睡公主 (芭蕾舞劇)
From Wikipedia, the free encyclopedia
《睡公主》（粵拼：seoi6 gung1 zyu2）係一齣古典芭蕾舞劇，有一場序幕加三幕。呢齣芭蕾舞劇由著名俄羅斯作曲家柴可夫斯基負責作曲[1]，組曲喺 1889 年完成，史上首場公演係喺 1890 年由馬林斯基芭蕾舞團响聖彼得堡度演嘅[2]。
.jpg)
2017 年一場《睡公主》表演其中一幕；王子咀沉睡緊嘅公主，解開詛咒。
2011 年演嘅《睡公主》第一幕；公主受到咀咒而進入沉睡。
《睡公主》個故仔建基於同名嘅童話故事：序幕講述公主奧羅拉喺佢出世受洗嘅典禮當中，受眾仙子祝福；喺呢個時候，邪惡又法力強大嘅仙子卡拉波斯嚟到，卡拉波斯向奧羅拉落咗個詛咒，咒佢將會喺 16 歲生日嗰時死亡；在場嘅眾仙子嘗試合力打消個咒，但卡拉波斯法力勁得滯，佢哋打唔消，只係減弱到個咒，令個咒變成「奧羅拉會喺 16 歲嗰時進入一段長久嘅沉睡，及後會有個王子嚟到幫佢解咒」。喺跟住嗰幾幕當中，場表演就係用芭蕾舞技巧表達[3]
- 奧羅拉喺 16 歲生日進入沉睡（第一幕）、
- 王子迪斯尼嚟到解咒（第二幕）、
- 王子同公主結婚，大團圓結局（第三幕）
時至今日，《睡公主》俾人同《天鵝湖》以及《合桃鉗》並列做柴可夫斯基嘅三大芭蕾舞曲巨作，亦係其中一齣最常俾人攞嚟返炒嘅芭蕾舞劇。
嗌法
《睡公主》喺各語言入邊嘅名：
- 粵拼：seoi6 gung1 zyu2
- 英文：The Sleeping Beauty
- 俄文：Спящая красавица，羅馬字轉寫係 Spjaŝaja krasavica
角色
宮廷：
- 奧羅拉公主（Princess Aurora），女主角，受詛咒而陷入長久嘅沉睡[註 1]
- 國王佛羅斯坦廿四世（King Florestan XXIV），奧羅拉個阿爸
- 皇后（The Queen），奧羅拉個阿媽
- 卡塔拉表（Catalabutte），主管典禮嘅大臣
- 皇室人員嗰啲侍臣、男女僕人
... 等等。
眾仙子：
- 紫丁香仙子（The Lilac Fairy），亦係奧羅拉個神仙教母
- 水晶噴泉仙子（Crystal Fountain Fairy）
- 魔法花園仙子（Enchanted Garden Fairy）
- 林地空野（Woodland Glade Fairy）
- 歌鳥仙子（Fairy of Songbirds）
- 金藤仙子（Fairy of Golden Vine）
- 金仙子（The Gold Fairy）
- 銀仙子（The Silver Fairy）
- 藍寶石仙子（The Sapphire Fairy）
- 鑽石仙子（The Diamond Fairy）
奸角：
- 邪惡仙子卡拉波斯（Carabosse the Evil Fairy）同埋佢班手下
有意娶奧羅拉嘅四位王子：
- 雪利王子（Prince Chéri）
- 查曼迪王子（Prince Charmant）
- 霍全利王子（Prince Fortuné）
- 青荳花王子（Prince Fleur de Pois）
迪斯尼王子同佢嘅同伴：
童話故事角色：
- 著長靴嘅貓（Puss-in-Boots）
- 白貓（The White Cat）
- 灰姑娘（Cinderella）
- 白馬王子（Prince Charming）
- 佛羅蓮公主（Princess Florine）
- 藍雀（Bluebird）
- 小紅帽（Little Red Riding Hood）
- 灰狼（The Gray Wolf）
... 等等。
故仔大綱
内文：睡公主
序幕：洗禮
故仔一開場，國王佛羅斯坦廿四世同佢嘅皇后喜迎佢哋嘅第一個細路－小公主奧羅拉。奧羅拉出咗世冇幾耐，皇宮上下正準備要行典禮同佢做受洗。
國王同皇后請咗六位仙子嚟出席典禮，呢六位仙子先後噉出場祝福小公主。頭五位仙子各自對小公主落咗個祝福－佢哋祝公主會生得靚、勇敢、性格可人、有音樂天份又識惡作劇，而正當法力最高嗰位仙子－紫丁香仙子－正要施法祝福公主之際，邪惡仙子卡拉波斯到場。卡拉波斯好嬲，問國王同皇后點解唯獨係佢冇收到邀請嚟出席典禮，跟住佢仲即刻郁手撕爛卡塔拉表（負責組織典禮嘅大臣）個假髮同埋用手扙毆佢。不過毆完之後卡拉波斯條氣仲未順，於是佢就向小公主落咗一個惡咒：佢咒奧羅拉第時會成為一個又靚、又健康、性格又好嘅女仔，但會喺 16 歲生日嗰日手指俾紡織用嘅針拮到並且當場死亡。國王同皇后嚇到冇咗半條命，
喺呢個時候，紫丁香仙子出手：佢法力唔夠卡拉波斯咁勁，打唔消卡拉波斯個惡咒，但佢做到將個咒變弱咗－個咒變咗做
| 「 | 奧羅拉會喺 16 歲生日嗰日手指俾紡織針拮親，但淨係會因此進入 100 年嘅長眠；100 年之後，佢會俾一個靚仔又勇敢嘅王子咀一啖，跟住醒返。 |
」 |
國王同皇后知道個女保得住條命之後，即場鬆返啖氣[3]。
第一幕：咒語
奧羅拉大個咗，終於等到佢 16 歲生日嘅日子。成個皇宮上下都喺度搞舞會同公主慶祝生日。喺呢個時候，國王成個人都囉囉攣噉－因為佢記得卡拉波斯個惡咒。主管典禮嘅大臣走嚟同國王報告，話留意到有平民婦女喺附近做紡織嘢（帶住針），國王一氣之下想重罰嗰班平民婦女，不過皇后出面勸咗吓佢，國王先至冷靜落嚟。
舞會開始，奧羅拉公主出場，一班舞者開始表演跳華爾滋。呢個時候，國王同皇后已經準備好－原來佢哋請咗四位王子嚟出席，想俾奧羅拉揀返個做老公，奧羅拉先後噉同四位王子跳咗陣舞，不過仲未即刻做到決定。舞會進行到咁上下，有一個著住斗篷嘅神秘阿婆到場，佢攞咗紡錘俾奧羅拉睇，奧羅拉對紡織相關嘅物件都覺得好好奇－國王同皇后唔想個詛咒應驗，所以奧羅拉由細到大都唔俾掂紡織嘢。
國王同皇后留意到，即刻想阻止奧羅拉掂個紡錘，但係已經太遲：奧羅拉隻手指已經俾個紡錘拮親；下一刻，奧羅拉就開始頭暈，跟住佢就躂低咗仲冇嗮反應。個神秘阿婆一路大笑一路除咗佢件斗篷－佢就係卡拉波斯。卡拉波斯好得戚，諗住公主已經死咗。不過喺呢個時候，紫丁香仙子出場，佢話奧羅拉冇死，只不過係睏著咗。跟住紫丁香仙子就叫啲僕人幫手將公主捧上去床上面，而佢就向成個王國施咗個咒，令所有人都同奧羅拉一齊睏著，同時一大團有刺嘅植物生咗出嚟，圍住成座皇宮，令王國同外界隔絕。
.jpg)
第二幕：預視
過咗 100 年咁耐嘅時間之後，有一班人嚟到沉睡王國附近：迪斯尼王子喺森林度同一班貴族一齊嚟打獵；佢班朋友同其他在場嘅貴族玩得好開心，但迪斯尼想自己一個人靜吓。
迪斯尼一支公走咗入森林深處，撞到紫丁香仙子－紫丁香仙子暗地裏揀咗迪斯尼做幫奧羅拉解咒嘅人。紫丁香仙子施法，令迪斯尼睇到睏緊嘅奧羅拉嘅影像，迪斯尼即刻對奧羅拉產生好感，然後紫丁香仙子就向迪斯尼解釋嗮成件事嘅來龍去脈；迪斯尼聽到，就要求紫丁香仙子帶佢去見公主。
紫丁香仙子應迪斯尼嘅要求，帶佢去收埋咗喺有刺植物入面嘅皇宮。卡拉波斯呢個時候出場，想阻止佢哋幫公主解咒。迪斯尼同紫丁香仙子結合佢哋嘅力量，打低卡拉波斯。最後迪斯尼同紫丁香仙子嚟到睏緊嘅奧羅拉面前，迪斯尼上前喺紫丁香仙子嘅見證下，咀咗奧羅拉一啖。迪斯尼此舉一嘢打破咗卡拉波斯嘅惡咒，下一刻奧羅拉同成個王國嘅人就開始醒返，奧羅拉都覺得對迪斯尼有好感，迪斯尼仲即場求婚，而奧羅拉就喺父母見證之下開心噉接受迪斯尼嘅求婚。
.jpg)
第三幕：婚禮
王國上下都喺度幫迪斯尼同奧羅拉搞婚禮。喺婚禮當中，有好多賓客－包括眾多童話故事人物同紫丁香仙子－到場，而呢啲賓客先後分別為對新人跳舞。
到咗婚禮高潮嗰陣，迪斯尼同奧羅拉一齊跳一場大雙人舞（Grand pas de deux；亦都有版本會加入由對新人加埋紫丁香仙子一齊跳嘅大三人舞），所有人跟住再跟住佢哋起舞。
最後迪斯尼同奧羅拉成婚，紫丁香仙子施法祝福對新人。
.jpg)
睇埋
註釋
參考
- Balanchine, George. 1975. 101 Stories of the Great Ballets. New York, USA: Anchor Books. ISBN 0-385-03398-2
- Hurley, Thérèse. "Opening the door to a fairy tale world: Tchaikovsky's ballet music" in The Cambridge Companion to Ballet. 2007. Cambridge, UK: Cambridge University Press. ISBN 978-0-521-53986-9.
- Kirstein, Lincoln. 1970. Four Centuries of Ballet: Fifty Masterworks. New York, USA: Dover. ISBN 0-486-24631-0.
- Warrack, John. 1973. Tchaikovsky. New York, USA: Charles Scribner's Sons.
- Warrack, John. 1979. Tchaikovsky Ballet Music. Seattle, USA: University of Washington Press. ISBN 0-295-95697-6.
- Warrack, John. 1985. Tchaikovsky's Ballets. Oxford, UK: Oxford University Press. ISBN 0-19-315314-9.
引述
拎
Wikiwand - on
Seamless Wikipedia browsing. On steroids.