋轉若干個圈。

轉多個圈嘅腳尖旋轉； 呢位舞蹈員勁到中途改變抬起髀嘅狀態。	一位男舞蹈員用 fouetté 轉向做腳尖旋轉。

Emboîté （法文讀音：[ɑ̃bwate]）

盒型舞步

• 盒型旋轉（emboîté turns）：一種常用嚟喺舞台上移動嘅方法；舞蹈員通常首先要右腿以向前 tendu 嘅方式向前伸，企好，跟住佢全身要旋轉，右腿以 rond de jambe 嘅型式去到身體側邊嘅位置，然後身體一嘢彈起，重心移去右腿嗰度，變成用右腿做支撐，而本嚟做支撐嘅左腿要抬起，雙腿喺一剎那間成 retiré 狀態，然後左腿落地，再喺雙腳半腳尖企掂地嘅情況下旋轉，轉到咁上下，右腿以 retiré 型式抬起再落地，重複由「雙腳半腳企之下旋轉，再其中一條腿以 retiré 抬起」嘅步驟若干次（通常係雙腿交替抬起），令位舞蹈員喺舞台上優雅噉移動若干距離。盒型旋轉唔使一定以右腿做起嘅，將上述講嘅嘢當中嘅左同右掉轉都得^[2]。

Renversé （法文讀音：[ʁɑ̃vɛʁse]）

仰翻姿：一種伴隨某啲旋轉型舞步嘅動作，舞蹈員一路做某個旋轉型舞步，一路向後側方彎腰（睇返 cambré），例如係腳尖旋轉仰翻姿（piroutte renversé）噉，就係指一位舞蹈員做腳尖旋轉嘅過程當中做仰翻姿^[100]。

Promenade （法文讀音：[pʁɔm.nad]）

漫步：舞蹈員一隻腳板完全掂地，而另一隻腳板就喺半空——即係阿拉伯斯卡或者向後 attitude（attitude derriere）等嘅狀態；跟住掂地嗰隻腳要靠腳踭係噉咦離開地面、身體旋轉少少、再落返地，達致令到成個人旋轉，同時條抬起髀嘅腳板喺空中「劃過」若干距離。要留意嘅係，漫步唔似得腳尖旋轉噉涉及個舞蹈員處於 relevé 狀態，而且同腳尖旋轉比起上嚟，漫步轉嘅速度通常會比較慢^[101]。

漫步嘅一種常見應用係男女舞蹈員嘅拍檔跳舞：想像女舞蹈員做咗一個阿拉伯斯卡（或者第啲涉及一條腿抬起嘅舞步），然後男舞蹈員要雙手掂住佢舞伴條腰或者手嚟撐住佢舞伴，跟住男舞蹈員會圍住佢舞伴打圈噉行，女舞蹈員要一路用漫步嘅方式旋轉，男舞蹈員一路用手幫佢舞伴保持平衡，最後達致女舞蹈員好似「一路做阿拉伯斯卡一路旋轉」噉^[101]。

Finger turns

手指旋轉：一種由一男一女舞蹈員一齊做嘅旋轉，重點係女舞蹈員喺捉住佢舞伴隻中指嘅情況下旋轉；男舞蹈員會企喺佢舞伴嘅左後面，高舉噉伸出佢嘅右手，當中中指指向下，而其餘手指同地板平行，身體其餘部份離佢舞伴有一定距離（唔會阻住佢舞伴旋轉）；跟住個女舞蹈員會捉住佢舞伴隻向下嘅中指，並且開始做旋轉；全程男舞蹈員都會扮演住支撐嘅角色，佢要有一對強而有力嘅雙臂，等個女舞蹈員無論做幾勁嘅旋轉，兩人都可以穩穩陣陣企到喺度。手指旋轉喺大雙人舞（grand pas de deux）嗰度不時會用到^[102]。

技巧概念

内文：Aplomb

Aplomb （法文讀音：[aplɔ̃]）

Aplomb，粵語可以譯做自信或者穩重性：大致係指一位芭蕾舞蹈員跳舞嗰陣時嘅「功架」；一位有 aplomb 嘅舞蹈員會有能力好穩陣噉樣做出垂直嘅姿勢同動作，而且具有完美嘅平衡力，令到觀賞佢跳舞嘅人完全唔使擔心佢做高難度舞步嗰陣會受傷^[103][104]。

Ballon

Ballon，粵語可以稱之為輕快優雅：形容芭蕾舞舞姿嘅一個詞語；一位跳舞嗰陣展示出 ballon 嘅舞蹈員步法會好輕盈，望落好似完全唔使用力就跳得起、離地嗰時望落會好似「飄緊」，而落力嗰時感覺會好似冇重量嘅噉。涉及跳躍嘅 allegro 類舞步，一般都畀人覺得係最能夠考驗一位舞蹈員嘅 ballon 嘅舞步^[105]。

Extension

伸展：指一位舞蹈員「抬起一條腿同埋將條腿維持喺半空」嘅能力；一個具有高伸展能力嘅舞蹈員喺抬起咗一條腿嘅情況下——例如係做緊阿拉伯斯卡或者 attitude ——能夠將支撐髀（掂住地嗰條髀）保持伸直、上半身擺位正確（例如做 attitude 嗰時上身理應係完全垂直嘅）、腳板指向正確方向、而且喺幾秒內完全保持到平衡。平衡力、柔軟度同埋肌肉力量等都係伸展嘅必要成份^[106]。

Line

線條：包含咗一位舞蹈員跳舞嗰陣全身形成嘅大致形狀；喺古典芭蕾舞上，一位舞蹈員身體嘅線條包括咗由佢頭頂到腳趾成嘅線，亦都包括咗身體其他重要嘅部份——例如係手臂、腰、膝頭同腳踭等——彼此之間形成嘅線。一位具有優美線條嘅舞蹈員會識得考慮晒自己全身，例如當佢做 grand jeté 呢一個主要涉及雙腿嘅舞步嗰陣，佢會識得諗埋自己雙臂同頭頸應該成咩位，先可以令佢成個身體整體成有美感嘅線，所以芭蕾舞上講嘅線條係一種宏觀性質嘅考量。

線條呢家嘢通常都係中至高階嘅芭蕾舞堂先會開始諗嘅：喺初階芭蕾舞堂當中，老師正路都會集中確保「學生識做啲舞步」同埋「學生做啲舞步嗰陣能夠保持平衡」先^[107]。

芭蕾舞堂

基本流程

一堂芭蕾舞堂涉及學生喺老師嘅監督之下練習各種嘅芭蕾舞技巧，一般可以分做三大階段：扶把練習、中心同埋行禮（詳情）——扶把練習同中心都屬於某啲特定類型嘅練習，而喺一輪練習過後，芭蕾舞堂會以 cool-down 以及學生向老師行禮作結^[108][109]。

兩個芭蕾舞學生喺扶把側邊熱身，準備上堂——芭蕾舞堂通常會以喺練功扶把側邊做運動起始嘅。 兩個芭蕾舞學生喺扶把側邊熱身，準備上堂——芭蕾舞堂通常會以喺練功扶把側邊做運動起始嘅。

Barre work

扶把練習：顧名思義係指喺扶把（barre）嗰度做嘅練習，通常會喺課堂嘅前半橛進行；扶把練習通常都係做一啲相對簡單嘅舞步，例如係 plié、tendu、rond de jambe、retiré 同 battement 等等^[109]。正常嚟講，緊接喺扶把練習後嘅會係中心練習（下面）。

Center

中心：指喺課室中間做嘅練習；做扶把練習做到咁上下（啲學生身體有返咁上下熱）之後，老師通常就會收起啲扶把（如果啲扶把係可攜式），叫班學生練習喺冇扶把扶住嘅情況下做出舞步。呢個時候，個老師正常都會叫學生行去課室嘅中心嗰度練，費事佢哋撞埋牆——所以芭蕾舞堂嘅呢一部份就叫「中心」^[110]。

Cool-down （大致似粵拼 ku1 daang1）

降溫運動：做完中心運動後成日會做嘅一樣嘢，老師帶領學生做一啲簡單嘅運動（例如係拉筋噉），等學生嘅身體降返溫。做完降溫運動之後，課堂就算係正式結束，傳統上學生跟住會向老師做行禮（睇返）嚟表示謝意^[109]。

常見運動

Croix, en （法文讀音：[ɑ̃ kʁwɑ]）

十字形噉做：芭蕾舞堂上常用嘅一隻字詞，係老師叫學生將同一個舞步做四吓，第一吓向前（devant），第二吓向側（à la seconde），第三吓向後（derrière）而跟住第四吓向側（à la seconde），又或者前後掉轉都得。舉例說明，喺堂上，個老師可能會要班學生做「十字形噉做 tendu」，意思即係叫佢前做一個向前嘅 tendu，再做一個向側嘅 tendu，再做一個向後嘅 tendu，最後再做一個向側嘅 tendu，最後返去原先嘅腳位企定定。十字形噉做主要係用喺芭蕾舞堂當中嘅，用途在於畀啲學生熟習同一個舞步向前、向側同向後嘅做法^[111]。例如下面幅圖噉，係顯示一個學生由第一腳位右腳向三個方向做 tendu 嘅圖解。

Cloche, en （法文讀音：[ɑ̃ klɔʃ]）

好似鐘噉：指一位舞蹈員做一個「本嚟條抬起髀喺前（或者後），由嗰個位置郁，經過第一腳位，再變成抬起髀去咗另一邊」嘅動作——好似一個鐘嘅前後擺動噉。例如係鐘式嘅 tendu 練習噉，學生首先以向前嘅 tendu（tendu devant）起始，跟住條抬起髀慢慢向後掃，變成第一腳位，然後抬起髀繼續向後掃，最後變成向後嘅 tendu（tendu derriére），或者將成個動作前後掉轉做。除咗噉，battement 等嘅舞步都可以鐘式噉做^[112]。

Adagio

慢板（個名係意大利文慢慢嚟噉解）：芭蕾舞堂成日有嘅一部份，指學生慢慢（但要流暢）噉做出某啲舞步，可以係喺扶把練習或者中心練習當中做嘅都得^[109]：無論級別係乜，喺一堂芭蕾舞堂入面，老師通常都會花少少時間叫啲學生一隻手掹住扶把、一路緩慢噉做出某啲特定嘅舞步（扶把練習慢板）或者喺中心嗰度唔靠扶把做慢板（中心慢板）；噉做目的係要個學生首先精確噉掌握好每一個舞步，掌握好（啲擺位冇問題）先至試吓用表演嗰陣會用嘅速度做出舞步；而且慢慢噉做出古典芭蕾舞嗰啲（好多時好講求體力嘅）舞步亦被指有助提升學生嘅平衡力。一個成功掌握到個舞步嘅學生會識得流暢又精確噉做出個舞步，兼且仲會達到穩陣嘅平衡感^[1][113]。

Balançoire（法文讀音：[balɑ̃swaʁ]）

鐘擺：扶把練習當中嘅一種運動，學生重複噉將自己其中一條腿向前向後來回噉做 battement－就好似鐘擺噉樣。同時學生上身會隨住條髀嘅擺動而細幅度噉向前或者向後傾。呢種運動被指有助提升學生髖關節嘅柔軟度，有陣時老師喺堂上會攞呢種運動嚟幫啲學生熱身^[114]。

俄羅斯嘅華加諾娃派芭蕾舞興嗌呢個動作做 passé la jambe 或者 battement passé la jambe ^[115]。

Allegro

快板（個名係意大利文開心噉解）：指一啲又快又充滿能量嘅舞步，可以分好多種，而涉及舞蹈員跳起嘅舞步冚唪唥都屬於快板。喺一堂芭蕾舞堂當中，呢類舞步通常係臨尾聲先至喺中心練嘅，因為啲學生通常都係喺課堂尾聲嗰陣最處於身體熱晒嘅狀態。當學生要練快板嗰時，個老師一般會首先叫學生做細啲（petit）嘅快板，跟住再叫佢哋試吓做一啲幅度大啲嘅快板，最後再叫學生試吓挑戰自己嘅極限，睇吓自己喺跟足音樂嘅情況之下可以跳到幾高^[1][116]。

Repertoire （法文讀音：[ɹɛp.ə.twɑ]）

舞目：指由一齣芭蕾舞劇嗰度抽出嚟嘅一段完整嘅舞段，可以係變奏舞，又可以係伴舞隊團隊跳嘅舞。舞目係芭蕾舞堂嘅常見素材——老師一般都會希望學生能夠唔淨只能夠做好每一個舞步，仲要有能力上台表演，跳出完整嘅舞段；於是喺學生熟習晒啲基本舞步之後，老師就好可能會去搵一段佢覺得班學生夠水平跳嘅舞段嘅影片返嚟，然後喺堂上叫班學生試吓跟住段片入面嘅舞蹈員跳^[117]。

Improvisation

即興跳舞：芭蕾舞堂上一種間中會出現嘅活動，指畀學生即興式噉跳舞：例如老師指定一個起始動作、一個收尾動作同埋一段音樂，學生一定要用個起始動作開頭同用個收尾動作終結，而且仲需要考慮自己段舞步能唔能夠配合段音樂，但除此之外佢哋可以自由噉揀想跳嘅舞步。呢種訓練喺廿世紀同打前嘅芭蕾舞堂當中並唔常見，搞到有人詬病話芭蕾舞訓練唔夠著重培育舞蹈員嘅創造力同埋對排舞嘅了解^[118]。

另一方面，即興有時可以出現喺實際表演當中：真係要上台表演嗰時，有本事嘅芭蕾舞蹈員——通常會係個舞團嘅首席——可能會俾排舞師安排佢哋喺表演中途做即興嘅變奏舞（variation）；噉做一方面可以展示呢啲舞蹈員嘅高超技術，而且亦可以用嚟展示明星舞蹈員嘅個性^[118][119]。

PBT（全名 progressing ballet technique）

漸進芭蕾技巧：喺 2010 年代由澳洲芭蕾舞蹈員兼芭蕾舞老師瑪莉·華頓馬康（Marie Walton-Mahon）開發嘅一套芭蕾舞教學方法。喺最基本嘅情況下，PBT 涉及俾學生瞓平喺地下，並且將雙腿放喺健身波上面做出芭蕾舞舞步，用嚟訓練學生嘅肌肉記憶同核心肌嘅穩定性^[120]。

稱謂詞彙

芭蕾舞相關人員要點稱呼，都有一定嘅學問。

舞者稱謂

一場《胡桃夾子》表演當中糖梅仙子同佢舞伴跳嘅大雙人舞；呢位男舞蹈員就係所謂嘅「騎士」。

喺多數版本嘅《天鵝湖》入面都會有一班舞蹈員扮演小天鵝團隊跳舞，呢啲團隊跳舞而唔會變奏舞嘅舞蹈員就係所謂嘅伴舞隊。

堪薩斯城芭蕾舞團演嘅《天鵝湖》當中嘅一幕；邪惡魔法師羅夫巴特喺王子同公主身後做緊 grand jeté，呢個角色多數係由首席角色藝術家演嘅。

睇埋：芭蕾舞蹈員

芭蕾舞蹈員顧名思義係指負責跳芭蕾舞嘅人。佢哋往往要經過好多年嘅訓練，先至夠資格上台表演。

Ballerina

意大利文「女芭蕾舞蹈員」噉解^[121]。

Prima ballerina

意大利文「首席女芭蕾舞蹈員」噉解^[121]。

Prima ballerina assoluta

可以譯做「絕對一級女芭蕾舞蹈員」；呢個稱號係一個少見嘅頭銜，淨係會加畀絕對最頂尖嘅女芭蕾舞蹈員。截至 2020 年為止，芭蕾舞史上得嗰 13 位舞蹈員成功得到呢個頭銜^[122]。

Ballerino

意大利文「男芭蕾舞蹈員」噉解^[123]。

Primo ballerino

意大利文「首席男芭蕾舞蹈員」噉解^[123]。

Danseuse（法文讀音：[dɑ̃søz]）

法文「女芭蕾舞蹈員」噉解^[124]。

Première danseuse（法文讀音：[pʁəmjɛʁ dɑ̃søz]）

法文「一級女芭蕾舞蹈員」噉解^[125]。

Danseuse en travesti （法文讀音：[dɑ̃søz ɑ̃ tʁa.vɛs.ti]）

女扮男裝嘅芭蕾舞蹈員：喺古典芭蕾舞當中，排舞師編一齣芭蕾舞劇嘅舞段嗰陣，有陣時會想要一段舞有一位男性角色畀身邊嘅舞蹈員抬起，但係男舞蹈員好多時比較重，於是位排舞師就可能會選擇將呢個角色安排畀一位身體輕啲嘅女舞蹈員飾演——要呢位女舞蹈員著男裝上台跳呢個角色^[126]。

Danseur（法文讀音：[dɑ̃sœʁ]）

法文「男芭蕾舞蹈員」噉解^[127]。

Premier danseur（法文讀音：[pʁəmje dɑ̃sœʁ]）

法文「一級男芭蕾舞蹈員」噉解^[125]。

Danseur noble（法文讀音：[dɑ̃sœʁ nɔbl]

字面解係「高貴嘅男芭蕾舞蹈員」噉嘅意思；喺古典芭蕾舞上，呢隻字詞係指舞技極之精湛、專門飾演王子等貴族角色嘅男芭蕾舞蹈員^[127]。

Cavalier

騎士：指一位負責做女主角舞伴、但本身並冇故事角色嘅男舞蹈員。舉個例說明，《胡桃夾子》呢一齣芭蕾舞劇當中嘅糖梅仙子係一位好重要嘅女主角，當佢要跳舞嗰陣，通常都梗要有個男舞蹈員傍住佢、做佢舞伴（例如係跳舞嗰陣幫手舉起佢噉），但呢位男舞蹈員喺《胡桃夾子》個故事當中並冇相應嘅角色。呢類冇故事角色、但舞技上必要嘅男舞蹈員就係所謂嘅「騎士」^[128]。

Corps de ballet （法文讀音：[kɔʁ də balɛ]）

伴舞隊（法文名係芭蕾舞嘅身體噉解）：舞蹈員一種，屬於一個芭蕾舞團當中嘅永久成員。一個芭蕾舞團嘅伴舞隊組成主要舞蹈員嘅骨幹，佢哋通常會一個團隊噉跳舞——唔似得王子同公主等嘅主角噉，會單獨噉跳做觀眾注意力嘅中心。雖然伴舞隊好多時都畀人覺得佢哋冇主角咁樣眼，但係做伴舞隊查實好講求默契，喺舞台上要識得互相配合同步噉做出舞步，係芭蕾舞表演當中不可或缺嘅一部份^[2]。

Coryphée（法文讀音：[kɔʁife]）

伴舞隊長：指伴舞隊嘅領導者，喺某啲門派（尤其係法國派）當中係一個略高過伴舞隊嘅舞蹈員等級。伴舞隊長負責控制伴舞隊嘅節奏；喺表演嗰陣，伴舞隊長要企喺其他伴舞隊成員前面，畀其他伴舞隊成員睇住佢嘅動作嚟跳舞。伴舞隊長通常唔會生得太高（費事遮住企喺佢後面嘅舞蹈員），亦都唔一定係伴舞隊當中舞技最好嗰個，但就要好識按照音樂控制自己跳舞嘅節奏，如果佢哋跟唔到節奏，就會搞亂晒成隊伴舞隊嘅舞^[2][129]。

Étoile （法文讀音：[e.twal]）

明星（法文名係「星星」噉解）：指成個芭蕾舞團入便最有料到嗰位舞蹈員^[130][131]。

Virtuoso

名家：指一位舞技好了得嘅舞蹈員^[132]。

舞者等級

古巴出世嘅名芭蕾舞蹈員卡洛斯·阿哥斯達嘅相，2019 年影嘅；佢曾經係古巴國家芭蕾舞團嘅首席舞蹈員。

英國皇家舞蹈學院將專業芭蕾舞蹈員分做以下幾個等級^[133]：

Artist

藝術家：最初階嘅舞蹈員，通常啲芭蕾舞學生啱啱畢咗業都係喺呢個級開始跳嘅。藝術家級嘅舞蹈員多數會俾人分派做伴舞隊。

First artist

一級藝術家：高「藝術家」一級嘅舞蹈員，多數會繼續做伴舞隊嘅工作，但因為佢哋舞技高過藝術家級嘅舞蹈員，佢哋比較有機會擔當伴舞隊當中一啲樣眼啲嘅角色，例如係《天鵝湖》入面嘅小天鵝噉。如果一位一級藝術家舞技夠好，個舞團諗住升佢職嘅話，佢有機會做變奏舞（variation）。

Soloist

獨舞員：再高一級嘅舞蹈員，顧名思義係指一啲正式開始可以做變奏舞嘅舞蹈員。喺一齣芭蕾舞劇當中，獨舞員主要係負責飾演一啲有名、有機會做變奏舞嘅配角，例如係《睡公主》當中嗰啲仙子噉。一個芭蕾舞團一般會有 15 到 20 位獨舞員。

First soloist

一級獨舞員：再高一級嘅舞蹈員，仲係負責飾演一啲有名、有機會做變奏舞嘅配角，但會擔當呢類配角當中比較樣眼嗰啲。一級獨舞員會有機會升做首席舞蹈員，而當個首席舞蹈員因為受咗傷或者點而跳唔到舞嗰陣，通常就會由一級獨舞員負責頂佢個位。

Principal character artist

首席角色藝術家：高級嘅舞蹈員，會喺芭蕾舞劇當中飾演重要嘅角色，但唔會做太多變奏舞。舉個例說明，《天鵝湖》入面嗰個角色邪惡魔法師羅夫巴特多數會由首席角色藝術家飾演：羅夫巴特係《天鵝湖》嘅大奸角，係一個不可或缺嘅角色，但係因為《天鵝湖》始終係以王子同公主做主角，所以羅夫巴特做變奏舞嘅機會通常都冇王子同公主咁多。首席角色藝術家多數係年紀比較大嘅前首席舞蹈員——體力唔夠好，做唔到要係噉勁跳變奏舞嘅主角，於是就憑住精湛嘅技術同演技擔當重要、但唔係主角嘅角色。

Principal

首席舞蹈員：一個芭蕾舞團入便最高級嘅專業舞蹈員，會喺芭蕾舞劇當中飾演主角，並且做大量嘅變奏舞，例如係《天鵝湖》當中嘅王子同公主或者《胡桃夾子》當中嘅女主角卡拉娜同合桃鉗... 等等多數會由個芭蕾舞團嘅首席嚟擔任。首席舞蹈員往往會係成個芭蕾舞團當中最引人注目嘅舞蹈員，而當一個芭蕾舞團為佢哋要演嘅芭蕾舞劇做宣傳嗰陣，好多時都會以「佢哋嘅首席舞蹈員會親自上台，表演精湛舞技」嚟做賣點。

呢個 RAD 舞蹈員等級，基本上等同於法國派嘅明星舞蹈員（Danseur Étoile / danseuse Étoile）或者意大利派嘅一級舞蹈員（Primo ballerino / prima ballerina）^[131]。

舞團人員

睇埋：芭蕾舞團

除咗舞蹈員之外，一場芭蕾舞表演仲涉及好多人員。

Ballet company

芭蕾舞團：指一班集合埋一齊合力搞芭蕾舞表演嘅人員，包括舞蹈員、排舞師以及各種嘅支援及管理人員呀噉。通常一個芭蕾舞團會代表佢哋所在嘅城市、省或者國家，例如係香港芭蕾舞團（代表香港）、廣州芭蕾舞團（代表廣州，某程度上代表晒全廣東）同埋中央芭蕾舞團（代表成個中國，總部喺北京）... 等等^[1]。

Ballet master / ballet mistress

芭蕾舞大師：芭蕾舞團當中嘅一個職位，係舞團藝術人員嘅一部份。芭蕾舞大師主要職責係指導舞團入面嘅舞蹈員，例如係日日朝頭早帶領成個舞團嘅舞蹈員綵排當日要跳嘅舞，又或者係教舞蹈員微調自己嘅舞姿... 呀噉，而當一個舞團要表演一齣芭蕾舞劇嗰時，佢哋啲芭蕾舞大師會係首先開始練要跳嘅舞嘅，跟住呢班芭蕾舞大師就會負責教啲舞蹈員跳，並且監督住成個綵排過程。芭蕾舞大師好多時都係退咗休嘅舞蹈員——年紀大咗、體力唔夠好、無力親自上台表演，但係就憑住佢哋豐富嘅經驗指導舞團入面嗰啲後生啲、體力好啲、但經驗冇咁豐富嘅舞蹈員^[134]。

Répétiteur（法文讀音：[ʁe.pe.ti.tœʁ]）

綵排老師：傳統上淨係負責帶領綵排嘅人員；到咗廿世紀中開始，帶領綵排呢家嘢通常都由芭蕾舞大師一手搞埋^[2]。

Régisseur（法文讀音：[ʁe.ʒi.sœʁ]）

舞台總監：喺個芭蕾舞團當中負責管舞台事務同綵排嘅管理人員。有陣時有啲芭蕾舞團唔會有舞台總監，而係靠個舞團嘅芭蕾舞大師處理埋呢啲事務^[135]。

Choreographer

排舞師：負責編寫舞段嘅高級藝術人員。當一個芭蕾舞團要表演一齣芭蕾舞劇嗰時，佢哋個排舞師會負責用舞譜編寫出舞蹈員要跳嘅舞段。喺芭蕾舞當中，呢啲舞段一般都係用古典舞步拼砌出嚟嘅，但係都可以好千變萬化：一個舞段閒閒哋由幾廿個舞步組成，所以可以有好多可能嘅組合；就算係同一段舞步組合，配合唔同音樂或者角色嚟跳都會有唔同嘅藝術效果；而且就算係古典芭蕾舞表演，排舞師一般都有權加入少量嘅非古典舞步。因為呢啲緣故，齣齣芭蕾舞劇嘅排舞都唔一樣，令到排舞成為一個專化嘅職位。有唔少舞蹈員年紀大咗之後都會改行做排舞^[136]。

一張舞譜 一張舞譜

排舞詞彙

一次《合桃鉗》表演當中嘅男女主角大雙人舞

睇埋：排舞、芭蕾舞曲同音樂術語

舞段（法文同英文：pas，法文讀音：[pɑ]，個法文讀音近似粵拼 paa1）係指一段舞步。喺古典芭蕾舞當中，一段 pas 係由古典舞步以某啲方式組合而成嘅^[137]。

Ballet(s)

喺英文同法文等嘅歐洲語言入便，Ballet 呢隻字詞通常指芭蕾舞呢種舞蹈本身，但係當呢個字做可數名詞嗰陣，通常係指緊一齣芭蕾舞劇。一齣芭蕾舞劇會有若干個舞段^[138]。

Grand pas （法文讀音：[ɡʁɑ̃ pɑ]）

大舞段：指一場芭蕾舞表演當中專門編嚟畀某一班舞蹈員（首席又得、伴舞隊又得）展示自己舞技嘅大型舞段，一般都會係一場芭蕾舞表演當中最引人注目嗰一個部份。一場大舞段會以起曲（entreé；法文讀音：[ɑ̃tʁe]）做起始，及後有場大慢板（grand adage），而最後以終曲（coda；意大利文讀音：[ˈkoːda]）作結。喺大慢板同終曲之間，排舞師有陣時會加插一截由伴舞隊所跳嘅舞段，又或者係一截由首席或者半獨舞員所跳嘅變奏舞，再唔係兩樣都有^[137]。大舞段可以分做好幾種，包括咗^[1][2][137]：

• 大行動舞段（grand pas d'action）係指一段表達齣芭蕾舞劇嘅故仔嘅大舞段。
• 經典大舞段（grand pas classique）係指一段同故仔唔啦更、編嚟淨係為咗俾舞蹈員展示舞技嘅大舞段。
• 大雙人舞（grand pas de deux）係指俾一齣芭蕾舞劇當中嘅男女主角兩個人一齊跳嘅大舞段，通常帶有浪漫嘅氣氛。
• 大三人舞（grand pas de trois）或者大四人舞（grand pas de quatre）等（分別）係指由三個角色同四個角色合力跳嘅大舞段，喺某啲芭蕾舞劇當中因為劇情需要而使用，例如係個故仔涉及咗三角戀嘅《仲夏夜之夢》入面，就好多時會有涉及喺三角戀入面嗰三個人一齊跳嘅大三人舞。
• 大終曲（grand coda）係指規模零舍大或者排舞零舍複雜嘅終曲。
• 多人終曲（coda générale / grand coda générale）係指參與嘅舞蹈員人數多嘅終曲。

Variation

變奏舞：指一位芭蕾舞蹈員一個人獨力噉跳一場舞。啲人傾一場芭蕾舞表演嗰陣成日會用呢個字，用「某個角色變奏舞」嚟指嗰一場表演當中某一段涉及嗰個角色自己一個人跳嘅舞，例如喺《睡公主》呢場芭蕾舞劇當中，就會有王子變奏舞（prince variation）同埋公主變奏舞（princess variation）等嘅變奏舞^[1][2]。

喺一場表演當中，當一位芭蕾舞蹈員做變奏舞嗰時，其他舞蹈員（睇伴舞隊）通常會行埋一邊，等佢可以成為注意力嘅中心。對於一場芭蕾舞表演嚟講，變奏舞嘅功用包括咗幫手令觀眾嘅注意力集中喺王子同公主等嘅主角身上，而且做得主角嘅，通常都表示佢係舞團當中最有本事嘅舞蹈員（首席），所以變奏舞嘅功用仲可以係用嚟俾最勁嗰啲舞蹈員展示自己嘅舞技^[1][2]。

Divertissement（法文讀音：[di.vɛʁ.tis.mɑ̃]）

插舞（法文名大致係指賞心悅目嘅分心噉解）：喺古典芭蕾舞劇當中，排舞師好多時會加插一啲短嘅舞段俾舞蹈員展示舞技，呢啲短嘅舞段通常對個故仔嚟講無關痛癢，但係就可以用嚟做大舞段嘅「頭盤」，例如《胡桃夾子》同《天鵝湖》等嘅芭蕾舞劇噉，呢啲芭蕾舞劇嘅故仔當中都有情節講到舞會，所以排舞師可以喺呢啲情節當中加返一兩段短嘅舞段俾一啲配角舞蹈員跳，嚟作為（由男女主角跳嘅）大舞段嘅前奏。冇咗插舞嘅話，好多芭蕾舞劇都會短一大截^[139]。

Tableau（法文讀音：[tæ.bləʊ]）

舞版（法文名「用嚟畫畫嘅表面」噉解）：指緊舞台上一幅「由一眾舞蹈員組成嘅畫面」。無論有冇故仔，一齣芭蕾舞劇會有若干幕，而當一幕開始嗰陣，排舞師多數會希望淨係用一個畫面嚟奠定嗰一幕嘅氣氛。一種常用嘅排舞做法係噉嘅：排舞師會叫嗰一幕出場嘅舞蹈員喺舞台簾打開之前，以特定嘅姿勢企定定；等舞台簾打開咗，觀眾會喺嗰一剎那睇到班舞蹈員企定定所形成嘅畫面，而跟住一眾舞蹈員就會由嗰個畫面嘅姿勢做起始，開始跳舞；有陣時喺一幕要終結嗰陣，排舞師又想用一個畫面總結嗰一幕，所以佢個排舞就會要班舞蹈員喺嗰一幕嘅最後一刻形成特定嘅姿勢，並且企定定，再喺啲舞蹈員冚唪唥以舞版姿勢企定定嘅狀態之下，閂埋舞台簾^[140]。

舉個例說明，《天鵝湖》個故仔第一幕講王子開舞會慶祝佢嘅生日，而《天鵝湖》排舞嘅一種常用手法係噉嘅：排舞師會安排若干對伴舞隊成員喺舞台上，每對一男一女，每個都以準備開始同自己舞伴跳舞嘅姿勢企定定唔郁，跟手再喺呢個狀態之下叫啲後台人員打開舞台簾，於是喺舞台簾打開嗰幾秒鐘之間，觀眾會見到「一班男男女女準備開始同舞伴跳舞」嘅定格畫面（舞版），理解到「開緊舞會」嘅情節，然後班舞蹈員就會乘勢由舞版嘅姿勢開始跳舞^[140]。

Finale（英文讀音：[fɪˈnɑːli]）

結局：指一場芭蕾舞劇嘅結尾。喺古典芭蕾舞當中，一齣芭蕾舞劇實會有故仔，而故仔就梗要有結局，通常一齣芭蕾舞劇最後嗰段 pas 就要負責令氣氛去到高潮，再總括成齣劇個故仔，等齣芭蕾舞劇可以完滿噉落幕——呢段 pas 就係芭蕾舞上所講嘅結局。結局嘅 pas 多數會「好有能量」（多大動作同埋高難度舞步），配樂會有戲劇性，務求令到觀眾嘅情緒去到頂峰狀態^[141]。

Bravura

氣勢舞：呢隻字詞源自西洋古典樂當中嘅詞 bravura。Bravura 大致上指「用嚟曬一位表演者嘅技術嘅表演」噉嘅意思^[142]，而喺芭蕾舞上，呢隻字詞多數係用嚟形容一啲排舞上好大膽、要求高技術嘅舞段——呢啲舞段好多時編嚟就係為咗要曬舞蹈員嘅舞技嘅^[143]。

舞劇類型

睇埋：古典芭蕾舞

Narrative ballet

敘事芭蕾舞：指有故仔嘅芭蕾舞劇。呢類芭蕾舞劇一般做法係將個齣劇分做若干幕，每幕代表個故仔嘅其中一段情節；喺每一幕當中，舞蹈員會著住特定嘅服裝喺一個有佈景嘅舞台上面跳舞，用舞姿表達所飾演嘅角色。好似係《天鵝湖》、《胡桃夾子》同埋《睡公主》等嘅經典舞劇，都係敘事芭蕾舞^[144]。

Ballet blanc

白色芭蕾舞（blanc 係法文白色噉解）：一種常見於浪漫時期嘅芭蕾舞美學，女舞蹈員傾向會著住白色芭蕾舞裙跳舞，例如《風仙女》或者《芝莎》等嘅浪漫芭蕾舞劇名作當中都會見到白色芭蕾舞^[145]。

Abstract ballet

抽象芭蕾舞：指冇故仔嘅芭蕾舞劇。呢類芭蕾舞劇通常注重用芭蕾舞嘅動作表達某啲抽象概念或者情感。抽象芭蕾舞係喺廿世紀中先至興起嘅，出名嘅作品有《珠寶》呢齣首演於 1967 年嘅芭蕾舞劇^[146]。

2014 年一場《風仙女》表演嘅一幕雙人舞； 就連個男舞蹈員身上都有好多白色。 2014 年一場《風仙女》表演嘅一幕雙人舞； 就連個男舞蹈員身上都有好多白色。

拉雜詞彙

以下係拉雜類型嘅芭蕾舞相關詞彙。

French numerals

法文數字：啲人討論芭蕾舞相關嘅嘢嗰陣，佢哋好多時都需要掕一個數字落去某一個行話詞彙嗰度，例如大雙人舞（grand pas de deux）係指由兩個舞蹈員跳嘅大舞段，大三人舞（grand pas de trois）係指由三個舞蹈員跳嘅大舞段... 等等。而因為現有嘅芭蕾舞技巧同概念多數都係源自文藝復興後嘅法國嘅，所以傳統上芭蕾舞溝通用嘅數字，多數都會係用返法文入便嘅數詞。以下係法文 2 至 8 嘅講法^[147]：

• Deux：2
• Trois：3
• Quatre：4
• Cinq：5
• Six：6
• Sept：7
• Huit：8

Recital

小型音樂會：喺芭蕾舞上係指一場由一班人數少嘅舞蹈員（多數唔會係一個芭蕾舞團）跳嘅小型表演。喺實際應用上，小型音樂會通常都係由芭蕾舞學校搞嚟畀啲學生做表演嘅，用意在於畀學生熟習吓喺台上表演同團隊跳舞，而且如果跳小型音樂會嗰班學生係細路嘅話，小型音樂會亦都幫到手向家長展示學生嘅學習成果^[148]。

Music theory

音樂理論：泛指對音樂嘅理論性質研究。樂理上嘅思考會分析聲嘅性質（節奏同音階呀噉），以及係呢啲性質點樣影響一首音樂「好唔好聽」。有唔少跳芭蕾舞嘅人都會學些少樂理，尤其係有關節奏方面嘅概念，用意在於想要理解點樣分析一首音樂，以及點樣用自己嘅動作配合音樂^[149]。

Balletomane

芭蕾舞迷：指一個熱愛芭蕾舞嘅人。呢隻字詞源自 1930 年，係 maniya（俄羅斯文狂熱噉解）黐落去 ballet 呢隻字詞而成嘅^[150][151]。

睇埋

• 芭蕾舞
• 巴洛克舞蹈
• 舞蹈
• 節奏
• 鋼琴

參考

• Beaumont, Cyril W.; Idzikowski, Stanislas (1975) [1922]. A Manual of the Theory and Practice of Classical Theatrical Dancing (Méthode Cecchetti). New York: Dover Publications. ISBN 0-486-23223-9.
• Greskovic, R. (2006). Ballet 101: A Complete Guide to Learning and Loving the Ballet. Limelight. ISBN 0-87910-325-6.
• Kersley, Leo; Sinclair, Janet (1981) [1977]. A Dictionary of Ballet Terms (3rd revised ed.). New York: Da Capo Press. ISBN 0-306-80094-2.
• Minden, Eliza Gaynor (2005). The Ballet Companion: A Dancer's Guide to the Technique, Traditions, and Joys of Ballet. New York: Simon and Schuster. ISBN 0-7432-6407-X.
• Ryman, Rhonda S. (1998). Dictionary of Classical Ballet Terminology (2nd ed.). London (Hightstown, NJ): Royal Academy of Dancing (distributed in the U.S.A. and Canada by Princeton Book). ISBN 0-9524848-0-3.
• Glossary of Dance Terms. New York: New York City Ballet. 2010.
• Beginner's Guide to Ballet (PDF).

註釋

1. 喺廿一世紀前，播音樂嘅架生好多時會係一座鋼琴，而到咗廿一世紀初就比較多會係老師部智能手機。
2. 要抵抗上半身向前傾嘅衝動。
3. 喺俄羅斯派當中，frappé 隻腳會一下過伸直，但唔會掂到地板。
4. 即係話佢對腳本來處於第三或者第五腳位。

引咗

1. Hammond, S. N. (2000). Ballet basics. McGraw-Hill Humanities, Social Sciences & World Languages.
2. Grant, Gail (1982) [1950]. Technical Manual and Dictionary of Classical Ballet (3rd ed.). New York: Dover Publications. ISBN 0-486-21843-0.
3. Anderson, Jack (1992). Ballet & Modern Dance: A Concise History (2nd ed.). Princeton, NJ: Princeton Book Company, Publishers.
4. Barre. thefreedictionary.com. Farlex.
5. "Dance School Equipment". www.opusbellingham.com/. Opus Performing Arts.
6. Are tights really necessary Down Under?. Dance Australia.
7. Adult Ballet. ThoughtCo.
8. Debra Craine and Judith Mackrell, "Tutu," in The Oxford Dictionary of Dance (Oxford University Press, 2000).
9. Leotard 互聯網檔案館嘅歸檔，歸檔日期2017年9月22號，.. Ballethub.
10. "How to Wear a Dance Belt 互聯網檔案館嘅歸檔，歸檔日期2019年5月1號，.". Dance Jox.
11. Reinhardt, Angela (2008) [2008]. Pointe shoes, tips and tricks (1st ed.). Dance Books Ltd.
12. Ballet technique 互聯網檔案館嘅歸檔，歸檔日期2019年6月22號，.. Ballethub.
13. Placement 互聯網檔案館嘅歸檔，歸檔日期2019年6月29號，.. Ballethub.
14. Paolacci, Claire (2004). "Serge Lifar and the Paris Opera during World War II". Journal of the Oxford University History Society: 8.
15. Janice Barringer; Sarah Schlesinger (2012). The Pointe Book. Princeton Book Company.
16. Relevé 互聯網檔案館嘅歸檔，歸檔日期2019年5月1號，.. Ballethub.
17. Sus-sous 互聯網檔案館嘅歸檔，歸檔日期2019年5月1號，.. Ballethub.
18. Détourné 互聯網檔案館嘅歸檔，歸檔日期2017年9月22號，.. Ballethub.
19. Détourné, demi 互聯網檔案館嘅歸檔，歸檔日期2017年9月22號，.. Ballethub.
20. Positions of the Arms in Ballet 互聯網檔案館嘅歸檔，歸檔日期2019年4月17號，.. BalletHub.
21. Rond de Bras 互聯網檔案館嘅歸檔，歸檔日期2019年6月3號，.. Ballethub.
22. Port de bras 互聯網檔案館嘅歸檔，歸檔日期2019年5月1號，.. Ballethub.
23. Grieg, Valerie (1994). Inside Ballet Technique: separating anatomical fact from fiction in the ballet class. Hightstown, NJ: Princeton Book Publishers, Company.
24. Plié 互聯網檔案館嘅歸檔，歸檔日期2019年3月26號，.. Ballethub.
25. Cambré 互聯網檔案館嘅歸檔，歸檔日期2019年5月1號，.. Ballethub.
26. Supporting Leg 互聯網檔案館嘅歸檔，歸檔日期2021年5月25號，.. BalletHub.
27. A Look at Tendu for Beginners in Ballet 互聯網檔案館嘅歸檔，歸檔日期2019年5月1號，.. Ballethub.
28. Cuisse 互聯網檔案館嘅歸檔，歸檔日期2019年6月22號，.. Ballethub.
29. Sickling 互聯網檔案館嘅歸檔，歸檔日期2019年5月28號，.. Ballethub.
30. Sickling in Ballet: What, Why and How to Avoid It 互聯網檔案館嘅歸檔，歸檔日期2019年5月28號，.. Ballethub.
31. Dégagé 互聯網檔案館嘅歸檔，歸檔日期2019年5月14號，.. Ballethub.
32. Frappé 互聯網檔案館嘅歸檔，歸檔日期2019年6月29號，.. Ballethub.
33. Retiré 互聯網檔案館嘅歸檔，歸檔日期2019年5月1號，.. Ballethub.
34. Cou-de-pied 互聯網檔案館嘅歸檔，歸檔日期2019年5月1號，.. Ballethub.
35. Pas de cheval 互聯網檔案館嘅歸檔，歸檔日期2019年7月6號，.. Ballethub.
36. Ballet Terms Dictionary 互聯網檔案館嘅歸檔，歸檔日期2019年3月26號，.. Ballethub.
37. Seconde, à la 互聯網檔案館嘅歸檔，歸檔日期2017年9月22號，.. BalletHub.
38. Piqué 互聯網檔案館嘅歸檔，歸檔日期2019年6月24號，.. Ballethub.
39. Fermé 互聯網檔案館嘅歸檔，歸檔日期2019年7月1號，.. Ballethub.
40. Tournant, en. Glosario Ballet.
41. Manèges 互聯網檔案館嘅歸檔，歸檔日期2017年9月22號，.. Ballethub.
42. Reverence in Ballet 互聯網檔案館嘅歸檔，歸檔日期2019年4月23號，.. ThoughtCo.
43. Battement 互聯網檔案館嘅歸檔，歸檔日期2019年5月1號，.. Ballethub.
44. Rond de jambe 互聯網檔案館嘅歸檔，歸檔日期2019年5月1號，.. Ballethub.
45. Fondu 互聯網檔案館嘅歸檔，歸檔日期2019年5月6號，.. Ballethub.
46. Développé 互聯網檔案館嘅歸檔，歸檔日期2019年5月1號，.. Ballethub.
47. Enveloppé 互聯網檔案館嘅歸檔，歸檔日期2019年5月2號，.. Ballethub.
48. Passé 互聯網檔案館嘅歸檔，歸檔日期2019年5月1號，.. Ballethub.
49. Classical walk 互聯網檔案館嘅歸檔，歸檔日期2019年4月15號，.. Ballethub.
50. Croisé 互聯網檔案館嘅歸檔，歸檔日期2019年6月22號，.. Ballethub.
51. Effacé 互聯網檔案館嘅歸檔，歸檔日期2019年6月22號，.. Ballethub.
52. Ouvert 互聯網檔案館嘅歸檔，歸檔日期2017年9月22號，.. Ballethub.
53. Ballet Positions Of The Body.
54. Quatrième 互聯網檔案館嘅歸檔，歸檔日期2017年9月22號，.. BalletHub.
55. Écarté 互聯網檔案館嘅歸檔，歸檔日期2019年6月22號，.. BalletHub.
56. Épaulment 互聯網檔案館嘅歸檔，歸檔日期2019年7月1號，.. Ballethub.
57. The Five Families of Jumps.
58. Assemblé 互聯網檔案館嘅歸檔，歸檔日期2019年5月18號，.. BalletHub.
59. Pas de chat 互聯網檔案館嘅歸檔，歸檔日期2019年3月26號，.. Ballethub.
60. Sissonne 互聯網檔案館嘅歸檔，歸檔日期2019年5月1號，.. Ballethub.
61. Failli 互聯網檔案館嘅歸檔，歸檔日期2019年7月4號，.. BalletHub.
62. Brisé 互聯網檔案館嘅歸檔，歸檔日期2019年5月1號，.. Ballethub.
63. Entrechat 互聯網檔案館嘅歸檔，歸檔日期2019年6月26號，.. Ballethub.
64. Retombe 互聯網檔案館嘅歸檔，歸檔日期2019年7月5號，.. Ballethub.
65. Chaînés 互聯網檔案館嘅歸檔，歸檔日期2019年5月1號，.. Ballethub.
66. Piqué tour 互聯網檔案館嘅歸檔，歸檔日期2019年4月3號，.. Ballethub.
67. Dance Spotting: Technique Not To Get Dizzy 互聯網檔案館嘅歸檔，歸檔日期2019年4月18號，..
68. Balancé 互聯網檔案館嘅歸檔，歸檔日期2019年5月1號，.. BalletHub.
69. Chassé 互聯網檔案館嘅歸檔，歸檔日期2017年9月22號，.. BalletHub.
70. Chassé en tournant 互聯網檔案館嘅歸檔，歸檔日期2019年5月1號，.. BalletHub.
71. Pas de Basque 互聯網檔案館嘅歸檔，歸檔日期2019年5月1號，.. Ballethub.
72. Coupé 互聯網檔案館嘅歸檔，歸檔日期2019年5月1號，.. Ballethub.
73. Échappé 互聯網檔案館嘅歸檔，歸檔日期2017年9月22號，.. Ballethub.
74. Glissade 互聯網檔案館嘅歸檔，歸檔日期2019年5月18號，.. Ballethub.
75. Balloné 互聯網檔案館嘅歸檔，歸檔日期2019年6月21號，.. BalletHub.
76. Polonaise 互聯網檔案館嘅歸檔，歸檔日期2019年7月4號，.. Ballethub.
77. Pas de valse 互聯網檔案館嘅歸檔，歸檔日期2019年7月7號，.. Ballethub.
78. Compound step 互聯網檔案館嘅歸檔，歸檔日期2019年5月1號，.. Ballethub.
79. Préparation 互聯網檔案館嘅歸檔，歸檔日期2019年6月29號，.. Ballethub.
80. The Perils of Partnering. Dance Australia.
81. THE ART OF LIFTING 互聯網檔案館嘅歸檔，歸檔日期2020年3月29號，.. The Australian Ballet.
82. Alderson, J., Hopper, L., Elliott, B., & Ackland, T. (2009). Risk factors for lower back injury in male dancers performing ballet lifts. Journal of Dance Medicine & Science, 13(3), 83-89.
83. Oxford English Dictionary, split, n. "4 b. the splits, in acrobatics or stage-dancing. Also in sing."
84. Batterie 互聯網檔案館嘅歸檔，歸檔日期2017年9月22號，.. Ballethub.
85. Arabesque 互聯網檔案館嘅歸檔，歸檔日期2017年9月22號，.. BalletHub.
86. Attitude 互聯網檔案館嘅歸檔，歸檔日期2017年9月22號，.. BalletHub.
87. Fish dive 互聯網檔案館嘅歸檔，歸檔日期2017年9月22號，.. BalletHub.
88. How To: A Tour en l'Air. DanceTeacher.
89. Cabriole 互聯網檔案館嘅歸檔，歸檔日期2019年5月1號，.. BalletHub.
90. Jeté 互聯網檔案館嘅歸檔，歸檔日期2019年5月1號，.. BalletHub.
91. Lepelley, M. C., Thullier, F., Koral, J., & Lestienne, F. G. (2006). Muscle coordination in complex movements during Jeté in skilled ballet dancers. Experimental brain research, 175(2), 321-331.
92. Hackney, J., Brummel, S., Jungblut, K., & Edge, C. (2011). The effect of sprung (suspended) floors on leg stiffness during grand jeté landings in ballet. Journal of Dance Medicine & Science, 15(3), 128-133.
93. Coupé-jeté en tournant 互聯網檔案館嘅歸檔，歸檔日期2019年5月3號，.. Ballethub.
94. Rivoltade 互聯網檔案館嘅歸檔，歸檔日期2019年7月6號，.. Ballethub.
95. Lin, C. W., Chen, S. J., Su, F. C., Wu, H. W., & Lin, C. F. (2014). Differences of ballet turns (pirouette) performance between experienced and novice ballet dancers. Research quarterly for exercise and sport, 85(3), 330-340.
96. Denardi, R. A., & Corrêa, U. C. (2013). Effects of instructional focus on learning a classical ballet movement, the pirouette. Journal of Dance Medicine & Science, 17(1), 18-23.
97. Ballet: Tips for Pirouettes. ThoughtCo.
98. Ballet 101: Names of the Most Popular Ballet Turns 互聯網檔案館嘅歸檔，歸檔日期2019年7月27號，..
99. Wiley, Roland John (1997). The Life and Ballets of Lev Ivanov. New York: Oxford University press.
100. Renversé 互聯網檔案館嘅歸檔，歸檔日期2019年7月7號，.. Ballethub.
101. Promenade 互聯網檔案館嘅歸檔，歸檔日期2019年6月25號，.. BalletHub.
102. Finger Turns 互聯網檔案館嘅歸檔，歸檔日期2019年6月21號，.. Ballethub.
103. Bernard Taper (1996) "Balanchine: A Biography".
104. Agrippina Vaganova (1969) "Basic Principles of Classical Ballet: Russian Ballet Technique".
105. Greskovic, Robert (2005). Ballet 101: A Complete Guide to Learning and Loving the Ballet. Hal Leonard Corporation.
106. Extension 互聯網檔案館嘅歸檔，歸檔日期2019年6月30號，.. Ballethub.
107. Line 互聯網檔案館嘅歸檔，歸檔日期2019年5月24號，.. Ballethub.
108. Ballet Class Structure. JOY OF MOVEMENT.
109. LEARN THE STRUCTURE AND DISTINCT PARTS OF BALLET CLASS.
110. Center 互聯網檔案館嘅歸檔，歸檔日期2019年5月1號，.. Ballethub.
111. Croix, en 互聯網檔案館嘅歸檔，歸檔日期2019年6月20號，.. Ballethub.
112. Cloche, en 互聯網檔案館嘅歸檔，歸檔日期2017年9月22號，.. Ballethub.
113. Adagio 互聯網檔案館嘅歸檔，歸檔日期2019年5月1號，.. BalletHub.
114. Balançoire 互聯網檔案館嘅歸檔，歸檔日期2019年5月1號，.. BalletHub.
115. Barker/Kostrovitskaya: 101 Lessons in Classical Ballet - 1977.
116. Allegro 互聯網檔案館嘅歸檔，歸檔日期2017年9月22號，.. BalletHub.
117. Specification for Discovering Repertoire examinations and class awards 互聯網檔案館嘅歸檔，歸檔日期2020年1月11號，.. Royal Academy of Dance.
118. 10 REASONS IMPROVISATION SHOULD BE AN INTEGRAL PART OF ALL VOCATIONAL BALLET TRAINING.
119. Carter, C. L. (2000). Improvisation in dance. The Journal of Aesthetics and Art Criticism, 58(2), 181-190.
120. Walton-Mahon, Marie, (Instructor.) (2014), Progressing ballet technique, [Sydney, New South Wales] Progressing ballet technique.
121. Ballerina 互聯網檔案館嘅歸檔，歸檔日期2019年5月1號，.. Ballethub.
122. "Ballet Company". Teatro alla Scala. Ballet Company, citing appointment as prima ballerina assoluta of La Scala in 1992.
123. Ballerino 互聯網檔案館嘅歸檔，歸檔日期2019年5月1號，.. Ballethub.
124. Danseuse. The Free Dictionary.
125. Danseuses et danseurs étoile.
126. Garafola, L. (1985). The travesty dancer in nineteenth-century ballet. Dance Research Journal, 17(2), 35-40.
127. Danseur 互聯網檔案館嘅歸檔，歸檔日期2019年5月1號，.. Ballethub.
128. Cavalier 互聯網檔案館嘅歸檔，歸檔日期2019年4月13號，.. Ballethub.
129. Coryphée 互聯網檔案館嘅歸檔，歸檔日期2019年4月18號，.. Ballethub.
130. Boisseau, Rosita (26 September 2017). "Danse: les adieux d'une étoile sur une rivière de joyaux". Le Monde.
131. Boisseau, Rosita (29 December 2016). "Germain Louvet élevé au rang de danseur étoile". Le Monde.
132. The male virtuosos who prove that ballet isn't just for ballerinas. The Royal Opera House.
133. Koegler, Horst (1982). Concise Oxford Dictionary of Ballet (2nd ed.). Oxford University Press.
134. Ballet Master / Ballet Mistress 互聯網檔案館嘅歸檔，歸檔日期2019年4月10號，.. Ballethub.
135. Régisseur 互聯網檔案館嘅歸檔，歸檔日期2019年5月11號，.. Ballethub.
136. Choreographer 互聯網檔案館嘅歸檔，歸檔日期2019年4月17號，.. Ballethub.
137. Pas 互聯網檔案館嘅歸檔，歸檔日期2019年5月1號，.. Ballethub.
138. The Most Famous Classical Ballets of All Time 互聯網檔案館嘅歸檔，歸檔日期2019年4月16號，.. ThoughtCo.
139. Divertissement 互聯網檔案館嘅歸檔，歸檔日期2019年5月2號，.. Ballethub.
140. Tableau 互聯網檔案館嘅歸檔，歸檔日期2019年5月4號，.. Ballethub.
141. Finale 互聯網檔案館嘅歸檔，歸檔日期2019年6月25號，.. Ballethub.
142. John Alexander Fuller-Maitland, A dictionary of music and musicians (A.D. 1450-1889). p. 271-272
143. The Cambridge Companion to Ballet, p. 151.
144. Erken, E. A. (2012). Narrative Ballet as Multimedial Art: John Neumeier's The Seagull. 19th-Century Music, 36(2), 159-171.
145. Ballet Blanc 互聯網檔案館嘅歸檔，歸檔日期2019年5月1號，.. Ballethub.
146. Abstract Ballet 互聯網檔案館嘅歸檔，歸檔日期2019年4月3號，.. Ballethub.
147. How to Count to 100 in French.
148. 5 Benefits of Dance Recital Participation 互聯網檔案館嘅歸檔，歸檔日期2019年8月1號，..
149. Aldrich, E. (1996). Ear Training for the Body: A Dancer's Guide to Music.
150. Balletomane 互聯網檔案館嘅歸檔，歸檔日期2019年5月1號，.. Ballethub.
151. Balletomane. The New Yorker.

拎

• （英文） 芭蕾舞詞彙同生字 at Esmeree.
• （英文） 法文芭蕾舞詞彙發音，連帶插圖
• （英文） Ballet Review，一本芭蕾舞雜誌
• （英文） Ballet Hub，一個芭蕾舞資訊網站
• （英文） The Royal Academy of Dance，英國皇家舞蹈學院官網
• （香港繁體） 香港芭蕾舞團官網